بازاردى باقىلاۋ – باسقارۋ باس مەڭگەرمەسى ازىق – تۇلىك حاۋىپسىزدىگىن تەز ارادا تەكسەرۋدىڭ 13 ءتۇرلى ءادىسىن جاريالادى، 18 ءتۇرلى حاۋىپ – قاتەرلى زاتتى تەكسەرۋگە بولادى 

جۇڭگو اقپارات تورابىنىڭ 9 – ايدىڭ 28 – كۇنى بەرگەن حابارى. بازاردى باقىلاۋ – باسقارۋ باس مەڭگەرمەسىنىڭ ۋيشين تەكشەسىنەن الىنعان حابارعا قاراعاندا، جۋىردا بازاردى باقىلاۋ – باسقارۋ باس مەڭگەرمەسى ازىق – تۇلىك حاۋىپسىزدىگىن تەز ارادا تەكسەرۋدىڭ 13 ءتۇرلى ءادىسىن جاريالاعان.

وسى رەت جاريالانعان 13 ءتۇرلى تەز تەكسەرۋ ءادىسى ارقىلى كوكونىس پەن جەمىستەگى اۋىل شارۋاشىلىعى سالاسىندا قولداناتىن دارىلەردىڭ تريازوفوس، حلورتالونيل، تيامەتوكسام قاتارلى قالدىقتارى، مالدىڭ، قۇستىڭ ەتىندەگى جانە ءسۇت ونىمدەرىندەگى دەكسامەتازون، انالگين، فلۋنيتسين قاتارلى گورموندىق، قابىنۋعا قارسى دارىلەردىڭ قالدىعى، بال مەن سۋ ونىمدەرىندەگى حلورامفەنيكول، سترەپتوميتسين قاتارلى انتيبيوتيك قالدىقتارى قاتارلى حاۋىپ – قاتەرى بار زاتتاردان جيىنى 18 ءتۇرلى زاتتى تەز ارادا تۇرگە ايىرىپ تەكسەرۋگە بولادى. تاجىريبەحانادا تەكسەرۋمەن سالىستىرعاندا، تەز ارادا تەكسەرۋ ءادىسىن قولدانۋ وڭاي، كوپ ۋاقىت كەتپەيدى، اۋىل شارۋاشىلىق ونىمدەرىن تولايىم ساتۋ بازارىنا، ەرەنبازارعا، اس - سۋ ورىندارىنا بارىپ، تەز ارادا تەكسەرۋ جۇرگىزۋگە بولادى، وسى ارقىلى ازىق – تۇلىك حاۋىپسىزدىگى جاعىنداعى حاۋىپ – قاتەردى ەرتە بايقاپ، ەرتە دابىل قاعۋدى جۇزەگە اسىرادى.

كەلەسى قادامدا بازاردى باقىلاۋ – باسقارۋ تاراۋلارى قاتىستى تەز ارادا تەكسەرۋ تەحنيكاسىن جاپپاي قولدانۋدى ىلگەرىلەتىپ، ازىق – تۇلىك حاۋىپسىزدىگى جاعىنداعى كومەسكى حاۋىپ - قاتەرلەردى تەكسەرۋ ونىمدىلىگىن ۇزدىكسىز ارتتىرىپ، بۇقارانىڭ ازىق – تۇلىك جاعىنداعى حاۋىپسىزدىگىن كۇش سالا قورعايدى.

كەلۋ قاينارى: حالىق تورابى