- ورتالىق
- ەل ءىشى
- شينجياڭ
- حالىقارا
مادەنيەت
ارناۋلى تاقىرىپ
دۇنيە جۇزىلىك 2 - كەزەكتى عالامتور جينالىسىنىڭ اشىلۋ سالتىندا سويلەنگەن ءسوز
2015.12.21 13:17 كەلۋ قاينارى : ءتاڭىرتاۋ تورابى
(2015 - جىلى 16 - جەلتوقسان، ۋجىن قالاشىعى)
جۇڭحۋا حالىق رەسپۋبليكاسىنىڭ ءتوراعاسى شي جينپيڭ
قۇرمەتتى قۇسايىن زۇڭتۇڭ،
قۇرمەتتى مەدۆەدەۆ زۇڭلي،
قۇرمەتتى ءماسىموۆ زۇڭلي،
قۇرمەتتى ساريەۆ زۇڭلي،
قۇرمەتتى راسۋلزادا زۇڭلي،
قۇرمەتتى ازيموۆ 1 - ورىنباسار زۇڭلي،
قۇرمەتتى سوۆالەني ورىنباسار باس ءۋازىر،
قۇرمەتتى ۋ حۇڭبو ورىنباسار باس حاتشى،
قۇرمەتتى جاۋ حوۋلين باس حاتشى،
قۇرمەتتى شۋاپ مىرزا،
مينيسترلەر، باس ەلشىلەر،
سيلى قوناقتار، دوستار:
سيلى قوناقتاردىڭ كورىكتى ۋجىن قالاشىعىندا باس قوسىپ، دۇنيە ءجۇزىنىڭ عالامتور ىستەرىنىڭ دامۋى جونىندەگى ءىرى جوسپاردى بىرگە اقىلداسۋعا كەلگەنىن قارسى الامىن. ەڭ اۋەلى، مەن جۇڭگو ۇكىمەتى مەن جۇڭگو حالقى اتىنان، سونداي - اق ءوز اتىمنان سيلى قوناقتاردىڭ دۇنيە جۇزىلىك 2 - كەزەكتى عالامتور جينالىسىنا قاتىناسقانىن قىزۋ قارسى الامىن! جينالىستىڭ اشىلعانىن قىزۋ قۇتتىقتايمىن!
مەن جىجياڭدا تالاي جىل قىزمەت ىستەدىم، ۋجىن قالاشىعىنا دا تالاي كەلگەن ەدىم. بۇگىن وسى اراعا تاعى دا ات باسىن بۇرعانىمدا، ءبىر جاعىنان، تانىس سەزىلسە، ەندى ءبىر جاعىنان، كوپتەگەن جاڭالىق، سونى لەپتى بايقادىم. بىلتىر دۇنيە جۇزىلىك تۇڭعىش كەزەكتى عالامتور جينالىسى وسى ارادا وتكىزىلىپ، تور جاسامپازدارى، تور شيپاحاناسى، زەردەلىك ساياحات سياقتىلاردى قارقىندى دامىتىپ، مىڭ جىلدىق تاريحى بار بايىرعى قالاشىققا تىڭ ومىرشەڭدىك كۇش سيلاعان ەدى. ۋجىن قالاشىعىنىڭ تور جۇيەسى، ينتەلەكتۋالدى جۇيەسى ءداستۇر مەن وسى زاماننىڭ، گۋمانيتار مەن عىلىم - تەحنيكانىڭ توعىسپالى دامۋىنىڭ جاندى بەينەسى، جۇڭگو عالامتورىنىڭ جاسامپازدىقپەن دامۋىنىڭ شاعىن كارتيناسى، ول، سونىمەن بىرگە، دۇنيە ءجۇزىنىڭ عالامتوردان بىرگە يگىلىكتەنۋ، دامۋ تانىمىن جاندى تۇردە بەينەلەيدى.
