شي جينپيڭ مەن پىڭ لييۋان ترامپ زۇڭتۇڭ مەن حانىمى وتكىزگەن قارسى الۋ مەملەكەتتىك قوناعاسىنا قاتىناستى

جەرگىلىكتى ۋاقىت 9 - ايدىڭ 24 - كۇنى كەشتە امەريكا زۇڭتۇڭى ترامپ پەن حانىمى ميلانيا جۇڭگونىڭ مەملەكەت ءتوراعاسى شي جينپيڭ مەن حانىمى پىڭ لييۋانعا ارناپ اق سارايدا قارسى الۋ مەملەكەتتىك قوناعاسىن وتكىزدى. سۋرەتتە: شي جينپيڭ ارناۋ ءسوز سويلەۋدە.

□ سۋرەتتى شينحۋا اگەنتتىگىنىڭ ءتىلشىسى شيە حۋانچى تۇسىرگەن

شينحۋا اگەنتتىگىنىڭ 9 - ايدىڭ 24 - كۇنى ۆاشينگتوننان بەرگەن حابارى (تىلشىلەر شۇي شيڭتاڭ، ليۋ سى). جەرگىلىكتى ۋاقىت 9 - ايدىڭ 24 - كۇنى كەشتە امەريكا زۇڭتۇڭى ترامپ پەن حانىمى ميلانيا جۇڭگونىڭ مەملەكەت ءتوراعاسى شي جينپيڭ مەن حانىمى پىڭ لييۋانعا ارناپ اق سارايدا قارسى الۋ مەملەكەتتىك قوناعاسىن وتكىزدى.

شي جينپيڭ مەن پىڭ لييۋان اق سارايعا جەتكەندە ترامپ پەن ميلانيا ىستىق ىقىلاسپەن قارسى الدى. ەكى ەلدىڭ مەملەكەت باسشىلارى مەن ولاردىڭ حانىمدارى توپتىق سۋرەتكە ءتۇستى ءارى قوناعاسىعا قاتىناسقان قوناقتارمەن كەزدەستى.

قوناعاسى باستالعاننان كەيىن شي جينپيڭ مەن ترامپ جەكە - جەكە ارناۋ ءسوز سويلەدى.

شي جينپيڭ جۇڭگو مەن امەريكا قاتىناسىنىڭ دامۋىنا كوڭىل ءبولىپ، قولداۋ كورسەتكەن امەريكاداعى بارلىق ءار سالا قايراتكەرلەرىنە ىقىلاستى سالەم جولدادى جانە جۇڭچيۋ مەرەكەسى بايلانىسىمەن ىزگى تىلەك تىلەدى.

شي جينپيڭ بىلاي دەپ اتاپ كورسەتتى: بيىل 5 - ايدا ترامپ زۇڭتۇڭ جۇڭگودا ءساتتى ساپاردا بولدى. قىسقا عانا جارتى جىلعا جەتپەيتىن ۋاقىتتا جۇڭگو مەن امەريكا ەكى ەلدىڭ مەملەكەت باسشىلارى ءوزارا ساپاردا بولىپ، ەكى ەل بارىس - كەلىسى تاريحىن جاراتتى. بۇل رەتكى ساپاردا تاعى دا كوپتەگەن جاڭا ورتاق تانىمعا كەلىپ، جۇڭگو مەن امەريكانىڭ سىندارلى ستراتەگيالىق ورنىقتى قاتىناسىنىڭ مازمۇنىن بايىتتى، جۇڭگو − امەريكا قاتىناسىنا جاڭا ستراتەگيالىق جەتەكشىلىك ازىرلەدى.

