مادەنيەت جانە ساياحات مينيسترلىگىنىڭ جۇڭچيۋ مەرەكەسى، مەملەكەت مەرەكەسى دەمالىسىنداعى ساياحات جونىندەگى ەسكەرتۋى 

2026 - جىلعى جۇڭچيۋ مەرەكەسىنىڭ، مەملەكەت مەرەكەسىنىڭ دەمالىسى تاياپ قالدى، مادەنيەت جانە ساياحات مينيسترلىگى بارشا ساياحاتشىلارعا مىنانى ەسكەرتەدى:

ءبىرىنشى، ساپارعا شىعۋ الدىنداعى دايىندىقتى جەتكىلىكتى ىستەۋ. ساپار بارىسىندا باسىپ وتەتىن جەر مەن بارماقشى بولعان جەردىڭ اۋا رايىنا، قاتىناس جاعدايىنا نازار اۋدارىپ، ساياحات كورىنىس رايوندارىنىڭ اشىلاتىن ۋاقىتى مەن بەلەتكە الدىن الا تاپسىرىس بەرۋگە قوياتىن تالابىن ەرتەرەك ۇعىسىپ، ساپار جولى مەن ساپار ۋاقىتىن ۇيلەسىمدى جوسپارلاۋ كەرەك. ءالى اشىلماعان، حاۋىپسىزدىككە جەتكىلىكتى كەپىلدىك ەتۋ مۇمكىندىگى جوق وڭىرلەرگە بارماۋ كەرەك. شەكارادان شىعىپ ساياحاتتاپ بارماقشى بولعان نىسانالى جەردىڭ حاۋىپسىزدىك جاعدايى مەن كوڭىل بولەتىن ىستەردى قاداعالاي باقىلاپ، حاۋىپ – قاتەر دارەجەسى جوعارى رايوندارعا بارماۋ كەرەك.

ەكىنشى، حاۋىپسىزدىك قورعانىسىن كۇشەيتۋ. ءوزى اۆتوموبيل جۇرگىزىپ ساياحاتتايتىندار اۆتوموبيلدىڭ جاعدايىن الدىن الا تەكسەرىپ، جولداعى قاتىناس ەرەجەلەرىنە بويسۇنىپ، شارشاعان كەزدە اۆتوموبيل جۇرگىزۋدەن جانە اراق ىشكەن سوڭ اۆتوموبيل جۇرگىزۋدەن تيىلۋى كەرەك. موتورلى كولىكتى جۇرگىزگەن نەمەسە وعان وتىرعان كەزدە، باستان – اياق حاۋىپسىزدىك بەلبەۋىن تاعۋ كەرەك. سەيىل كەمەسىنە وتىرعاندا بەلگىلەمە بويىنشا قۇتقارۋ كيىمىن كيۋ كەرەك. ورتتەن ساقتانۋعا نازار اۋدارىپ، دالاداعى قيمىلدار بارىسىندا ورتتەن جانە اپاتتان ساقتانۋعا كوڭىل ءبولۋ كەرەك. كورىنىس رايوندارىن، الەۋمەتتىك مادەنيەت ورىندارىن، مادەني ەسكەرتكىشتەردى قورعاۋ ورىندارى قاتارلى ورىنداردى ارالاعان كەزدە، ءورت ءوشىرۋ جانە ءتۇرلى حاۋىپسىزدىكتى باسقارۋ جونىندەگى بەلگىلەمەلەرگە قاتاڭ بويسۇنۋ كەرەك.

ءۇشىنشى، حاۋىپ – قاتەر دارەجەسى جوعارى نىساندارعا قاتىناسقاندا ابايلاۋ. بيىكتىكتەگى نىساندار، تەز قارقىندى نىساندار، سۋ ۇستىندەگى نىساندار، سۋعا سۇڭگۋدى قاجەت ەتەتىن نىساندار، شارلاۋ تۇرىندەگى نىساندار قاتارلى حاۋىپ – قاتەر دارەجەسى جوعارى نىساندارعا قاتىناسۋدان بۇرىن، نىسانعا قاتىستى ەسكەرتۋدى مۇقيات وقىپ، ءوز دەنساۋلىق جاعدايىنا ساي، شاما – شارقىنا قاراي قاتىناسۋ كەرەك. قيمىلعا قاتىناسقان كەزدە، حاۋىپسىز مەڭگەرۋ ولشەمىنە قاتاڭ بويسۇنىپ، قىزمەتكەرلەردىڭ نۇسقاۋىنا قۇلاق اسىپ، ءوزىنىڭ جانە باسقالاردىڭ حاۋىپسىزدىگىنە قاتەر توندىرەتىن ارەكەتتەردى ىستەمەۋ كەرەك.

ءتورتىنشى، وركەنيەتتى ءارى تومەن كومىرتەكتى ساياحاتتاۋ. زاڭ – ەرەجەلەر مەن قوعامدىق ءمورالعا سانالى تۇردە بويسۇنىپ، سانالى تۇردە كەزەك كۇتىپ، ساپار بارىسىندا وركەنيەتتىلىكپەن ءوزارا جول بەرىپ، الەۋمەتتىك ورىنداردىڭ تاماشا ءتارتىبىن ويداعىداي ساقتاۋ كەرەك. مادەني ەسكەرتكىشتەردى، جاراتىلىستىق ورتانى جانە الەۋمەتتىك قۇرىلعىلاردى ايالاۋ، ساياحات رايوندارىندا قوقسىقتى قالاعان جەرگە تاستاماۋ كەرەك. جاسىل ءارى تومەن كومىرتەكتى، ۇنەمشىلدىككە ءمان بەرەتىن ساياحاتتاۋ ءتاسىلىن دارىپتەپ، ”تاماقتى قالدىرماي جەۋ ارەكەتىن“ امالياتتا ايگىلەپ، اس - سۋ ىسىراپشىلدىعىن تيۋ كەرەك.

كەلۋ قاينارى: حالىق تورابى