ورتالىقتىڭ 3 – كەزەكتى 6 – توپتاعى ەكولوگيالىق ورتانى قورعاۋدى قاداعالاۋ گرۋپپالارى قاداعالاۋ جاعدايى جونىندە اڭىس قايتاردى 

شينحۋا اگەنتتىگىنىڭ 9 – ايدىڭ 29 – كۇنى بەيجيڭنەن بەرگەن حابارى. ءتىلشىنىڭ 9 - ايدىڭ 29 – كۇنى ەكولوگيالىق ورتا مينيسترلىگىنەن ۇعىسۋىنشا، پارتيا ورتالىق كوميتەتى مەن مەملەكەتتىك كەڭەستىڭ بەكىتۋىمەن، ورتالىقتىڭ 3 – كەزەكتى 6 – توپتاعى ەكولوگيالىق ورتانى قورعاۋدى قاداعالاۋ گرۋپپاسى جۋىردا جەكە – جەكە لياۋنيڭ، جيلين، حيلۇڭجياڭ، گۋاڭدۇڭ، گۋاڭشي، شيزاڭ، شينجياڭ سىندى 7 ولكەدە (اۆتونوميالى رايوندا) جانە شينجياڭ ءوندىرىس – قۇرىلىس بيڭتۋانىندا ەكولوگيالىق ورتانى قورعاۋدى قاداعالاۋ جاعدايى جونىندە اڭىس قايتاردى.

قاداعالاۋ گرۋپپالارى مىنانى اتاپ كورسەتتى: جالپى تۇلعالىق جاقتان العاندا، وسى جولى قاداعالاۋ ورىستەتىلگەن ولكەلەر مەن بيڭتۋان ەكولوگيالىق وركەنيەت قۇرىلىسى مەن ەكولوگيالىق ورتانى قورعاۋدى كۇشەيتىپ، جاسىل، تومەن كومىرتەكتى دامۋدى جانە لاستانۋدىڭ الدىن الۋدان، وڭاۋدان قامال الۋدى ىشكەرىلەي ىلگەرىلەتىپ، قىزمەتتە تىڭ، تاتىمدى تابىستارعا قول جەتكىزگەن. سونىمەن بىرگە، قاداعالاۋ بارىسىندا كەيبىر كورنەكتى ماسەلەلەر دە بايقالدى: ءىشىنارا ولكە، اۆتونوميالى رايونداردىڭ شي جينپيڭ ەكولوگيالىق وركەنيەت يدەياسىن امالياتتا ايگىلەۋىندە جەتەرسىزدىكتەر ساقتالعان، ”ەنەرگيانى كوپ سارىپ ەتەتىن، لاس زاتتاردى كوپ ىعىستىراتىن“ نىسانداردى كوزسىزدىكپەن اتقارۋ، قۇرىلىس قوقسىقتارىن زاڭعا، ەرەجەگە قايشى تۇردە ءبىر جاقتى ەتۋ، جابايى قۇستاردى زاڭسىز اۋلاپ ساتۋ جاعدايى تيىم سالسا دا تيىلماۋ سىندى ماسەلەلەر ءالى دە ساقتالۋدا. ەكولوگيانى قورعاۋ، قالپىنا كەلتىرۋدە كورنەكتى ماسەلەلەر ساقتالعان، ءىشىنارا ورمان، سازدى ءوڭىر، وزەن ارناسى، جاراتىلىستىق قورىق قاتارلى سەزىمتال رايونداردى يەلەپ الۋ جانە ءبۇلدىرۋ جاعدايى ورىن تەپكەن، كەيبىر جەرلەر ”ۇش سولتۇستىك“ قورعانىس ورمانى قۇرىلىسىن قاتاڭ، شىنايى اتقارماعان، قىزىل اعاشتى ورماندى قورعاۋدا ءالى دە ولقىلىق ساقتالعان. لاستانۋدىڭ الدىن الۋدان، وڭاۋدان قامال الۋدا ءالى دە ولقىلىقتار بار، سۋدىڭ لاستانۋىنىڭ الدىن الۋدا جەتەرسىزدىكتەر ساقتالعان، كەيبىر جەرلەر تۇرمىستىق لاس سۋدى جيناپ، ءبىرجاقتى ەتۋدى تولىق تياناقتاندىرماعان، اتموسفەرا لاستانۋىنىڭ الدىن الۋدا ءالى دە ءالسىز تۇيىندەر ساقتالعان. اۋىل – قىستاقتىڭ قونىستانۋ ورتاسىن رەتتەۋ – جونگە سالۋ پارمەندى بولماعان، باعىمشىلىق سالاسىنا بايلانىستى لاستانۋ ماسەلەسى كورنەكتى بولعان، ” قىستاقتىڭ اينالاسى قوقىر - قوقسىققا تولى بولۋ “ ماسەلەسى ءالى دە ورىن تەۋىپ وتىر.

قاداعالاۋ گرۋپپاسىنىڭ ايتۋىنشا، كەلەسى قادامدا، قاداعالاۋ جۇرگىزىلەتىن وبيەكتىلەردىڭ قاتىستى تالاپتار بويىنشا 45 قىزمەت كۇنى ىشىندە رەتتەۋ – تۇزەتۋ جوباسىن زەرتتەپ جاساۋىنا، ءتارتىپ بويىنشا پارتيا ورتالىق كوميتەتىنە، مەملەكەتتىك كەڭەسكە جولداۋىنا جەتەكشىلىك ەتەدى جانە قۋزاۋ سالادى. سونىمەن بىرگە، ورنالاستىرۋ جانە قۋزاۋ سالۋدى ۇزدىكسىز كۇشەيتىپ، بايقالعان ماسەلەلەردى سوڭىنا دەيىن قاداعالاپ، قاداعالاۋ جۇرگىزىلگەن وبيەكتىلەردىڭ رەتتەۋ – تۇزەتۋدى شىنايى تياناقتاندىرىپ، ناقتى ونىمدىلىككە قول جەتكىزۋىن ىلگەرىلەتەدى.

كەلۋ قاينارى: حالىق تورابى