شي جينپيڭ بىلاي دەپ باسا دارىپتەدى: 200 جىلدان استام ۋاقىتتىڭ الدىندا امەريكا تاۋەلسىز بولعاننان باستاپ نازارىن جۇڭگوعا اۋدارعان بولاتىن. جۇڭگو مەن امەريكا ەكى جاق باردى - جوقتى ءوزارا اۋىستىرىپ، ارتىقشىلىقتارىمەن ءبىرىن - ءبىرى تولىقتاپ، ساۋدا بارىس - كەلىسىن باستادى. 80 نەشە جىلدىڭ الدىندا جۇڭگو مەن امەريكا ەكى ەل حالقى تىزە قوسا شايقاس جاساپ، جاپون ميليتاريزمى شاپقىنشىلارىنا قارسى تۇرعان، وسى قان مەن وت شىڭداعان دوستىق، ءسوز جوق، ۇرپاقتان - ۇرپاققا جالعاسادى. 50 نەشە جىلدىڭ الدىندا ۇستەل دوپ ديپلوماتياسى ۇزاقتان شاڭ قاۋىپ جاتقان بارىس - كەلىس قاقپاسىن اشتى، جۇڭگو مەن امەريكانىڭ اعا بۋىن ساياساتشىلارى ”كىشكەنە دوپ ۇلكەن دوپتى اينالدىرعان“ ساياسي پاراساتپەن جۇڭگو − امەريكا قاتىناسىن قالىپقا ءتۇسىرۋ ۇلى بارىسىن باستادى. 20 نەشە جىلدىڭ الدىندا سايكاۋس ەسىمدى امەريكالىقتىڭ جۇڭگونىڭ قۇمدى تىزگىندەۋشىسى يىن يۇيجىننىڭ اعاش ەگۋىنە قارجىلاي كومەكتەسكەن اڭگىمەسى كوپتەگەن جۇڭگو بۇقاراسىن اسەرلەندىردى ءارى جۇڭگو مەن امەريكا ەكى ەل حالقىنىڭ دوستىق بارىس - كەلىسىنىڭ ۇلگىسى بولدى. جۇڭگو مەن امەريكانىڭ گۋمانيتارلىق اۋىس - كۇيىسى ەكى ەل حالقىنىڭ جۇرەكتەرىنىڭ توعىسۋىن جەبەۋگە ءتيىمدى بولىپ، جۇڭگو مەن امەريكانىڭ دوستىق سەلبەستىگى ءۇشىن حالىق رايى نەگىزىن بەكەمدەدى.

شي جينپيڭ بىلاي دەپ اتاپ كورسەتتى: بۇگىنگى تاڭدا جۇڭگو − امەريكا قاتىناسى تاعى دا جاڭا تاريحي باستامادا تۇر. ترامپ زۇڭتۇڭ امەريكانى تاعى دا ۇلى ەتۋدى العا قويدى، جۇڭگو جۇڭحۋا ۇلتىنىڭ ۇلى گۇلدەنۋىن جۇزەگە اسىرۋعا كۇش سالۋدا. بۇل ەكى نىسانا دا وتە ايبىندى، بۇكىلدەي ءبىرىن - ءبىرى تابىسقا جەتكىزەدى. ەكى جاق ءىرى ەلدىك جاۋاپكەرشىلىكتى ايگىلەپ، حالىق تىلەگى مەن ءداۋىر اۋقىمىنا سايكەسىپ، ءىرى ەلدەردىڭ دۇرىس بارىس - كەلىس جاساۋ جاڭا جولى جونىندە ىزدەنىس جاساۋى كەرەك. تاريحتىڭ سالقار كوشى تىنباي جالعاسۋدا، جۇڭگو مەن امەريكا ەكى ەل حالقىنىڭ دوستىق ىستەرىنىڭ بولاشاعى كەڭ. ەكى جاق قول ۇستاسا العا باسىپ، جۇڭگو − امەريكا دوستىعىنىڭ كوركەم گۇلدەرىن بىرگە سۋارىپ، جۇڭگو − امەريكا دوستىعىنىڭ شىت جاڭا تاراۋىن بىرگە جازۋى كەرەك.

ترامپ مىنالاردى ءبىلدىردى: مەن بيىل 5 - ايدا جۇڭگوعا ساپارلاي بارعانىمدا، جۇڭگو حالقىنىڭ ىقىلاستى دوستىعى ماعان تەرەڭ ءارى تاماشا اسەر قالدىردى. بۇگىن كەشتە ەكى ەلدىڭ ءار سالا قايراتكەرلەرى ءبىر ارادا باس قوسىپ، امەريكا مەن جۇڭگو اراسىنداعى 10 مىڭ شاقىرىم اتتاعان، ءجۇز جىلدان استام ۋاقىتقا جالعاسقان دوستىقتى بىرگە قۇتتىقتادى. امەريكا مەن جۇڭگو ەكى ەلدىڭ ۇزاق مادەنيەتى بار، ەكى ەل حالقى ۇزاق ۋاقىت دوستىق بارىس - كەلىس جاساپ كەلەدى. ءبىر - ءبىرىنىڭ ءتۇزىمى تۇرلىشە بولعانىمەن، امەريكا − جۇڭگو دوستىعى ۋاقىت وتكەن سايىن بەكەمدەلە ءتۇستى. مەن ءتوراعا شي جينپيڭمەن بىرگە ءوزارا قۇرمەت ەتۋگە تاباندى بولىپ، ەكى ەلدىڭ دوستىعىن ۇزدىكسىز جەتىلدىرىپ، ۇرپاقتارعا باياندى گۇلدەنىپ - كوركەيۋ مەن حاۋىپسىزدىك الا كەلۋدى قالايمىن.

قوناعاسى قىزۋ دوستىق مەرەيگە شومدى. قوناعاسىدا امەريكا كوركەمونەرشىلەرى تارتىمدى ادەبيەت - كوركەمونەر نومىرلەرىن ورىندادى.

ساي چي، ۋاڭ ي، حى ليفىڭ قاتارلىلار قوناعاسىعا قاتىناستى.