دۇنيە ءجۇزىنىڭ وركەنيەت تاريحىنا نازار سالار بولساق، ادامزات اۋىل شارۋاشىلىق توڭكەرىسىن، ونەركاسىپ توڭكەرىسىن، ينفورماتسيا توڭكەرىسىن باستان كەشىردى. ءار جولعى كاسىپتىك تەحنيكالىق توڭكەرىس ادامزاتتىڭ ءوندىرىسى مەن تۇرمىسىنا وراسان زور ءارى تەرەڭ ىقپال جەتكىزدى. قازىر عالامتور ۋاكىلدىك ەتكەن ينفورماتسيا تەحنيكاسى كۇننەن - كۇنگە جاڭارىپ، قوعامدىق ءوندىرىستىڭ تىڭ وزگەرىسىنە، رەفورماسىنا جەتەكشىلىك ەتىپ، ادامزات تۇرمىسىنىڭ تىڭ ءورىسىن اشىپ، مەملەكەتتى جونگە سالۋدىڭ تىڭ ءورىسىن كەڭەيتىپ، ادامزاتتىڭ دۇنيەنى تانۋ، دۇنيەنى وزگەرتۋ قابىلەتىن بارىنشا ارتتىردى. عالامتور دۇنيەنى «اۋىلى ارالاس، قويى قورالاس» جەر شارى قىستاعىنا اينالدىردى، ارا شالعايلىعىنان «ات ءىزىن سالىسپايتىن» جاعدايدى وزگەرتتى. بىلايشا ايتقاندا، كۇللى دۇنيە عالامتورمەن ءتىپتى دە تۇرلەنىپ، تۇرمىس عالامتورمەن ءتىپتى دە ارلەنە ءتۇستى.
جۇڭگو ينفورماتسيالانۋدىڭ قارىشتاپ دامۋىنداي تاريحي بارىسقا قادام تاستادى. جۇڭگو عالامتوردىڭ دامۋىنا باسا ءمان بەردى، 21 جىلدىڭ الدىندا حالىقارالىق عالامتورمەن ۇشتاسقاننان بەرى، ءبىز بەلسەنە پايدالانۋ، عىلمي دامۋ، زاڭ بويىنشا باسقارۋ، حاۋىپسىزدىككە كەپىلدىك ەتۋ وي جەلىسى بويىنشا، ينفورماتسيا نەگىزدىك قۇرىلعى قۇرىلىسىن كۇشەيتىپ، توراپ ەكونوميكاسىن دامىتىپ، ينفورماتسيادان حالىقتى يگىلىكتەندىرۋ ءىسىن ىلگەرىلەتتىك. سونىمەن قاتار توراپ ءورىسىن زاڭ بويىنشا جونگە سالىپ، توراپ ءورىسىن بارعان سايىن ايقىنداي تۇستىك. قازىر جۇڭگودا 670 ميلليون توراپكەر، 4 ميلليون 130 مىڭ توراپ بەكەتى بار، توراپ ەكونوميكالىق، قوعامدىق دامۋمەن، حالىق تۇرمىسىمەن ىشكەرىلەي توعىستى.
ج ك پ 18 - كەزەكتى ورتالىق كوميتەتىنىڭ بەسىنشى جالپى ماجىلىسىندە جاڭالىق اشا دامۋ، سايكەستى دامۋ، جاسىل دامۋ، اشىق دامۋ، ورتاق يگىلىككە كەنەلەتىن دامۋ ي−دەياسى العا قويىلدى. «13 - بەسجىلدىق» جوبا كەزىندە، جۇڭگو توراپتا باسىمدىققا يە ەل ستراتەگياسىن، مەملەكەتتىك ءىرى سيفر ستراتەگياسىن، «عالامتور + » قيمىل جوسپارىن بارىنشا اتقارىپ، بەلسەنە العا باساتىن تور مادەنيەتىن دامىتىپ، تور ەكونوميكاسىنىڭ ءورىسىن كەڭەيتىپ، عالامتور مەن ەكونوميكانىڭ، قوعامنىڭ توعىسىپ دامۋىن جەبەيدى. ءبىزدىڭ نىسانامىز− عالامتوردىڭ دامۋ جەتىستىكتەرىنەن ءبىر ميلليارد 300 ميلليون جۇڭگو حالقىن يگىلىكتەندىرىپ، ءار ەل حالقىن يگىلىككە بارىنشا كەنەلتۋ.
قوناقتار، دوستار!
