بەتتى ساقتاۋ | باس بەت ەتۋ | حات ساندىعى | حابارلاسىڭىز | ءبىز تۋرالى جۇڭگو كوممۋنيستىك پارتياسى اقپارات تورابى

شي جينپيڭ گەرمانيا زۇڭتۇڭى شتاينمەيرمەن كەڭەس وتكىزدى

2026.11.02 16:50     كەلۋ قاينارى : شينجياڭ گازەتى

10 - ايدىڭ 30 - كۇنى تۇستەن كەيىن مەملەكەت ءتوراعاسى شي جينپيڭ بەيجيڭ حالىق سارايىندا جۇڭگوعا مەملەكەتتىك ساپارمەن كەلگەن گەرمانيا زۇڭتۇڭى شتاينمەيرمەن كەڭەس وتكىزدى. سۋرەتتە: كەڭەستەن بۇرىن شي جينپيڭ مەن حانىمى پىڭ لييۋان شتاينمەير جانە ونىڭ حانىمى بيدەنبەندەرمەن بىرگە سۋرەتكە ءتۇستى.

□ سۋرەتتى شينحۋا اگەنتتىگىنىڭ ءتىلشىسى شىن حۇڭ تۇسىرگەن

شينحۋا اگەنتتىگىنىڭ 10 - ايدىڭ 30 - كۇنى بەيجيڭنەن بەرگەن حابارى (تىلشىلەر ۋىن شين، ۋ يۋە). 10 - ايدىڭ 30 - كۇنى تۇستەن كەيىن مەملەكەت ءتوراعاسى شي جينپيڭ بەيجيڭ حالىق سارايىندا جۇڭگوعا مەملەكەتتىك ساپارمەن كەلگەن گەرمانيا زۇڭتۇڭى شتاينمەيرمەن كەڭەس وتكىزدى.

شي جينپيڭ بىلاي دەپ اتاپ كورسەتتى: ديپلوماتيالىق قاتىناس ورناتقان جارتى عاسىردان استام ۋاقىتتان بەرى، جۇڭگو − گەرمانيا قاتىناسى جوعارى دەڭگەيدە دامۋدى ساقتاپ، باستان - اياق ءوزارا سەنىم ارتاتىن دوس، ءبىرىن - ءبىرى تابىسقا جەتەلەيتىن سەرىك بولىپ كەلدى. كەزەكتە دۇنيە جۇزىندە 100 جىلدىق وزگەرىس جەدەل قۇبىلىپ، وزگەرىس پەن بىلىقپالىق بولىپ جاتقان جاعى ءتىپتى دە كورنەكتىلەنە ءتۇستى. جۇڭگو مەن گەرمانيا دۇنيە جۇزىندەگى ەكىنشى، ءۇشىنشى ءىرى ەكونوميكالىق تۇلعا رەتىندە، جۇڭگو − ەۆروپا قاتىناسىنىڭ دامۋىندا جانە دۇنيە ءجۇزى ەكونوميكاسىنىڭ ورنىقتى ارتۋىندا ماڭىزدى جاۋاپكەرشىلىك ارقالاپ وتىر، تىلدەسۋدى جانە ىستەستىكتى كۇشەيتىپ، تەڭ، ءوزارا ءتيىمدى، ستراتەگياسى ورنىقتى سەلبەستىكتىڭ جاڭا ۇلگىسىن قالىپتاستىرىپ، سىرتقا توماعا - تۇيىق بولماي ەسىك اشاتىن، قارسىلاسپاي سەلبەسەتىن بەلسەندى سيگنال تاراتۋى كەرەك. جۇڭگو گەرمانيامەن بىرگە ەكى ەلدىڭ جاپپاي ستراتەگيالىق سەرىكتەستىك قاتىناسىنىڭ جاڭا تاراۋىن اشىپ، اناعۇرلىم ءادىل، ۇيلەسىمدى الەمدىك باسقارۋ جۇيەسىن ورناتۋدى ىلگەرىلەتۋدى قالايدى.

