ەڭ تومەنگى ەڭبەكاقى ولشەمى جوعارىلاتىلسا، مىنا يگىلىك تۇرلەرى دە سايكەستى جوعارىلاتىلادى

جۋىردا، بۇكىل ەلىمىزدەگى كوپتەگەن جەرلەر ەڭ تومەنگى ەڭبەكاقى ولشەمىن جاڭا كەزەكتى رەتتەۋدى ورىستەتتى. 9 - ايدىڭ 1 - كۇنىنەن باستاپ گۋاڭدۇڭ مەن يۇننان ەڭ تومەنگى ەڭبەكاقى ولشەمىنىڭ جاڭا نۇسقاسىن رەسمي اتقاردى. شانشي، شينجياڭ قاتارلى جەرلەر 10 - ايدىڭ 1 - كۇنىنەن باستاپ اتقاراتىنىن ايقىندادى. وسىنىڭ الدىندا، جياڭسۋ، جىجياڭ، شانشي 1 - ايدىڭ 1 - كۇنىنەن باستاپ جاڭا ولشەمدى اتقارعان بولاتىن.

ەڭ تومەنگى ەڭبەكاقى ولشەمى جوعارىلاتىلعاننان كەيىن، بۇل تومەن كىرىستى ەڭبەكشىلەردىڭ كىرىسىمەن تىكەلەي قاتىستى بولىپ قانا قويماي، باسقا ەڭبەكشىلەردىڭ دە ەڭبەككە قاتىستى ۇقىق - مۇددەسىنە ىقپال جاسايدى. ”ۇستەمە جۇمىس اقىسىنىڭ ەڭ تومەنگى ولشەمى، جۇمىسسىزدىقتان قامسىزداندىرۋ قاراجاتى، سىناق مەرزىمىندەگى ەڭبەكاقى، ەكونوميكالىق تولەم قاراجاتى، سىرتقا جىبەرگەن ەڭبەككۇشتىڭ جۇمىس كۇتكەن مەرزىمدەگى ەڭبەكاقىسى، اۋرۋ سەبەبىنەن دەمالۋ ەڭبەكاقىسى قاتارلىلاردى ەسەپتەۋ ولشەمى نەمەسە ەڭ تومەنگى كەپىلدىك شەگى سول جەردىڭ ەڭ تومەنگى ەڭبەكاقىسىمەن تۇرلىشە دەڭگەيدە قاتىستى بولادى“، - دەيدى مەملەكەتتىك ادۆوكاتتار قوعامىنىڭ ەڭبەك جانە قوعامدىق قامتاماسىزداندىرۋ زاڭى كوميتەتىنىڭ ورىنباسار مەڭگەرۋشىسى لۋ جيڭبو.

ۇستەمە جۇمىس اقىسىن مىسالعا الساق، لۋ جيڭبو: ”ۇستەمە جۇمىس اقىسىن ەسەپتەگەندە، ەڭبەكشىنىڭ قالىپتى جۇمىس ۋاقىتىنداعى ەڭبەكاقىسى ەسەپتەۋ ولشەمى ەتىلەدى ءارى «ەڭ تومەنگى ەڭبەكاقى بەلگىلەمەسىندە» ەڭ تومەنگى ەڭبەكاقىنىڭ ىشىندە ۇستەمە جۇمىس اقىسى قامتىلمايتىنى ايقىن بەلگىلەنگەن. قىزمەتكەردىڭ ەڭبەكاقىسى ەڭ تومەنگى ەڭبەكاقىمەن ۇقساس بولعان كەزدە، ۇستەمە جۇمىس اقىسى دا ەڭ تومەنگى ەڭبەكاقىمەن سايكەس جوعارىلايدى“، - دەپ تولىقتاي ءتۇسىندىردى.

مۇنان سىرت، ءتىلشىنىڭ ۇعىسۋىنشا، سىناق مەرزىمىندەگى ەڭبەكاقى جونىنەن ايتقاندا، ەڭبەك توقتامى زاڭىندا سىناق مەرزىمىندەگى ەڭبەكاقى سول جەردىڭ ەڭ تومەنگى ەڭبەكاقى ولشەمىنەن تومەن بولماۋى كەرەك دەپ بەلگىلەنگەن. ەمدەلۋ مەرزىمىندە اۋرۋ سەبەبىنەن دەمالۋ ەڭبەكاقىسى نەمەسە ناۋقاسقا بەرىلەتىن جاردەم قاراجاتى ەڭ تومەنگى ەڭبەكاقى ولشەمىنىڭ %80 ىنەن تومەن بولماۋى كەرەك. ”تومەن نەگىزگى ەڭبەكاقى + جوعارى ۇلەس“ ۇلگىسى قولدانىلاتىن زات ساتۋشى، دەلدال، سونداي - اق جاڭا جۇمىستانۋ فورماسىنداعى ەڭبەكشىلەر جونىنەن ايتقاندا، ەڭ تومەنگى ەڭبەكاقى ولشەمىنىڭ جوعارىلاۋى ولارعا كىرىستىك جاقتان اناعۇرلىم سەنىمدى كەپىلدىك ازىرلەيدى.

كەلۋ قاينارى: حالىق تورابى