دۇنيە ءجۇزىنىڭ كوپ ۇيەكتەنۋىنىڭ، ەكونوميكالىق جاھاندانۋدىڭ، مادەنيەتتىڭ ءار تاراپتانۋىنىڭ ونان ارى دامۋىنا ساي، عالامتور ادامزات وركەنيەتىنىڭ العا باسۋىندا اناعۇرلىم زور جەبەۋ رولىن اتقارادى. سونىمەن بىرگە، عالامتور سالاسىنىڭ دامۋى بىركەلكى بولماۋ، ەرەجەلەرى كەمەلسىز، ءتارتىبى لايىقسىز بولۋ سياقتى ماسەلەلەر كۇننەن - كۇنگە كورنەكتىلەنىپ وتىر. ءار مەملەكەت پەن رايوننىڭ ينفورماتسيا وتكەلدەرى بارعان سايىن الشاقتاپ بارادى، قازىرگى تور ءورىسىن جونگە سالۋ ەرەجەلەرى باسىم كوپ ساندى ەلدەردىڭ تىلەگى مەن مۇددەسىن ايگىلەۋگە شاماسى جەتپەي وتىر؛ دۇنيە جۇزىندە جەكە قۇپيالىققا سۇعاناقتىق جاساۋ، ءبىلىم مەنشىك ۇقىعىنا سۇعاناقتىق جاساۋ، تور قىلمىسى سياقتى جايتتەر دە ۇنەمى تۋىلىپ كەلەدى. توردا ۇرلاپ تىڭداۋ، توردا شابۋىلداۋ، توردا لاڭكەستىك قيمىل جاساۋ سياقتىلار بۇكىل جەر شارىندىق الاپاتقا اينالدى. وسى ماسەلەلەر مەن سىن - سايىستار الدىندا، حالىقارالىق قوعام ءوزارا قۇرمەت ەتۋ، ءوزارا سەنىمدىلىك ارتۋ نەگىزىندە تىلدەسۋدى، سەلبەستىكتى كۇشەيتىپ، عالامتوردىڭ بۇكىل جەر شارىندىق جونگە سالۋ جۇيەسى توڭكەرىسىن ىلگەرىلەتىپ، جاراسىمدى، حاۋىپسىز، اشىق، سەلبەسكەن تور ءورىسىن بىرگە قۇرىپ، كوپ جاقتىلى، دەموكراتيالى، اشىق - جاريا عالامتورلىق جونگە سالۋ جۇيەسىن ورناتۋ كەرەك.
عالامتوردى جونگە سالۋ جۇيەسىنىڭ وزگەرىسىن ىلگەرىلەتۋدە مىنا پرينسيپتەرگە تاباندى بولعان ءجون:
− تورداعى يەلىك ۇقىققا قۇرمەت ەتۋ. «بىرلەسكەن مەملەكەتتەر ۇيىمىنىڭ ۋستاۆىندا» بەلگىلەنگەن يەلىك ۇقىق تەڭدىگى پرينسيبى وسى زامانعى حالىقارالىق قاتىناستاردىڭ نەگىزگى قاعيداسى، ول مەملەكەت ارالىق بارىس - كەلىستەردىڭ ءار سالاسىن قامتيدى، بۇل پرينسيپ پەن رۋح تور كەڭىستىگىنە دە ۇيلەسەدى. ءبىز ءار ەلدىڭ توردى دامىتۋ جولىن، توردى باسقارۋ ۇلگىسىن، عالامتورلىق الەۋمەتتىك ساياساتتاردى جانە حالىقارالىق تور كەڭىستىگىن جونگە سالۋعا تەڭ ات سالىسۋ ۇقىعىن دەربەس تاڭداۋىنا قۇرمەت ەتۋىمىز، توردا وكتەم بيلىك جۇرگىزبەۋىمىز، باسقا ەلدىڭ ىشكى ىسىنە كيلىكپەۋىمىز، باسقا ەلدىڭ مەملەكەت حاۋىپسىزدىگىنە قاتەر توندىرەتىن تور قيمىلدارىمەن شۇعىلدانباۋىمىز، ونداي قيمىلداردى ىرقىنا جىبەرمەۋىمىز نەمەسە قولداماۋىمىز كەرەك.