شي جينپيڭ بىلاي دەپ باسا دارىپتەدى: ساياساتتىڭ قۇنى ونىڭ باياندىلىعىندا. جۇڭگونىڭ گەرمانيا جونىندەگى ساياساتى ۇلاسپالى، ورنىقتى، مەجەلەۋگە بولادى، گەرمانيانىڭ ءىرى ەلدىك ورنىنا ايرىقشا ءمان بەرەدى، گەرمانيانىڭ تۇتاستىعى مەن دامۋىن باستان - اياق قولدايدى، گەرمانيانىڭ ەۆروپا جانە حالىقارالىق ىستەردە اناعۇرلىم زور رول اتقارۋىن قۋانا كورگىسى كەلەدى. گەرمانيانىڭ جۇڭگونىڭ دامۋىنا جانە جۇڭگومەن سەلبەستىككە اشىق، بەلسەندى پوزيتسيامەن قاراپ، جۇڭگوعا قاراتقان ۇستامدى، ناقتى، دوستىق ساياساتقا تاباندى بولۋىن، ءوزارا قۇرمەت ەتۋگە، تەڭ تۇرعىدا مامىلە جاساۋعا تاباندى بولۋىن ءۇمىت ەتەمىن، بۇل دا جۇڭگو − گەرمانيا قاتىناسىنىڭ ۇزدىكسىز اقاۋسىز دامۋىنداعى قۇندى تاجىريبە. گەرمانيا وزىق جاساۋ كاسىبىنە جانە جوعارى ساپالى ونىمدەرگە ۋاكىلدىك ەتەدى، جۇڭگو جوعارى ساپالى دامۋ ارقىلى جۇڭگو ۇلگىسىندەگى وسىزامانداندىرۋدى ىلگەرىلەتۋدە. ەكى جاقتىڭ دامۋ ستراتەگيالارى ءوزارا ۇيلەسەدى، سەلبەستىك ءورىسى كەڭ. جۇڭگو جوعارى دەڭگەيدە سىرتقا ەسىك اشۋدى تاباندىلىقپەن ىلگەرىلەتىپ، شارۋاشىلىق - ساۋدا ورتاسىن ۇزدىكسىز ساپالىلاندىرۋدا، گەرمانيانى قامتىعان ءار ەل كاسىپورىندارىنىڭ جۇڭگودا قىرپۋلى ەڭبەك ەتىپ، اسا كولەمدى بازار پايداسىنان بىرگە يگىلىكتەنۋىن قارسى الادى. گەرمانيانىڭ اشىق، سيىسىمدى بولۋدان جازباي، گەرمانياعا بارعان جۇڭگو كاسىپورىندارىنا ءادىل، جاريا، كەمسىتپەيتىن شارۋاشىلىق - ساۋدا ورتاسىن ازىرلەۋىن، جۇڭگو مەن گەرمانيانىڭ ناقتى ىستەر سەلبەستىگىن ۇلعايتۋىن، كۇشەيتۋىن ءۇمىت ەتەمىن. جۇڭگو گەرمانيامەن بىرگە جاساندى زەردە، جاسىل تومەن كومىر قىشقىل گازدى بولۋ، قىزمەت وتەۋ ساۋداسى، سيفرلى ەكونوميكا سياقتى سالالاردا سەلبەستىك جاساپ، بولاشاقتاعى باسەكەلىك قۋاتىن بىرگە جوعارىلاتۋدى، جۇڭگو − گەرمانيا سەلبەستىگىنىڭ اياسىن كەڭەيتىپ، تەبىنىن كۇشەيتۋدى قالايدى. جۇڭگو − گەرمانيا ەكى ەل حالىقتارىنىڭ بارىندە ەڭبەكشىلدىك، پاراساتتىلىق، قايسارلىق سىندى تاڭداۋلى قاسيەت بار، بارلىعى جۇڭگو مەن گەرمانيانىڭ دوستىعىن قولدايدى، ەكى جاق مادەنيەت، وقۋ - اعارتۋ، كوركەمونەر اۋىس - كۇيىسىن قولداپ، ادامداردىڭ بارىس - كەلىسىنە قولايلىلىق جاساپ، حالىق تىلەگىنىڭ توعىسۋىن جەبەپ، كەلەر جىلى جۇڭگو مەن گەرمانيانىڭ ديپلوماتيالىق قاتىناس ورناتقاندىعىنىڭ 55 جىلدىعىن بىرگە قۇتتىقتاۋعا تاماشا اۋقىم ازىرلەۋى كەرەك.

