ديڭ شۋەشياڭ جۇڭگو ورتا جانە دامۋ حالىقارالىق سەلبەستىك كوميتەتىنىڭ 2026 - جىلعى جىلدىق ماجىلىسىنە قاتىناستى ءارى ءسوز سويلەدى

شينحۋا اگەنتتىگى، 9 - ايدىڭ 29 - كۇنى، بەيجيڭ. 9 - ايدىڭ 29 - كۇنى تۇستەن كەيىن جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ تۇراقتى مۇشەسى، مەملەكەتتىك كەڭەس زۇڭليىنىڭ ورىنباسارى، جۇڭگو ورتا جانە دامۋ حالىقارالىق سەلبەستىك كوميتەتىنىڭ ءتوراعاسى ديڭ شۋەشياڭ بەيجيڭدە مەملەكەتتىك سەلبەستىك قوعامىنىڭ 2026 - جىلعى جىلدىق ماجىلىسىنە قاتىناستى ءارى ءسوز سويلەدى.

ديڭ شۋەشياڭ مىنالاردى ءبىلدىردى: شي جينپيڭ ەكولوگيالىق وركەنيەت يدەياسىنىڭ جەتەكشىلىگىندە، جۇڭگونىڭ ەكولوگيالىق وركەنيەت قۇرىلىسىندا وراسان زور تابىستارعا قول جەتىپ، حالىقارالىق قوعامنىڭ جاپپاي مويىنداۋىنا جانە وسكەلەڭ القاۋىنا يە بولدى. ”15 - بەسجىلدىق“ كەزىندە جۇڭگو ەكونوميكالىق، قوعامدىق دامۋدىڭ جاپپاي جاسىل تيپكە بۇرىلىس جاساۋىن جەدەلدەتەدى، جاسىل، تومەن كومىرتەكتى دامۋ نىساناسى اناعۇرلىم بەلسەندى، مىندەت - شارالارى اناعۇرلىم پارمەندى، ءتۇزىم جۇيەسى اناعۇرلىم قاتاڭ بولادى، كورىكتى جۇڭگو قۇرىلىسى، ءسوز جوق، تىڭ ساتىعا كوتەرىلەدى.

ديڭ شۋەشياڭ مىنالاردى باسا دارىپتەدى: باياندى دامۋدى جۇزەگە اسىرۋ ءار جاقتىڭ قول ۇستاسا، جاسىل العا باسۋىن قاجەت ەتەدى. ول مىناداي 3 ءتۇرلى ۇسىنىستى ورتاعا قويدى: ءبىرىنشى، ناقتى ارەكەت ارقىلى جاسىل، تومەن كومىرتەكتى دامۋدى ىلگەرىلەتىپ، «بىرلەسكەن مەملەكەتتەر ۇيىمىنىڭ كليمات وزگەرىسى جونىندەگى جۇلگەلىك شارتىن» جانە «پاريج كەلىسىمىن» باتىل قورعاپ، ”كۇنميڭ - مونترەال جۇلگەسىن“ اتقارۋ باستاماسىن جاپپاي تياناقتاندىرىپ، دۇنيە ءجۇزىنىڭ كليماتىن وڭاۋعا، ورگانيزمدەردىڭ الۋان تۇرلىلىگىن قورعاۋعا ءتىپتى دە كوپ تۇراقتىلىق جانە وڭ ەنەرگيا قوسۋ كەرەك. ەكىنشى، عىلىم - تەحنيكادا جاڭالىق اشۋ ارقىلى جاسىل وندىرگىش كۇشتەردى جەتىلدىرىپ، جاسىل تەحنيكادا جاڭالىق اشۋ جۇيەسىن جەدەل كەمەلدەندىرىپ، جاسىل، تومەن كومىرتەكتى عىلىم - تەحنيكادا قامال الۋدى بىرلەسىپ ورىستەتىپ، تەحنيكانى كادەگە جاراتۋدى ىلگەرىلەتىپ، كاسىپ سالاسىنىڭ سيفرلانۋىنىڭ، زەردەلىلەنۋىنىڭ جاسىلداندىرۋمەن ىشكەرىلەي توعىسۋىن جەبەۋ كەرەك. ءۇشىنشى، اشىق سەلبەستىك ارقىلى دۇنيە جۇزىلىك قورشاعان ورتا مەن كليماتتى جونگە سالۋدى كەمەلدەندىرىپ، جاسىل ”ءبىر بەلدەۋ، ءبىر جولدى“ بىرگە قۇرۋدى جوعارى ساپامەن ىلگەرىلەتىپ، كليمات وزگەرىسىنە بايلانىستى وڭتۇستىك ەلدەردىڭ سەلبەستىگىن تەرەڭدەتىپ، ساپالى، جاسىل تەحنيكا مەن ونىمدەردىڭ ەركىن اينالىمىن جەبەپ، جاسىل دامۋ جەتىستىكتەرىنەن ءار ەل حالقىن اناعۇرلىم ويداعىداي يگىلىكتەندىرۋ كەرەك.

ديڭ شۋەشياڭ مىنالاردى ءبىلدىردى: وتكەن 5 جىلدا 7 - كەزەكتى جۇڭگو ورتا جانە دامۋ حالىقارالىق سەلبەستىك كوميتەتىنىڭ مۇشەلەرى، ماماندارى بەلسەنە اقىل - كەڭەس بەرىپ، جۇڭگو مەن شەتەلدىڭ اۋىس - كۇيىسىن، سەلبەستىگىن جەبەپ، جۇڭگو مەن دۇنيە ءجۇزىنىڭ ەكولوگيالىق وركەنيەت قۇرىلىسىنا ماڭىزدى ۇلەس قوستى. جۇڭگو ۇكىمەتى 8 - كەزەكتى جۇڭگو ورتا جانە دامۋ حالىقارالىق سەلبەستىك كوميتەتىن قۇرۋدى رەسمي بەكىتتى، مەملەكەتتىك ورتا جانە دامۋ حالىقارالىق سەلبەستىك كوميتەتىنىڭ دامۋىن بۇرىنعىداي بار كۇشپەن قولدايدى، مۇشەلەردىڭ، مامانداردىڭ كورىكتى جۇڭگو قۇرىلىسىنا، دۇنيە ءجۇزىنىڭ باياندى دامۋىنا ۇزدىكسىز اقىل - پاراساتى مەن كۇش - قۋاتىن ارناۋىن ءۇمىت ەتەمىن.

وسى رەتكى جۇڭگو ورتا جانە دامۋ حالىقارالىق سەلبەستىك كوميتەتى جىلدىق ءماجىلىسىنىڭ نەگىزگى تاقىرىبى − ”ناقتى ىستەر ىستەۋ، جاڭالىق اشۋ سەلبەستىگى، قول ۇستاسا جاسىل العا باسۋ“ بولدى. مەملەكەتتىك ورتا جانە دامۋ حالىقارالىق سەلبەستىك كوميتەتىنىڭ جۇڭگولىق، شەتەلدىك مۇشەلەرىنەن، ماماندارىنان، باقىلاۋشىلارىنان 400 دەن استام ادام ماجىلىسكە قاتىناستى.

كەلۋ قاينارى: حالىق تورابى