− بەيبىتشىلىك پەن حاۋىپسىزدىكتى قورعاۋ. حاۋىپسىز، ورنىقتى، كوركەيگەن تور كەڭىستىگى ءار ەل ءۇشىن، ءتىپتى، بۇكىل الەم ءۇشىن اسا كەلەلى مانگە يە. شىنايى ومىردە سوعىس ءتۇتىنى ءالى سەيىلگەن جوق، لاڭكەستىك تۇمانىن ايىقتىرۋ قيىنعا سوعۋدا، زاڭعا قايشى قىلمىستار اۋىق - اۋىق ءجۇز بەرۋدە. تور كەڭىستىگى ءار ەل بىلەك سىناساتىن مايدانعا اينالماۋى، زاڭعا قايشى قىلمىستاردىڭ بەسىگى بولماۋى ءتيىس.ءار ەل بىرگە قۇلشىنىپ، تور كەڭىستىگى ارقىلى لاڭكەستىك، بادىكتىك، ەسىرتكى ساۋدالاۋ، اقشانىڭ ءىزىن جاسىرۋ، قۇمار ويناۋ سياقتى قىلمىستىق ارەكەتتەردەن ساقتانۋ جانە وعان قارسى تۇرۋ كەرەك. ساۋدالىق ماقساتتا قۇپيالىق ۇرلاۋ ياكي ۇكىمەت تورلارىنا قاسكەرلىك شابۋىل جاساۋ سياقتىلاردىڭ بارلىعىنا قاتىستى زاڭدار مەن حالىقارالىق شارتتارعا ساي باتىل سوققى بەرۋ كەرەك. تور حاۋىپسىزدىگىن قورعاۋدا ءبىر - بىرىنە كەرەعار 2 ولشەم قولدانۋعا، ءبىر ەلدىڭ حاۋىپسىزدىگىن قورعاپ، باسقا ەلدەردى قاتەرگە ۇستاۋعا، ءبىر ءبولىم ەلدەردىڭ حاۋىپسىزدىگىن قورعاپ، ەندى ءبىر ءبولىم ەلدەردى قاتەرگە ۇستاۋعا بولمايدى، باسقا ەلدىڭ حاۋىپسىزدىگىن قۇربان ەتىپ، ايتىلمىش ءوزىنىڭ تۇبەگەيلى حاۋىپسىزدىگىن عانا كوزدەۋگە تىپتەن بولمايدى.
− اشىق سەلبەستىكتى جەبەۋ. «تورتەۋ تۇگەل بولسا توبەدەگى كەلەدى، التاۋ الا بولسا اۋىزداعى كەتەدى». دۇنيە جۇزىلىك عالامتوردى جونگە سالۋ جۇيەسىن كەمەلدەندىرىپ، تور كەڭىستىگىنىڭ ءتارتىبىن قورعاۋدا، ءسوز جوق، ءبىر جاعادان باس، ءبىر جەڭنەن قول شىعارۋ، ءوزارا سەنۋ، ءبىر - بىرىنە پايدا جەتكىزۋ يدەياسىندا تاباندى بولىپ، ناتيجەسىز، جەڭگەنى ءبارىن قيداي سىپىراتىن كونە كوزقاراستى تاستاۋىمىز كەرەك. ءار ەل عالامتور سالاسىنداعى اشىق سەلبەستىكتى ىلگەرىلەتۋى، اشىق سەلبەستىكتىڭ ىشكى ءمانىن بايىتىپ، اشىق ۇستاۋ دەڭگەيىن جوعارىلاتىپ، پىكىر اۋىساتىن، سەلبەستىك جاساساتىن ءتىپتى دە كوپ تۇعىر قۇرىپ، مۇددەلەردىڭ اناعۇرلىم كوپ توعىسۋ تۇيىندەرىن، سەلبەستىكتىڭ ءتىپتى دە كوپ ارتۋ تۇيىندەرىن، تەڭ ۇتۋدىڭ ءتىپتى دە كوپ جارقىن تۇيىندەرىن قالىپتاستىرىپ، تور كەڭىستىگىندەگى ارتىقشىلىقتاردىڭ ءبىرىن - ءبىرى تولىقتاۋىن، بىرگە دامۋدى ىلگەرىلەتىپ، ءتىپتى دە كوپ مەملەكەت پەن حالىقتىڭ ينفورماتسيا ءداۋىرىنىڭ ۇشقىر پويەزىنە وتىرىپ، عالامتور دامۋىنىڭ جەمىستەرىنەن بىرگە يگىلىكتەنۋىنە مۇمكىندىك جاساۋ كەرەك.
