شينجياڭدا جاڭا بەلگىلەمە شىعارىلدى! قارتتارعا بەرىلەتىن قامقورلىق قاراجاتىنا قاتىستى 

جۋىردا، ءتىلشىنىڭ اۆتونوميالى رايوندىق حالىق ىستەرى مەڭگەرمەسىنەن ۇعىسۋىنشا، اۆتونوميالى رايوندىق حالىق ىستەرى مەڭگەرمەسى، قوعام حاۋىپسىزدىگى مەڭگەرمەسى، قازىنا مەڭگەرمەسى، ادام كۇشى بايلىعى جانە قوعامدىق قامتاماسىزداندىرۋ مەڭگەرمەسى، دەنساۋلىق ساقتاۋ – سالاماتتىق كوميتەتى سىندى 5 تاراۋ بىرلەسىپ «شينجياڭ ۇيعۇر اۆتونوميالى رايونىندا 80 جاستان اسقان قارتتاردىڭ نەگىزدىك تۇرمىس قاراجاتى ءتۇزىمىنىڭ اتقارىلاتىن ەگجەي – تەگجەيلى بەلگىلەمەسىن» باسىپ تاراتتى، 2026 – جىلى 9 – ايدىڭ 7 – كۇنىنەن باستاپ اتقارىلادى، كۇشكە يە مەرزىمى 5 جىل. جاڭا بەلگىلەمەدە بۇرىن تياناقتاندىرىلىپ ونىمدىلىگىن كورسەتكەن حالىققا قولايلى شارالاردى ءتۇزىم فورماسىندا بەكىتىپ، قارتتارعا بەرىلەتىن قامقورلىق قاراجاتىن تاراتۋدىڭ اناعۇرلىم ۇزاق مەرزىمدىك ءونىمدى اتقارىلۋىن ىلگەرىلەتەدى.

2024 - جىلى باسىپ تاراتىلعان بۇرىنعى ەگجەي – تەگجەيلى بەلگىلەمەدە قارتتار ءوتىنىش بەرگەندە ”ءۇش دارەجە بويىنشا بەكىتۋ، ءۇش تىزىمدىك بويىنشا جاريالاۋ“ ۇلگىسىن اتقارۋ تالاپ ەتىلگەن. 2025 – جىلى 4 – ايدا اۆتونوميالى رايون بويىنشا قارتتارعا بەرىلەتىن قامقورلىق قاراجاتىنان ”ءوتىنىش ەتپەي – اق يگىلىكتەنۋ“ جاپپاي اتقارىلدى، قارتتار ءوتىنىش بەرمەسە دە، قامقورلىق جاسىنا جەتكەن كەزدە قاراجاتتان يگىلىكتەنەتىن بولدى. وسى رەتكى جاڭا بەلگىلەمەدە قارتتارعا بەرىلەتىن قامقورلىق قاراجات ”ءوتىنىش بەرمەي – اق يگىلىكتەنۋ، ىرىقتى تۇردە تاراتۋ“ پرينسيپى بويىنشا اتقارىلاتىن ءتۇزىم فورماسىندا اناعۇرلىم ايقىندالدى. اۆتونوميالى رايوننىڭ 80 جاستان اسقان قارتتارعا بەرىلەتىن نەگىزدىك تۇرمىس قامقورلىق قاراجاتى ينفورماتسياسىن باسقارۋ جانە تاراتۋ جۇيەسى ءار ايدىڭ باس شەنىندە قوعام حاۋىپسىزدىگى، ادام كۇشى بايلىعى جانە قوعامدىق قامتاماسىزداندىرۋ، دەنساۋلىق ساقتاۋ – سالاماتتىق تاراۋلارى ورتاق يگىلىكتەنەتىن ساندى مالىمەتتەردى اۆتوماتتى تۇردە سالىستىرىپ، قامقورلىق قاراجات الاتىن جاسقا جەتكەن قارتتاردىڭ ينفورماتسياسىن 3 اي بۇرىن قىستاققا (الەۋمەتتىك اۋماققا) جەتكىزەدى، نەگىزگى ساتىداعى قىزمەتكەرلەرى تەكسەرىپ تۇراقتاندىرعاننان كەيىن ولشەمگە ۇيلەسەتىن قارتتاردى قاراجات تاراتۋ كولەمىنە ەنگىزەدى.

