شي جينپيڭ امەريكا زۇڭتۇڭى ترامپ اق سارايدا وتكىزگەن قارسى الۋ سالتىنا قاتىناستى

شينحۋا اگەنتتىگىنىڭ 9 - ايدىڭ 24 - كۇنى ۆاشينگتوننان بەرگەن حابارى (تىلشىلەر ياڭ شىلۇڭ، حاۋ ۋيۋي). جەرگىلىكتى ۋاقىت 9 - ايدىڭ 24 - كۇنى تۇستەن بۇرىن امەريكا زۇڭتۇڭى ترامپ اق سارايدا سالتاناتتى سالت وتكىزىپ، جۇڭگونىڭ مەملەكەت ءتوراعاسى شي جينپيڭنىڭ امەريكاعا مەملەكەتتىك ساپارمەن كەلگەندىگىن قىزۋ قارسى الدى.

9 - ايداعى ۆاشينگتوندا كۇزدىڭ كوركى كوز سۇرىندىرەدى، جۇڭگو − امەريكا ەكى ەلدىڭ مەملەكەت تۋلارى جەلمەن جەلبىرەيدى. شي جينپيڭ مەن حانىمى پىڭ لييۋان اۆتوكولىكپەن اق سارايعا جەتكەندە، ترامپ زۇڭتۇڭ مەن حانىمى ميلانيا اۆتوكولىكتەن تۇسەتىن جەردە ىستىق ىقىلاسپەن قارسى الدى. ەكى ەلدىڭ مەملەكەت باسشىلارى مەن حانىمدارى توپتىق سۋرەتكە ءتۇستى.

شي جينپيڭ مەن حانىمى ترامپ پەن حانىمىنىڭ سەرىك بولۋىندا اق سارايعا قادام تاستادى. شي جينپيڭ مەن پىڭ لييۋان ىلگەرىندى - كەيىندى سيلى قوناقتار داپتەرىنە قولتاڭبا قالدىردى.

ايبىندى اسكەري وركەستر ءۇنى ىشىندە ەكى ەلدىڭ مەملەكەت باسشىلارى ورتاڭعى زالعا كەلدى. اسكەري وركەستر جۇڭگو مەن امەريكا ەكى ەلدىڭ مەملەكەت ءانىن ورىندادى.

مەملەكەت ءانى اياقتاعاننان كەيىن، شي جينپيڭ مەن ترامپ جەكە - جەكە ارناۋ ءسوز سويلەدى.

شي جينپيڭ ءبىر ميلليارد 400 ميلليوننان استام جۇڭگو حالقى اتىنان امەريكا حالقىنا ىقىلاستى سالەم جولداپ، امەريكانىڭ تاۋەلسىزدىك العاندىعىنىڭ 250 جىلدىعىن قىزۋ قۇتتىقتادى.

شي جينپيڭ بىلاي دەپ اتاپ كورسەتتى: مەن وسى رەت ترامپ زۇڭتۇڭنىڭ ۇسىنىسىمەن امەريكاعا دوستىقتى جالعاستىرۋ، سەلبەستىكتى كەڭەيتۋ، ەكى ەل حالقىنىڭ قۇت - ىرىسىن ارتتىرۋ ءۇشىن ساپارلاي كەلدىم. بۇگىنگى دۇنيە ءجۇزى وزگەرىسى، ءداۋىر وزگەرىسى، تاريحي وزگەرىس الدىندا، جۇڭگو مەن امەريكا سىندى ەكى ءىرى ەل ادامزاتتىڭ دامۋىن، العا باسۋىن جەبەۋ سىندى تاريحي اۋىر مىندەت ارقالاپ وتىر. ترامپ زۇڭتۇڭ بيىل جۇڭگودا ساپاردا بولعان كەزدە، ءبىز جۇڭگو مەن امەريكانىڭ سىندارلى ستراتەگيالىق ورنىقتى قاتىناسىن ورناتۋدى ءبىر اۋىزدان قۇپتادىق، بۇل ەكى ەل حالقى مەن حالىقارالىق قوعامنىڭ جاپپاي قارسى الۋىنا يە بولدى. مەن ترامپ زۇڭتۇڭمەن بىرگە قۇلشىنىپ، جۇڭگو − امەريكا قاتىناسى سىندى وسى الىپ كەمەنىڭ ورنىقتى قاداممەن الىسقا جەتۋىنە جەتەكشىلىك ەتۋدى قالايمىن.