− تاماشا ءتارتىپ قالىپتاستىرۋ. تور كەڭىستىگىندە شىنايى قوعام سياقتى ەركىندىكتى دارىپتەۋمەن بىرگە، ءتارتىپتى ساقتاۋ كەرەك. ەركىندىك − ءتارتىپتىڭ ماقساتى، ءتارتىپ − ەركىندىكتىڭ كەپىلى. ءبىز عالامتور قولدانۋشىلاردىڭ يدەيا اۋىسىپ، تىلەك - نيەتتەرىن ءبىلدىرۋ ۇقىعىنا قۇرمەت ەتۋمەن بىرگە، زاڭ بويىنشا تاماشا تور ءتارتىبىن قالىپتاستىرۋىمىز كەرەك، بۇل عالامتور قولدانۋشىلاردىڭ زاڭدى مۇددەسىنە كەپىلدىك ەتۋگە ءتيىمدى. تور كەڭىستىگى «زاڭنان تىس دۇنيە» ەمەس. تور كەڭىستىگى ۆيرتۋالدى بولعانىمەن، تور كەڭىستىگىنەن پايدالانۋشى سۋبيەكتىلەر شىنايى بولادى، بارلىعىمىز زاڭعا بويسۇنۋىمىز، ءار جاقتىڭ ۇقىعى مەن بورىشىن ايقىنداۋىمىز كەرەك. توردى زاڭ بويىنشا جونگە سالۋعا، تور جۇمىستارىن زاڭ بويىنشا جۇرگىزۋگە، توردان زاڭ بويىنشا پايدالانۋعا تاباندى بولىپ، عالامتوردىڭ زاڭ - ءتۇزىم ارناسىندا اقاۋسىز جۇرگىزىلۋىنە مۇمكىندىك جاساۋىمىز كەرەك. سونىمەن بىرگە، تور ەتيكاسىن، تور وركەنيەت قۇرىلىسىن كۇشەيتىپ، مورالمەن تاربيەلەۋدىڭ جەتەكشىلىك رولىن كورنەكتىلەندىرىپ، ادامزات وركەنيەتىنىڭ وزىق تابىستارىمەن تور كەڭىستىگىن بايىتىپ، تور ەكولوگياسىن قالپىنا كەلتىرۋىمىز كەرەك.
قوناقتار، دوستار!
تور كەڭىستىگى − ادامزاتتىق ورتاق قيمىل كەڭىستىگى، تور كەڭىستىگىنىڭ بولاشاق تاعدىرىن دۇنيە جۇزىندەگى ءار ەل بىرگە يگەرۋى ءتيىس. ءار ەل اۋىس - كۇيىستى كۇشەيتىپ، ورتاق تانىمدى ارتتىرىپ، سەلبەستىكتى تەرەڭدەتىپ، تور كەڭىستىگى تاعدىرلاس ورتاق تۇلعاسىن بىرگە قۇرۋى كەرەك. وسى جونىندە مەن مىنا 5 جاقتاعى ۇستانىمدى العا قويامىن:
ءبىرىنشى، الەمدىك تور نەگىزدىك قۇرىلعى قۇرىلىسىن جەدەلدەتىپ، ءوزارا بايلانىس جاساۋ، ءوزارا توعىسۋدى جەبەۋ كەرەك. توردىڭ ءمانى − ءوزارا بايلانىسۋ، ينفورماتسيانىڭ قۇنى − ءوزارا توعىسۋ. ينفورماتسيا نەگىزدىك قۇرىلعىلار قۇرىلىسىن كۇشەيتكەندە عانا، ينفورماتسيانىڭ ىركىلىسسىز ارناسىن اشۋعا، تۇرلىشە ەل، تۇرلىشە ءوڭىر، تۇرلىشە ادامدار توبى اراسىنداعى ينفورماتسيا ارناسىن ۇزبەي ىركىلىسسىزدەندىرىپ، ينفورماتسيا قاينارىنىڭ تولىق اينالىم جاساۋىنا مۇمكىندىك تۋدىرۋ كەرەك. جۇڭگو «كەڭ جولاقتى جەلىلى جۇڭگو» ستراتەگياسىن اتقارۋدا، مەجەمەن 2020 - جىلعا بارعاندا جۇڭگونىڭ كەڭ جولاقتى جەلىسى بارلىق اكىمشىلىك قىستاقتاردى قامتىپ، تور نەگىزدىك قۇرىلعىسىنىڭ «سوڭعى ءبىر شاقىرىمىنا» دەيىن تۇتاسىپ، ءتىپتى كوپ ادام عالامتوردان يگىلىكتەنە الادى. جۇڭگو ءار جاقپەن بىرگە ۇسىنىلىمدى ارتتىرىپ، تەحنيكالىق قولداۋ سەرپىنىن كۇشەيتىپ، دۇنيە جۇزىلىك تور نەگىزدىك قۇرىلعىلار قۇرىلىسىن ىلگەرىلەتىپ، ءتىپتى كوپ دامۋ ۇستىندەگى ەلدەر مەن حالىقتى عالامتور الا كەلگەن دامۋ ورايلارىنان يگىلىكتەندىرۋدى قالايدى.
