امەريكا زۇڭتۇڭى تۇڭعىش رەت اۋەجايعا بارىپ جۇڭگونىڭ مەملەكەت ءتوراعاسىن قارسى الدى

بۇكىل دۇنيە ءجۇزىنىڭ نازارى وسى ساتكە شوعىرلاندى −

جەرگىلىكتى ۋاقىت 9 - ايدىڭ 23 - كۇنى ساعات 17دەن 35 مينۋت مولشەرىندە جۇڭگونىڭ مەملەكەت ءتوراعاسى شي جينپيڭ وتىرعان ارناۋلى ۇشاق امەريكانىڭ استاناسى ۆاشينگتوننىڭ قالا ماڭىنداعى اندرەۋس اۋە ارمياسى بازاسىنا جەتكەندە، امەريكا زۇڭتۇڭى ترامپ وسى ارادا كۇتىپ تۇرعان ەدى.

ءتوراعا شي جينپيڭ مەن حانىمى پىڭ لييۋان ۇشاق باسپالداعىنان تۇسكەندە، ترامپ زۇڭتۇڭ مەن حانىمى ميلانيا ىستىق ىقىلاسپەن امانداستى. قۇرمەت قاراۋىلى قىزىل كىلەمنىڭ ەكى جاعىندا ساپ تۇزەپ تۇردى. ەكى ەلدىڭ مەملەكەت باسشىلارى ۇزاق ۋاقىت شىنايى پىكىرلەستى. 2 بالا ءتوراعا شي جينپيڭ مەن حانىمىنا گۇل ۇسىندى.

امەريكا زۇڭتۇڭىنىڭ ساپارلاي كەلگەن جۇڭگو باسشىسىن اۋەجايعا بارىپ قارسى الۋى تاريحتا تۇڭعىش رەت سانالادى. بۇل عانا ەمەس، امەريكانىڭ اق سارايى وسى ورنالاستىرۋدى نەشە كۇن بۇرىن جاريالاعان كەزدە، كوپتەگەن مەديا حابارلارىندا امەريكا زۇڭتۇڭىنىڭ اۋەجايعا بارىپ شەتەل باسشىسىن قارسى الۋى وتە سيرەك كەزدەسەدى دەلىندى.

كۇز كۇندەرىندەگى اندرەۋس اۋە ارمياسى بازاسىندا اسكەري وركەستر جۇڭگو مەن امەريكا ەكى ەلدىڭ مەملەكەت ءانىن اسقاقتاتا ورىندادى. 21 رەت اتىلعان قۇرمەت ساليۋتى زەڭگىر كوكتى جاڭعىرتتى، سوعىس ۇشاقتارى ۇشىپ ءوتىپ قۇرمەت ءبىلدىردى، بۇل امەريكا جاقتىڭ ءتوراعا شي جينپيڭنىڭ ساپارلاي كەلگەندىگى جونىندەگى جوعارى ولشەمدى سي - سياپاتىن ايگىلەدى.

بيىل 5 - ايدا جۇڭگو مەن امەريكا ەكى ەلدىڭ مەملەكەت باسشىلارى بەيجيڭدە ديدارلاسىپ، ”جۇڭگو مەن امەريكانىڭ سىندارلى ستراتەگيالىق ورنىقتى قاتىناسىن“ ورناتۋ جونىندە ورتاق تانىمعا كەلدى. ءتوراعا شي جينپيڭ وسى جولى ترامپ زۇڭتۇڭنىڭ ۇسىنىسى بويىنشا امەريكادا 3 كۇندىك مەملەكەتتىك ساپاردا بولىپ، ەكى ەل مەملەكەت باسشىلارىنىڭ جارتى جىل ىشىندە ءوزارا ساپاردا بولۋىن جۇزەگە اسىردى، سونداي - اق بىلتىر 10 - ايدا كورەيانىڭ پۋسانىندا ديدارلاسقاننان بەرى ەكى ەلدىڭ مەملەكەت باسشىلارىنىڭ ءۇشىنشى رەت جۇزدەسۋى بولىپ، تاريحي، بەلەستىك ءمان الادى.

ترامپ زۇڭتۇڭ مەن حانىمى ءتوراعا شي جينپيڭ مەن حانىمىن اۆتوكولىككە شىعارىپ سالاردا ەكى ەلدىڭ مەملەكەت باسشىلارى تاعى دا كىدىرىپ اڭگىمەلەستى. سول جەردەگى مەديا تىلشىلەرى وسى ىقپالداستىق ساتتەردى جاپا - تارماعاي ەستەلىككە الدى.

ترامپ زۇڭتۇڭ مىنالاردى ءبىلدىردى: ۆاشينگتوندا ءتوراعا شي جينپيڭ مەن پىڭ لييۋان حانىمدى كۇتىپ العانىما وتە قۋانىشتىمىن، بۇل ءبىر رەتكى كۇللى الەم كوز تىككەن ساپار. ءتوراعا شي جينپيڭ ۇلى باسشى، بۇل ءبىر ۇلى ءسات. مەن ءتوراعا شي جينپيڭمەن ىشكەرىلەي پىكىر اۋىستىرىپ، ەكى ەل قاتىناسىنىڭ دامۋىن ىلگەرىلەتۋدى ءۇمىت ەتەمىن.

ءتوراعا شي جينپيڭ مىنالاردى ءبىلدىردى: ەكى جاقتىڭ بىرگە قۇلشىنۋىندا وسى رەتكى ساپاردىڭ، ءسوز جوق، سۇبەلى جەتىستىكتەرگە جەتىپ، ەكى ەل حالقىنىڭ قۇت - ىرىسىن ارتتىرىپ، دۇنيە ءجۇزىنىڭ بەيبىتشىلىگىنە ءۇمىت ۇستەيتىندىگىنە سەنەمىن.

(شينحۋا اگەنتتىگىنىڭ 9 - ايدىڭ 23 - كۇنى ۆاشينگتوننان بەرگەن حابارى)