شي جينپيڭ بىلاي دەپ باسا دارىپتەدى: جۇڭگو مەن امەريكا بايلانىستى كۇشەيتۋى كەرەك. ەكى ەلدىڭ مەملەكەت جاعدايى ۇقسامايدى، بۇكپەسىز، ىشكەرىلەي، باياندى تىلدەسۋ ارقىلى تۇسىنىكتى ارتتىرىپ، پارىقتاردى ساقتاپ ورتاقتىققا ۇمتىلىپ، ءوزارا سەنىمدىلىكتى توپتاۋعا بولادى. جۇڭگو مەن امەريكا شىن نيەتپەن سەلبەستىك جاساۋى كەرەك. ەكى ەلدىڭ مۇددەسى تەرەڭ توعىسقان، سەلبەستىك كەڭىستىگى توتەنشە كەڭ. جۇڭگو مەن امەريكانىڭ سەلبەستىگى دۇنيە جۇزىندەگى بارلىق ماسەلەنى شەشە الماعانىمەن، ەكى ەل سەلبەستىگى بولماسا، دۇنيە جۇزىندەگى كوپ ماسەلەلەردى شەشۋ قيىنعا سوعادى. جۇڭگو مەن امەريكا ەكەۋى دە جاساندى زەردە جاعىنداعى ءىرى ەلدەر، جاساندى زەردەنى ويداعىداي دامىتۋ، ويداعىداي مەڭگەرۋ قابىلەتى مەن جاۋاپكەرشىلىگى بار، جاساندى زەردە دامۋىنىڭ باستان - اياق ادامنىڭ مەڭگەرۋىندە بولۋىنا، حالىقتى باقىتقا كەنەلتۋىنە شىنايى كەپىلدىك ەتۋى كەرەك. جۇڭگو مەن امەريكا بەيبىت قاتار تۇرۋى كەرەك. جۇڭگو مەن امەريكا سىندى ەكى ءىرى ەل بىرىكسە ەكى جاققا دا ءتيىمدى، تىرەسسە ەكەۋى دە زيانعا ۇشىرايدى. ەكى جاق، ءسوز جوق، قاقتىعىسپاۋ، قارسىلاسپاۋ تومەنگى شەگىن ساقتاۋى كەرەك. ”زۋسيديدەس شىرعاسىنان“ اتتاپ وتۋگە بولادى.

شي جينپيڭ بىلاي دەپ اتاپ كورسەتتى: جۇڭگو مەن امەريكا كەزىندە فاشيزم شاپقىنشىلىعىنا تىزە قوسا قارسى تۇرعان. وسى بولىك تاريحتى جۇڭگو حالقى ۇمىتپايدى، امەريكا حالقى دا ۇمىتقانى جوق. جۇڭگو − امەريكا قاتىناسىنىڭ ءۇمىتى حالىقتا، بولاشاعى جاستاردا. الداعى 5 جىلدا جۇڭگو جاق 100 مىڭ امەريكا جاستارى مەن ورەندەرىن جۇڭگوعا كەلىپ اۋىس - كۇيىس جاساۋعا، ۇيرەنۋگە شاقىرادى. مىسىق ايۋ جۇڭگو − امەريكا ەكى ەل حالقى دوستىعىنىڭ ەلشىسى. مىسىق ايۋ ”پيڭپيڭ“، ”فۋشۋاڭ“ الدا اتلانتا حايۋاناتتار باقشاسىنا قونىس تەۋىپ، امەريكا حالقىمەن جۇزدەسەدى.

شي جينپيڭ بىلاي دەپ باسا دارىپتەدى: جۇڭحۋا ۇلتىنىڭ ۇلى گۇلدەنۋىن جۇزەگە اسىرۋ مەن امەريكانى تاعى دا ۇلى ەتۋ ءبىر - بىرىنە بوگەت بولمايدى، ەكى جاق حالىقتىق سۇيىسپەنشىلىكتەن جازباي، تاريحي ىرىقتىلىقتى ايگىلەپ، جۇڭگو − امەريكا ەكى ەل حالقىنىڭ دوستىق ىستەرىن ۇزدىكسىز ىلگەرىلەتىپ، اناعۇرلىم كوركەم دۇنيەنى قول ۇستاسا بىرگە قۇرۋى كەرەك.

