ساقشى جاق ينتەرنەت ارقىلى زورلىق – زومبىلىق ىستەگەن قىلمىستىق توپتى تالقاندادى 

شينحۋا اگەنتتىگىنىڭ 9 - ايدىڭ 22 – كۇنى بەيجيڭنەن بەرگەن حابارى (ءتىلشى لي ميڭحۋي، ۋاڭ فان). ءتىلشىنىڭ 9 - ايدىڭ 22 - كۇنى قوعام حاۋىپسىزدىگى مينيسترلىگى ينتەرنەت حاۋىپسىزدىگى مەكەمەسىنەن ۇعىسۋىنا قاراعاندا، جيلين ولكەسى جيلين قالاسىنداعى قوعام حاۋىپسىزدىگى مەكەمەسى ينتەرنەت حاۋىپسىزدىگى تاراۋلارى ينتەرنەت ارقىلى زورلىق – زومبىلىق ىستەۋ قاتارلى جاڭا تيپتەگى قارا – سۇرقيا كۇشتەرگە ساياتىن قىلمىستارعا نازاردى شوعىرلاندىرىپ، جۋىردا ينتەرنەت ارقىلى زورلىق – زومبىلىق ىستەگەن قىلمىستىق توپتى ءساتتى تالقانداپ، دەلوعا قاتىستى 98 ادامدى قولعا العان.

ساقشى جاق تەكسەرۋ جۇرگىزۋ بارىسىندا مىنانى بايقاعان: ينتەرنەت ارقىلى زورلىق – زومبىلىق ىستەيتىن ءمالىم ءبىر توپ ءداستۇرلى قارا – سۇرقيا كۇشتەردىڭ زاڭعا قايشى قىلمىستىق ىستەرمەن اينالىسۋ فورماسىنا ەلىكتەپ، كوپ ادامعا ”بىلاپىت سوزدەرمەن ەكراندى تولتىرۋ“ ارقىلى توپتىق بالاعاتتاۋ، ”كەلتە حات جاۋدىرۋ“ ارقىلى قاساقانا پالە شىعارۋ، ”جەكەلىك قۇپيالىقتى اشكەرەلەۋ“ ارقىلى قىسىم ءتۇسىرۋ، ”ولگەن ادامعا ارنالاتىن زاتتاردى جولداۋ“ ارقىلى رۋحاني جاقتان قوقانلوقى جاساۋ قاتارلى زاڭسىز ارەكەتتەردى ىستەگەن، قوعامدا ىقپالى ەرەكشە ناشار بولعان. تەكسەرۋگە قاراعاندا، ينتەرنەت ارقىلى زورلىق – زومبىلىق ىستەيتىن بۇل قىلمىستىق توپ ينتەرنەت ويىنداعى الەۋمەتتىك قارىم – قاتىناس بارىسىندا تۋىنداعان داۋ – شارلارعا شاتىلعان ەرەكشە توپتاردى نىسانا ەتىپ، ”تاپسىرىس بەرۋشىنىڭ“ قاجەتىنە قاراي اقشا الىپ، ”ينتەرنەتتە كەك الۋ تاپسىرىسىن“ ارنايى دايىنداپ، ”تاپسىرىس قابىلداۋ – تاپسىرىسقا ادام ورنالاستىرۋ – توپ قۇرۋ – زيانكەستىك جاساۋ – اڭىس قايتارۋ“ سىندى ۇلاسپا جەلىلى قىلمىس وتكىزۋ ۇلگىسىن قالىپتاستىرعان.

قوعام حاۋىپسىزدىگى ورگاندارى دالەل - فاكىتتى انىقتاپ تۇراقتاندىرۋ نەگىزىندە قولعا الۋ ارەكەتىن ۇيىمداستىرىپ اتقارعان. ۇعىسۋعا قاراعاندا، اتالعان توپ ءوزىنىڭ قىلمىستىق ارەكەتىن تۇگەل مويىنداعان، دەلو ىشكەرىلەي تەكسەرىلۋدە.

كەلۋ قاينارى: حالىق تورابى