شي جينپيڭ بىلاي دەپ اتاپ كورسەتتى: جۇڭگو باستان - اياق ەۆروپا وداعىن سەرىك رەتىندە قاراپ، ەۆروپامەن قاتىناستى شىن ىقىلاسپەن جانە ىزگى نيەتپەن دامىتىپ كەلەدى. تاريح پەن رەالدىق جۇڭگو − ەۆروپا سەلبەستىگىنىڭ باسەكەدەن ۇستەم تۇراتىندىعىن، ورتاق تانىمنىڭ الاۋىزدىقتان ۇستەم تۇراتىندىعىن قايتا - قايتا دالەلدەدى. جۇڭگو مەن ەۆروپانىڭ ەكونوميكا - ساۋدا قاتىناسىنىڭ ءمانى − ارتىقشىلىقتارمەن ءوزارا تولىقتاۋ، ءوزارا پايدا جەتكىزىپ تەڭ يگىلىككە كەنەلۋ، ءوزارا تابىسقا جەتەلەۋدىڭ جولى − ءوزارا قۇرمەت ەتۋ، ءوزارا ءتۇسىنۋ، ءوزارا جول بەرۋ، سايكەستى دامۋدىڭ تەتىگى − پارىقتاردى ساقتاپ ورتاقتىققا ۇمتىلۋ، تۋراشىلدىقتان اينىماي جاڭالىق اشۋ. جۇڭگو − ەۆروپا قاتىناسى بوران - شاشىندى باستان كەشىرگەن، سەلبەستىك بارىسىندا ءىشىنارا ماسەلەلەردىڭ جارىققا شىعۋى دامۋ بارىسىنداعى ماسەلە، العا باسۋ بارىسىنداعى قايشىلىق. سەرىكتەستىك قاتىناستىڭ ورنىن بەرىك ساقتاپ، تەڭ تۇرعىدا تىلدەسۋ نەگىزگى اۋەنىنەن جازباساق بولعانى، الاۋىزدىق پەن ماسەلەلەر تۇبىندە شەشىلەدى، جۇڭگو − ەۆروپا قاتىناسىنىڭ العا قاراي دامۋىنا بوگەت بولمايدى. ەۆروپانىڭ جۇڭگومەن ءبىر باعىتتا ىلگەرىلەپ، تەڭ، ءتارتىپتى دۇنيە ءجۇزىنىڭ كوپ ۇيەكتەنۋىن جانە جالپىعا ءتيىمدى، سيىسىمدى ەكونوميكانىڭ جاھاندانۋىن قول ۇستاسا ىلگەرىلەتۋىن ءۇمىت ەتەمىن.

شي جينپيڭ شتاينمەيرگە جۇڭگو كوممۋنيستىك پارتياسى 20 - كەزەكتى ورتالىق كوميتەتى بەسىنشى جالپى ءماجىلىسىنىڭ جاعدايىن تانىستىردى. شي جينپيڭ بىلاي دەپ اتاپ كورسەتتى: مەملەكەتتى باسقارۋدا، ءسوز جوق، الدىمەن پارتيانى باسقارۋ كەرەك، پارتيا كوركەيگەندە عانا مەملەكەت قۇدىرەتتەنەدى. پارتيانى جاپپاي قاتاڭ باسقارۋدى تاباندىلىقپەن ىلگەرىلەتۋ، ءسوز جوق، حالىق بۇقاراسىنىڭ كەڭ كولەمدى جاقتاۋىنا جانە قولداۋىنا يە بولادى. جۇڭگو كوممۋنيستىك پارتياسى گەرمانيانى قامتىعان دۇنيە جۇزىندەگى ءار ەلدىڭ نەگىزگى ساياسي پارتيالارىمەن ەل باسقارۋ تاجىريبەسىن اۋىستىرۋدى قالايدى.

