شي جينپيڭ ۆاشينگتونعا جەتىپ، امەريكاداعى مەملەكەتتىك ساپارىن باستادى

جەرگىلىكتى ۋاقىت 9 - ايدىڭ 23 - كۇنى تۇستەن كەيىن مەملەكەت ءتوراعاسى شي جينپيڭ ارناۋلى ۇشاقپەن ۆاشينگتونعا جەتىپ، امەريكا زۇڭتۇڭى ترامپتىڭ ۇسىنىسىمەن امەريكاداعى مەملەكەتتىك ساپارىن باستادى. شي جينپيڭ مەن حانىمى پىڭ لييۋان ۆاشينگتونداعى اندرەۋس اۋە ارمياسى بازاسىنا جەتكەن كەزدە، ترامپ پەن حانىمى ميلانيا ىستىق ىقىلاسپەن قارسى الدى.

□ سۋرەتتى شينحۋا اگەنتتىگىنىڭ ءتىلشىسى لي شياڭ تۇسىرگەن

شينحۋا اگەنتتىگىنىڭ 9 - ايدىڭ 23 - كۇنى ۆاشينگتوننان بەرگەن حابارى (تىلشىلەر ياڭ يجۇن، سۋ لياڭ). جەرگىلىكتى ۋاقىت 9 - ايدىڭ 23 - كۇنى تۇستەن كەيىن مەملەكەت ءتوراعاسى شي جينپيڭ ارناۋلى ۇشاقپەن ۆاشينگتونعا جەتىپ، امەريكا زۇڭتۇڭى ترامپتىڭ ۇسىنىسىمەن امەريكاداعى مەملەكەتتىك ساپارىن باستادى.

شي جينپيڭ مەن حانىمى پىڭ لييۋان ۆاشينگتونداعى اندرەۋس اۋە ارميا بازاسىنا جەتكەندە، ترامپ پەن حانىمى ميلانيا ىستىق ىقىلاسپەن قارسى الدى. ترامپ مىنالاردى ءبىلدىردى: ۆاشينگتوندا ءتوراعا شي جينپيڭ مەن پىڭ لييۋان حانىمدى كۇتىپ العانىما وتە قۋانىشتىمىن، بۇل ءبىر رەتكى كۇللى الەم كوز تىككەن ساپار. ءتوراعا شي جينپيڭ ۇلى باسشى، بۇل ءبىر ۇلى ءسات. مەن ءتوراعا شي جينپيڭمەن ىشكەرىلەي پىكىر اۋىستىرىپ، ەكى ەل قاتىناسىنىڭ دامۋىن ىلگەرىلەتۋدى ءۇمىت ەتەمىن.

امەريكا بالالارى شي جينپيڭ مەن پىڭ لييۋانعا گۇل ۇسىندى. قۇرمەت قاراۋىلى قىزىل كىلەمنىڭ ەكى جاعىندا قاتار تۇزەپ قۇرمەت ءبىلدىردى، اسكەري وركەستر جۇڭگو مەن امەريكا ەكى ەلدىڭ مەملەكەت ءانىن ورىندادى، 21 رەت قۇرمەت ساليۋتى اتىلدى، سوعىس ۇشاقتارى ۇشىپ ءوتىپ قۇرمەت ءبىلدىردى.

شي جينپيڭ جازباشا ءسوز سويلەپ، جۇڭگو حالقى اتىنان امەريكا حالقىنا ىقىلاستى سالەم جولدادى جانە ىزگى تىلەك ءبىلدىردى.