ەكىنشى، تورداعى مادەنيەت اۋىس - كۇيىسىنەن بىرگە يگىلىكتەنۋ تەكشەسىن قۇرىپ، اۋىس - كۇيىس جاساۋدى، ءبىر - بىرىنەن ۇلگى الۋدى جەبەۋ كەرەك. مادەنيەت اۋىس - كۇيىس ارقىلى اجارلانا تۇسەدى، وركەنيەت ءبىر - بىرىنەن ۇلگى الۋ ارقىلى مازمۇنىن بايىتا تۇسەدى. عالامتور − ادامزاتتىڭ وزىق مادەنيەتىن تاراتىپ، وڭ ەنەرگيانى ساۋلەلەندىرەتىن ماڭىزدى دانەكەر، جۇڭگو عالامتور ارقىلى حالىقارالىق اۋىس - كۇيىس كوپىرىن سالىپ، دۇنيە جۇزىلىك وزىق مادەنيەت جونىندەگى اۋىس - كۇيىستى، ءبىر - بىرىنەن ۇلگى الۋدى ىلگەرىلەتىپ، ءار ەل حالقىنىڭ سۇيىسپەنشىلىكتەرىن توعىستىرىپ، كوڭىل كۇيلەرىن ورتاقتاستىرۋدى قالايدى. ءبىز ءار ەلمەن بىرگە عالامتوردىڭ تاراتۋ تۇعىرى بولۋداي باسىمدىعىن ساۋلەلەندىرىپ، ءار ەل حالقىن جۇڭحۋانىڭ تاڭداۋلى مادەنيەتىن تۇسىنۋىنە، جۇڭگو حالقىن ءار ەلدىڭ وزىق مادەنيەتىمەن تانىسۋىنا مۇمكىندىك جاساپ، تور مادەنيەتىنىڭ گۇلدەنۋىن، دامۋىن ورتاق ىلگەرىلەتىپ، ادامداردىڭ رۋحاني جان دۇنيەسىن بايىتىپ، ادامزاتتىڭ وركەنيەتتەگى العا باسارلىعىن جەبەۋدى قۇپتايمىز.
ءۇشىنشى، تور ەكونوميكاسىندا جاڭالىق اشا دامۋدى ىلگەرىلەتىپ، بىرگە گۇلدەنىپ - كوركەيۋدى جەبەۋ كەرەك. كەزەكتە، دۇنيە ءجۇزى ەكونوميكاسىنىڭ قايتا جاندانۋى بۇرالاڭدىقتارعا تولى بولۋدا، جۇڭگونىڭ ەكونوميكاسى دا بەلگىلى باسەڭدەۋ قىسىمىنا ءدوپ كەلۋدە. وسى ماسەلەلەردى شەشۋدىڭ تەتىگى − دامۋدى جاڭالىق اشۋمەن جەبەۋدەن جازباي، دامۋدىڭ تىڭ ءورىسىن اشۋ. جۇڭگو كەزەكتە «عالامتور + » ارەكەت جوسپارىن اتقارۋ ارقىلى «سيفرلى جۇڭگو» قۇرىلىسىن ىلگەرىلەتىپ، ورتاق ەكونوميكانى دامىتىپ، عالامتوردى نەگىز ەتكەن ءتۇرلى جاسامپازدىقتاردى قولداپ، دامۋ ساپاسى مەن ءونىمىن جوعارىلاتۋ ۇستىندە. جۇڭگونىڭ عالامتور ءىسى قارىشتاپ دامىپ، ءار ەل كاسىپورىندارى مەن شارۋاشىلىق قۇرۋشىلارىن كەڭ بازار اياسىمەن قامدادى. جۇڭگونىڭ ايقارا اشىلعان ەسىگى ماڭگى