شتاينمەير مىنالاردى ءبىلدىردى: وتكەن 25 جىلدا جۇڭگوعا 8 رەت ساپارلاي كەلدىم، جۇڭگونىڭ تەز قارقىندى دامۋىنا كۋا بولدىم، ءار جولى كەلگەندە جۇڭگودا شىت جاڭا بەينە جارىققا شىعادى. جۇڭگو ساياسي ىقپالى جانە ەكونوميكا، عىلىم - تەحنولوگيا ناقتى قۋاتى جاعىندا دۇنيە جۇزىندەگى ىقپالدى ءىرى ەلگە اينالدى، گەرمانيا ءتوراعا شي جينپيڭ باسشىلىق ەتكەن جۇڭگونىڭ وراسان زور دامۋ جەتىستىكتەرىنە قول جەتكىزگەندىگىنە ايرىقشا ءتانتى. گەرمانيا − جۇڭگو قاتىناسى تىعىز، ءوزارا تيىمدىلىك جەتكىزەدى، ومىرشەڭ كۇشكە باي، ەكى جاق باستان - اياق ءوزارا قۇرمەت ەتىپ، تەڭ تۇرعىدا تىلدەسىپ، ءار سالاداعى سەلبەستىكتە ناقتى تابىستارعا قول جەتكىزىپ، ءبىر - ءبىرىنىڭ دامۋىنا دەم بەردى. گەرمانيا ءبىر جۇڭگو ساياساتىن باتىل اتقارادى، ەكى ەل قاتىناسىنىڭ بولاشاعىنا كامىل سەنەدى، جۇڭگومەن جوعارى جىكتەگىلەر اراسىنداعى بارىس - كەلىستى ساقتاپ، ساۋدا، عىلىم - تەحنولوگيا، جاساندى زەردە، قورشاعان ورتانى قورعاۋ سياقتى سالالارداعى سەلبەستىكتى كۇشەيتىپ، گۋمانيتارلىق اۋىس - كۇيىستى جەبەۋدى قالايدى. ەكى جاقتىڭ ەكونوميكا - ساۋدا الاۋىزدىعىن تىلدەسۋ، كەڭەسۋ ارقىلى ۇيلەسىمدى ءبىر جاقتى ەتىپ، ءوزارا پايدا جەتكىزىپ تەڭ يگىلىككە كەنەلۋدى جۇزەگە اسىرىپ، دۇنيە جۇزىنە ۇلگى كورسەتۋىنە بولادى. حالىقارالىق ءتارتىپ قىسىمعا ۇشىراپ وتىر، دۇنيە ءجۇزى جۇڭگونىڭ اناعۇرلىم زور رول اتقارۋىن كۇتەدى. گەرمانيا جۇڭگومەن بىرگە دۇنيە ءجۇزىنىڭ بەيبىتشىلىگىن، دامۋىن قورعاۋ جاۋاپكەرشىلىگىن ارقالاپ، بىرلەسكەن مەملەكەتتەر ۇيىمى ۋستاۆىنىڭ باس ماقساتى مەن پرينسيبىن قورعاپ، حالىقارالىق زاڭنىڭ بەدەلىن قورعاپ، ەركىن ساۋدانى جانە دۇنيە جۇزىلىك ساۋدا ۇيىمىنىڭ ەرەجەسىن قولداپ، قورعامپازدىققا قارسى تۇرۋدى، ساۋدا شايقاسىنا قارسى تۇرۋدى قالايدى.

كەڭەستەن بۇرىن شي جينپيڭ مەن حانىمى پىڭ لييۋان حالىق سارايىنىڭ شىعىس قاقپاسىنىڭ الدىنداعى الاڭدا شتاينمەير مەن ونىڭ حانىمى بيدەنبەندەردى قارسى الۋ سالتىن وتكىزدى.

شتاينمەير كەلگەن كەزدە قۇرمەت قاراۋىلى قاتار تۇزەپ قۇرمەت ءبىلدىردى. ەكى ەلدىڭ مەملەكەت باسشىلارى كوزدەن كەشىرۋ مىنبەسىنە شىقتى، اسكەري وركەستر جۇڭگو مەن گەرمانيا ەكى ەلدىڭ مەملەكەت ءانىن ورىندادى، تيان - انمىن الاڭىندا 21 رەت قۇرمەت ساليۋتى اتىلدى. شتاينمەير شي جينپيڭنىڭ سەرىك بولۋىندا جۇڭگو حالىق ازاتتىق ارمياسىنىڭ قۇرمەت قاراۋىلىن كوزدەن كەشىردى ءارى سالتانات قاتارىن تاماشالادى.

سول كۇنى كەشتە شي جينپيڭ مەن پىڭ لييۋان حالىق سارايىنىڭ جينسى زالىندا شتاينمەير مەن حانىمىنا ارناپ قارسى الۋ قوناعاسىن بەردى.

ۋاڭ ي جوعارىداعى قيمىلدارعا قاتىناستى.

جاۋاپتى رەداكتورى : مانەپ ەربول ۇلى