قارتتاردى كۇتىمدەۋگە ساياتىن زاڭسىز قولدانبالى باعدارلامالارعا قاتىستى الدامكوستىكتەن ساقتانىڭىز! حالىق ىستەرى مينيسترلىگى جاريالاعان ەڭ جاڭا ەسكەرتۋ 

جۇڭگو اقپارات تورابىنىڭ 9 – ايدىڭ 22 – كۇنى بەرگەن حابارى. حالىق ىستەرى مينيسترلىگى تورابىنىڭ حابارىنا قاراعاندا، جۋىردا قارتتاردى كۇتىمدەۋگە ساياتىن ءبىر ءبولىم زاڭسىز قولدانبالى باعدارلامالار ”مينحۇيتۇڭ“ دەگەن سياقتى اتتارمەن الدامكوستىك ىستەگەن. زاڭسىز ەلەمەنتتەر حۇجاتتاردى جالعاننان جاساپ، حالىق ىستەرى مينيسترلىگىنىڭ قىزمەتكەرلەرىنىڭ اتىن جامىلىپ، ”قارتتارعا قوسىمشا قاراجات تاراتامىز“، ”جالپىعا ءتيىمدى ارناۋلى قاراجات بەرىلەدى“ دەپ جار سالىپ، قامسىزداندىرۋ اقىسى، كەپىلدىك اقىسى، ىسكە قوسۋ اقىسى قاتارلىلاردى الدىن الا تاپسىرۋدى تالاپ ەتكەن نەمەسە ”قول قويۋ ارقىلى اقشا تابۋ“، ”جوعارى سومادا پايدا تابۋ“، ”قاتىناسۋعا ادام شاقىرۋ ارقىلى ۇلەس اقى الۋ“ قاتارلى جولدارمەن قارجى قوسۋعا ەلىكتىرگەن، سوڭىندا قاتىناسۋشىلار بۇل اقشانى قايتارىپ الا الماعان. قاتىستى ىستەر جونىندە مىناداي ەسكەرتۋ بەرىلەدى:

ءبىرىنشى، حالىق ىستەرى مينيسترلىگى ”مينحۇيتۇڭ“ قاتارلى نىسانداردى ەشقاشان ۇيىمداستىرماعان نەمەسە ونى ۇيىمداستىرۋدى بەكىتپەگەن، وسى تەكتەس ءارقانداي ءونىم مەن قاتىستى قولدانبالى باعدارلامالاردى دا جاريالاماعان.

ەكىنشى، بارشا جۇرتشىلىقتىڭ قىراعىلىقتى ارتتىرىپ، كەلۋ قاينارى انىق بولماعان اقپاراتتار مەن شىندىققا جاناسپايتىن ۇگىتتەرگە وڭاي سەنە كەتپەۋىن، الدانىپ قالۋدان ساقتانۋىن ءۇمىت ەتەمىز.

ءۇشىنشى، بۇعان الدە قاشان قاتىناسقان نەمەسە زيانعا ۇشىراۋ ىقتيمالدىعى بار قولدانۋشىلاردىڭ جەرگىلىكتى قوعام حاۋىپسىزدىگى ورگاندارىنا دەر كەزىندە دەلونى مالىمدەپ، ونان ارى زيانعا ۇشىراۋىنان ساقتانعانى ءجون.

ءتورتىنشى، كۇماندى جاعدايعا تاپ بولعاندا، دەرەۋ 110 نومىرىنە تەلەفون سوعىپ ساقشىعا مالىمدەڭىز نەمەسە 96110 نومىرىنە تەلەفون سوعىپ كەڭەس سۇراڭىز، اشكەرەلەڭىز.

كەلۋ قاينارى: حالىق تورابى