تاراتۋ ولشەمى جاعىنان ايتقاندا، اۆتونوميالى رايون 2025 – جىلى قارتتارعا بەرىلەتىن قامقورلىق قاراجاتىن تاراتۋ ولشەمىن جاپپاي رەتتەدى، ناقتاپ ايتقاندا: 80 جاستان (80 جاستى قامتيدى) 89 جاسقا دەيىنگى قارتتاردىڭ اربىرىنە ايىنا 75 يۋان؛ 90 جاستان (90 جاستى قامتيدى) 99 جاسقا دەيىنگى قارتتاردىڭ اربىرىنە ايىنا 150 يۋان؛ 100 جاستان (100 جاستى قامتيدى) اسقان قارتتاردىڭ اربىرىنە ايىنا 280 يۋان.

يكەمدى باسقارۋ جاعىنان ايتقاندا، قارتتارعا بەرىلەتىن قامقورلىق قاراجاتى ”ورتاق يگىلىكتەنەتىن ينفورماتسيالارمەن كۋالاندىرۋ، سالاۋاتىن ءوزى دەربەس كۋالاندىرۋ، نەگىزگى ساتىدا تەكسەرىپ سالاۋاتىن كۋالاندىرۋ“ سىندى تولىمدىلىعىن كۋالاندىرۋدىڭ 3 ءتۇرلى ءتاسىلى بويىنشا اتقارىلادى، قوعام حاۋىپسىزدىگى تاراۋلارى، ادام كۇشى بايلىعى جانە قوعامدىق قامتاماسىزداندىرۋ تاراۋلارى، دەنساۋلىق ساقتاۋ - سالاماتتىق تاراۋلارى سىندى تاراۋلاردىڭ ساندى مالىمەتتەن ورتاق يگىلىكتەنۋ جانە ءوزارا اۋىستىرۋ مەحانيزمىن كەمەلدەندىرىپ، سالاۋاتىن ءوزى دەربەس كۋالاندىرۋ ۋاقىتىن ءار جىلدىڭ 2 –، 5 –، 8 –، 11 – ايلارىنىڭ 11 – كۇنىنەن سول ايدىڭ اياعىنا دەيىن ورىنداپ بولۋ كەرەك دەپ رەتتەدى. جاس شەگىنىڭ وزگەرۋىنە بايلانىستى ولشەمدى رەتتەۋ قاجەت بولعاندا جۇيەنىڭ اۆتوماتتى تۇردە رەتتەيتىندىگىن، وزگەرتۋ جونىندە ءوتىنىشىن بەرۋدىڭ قاجەتى جوقتىعىن ايقىندادى؛ قارتتاردىڭ قايتىس بولۋى، نوپوسىن جوتكەپ كەتۋى نەمەسە جازاسىن وتەۋى سىندى قاراجات تاراتۋدى توقتاتاتىن جاعدايلاردى ايقىندادى.

ۇعىسۋعا قاراعاندا، شينجياڭ 2011 – جىلى 80 جاستان اسقان قارتتارعا نەگىزدىك تۇرمىس قامقورلىق قاراجاتىن تاراتۋ ءتۇزىمىن ورناتقاننان بەرى، ءجۇز مىڭداعان قارتتار بۇل ساياساتتان يگىلىكتەنگەن، وسى رەتكى رەتتەۋ قارتتارعا قامقورلىق قاراجاتىن تاراتۋدىڭ اناعۇرلىم ءدال، جۇيەلى اتقارىلۋىن ىلگەرىلەتەدى.

كەلۋ قاينارى: حالىق تورابى