جابىلمايدى، شەتەل قارجىسىنان پايدالانۋ ساياساتى وزگەرمەيدى، شەتەل قارجى قوسۋشى كاسىپورىندارىنىڭ زاڭدى ۇقىق - مۇددەسىن بۇرىنعىداي قامتاماسىزداندىرادى، ءار ەل كاسىپورىندارىنىڭ جۇڭگودا قارجى قوسىپ، شارۋاشىلىعىن گۇلدەندىرۋىنە تاماشا قىزمەت كورسەتۋ بەتالىسىن وزگەرتپەيدى. تەك جۇڭگونىڭ زاڭىنا بويسۇنسا بولعانى، ءبىز ءار ەل كاسىپورىندارى مەن شارۋاشىلىق قۇرۋشىلارىنىڭ جۇڭگودا قارجى قوسىپ، شارۋاشىلىعىن گۇلدەندىرۋىن قىزۋ قارسى الامىز. ءبىز ءار ەلمەن سەلبەسۋدى كۇشەيتىپ، شەكارا اتتاعان ەلەكتروندىق ساۋدانى دامىتۋ، ينفورماتسيادا، ەكونوميكادا ۇلگى كورسەتۋ رايونىن قۇرۋ سياقتىلار ارقىلى دۇنيە ءجۇزى كولەمىندەگى قارجى قوسۋ مەن ساۋدانىڭ دامۋىن جەبەپ، دۇنيە ءجۇزى سيفرلى ەكونوميكاسىنىڭ دامۋىن ىلگەرىلەتەمىز.
ءتورتىنشى، تور حاۋىپسىزدىگىن قامتاماسىز ەتىپ، ءتارتىپتى دامۋدى جەبەۋ كەرەك. حاۋىپسىزدىك پەن دامۋ −ءبىر دەنەنىڭ قوس قاناتى. حاۋىپسىزدىك − دامۋدىڭ كەپىلى، دامۋ − حاۋىپسىزدىكتىڭ نىساناسى. تور حاۋىپسىزدىگى الەمدىك سايىس، بۇدان قاعىس قالاتىن مەملەكەت بولمايدى، تور حاۋىپسىزدىگىن قورعاۋ − حالىقارالىق قوعامنىڭ ورتاق جاۋاپكەرلىگى. ءار ەل سەلبەسە قۇلشىنىس جاساپ، ينفورماتسيا تەحنيكاسىنان بەتالدى پايدالانۋدى بىرگە شاۋجايلاپ، تورداعى باقىلاپ تىڭداۋعا جانە تورداعى شابۋىلعا، تور كەڭىستىگىندەگى سوعىس دايىندىعى باسەكەسىنە قارسى تۇرۋ كەرەك. جۇڭگو ءار ەلمەن بىرگە پىكىرلەسۋ مەن ارالاسۋدى كۇشەيتىپ، الاۋىزدىقتاردى ءونىمدى باسقارىپ جانە مەڭگەرىپ، تاراپتاردىڭ بارلىعى دەرلىك قابىل الاتىن تور كەڭىستىگىنىڭ حالىقارالىق قاعيداسىن، تور كەڭىستىگىندەگى حالىقارالىق لاڭكەستىككە قارسى تۇرۋ شارتىن جاساۋدى ىلگەرىلەتىپ، تورداعى قىلمىستىق ارەكەتتەرگە سوققى بەرۋدىڭ ءادىليالىق كومەكشى مەحانيزمىن اقاۋسىزداندىرۋعا، تور كەڭىستىگىنىڭ بەيبىتشىلىگى مەن حاۋىپسىزدىگىن بىرگە قورعاۋعا پەيىل.
