شينجياڭ مۇزتاۋ شىڭىنداعى 2 - مۇزدىقتا قار كوشكىنى تۋىلدى، مادەنيەت - ساياحات تاراۋى حاۋىپسىزدىك جونىندە ەسكەرتۋ جاريالادى 

جۋىردا، شينجياڭ قىزىلسۋ قىرعىز اۆتونوميالى وبلىسى اقتاۋ اۋدانىنداعى مۇزتاۋ شىڭىنىڭ 2 - مۇزدىعىندا قار كوشكىنى تۋىلىپ، كوپتەگەن ساياحاتشىلار كوشكىن كورىنىسىن قول تەلەفونمەن ەستەلىككە الدى. مول قار - مۇز شىڭىنان ەڭىستەگى تاۋ بەتكەيىمەن سىرعىپ، اپساتتە كەڭدىگى نەشە ءجۇز مەتر، بيىكتىگى نەشە ءجۇز مەتر كەلەتىن ”قار تۇمانى“ مەن ”قار داۋالىن“ قالىپتاستىرىپ، قار - مۇز قيىرشىقتارىن ىلەستىرە وتىرىپ اڭعاردىڭ ىشىمەن جوڭكىلگەن. ءتىلشىنىڭ ءورت ءوشىرۋ - قۇتقارۋ تاراۋىنان ۇعىسۋىنشا، وسى رەتكى كوشكىن ەلسىز مەكەندە، سونداي - اق قاتىناس نەگىزگى ارناسىنان ءبىرشاما الىس ورىندا تۋىلعان، ادامنىڭ جارالانۋى نەمەسە قازا بولۋى، مال – مۇلىكتىڭ زيانعا ۇشىراۋى سىندى جاعداي تۋىلمادى.

ۇعىسۋعا قاراعاندا، مۇزتاۋ شىڭىنىڭ ۇشار باسى تەڭىز دەڭگەيىنەن 7546 مەتر بيىكتىكتە بولىپ، شىڭنىڭ توبەسى ميلليونداعان جىلداردان بەرى قار - مۇز جانە مۇزدىقپەن قۇرسانىپ جاتادى. 2 - مۇزدىق سىرتقا اشىلماعان جوعارى حاۋىپتى وڭىرگە جاتادى، مۇزدىقتا وزگەرىس بولاتىن حاۋىپ – قاتەر ءبىرشاما جوعارى.

اقتاۋ اۋداندىق مادەنيەت - ساياحات مەكەمەسى 9 - ايدىڭ 5 - كۇنى حابارلاندىرۋ جاريالاپ، بارشا ساياحاتشىلارعا مىنانى ەسكەرتتى: مۇزتاۋ شىڭى ءالى اشىلماعان جوعارى حاۋىپتى باسقارىلاتىن ءوڭىرىنىڭ جەر بەدەرى كۇردەلى، اۋا رايى قۇبىلمالى، كومەسكى قاتەرى زور، سونداي - اق حابارلاسۋ سيگنالى ءالسىز، قۇتقارۋ شارت - جاعدايى وتە ناشار، اشىلماعان جوعارى حاۋىپتى باسقارىلاتىن وڭىرگە ءوز بەتىمەن كىرۋگە قاتاڭ تيىم سالىنادى، ساياحاتتاۋ، جاياۋ ءجۇرۋ، شارلاۋ، كەسىپ ءوتۋ، كەسكىنگە الۋ قاتارلى بارلىق قاتەرلى قيمىلدارعا تيىم سالىنادى.

كەلۋ قاينارى: حالىق تورابى