تاكلاماكان شولىنەن تىڭ جاڭالىق

جۋىردا، شينجياڭ گەولوگيا مەكەمەسى سۋ رايى مەن قورشاعان ورتاعا گەولوگيالىق تەكسەرۋ جۇرگىزۋ ورتالىعى وڭتۇستىك شينجياڭداعى شولدەن سۋ ىزدەۋ ينجەنەرياسىن اتقارۋ بارىسىندا جاڭا تابىسقا قول جەتكىزدى، تاكلاماكان ءشولىنىڭ وڭتۇستىك جيەگىندەگى نيە اۋدانى ءاندىر اۋىلى مەن ءشولدىڭ قويناۋىنداعى مازارتاۋدىڭ وڭتۇستىك وڭىرىنەن ەكى جەردەن مول جەر استى سۋى جاڭادان بايقالدى، بۇل ”ءشول استىندا تەك توقتاۋ سۋ، تۇزدى سۋ عانا بار“ دەگەن ءداستۇرلى تانىمدى جوققا شىعاردى.

مۇنان سىرت، ينجەنەريا ۇيىرمەسى تاكلاماكان ءشولىنىڭ جيەگىن جاسىلداندىرۋ ينجەنەرياسى اششى سۋدى پايدالانۋ سىناق بەكەتىن قۇرىپ، شولدەگى اششى سۋدى وسىمدىكتەردى سۋارۋعا حاۋىپسىز پايدالانۋعا بولاتىن سۋعا وزگەرتىپ، ءشولدىڭ جيەگىن جاسىلداندىرۋ ينجەنەرياسىنا تىڭنان سۋ قاينارىن ازىرلەدى.

شينجياڭ گەولوگيا مەكەمەسى سۋ رايى مەن قورشاعان ورتاعا گەولوگيالىق تەكسەرۋ جۇرگىزۋ ورتالىعى وڭتۇستىك شينجياڭداعى شولدەن سۋ ىزدەۋ ينجەنەرياسىنىڭ جاۋاپتىسى كاڭ جيان بىلاي دەدى: بۇل جولى ”جاساندى سەرىكپەن كورۋ، ۇشاقپەن شارلاۋ، جەر بەتىنەن بارلاۋ، بۇرعىلاپ دالەلدەۋ“ تاسىلدەرى بىردەي قولدانىلىپ، عارىشتان جاساندى سەرىك ارقىلى قۇرىلىمىن بايقاپ، ۇشاق جانە اۆياتسيالىق جابدىقتار ارقىلى اۋەدەن شارلاۋ جۇرگىزىپ، جەر بەتىنەن فيزيكالىق بارلاۋ ورىستەتىپ، بۇرعىلاۋ ارقىلى دالەلدەپ، ناتيجەدە مۇنداعى جەر استى سۋىنىڭ اعىندى سۋ ەكەنى، جاڭالانىپ تۇراتىنى، تۇششى سۋ مەن اششى سۋدىڭ ەكەۋى دە بار ەكەنى انىقتالدى.

ينجەنەريا ۇيىرمەسى ءۇش ولشەمدى مودەل مەن سۋ رايى گەولوگيالىق تۇجىرىمدىق مودەلىن قۇرىپ، تۇششى سۋ مەن اششى سۋدىڭ تارالۋ شەكاراسىن ءدال پارىقتاعان ءارى وسى نەگىزدە الىستان شارلاۋ، گەوفيزيكا، سۋ رايىنا گەولوگيالىق تەكسەرۋ جۇرگىزۋ، ەكولوگيالىق ورتا قاتارلى جاقتارداعى ساندىق مالىمەتتەردى توعىستىرعان زەرتتەۋ ءادىسىن قالىپتاستىرىپ، ”سۋ بار ما، مولشەرى قانشا، قالاي پايدالانامىز“ دەگەن جۇيەلى ماسەلەلەرگە ءدال جاۋاپ بەردى.

شينجياڭ گەولوگيا مەكەمەسى سۋ ورتاسى مەن قورشاعان ورتاعا گەولوگيالىق تەكسەرۋ جۇرگىزۋ ورتالىعىنىڭ مەڭگەرۋشىسى جاڭ لەي بىلاي دەدى: بۇل ينجەنەريانىڭ ءمانى، استە، تەك قانشالىقتى مولشەردە سۋ بايىلعى تابىلعانىمەن عانا شەكتەلمەيدى، ءبىزدىڭ ”سۋ بايلىعى ءشولدى ءوڭىردىڭ ۇزاق بولاشاقتىق دامۋىنا ۇزدىكسىز تىرەك بولا الا ما، وڭتۇستىك شينجياڭنىڭ سۋ حاۋىپسىزدىگى اۋقىمىن قايتادان قالىپتاستىرۋعا گەولوگيالىق جوبا ۇسىنا الامىز با؟“ دەگەن سۇراۋعا جاۋاپ بەرگىمىز كەلەدى.

كەلۋ قاينارى: حالىق تورابى