ترامپ شي جينپيڭنىڭ امەريكادا تاريحي سيپاتتى مەملەكەتتىك ساپاردا بولعاندىعىن قىزۋ قارسى الدى. ول مىنالاردى ءبىلدىردى: مەن ءتوراعا شي جينپيڭمەن ءوزارا قۇرمەت ەتۋ نەگىزىندە ۇلى دوستىق ورناتتىم، بۇل ەكى ەل حالقىنىڭ ءتۇبىرلى مۇددەسىنە ۇيلەسەدى. امەريكا − جۇڭگو ەكى ەل بىرنەشە عاسىردىڭ الدىندا تەڭىز - مۇحيتتان ءوتىپ ساۋدا جاساپ، ءوزارا ۇيرەنگەن. ءتوراعا شي جينپيڭنىڭ وسى رەتكى ساپارى امەريكانىڭ تاۋەلسىزدىك العاندىعىنىڭ 250 جىلدىعى ساتىنە تۋرا كەلىپ وتىر، ەكى جاق ۇزدىكسىز سەلبەسىپ، دۇنيە جۇزىنە ۇلەس قوسادى. مەن ءتوراعا شي جينپيڭمەن ساۋدا، حاۋىپسىزدىك، جاساندى زەردە، عىلىم - تەحنولوگيا سياقتى كەڭەستىك تاقىرىپتار جونىندە ىشكەرىلەي تالقى جۇرگىزەمىن، دۇنيە ءجۇزىنىڭ الداعى نەشە ون جىلداعى بەيبىتشىلىگى مەن گۇلدەنۋىنە بەرىك نەگىز قالايمىز. امەريكا مەن جۇڭگو ەكى ەل كەزىندە تىزە قوسا شايقاس جاساپ، دۇنيە جۇزىلىك ەكىنشى سوعىستىڭ جەڭىسىنە بىرگە قول جەتكىزدى، ۇشار جولبارىس اترەتى سياقتىلاردىڭ حيكايالارى كۇنى بۇگىنگە دەيىن ەكى ەل حالقىنىڭ ەسىندە. مەن ءتوراعا شي جينپيڭمەن ۇزدىكسىز قول ۇستاسا سەلبەسىپ، امەريكا − جۇڭگو ەكى ەلدىڭ اناعۇرلىم كوركەم بولاشاعىن اشۋدى ءۇمىت ەتەمىن.

ارناۋ ءسوز اياقتاعاننان كەيىن، شي جينپيڭ مەن پىڭ لييۋان ترامپ پەن حانىمىنىڭ سەرىك بولۋىندا تەڭىز ارمياسى قۇرلىقتىق سوعىس اترەتىنىڭ ونەر كورسەتۋىن تاماشالادى، ەكى ەلدىڭ مەملەكەت باسشىلارى مەن حانىمدارى جەكە - جەكە قارسى جاقتىڭ ساپارلاستارىمەن قول الىسىپ، قۇرمەت ءبىلدىردى. وسىدان كەيىن ەكى ەلدىڭ مەملەكەت باسشىلارى مەن حانىمدارى اق سارايدىڭ راۋشانگۇل باقشاسىنا بىرگە بارىپ قۇرمەت قاراۋىلىن كوزدەن كەشىردى. اسكەري وركەستر باستالۋ دابىلىن قاقتى، امەريكانىڭ ءارقايسى ارميا تۇرلەرىنىڭ قۇرمەت قاراۋىلى ءداستۇرلى قاتارعا تۇرۋ جانە اسپاپتىق مۋزيكا نومىرلەرىن ورىندادى، سوعىس ۇشاقتارى اق سارايدىڭ توبەسىنەن ۇشىپ ءوتىپ، جۇڭگو − امەريكا ەكى ەلدىڭ مەملەكەت باسشىلارى مەن حانىمدارىنا قۇرمەت ءبىلدىردى.

قارسى الۋ سالتى اياقتاعاننان كەيىن، ەكى ەلدىڭ مەملەكەت باسشىلارى مەن حانىمدارى اق سارايداعى ەلليپس فورمالى كەڭسەگە بارىپ، ىقىلاستى دوستىق بەينەدە پىكىرلەستى.

ساي چي، ۋاڭ ي، حى ليفىڭ قاتارلىلار قاتىناستى.