جۇڭگو - قازاقستان استىق ساۋداسى تەكشەسى رەسمي ىسكە قوسىلدى 

گازەتىمىز حابارى (ءتىلشى جياڭ يۋچيڭ). 9 - ايدىڭ 5 - كۇنى جۇڭگو - قازاقستان استىق كاسىپورىندارىنىڭ كەزدەسىپ اۋىس - كۇيىس جاساۋ جينالىسى چاڭشادا وتكىزىلدى. جينالىستا جۇڭگو - قازاقستان استىق ساۋداسى تەكشەسى رەسمي ىسكە قوسىلدى، بۇل ەكى ەلدىڭ استىق ساۋداسى سەلبەستىگىنىڭ سيفرلاندىرىلعان جاڭا كەزەڭگە قادام تاستاعانىن كورسەتەدى.

بيىل 5 - ايدا جۇڭگو مەملەكەتتىك استىق جانە زات ساقتاۋ مەكەمەسى مەن قازاقستان اۋىل شارۋاشىلىعى مينيسترلىگى استىق سالاسىنداعى سەلبەستىك جونىندەگى سەلبەستىك ەستەلىگىنە قول قويىپ، ۇزاق مەرزىمدىك ءونىمدى سەلبەستىك مەحانيزمىن ورناتتى. وسىدان كەيىن ەكى جاقتىڭ بىرگە ىلگەرىلەتۋىندە جۇڭگو - قازاقستان استىق ساۋداسى تەكشەسىنىڭ قۇرىلىسىندا ناقتى ىلگەرىلەۋشىلىككە قول جەتكىزىلىپ، ينتەرنەت ارقىلى ساۋدالاسۋ سىناق ءتۇيىنى ءساتتى تياناقتاندىرىلىپ، تەكشەنىڭ رەسمي ىسكە قوسىلۋىنا تاماشا شارت - جاعداي جاراتىلدى.

وسى رەت رەسمي ىسكە قوسىلعان جۇڭگو - قازاقستان استىق ساۋداسى تەكشەسىن مەملەكەتتىك استىق جانە زات ساقتاۋ مەكەمەسى استىق ساۋداسىن سايكەستىرۋ ورتالىعى مەن قازاقستان مەملەكەتتىك استىق ساۋداسى توبى بىرگە قۇرعان بولىپ، جۇڭگو مەملەكەتتىك استىق ساۋداسى تەكشەسىن نەگىز ەتىپ بىرگە جاساعان، قوعامداعى الەۋمەتتىك بەدەلى زور، بايلىقتى شوعىرلاندىرۋ دارەجەسى جوعارى، جان - جاقتىلى قىزمەت وتەۋى كەمەلدى ت.ب. كوپتەگەن ارتىقشىلىقتارعا يە، ەكى ەلدىڭ كاسىپورىندارىنا ولشەمدى، جوعارى ءونىمدى، قولايلى ينتەرنەتتىك استىق ساۋداسى جاڭا ارناسىن ازىرلەيدى.

مەملەكەتتىك استىق جانە زات ساقتاۋ مەكەمەسىنىڭ باستىعى ليۋ حۋانشين ءسوز سويلەگەندە بىلاي دەدى: جۇڭگو - قازاقستان استىق ساۋداسى تەكشەسىن قۇرۋ جۇڭگونىڭ ورتا ازيا ەلدەرىمەن بىرگە ”ءبىر بەلدەۋ، ءبىر جولدى“ جوعارى ساپالى كوركەيتۋ ارەكەت جوسپارىن تياناقتاندىرۋداعى ناقتى شاراسى، ەكى ەلدىڭ استىق ساۋداسى سەلبەستىگىندەگى ساۋدالىق ءوزارا سەنىمدىلىكتى، ولشەمدى ءوزارا ۇلاستىرۋدى جانە ەرەجەلەردى ۇشتاستىرۋدى جەبەۋگە پايدالى، ساۋدا وزىندىك قۇنىن اناعۇرلىم تومەندەتۋگە، ساۋدا ونىمدىلىگىن جوعارىلاتۋعا، ساۋدا سالاسىنداعى سەلبەستىكتى ىركىلىسسىزدەندىرۋگە پايدالى، وڭىرلىك استىق كاسىبى تىزبەگىنىڭ سايكەستى دامۋىن ىلگەرىلەتۋدە، وڭىرلىك استىق حاۋىپسىزدىگىنە كەپىلدىك ەتۋدە ماڭىزدى مانگە يە.

كەلۋ قاينارى: حالىق تورابى