شي جينپيڭ بىلاي دەپ اتاپ كورسەتتى: جۇڭگو دا، امەريكا دا ۇلى مەملەكەت، جۇڭگو حالقى دا، امەريكا حالقى دا ۇلى حالىق. جۇڭگو − امەريكا ەكى ەل حالقى ۇزاق ۋاقىت دوستىق بارىس - كەلىس جاساپ، ەكى جاقتىڭ مۇددەسى تەرەڭ توعىستى، ەكى ەل قارسىلاس ەمەس، قايتا سەرىك بولۋعا ءتيىس، جۇڭحۋا ۇلتىنىڭ ۇلى گۇلدەنۋىن جۇزەگە اسىرۋ مەن امەريكانى تاعى دا ۇلى ەتۋ مۇلدە ءبىر - بىرىنە بوگەت بولمايدى، ءبىرىن - ءبىرى تابىسقا جەتكىزەدى، دۇنيە ءجۇزىن باقىتقا كەنەلتەدى. ترامپ زۇڭتۇڭ بيىل 5 - ايدا جۇڭگودا ساپاردا بولعان كەزدە، ءبىز جۇڭگو مەن امەريكانىڭ سىندارلى ستراتەگيالىق ورنىقتى قاتىناسىن ورناتىپ، بولاشاقتاعى جۇڭگو − امەريكا قاتىناسىنىڭ دامۋىنا ستراتەگيالىق جەتەكشىلىك ەتۋدى قۇپتادىق. جۇڭگو مەن امەريكا ەكى جاق ءبىر باعىتتا ىلگەرىلەپ، سەلبەستىكتى نەگىز ەتكەن، باسەكە ۇيلەسىمدى بولعان، الاۋىزدىقتى مەڭگەرۋگە بولاتىن، بەيبىتشىلىكتى ىسكە اسىرۋعا بولاتىن ورنىقتى قاتىناستىڭ قالىپتاسۋىن ىلگەرىلەتىپ، جاڭا داۋىردەگى جۇڭگو مەن امەريكا سىندى ەكى ءىرى ەلدىڭ دۇرىس بارىس - كەلىس جاساۋ جولىمەن جۇرۋگە ءتيىس.

شي جينپيڭ بىلاي دەپ باسا دارىپتەدى: دۇنيە ءجۇزى دامىپ، ءداۋىر وزگەرۋدە، الايدا جۇڭگو مەن امەريكا ەكى ەلدىڭ بەيبىت قاتار تۇرۋ تاريحي لوگيكاسى وزگەرگەن جوق، ەكى ەل حالقىنىڭ دوستىق بارىس - كەلىس سىندى تاماشا ارمان - تىلەگى وزگەرگەن جوق، حالىقارالىق قوعامنىڭ جۇڭگو − امەريكا ەكى ەلدەن جاپپاي كۇتكەن ءۇمىتى وزگەرگەن جوق. مەن ترامپ زۇڭتۇڭمەن ەكى ەلدىڭ قاتىناسىنا جانە دۇنيە ءجۇزىنىڭ جاعدايىنا ساياتىن كەلەلى ماسەلەلەر جونىندە ىشكەرىلەي پىكىر اۋىستىرىپ، جۇڭگو مەن امەريكانىڭ سىندارلى ستراتەگيالىق ورنىقتى قاتىناسىنىڭ مازمۇنىن ۇزدىكسىز بايىتىپ، جۇڭگو مەن امەريكانىڭ ءار سالاداعى اۋىس - كۇيىس، سەلبەستىك ءورىسىن كەڭەيتۋدى ءۇمىت ەتەمىن. مەن تاعى امەريكانىڭ ءار سالا قايراتكەرلەرىمەن كەڭ كولەمدە كەزدەسىپ، دوستىقتى بەكەمدەۋدى ءۇمىت ەتەمىن. ەكى جاقتىڭ بىرگە قۇلشىنۋىندا وسى رەتكى ساپاردىڭ، ءسوز جوق، سۇبەلى جەتىستىكتەرگە جەتىپ، ەكى ەل حالقىنىڭ قۇت - ىرىسىن ارتتىرىپ، دۇنيە ءجۇزىنىڭ بەيبىتشىلىگىنە ءۇمىت ۇستەيتىندىگىنە سەنەمىن.

ساي چي، ۋاڭ ي قاتارلى سەرىك بولىپ ساپارلاي بارعاندار دا سول ۇشاقپەن بىرگە جەتتى.

الدىن الا بارعان جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ مۇشەسى، مەملەكەتتىك كەڭەستىڭ ورىنباسار زۇڭليى حى ليفىڭ، جۇڭگونىڭ امەريكادا تۇراتىن باس ەلشىسى شيە فىڭ دا اۋەجايعا بارىپ قارسى الدى.

شي جينپيڭ اۆتوكولىكپەن اۋەجايدان ءوزى تۇسەتىن قوناقجايعا بارا جاتقان جولدا حۋاچياۋلاردىڭ، حۋارىنداردىڭ جانە سول جەردە وقىپ جاتقان وقۋشىلاردىڭ ۋاكىلدەرى جولدىڭ ەكى جاعىنا جينالىپ، جۇڭگو مەن امەريكا ەكى ەلدىڭ مەملەكەت تۋىن بۇلعاپ، ءتوراعا شي جينپيڭنىڭ ساپارلاي كەلگەندىگىن قىزۋ قارسى الدى.