شينجياڭ ۇرىمجىدە جابايى قۇستاردى زاڭسىز ساتۋعا سوققى بەرىلدى 

گازەتىمىزدىڭ 9 – ايدىڭ 7 – كۇنى ۇرىمجىدەن بەرگەن حابارى (ءتىلشى شاڭ رۇڭجىڭ) ءتىلشىنىڭ شينجياڭ ءۇرىمجى قالالىق قوعام حاۋىپسىزدىگى مەكەمەسىنەن ۇعىسۋىنشا، 9 – ايدىڭ 3 – كۇنى ءۇرىمجى قالالىق قوعام حاۋىپسىزدىگى مەكەمەسى جوعارى – جاڭا عىلىم – تەحنولوگيانى كوركەيتۋ (جاڭا قالا) رايونى بولىمشە مەكەمەسى باعالى، جويىلۋعا تاياعان جابايى حايۋاناتتارعا زالال جەتكىزۋگە قاتىستى ءبىر دەلونى ءساتتى انىقتاپ، جابايى قۇستاردى زاڭسىز ساتۋمەن ارنايى شۇعىلداناتىن ءوڭىر اتتاپ قىلمىس وتكىزەتىن توپتى ءبىر جاقتى ەتتى.

وسى رەتكى تور جايۋ ارەكەتى بارىسىندا قورعالاتىن ءتۇرلى جابايى قۇستاردان جيىنى 161 قۇس انىقتالدى، مۇنىڭ ىشىندە مەملەكەتتىك 1 - دارەجەلى قورعالاتىن ءبىر قۇس، مەملەكەتتىك 2 - دارەجەلى قورعالاتىن 142 قۇس بار، مۇنان سىرت 18 قۇس ”ءۇش ءتۇرلى قۇنى بار“ قورعالاتىن جابايى حايۋاناتتارعا جاتادى. قازىر انىقتالعان جابايى قۇستاردىڭ بارلىعى ۇيلەسىمدى ورنالاستىرىلىپ، سانجى حۇيزۋ اۆتونوميالى وبلىسىنداعى جابايى حايۋاناتتاردى قۇتقارۋ ورتالىعىنا اۋىستىرىلىپ، كاسىپتىك جاقتان باقىلاپ – باسقارۋعا الىندى.

دەلو انىقتالعانعا دەيىن، اتالعان توپ مەملەكەتتىك 2 - دارەجەلى قورعالاتىن قۇستاردان جالپى 580 دەن استامىن زاڭسىز ساۋدالاعان، دەلوعا قاتىستى جالپى سوما 400 مىڭ يۋاننان اسقان. حالىق ساقشىلارى مىنانى ءبىلدىردى: قورعالاتىن جابايى قۇستاردىڭ كوپ مولشەردە زاڭسىز اۋلانۋى مەن ساتىلۋى تەك جابايى حايۋانات بايلىعىنىڭ شەكتەن تىس ازايۋىنا سەبەپشى بولىپ قويماي، وڭىرلىك ەكولوگيالىق تەپە – تەڭدىكتى دە اۋىر دارەجەدە بۇلدىرەدى، سونداي – اق جابايى حايۋاناتتاردى قورعاۋ جانە باسقارۋ ءتارتىبىن بىلىقتىرادى، سيپاتى وتە ناشار. قازىر ساقشى جاق بۇل ءىس تۋرالى زاڭ بويىنشا دەلو تۇرعىزىپ تەكسەرۋ جۇرگىزۋدە.

ساقشى جاق مىنانى ەسكەرتتى: جابايى قۇستار — ەكولوگيالىق جۇيەنىڭ ماڭىزدى قۇرامداس بولىگى، جابايى حايۋاناتتاردى قورعاۋ ءاربىر ازاماتتىڭ زاڭدىق بورىشى. تۇرعىندار جابايى حايۋاناتتاردى زاڭسىز اۋلاۋ، ساتۋ سياقتى ارەكەتتەردى بايقاسا، قوعام حاۋىپسىزدىگى ورگاندارىنا دەر كەزىندە مالىمدەپ، ەكولوگيالىق ورتانى قورعاۋعا ات سالىسۋىنا بولادى.

كەلۋ قاينارى: حالىق تورابى