بەسىنشى، عالامتوردى جونگە سالۋ جۇيەسىن ورناتىپ، ادىلدىكتى، تۋرالىقتى جەبەۋ كەرەك. حالىقارالىق تور كەڭىستىگىن جونگە سالۋدا كوپ جاقتى ات سالىسۋدان، تاراپتاردىڭ ات سالىسۋىنان جازباي، كوپشىلىك اقىلداسىپ ءبىر جايلى ەتۋ، ۇكىمەت، حالىقارالىق ۇيىم، عالامتور كاسىپورنى، تەحنيكالىق توپ، حالىقتىق قۇرىلىم، جەكە ادام سياقتى سۋبيەكتتەردىڭ رولىن ساۋلەلەندىرىپ، سىڭار جاقتىلىقتان اۋلاق بولۋ، ءبىر جاق بيلەيتىن نەمەسە بىرنەشە جاق بىرگە بيلىك ايتاتىن جاعدايدان اۋلاق بولۋ كەرەك. ءار ەل بارىس - كەلىستى، اۋىس - كۇيىستى كۇشەيتىپ، تور كەڭىستىگىنىڭ كەڭەسۋ مەحانيزمىن كەمەلدەندىرىپ، الەمدىك عالامتوردى جونگە سالۋدىڭ قاعيداسىن جاساۋدى اقىلداسىپ، الەمدىك عالامتوردى جونگە سالۋ جۇيەسىن اناعۇرلىم ءادىل دە ۇيلەسىمدى ەتۋ، باسىم كوپ ساندى ەلدىڭ قالاۋى مەن مۇددەسىن اناعۇرلىم تەڭدىكپەن بەينەلەۋ كەرەك. الەمدىك عالامتور جينالىسىن اشۋدا جەر شارى عالامتوردان ورتاق يگىلىكتەنەتىن، عالامتوردى بىرگە جونگە سالاتىن ءبىر مىنبەر ازىرلەپ، عالامتوردىڭ اقاۋسىز دامۋىن بىرگە ىلگەرىلەتۋدى ءۇمىت ەتەمىز.
قۇرمەتتى قوناقتار، دوستار!
«داۋىرمەن توعىسقان جول داڭعىل بولادى». عالامتور ءپىشىنسىز بولعانىمەن، عالامتوردان ادامزات پايدالانادى، عالامتور ادامزاتتىڭ ورتاق باقشاسى. وسى باقشانى اناعۇرلىم كوركەم، تازا، حاۋىپسىز ەتۋ حالىقارالىق قوعامنىڭ ورتاق جاۋاپكەرلىگى. الداعى جەردە قول ۇستاسا سەلبەسىپ، توراپ كەڭىستىگىندەگى ءوزارا بايلانىستى، بارىس - كەلىستى جەبەپ، بىرگە يگىلىكتەنىپ، بىرگە جونگە سالىپ، ادامزات دامۋىنىڭ اناعۇرلىم شۇعىلالى بولاشاعىن اشۋعا كۇش قوسايىق!
سوڭىندا جينالىستىڭ تولىق تابىستى بولۋىن ءۇمىت ەتەمىن!
كوپشىلىككە راقىمەت. «شينجياڭ گازەتى»
جاۋاپتى رەداكتورى : نۇرعيسا قۇرمانجان ۇلى
وقىرمان نازارىنا
نازار سالا كەتەرسىز
- 1.
جۇڭحۋا حالىق رەسپۋبليكاسىنىڭ قاتىستى زاڭ-ەرەجەلەرىنە بويسىنىپ، توراپتا ءمورالدى بولىڭىز، ءسىزدىڭ ارەكەتىڭىز سەبەبىنەن تىكەلەي نەمەسە جانامالاي تۋىنداعان زاڭدىق جاۋاپكەرشىلىكتى ءوزىڭىز ارقالايسىز.
2.
قالام اتىڭىز بەن جازعان لەبىزىڭىزدى باسقارۋدىڭ بارلىق ۇقىعى حالىق تورابىنا ءتان.
3. حالىق تورابىنىڭ ءسىزدىڭ حالىق تورابىنىڭ لەبىز جازۋ بەتىنە جازعان لەبىزىڭىزدى توراپ ىشىندە كوشىرۋ نەمەسە لەبىزىڭىزدەن سيتات كەلتىرۋ ۇقىعى بار.
4.
ەگەر باسقارۋ جاعىنا پىكىرىڭىز بولسا، لەبىز جازۋ بەتىنىڭ باسقارۋشىسىنا نەمەسە حالىق گازەتى مەكەمەسىنىڭ توراپ ورتالىعىنا اڭىس ەتىڭىز.
تەلەفون: 67 /65368365-010 حات ساندىعى: kazakh@peopledaily.com.cn
بۇل بەتتىڭ مەنشىك ۇقىعى حالىق تورابىنا ءتان، كەلىسىمنەن وتپەگەندە كوشىرىپ پايدالانۋعا بولمايدى
Copyright © 1997-2012 by www.people.com.cn. all rights reserved
جۇڭگو كوممۋنيستىك پارتياسى اقپارات تورابى 
بۇل حابارعا باعاڭىز
لەبىز جازۋ
