بولمە تەمپەراتۋراسىنىڭ تومەنگە شەگى 20 سەلتسي گرادۋس بولدى، ولشەمگە تولماسا اقى قايتارۋعا بولادى، شينجياڭنىڭ تۇڭعىش اۆتونوميالى رايون دارەجەلى جىلۋمەن قامداۋ جەرگىلىكتى زاڭ ـ ەرەجەسى 10 – ايدان باستاپ اتقارىلادى

جىلۋمەن قامداۋ مەزگىلى تاياپ قالدى، پارىڭىز ىستىق بولماسا، ۇقىقتى زاڭ بويىنشا قورعاۋعا بولادى! 9 - ايدىڭ 17 – كۇنى، شينجياڭ ۇيعۇر اۆتونوميالى رايوندىق حالىق قۇرىلتايى تۇراقتى كوميتەتى اقپار جاريالاۋ ءماجىلىسىن اشىپ، «شينجياڭ ۇيعۇر اۆتونوميالى رايونىنىڭ قالا - قالاشىقتاردا جىلۋمەن قامداۋ ەرەجەسىن» (تومەندە قىسقارتىلىپ «ەرەجە» دەلىنەدى) ۇگىتتەدى، ءتۇسىندىردى. «ەرەجەدەگى» بەلگىلەمەگە نەگىزدەلگەندە، بولمە تەمپەراتۋراسى 20 سەلتسي گرادۋستان تومەن بولسا، تۇرعىنداردىڭ اقى قايتارۋدى ءوتىنىش ەتۋىنە بولادى، 18 سەلتسي گرادۋستان تومەن بولسا، اقشانى تولىق قايتارۋعا بولادى.

قالا ـ قالاشىقتاردى جىلۋمەن قامداۋ — كەلەلى حالىق تۇرمىسى ينجەنەرياسى، حالىق تىلەگى ينجەنەرياسى، ءار ۇلت بۇقاراسىنىڭ حال – جاعدايىنا، قۇت-ىرىسىنا سايادى. «ەرەجە» اۆتونوميالى رايوندىق 14 - كەزەكتەتى حالىق قۇرىلتايى تۇراقتى كوميتەتىنىڭ 30 - جىيىندا ماقۇلداندى، بيىل 10 - ايدىڭ 1 - كۇنىنەن باستاپ جالپى بەتتىك اتقارىلادى، بۇل — شينجياڭنىڭ تۇڭعىش اۆتونوميالى رايون دارەجەلى جىلۋمەن قامداۋ جەرگىلىكتى زاڭ ـ ەرەجەسى.

«ەرەجەدە» بىلاي دەپ ايقىن بەلگىلەندى: تۇرعىنداردىڭ جاتىن بولمەسىنىڭ، قوسىمشا بولمەسىنىڭ تۇتاس كۇندىك تەمپەراتۋراسى 20 سەلتسي گرادۋستان تومەن بولماۋى كەرەك، بۇل سولتۇستىكتەگى باسىم كوپ ساندى رايونداردىڭ 18 سەلتسي گرادۋستىق جىلۋمەن قامداۋ ولشەمىمەن سالىستىرعاندا 2 سەلتسي گرادۋس جوعارىلادى. سونىمەن بىرگە، تەمپەراتۋرانى ولشەۋ ءتارتىبىن ارناعا ءتۇسىرىپ، جىلۋمەن قامدايتىن ورىنداردان 24 ساعات ىشىندە ۇيگە بارىپ تەمپەراتۋرانى ولشەۋدى تالاپ ەتتى ءارى تەمپەراتۋرانى تۇسكى ساعات 12 دەن 16 عا دەيىنگى ارالىققا ورنالاستىرۋىنا بولمايدى دەپ، ”تەمپەراتۋرانى جىلى كەزدە ولشەيتىن“ ساڭىلاۋدى توستى. تەمپەراتۋرا ولشەۋ ناتيجەسىنىڭ وبيەكتيۆ، ءادىل بولۋىنا كەپىلدىك ەتۋ ءۇشىن، «ەرەجەدە» ءۇشىنشى جاقتىڭ قايتالاي ولشەۋ مەحانيزمى ەنگىزىلىپ، جىلۋمەن قامدايتىن ورىنداردىڭ ”سپورتشى دا ءوزى، تورەشى دە ءوزى بولۋىنان“ ساقتاندى.

«ەرەجەدە» قاراجاتتى قايتارۋ جاعىندا تۇراقتى تارماقتار بەلگىلەندى، جىلۋ تۇتىنۋشىلاردىڭ ءوز سەبەبىنەن بولماعان جاعدايدا، بولمە تەمپەراتۋراسى 20 سەلتسي گرادۋستان تومەن بولسا، كۇنىنە 18 سەلتسي گرادۋستان جوعارى بولۋداعى كۇندىك ولشەمدى جىلۋ اقىسىنىڭ %50 ىن قايتارادى، 18 سەلتسي گرادۋستان تومەن بولسا، كۇندىك ولشەمدى جىلۋ اقىسى %100 قايتارىلادى. ”ولشەم بار بولۋ، تەكسەرۋگە بولاتىن بولۋ، قايتالاي تەكسەرۋگە بولاتىن بولۋ، اقى قايتارۋعا بولاتىن بولۋ“ سىندى جابىق اينالىم ارقىلى بۇقارانىڭ ۇقىعىن قورعاۋ ارناسىنىڭ ىركىلىسسىزدىگىنە شىنايى كەپىلدىك ەتتى.

كەلۋ قاينارى: حالىق تورابى