2 - تامىز كۇنشاندا تۋىلعان پارتىلاۋ وقيعاسىنىڭ سوڭعى جۇمىستارى ءتارتىپتى جۇرگىزىلۋدە

قازا بولعانداردىڭ سانى 71 گە جەتتى، جاراقاتتانعان 186 ادام ەمدەلۋدە

2014.08.04 15:45   كەلۋ قاينارى : حالىق تورابى

　　حالىق تورابى 4 - شىلدە، بەيجيڭ. جياڭسۋ ولكەسى سۋجوۋ قالاسى 3 -تامىز تۇستەن كەيىن اقپار جاريالاۋ ءماجىلىسىن اشىپ، 2 -تامىز كۇنشاندا تۋىلعان پارتىلاۋ وقيعاسىن ءبىرجاقتىلى ەتۋ جانە جاراقاتتانعانداردى ەمدەۋ - قۇتقارۋ قىزمەتى سياقتى احۋالداردى مالىمدەدى. كۇنشان قالاسىنىڭ باستىعى لۋ جۇن: كەزەكتە جاراقاتتانداردان 186 ادام اۋرۋحانادا ەمدەلىپ جاتىر، 71 ادام قازا بولدى، وقيعانىڭ سوڭعى جۇمىستارى ءتارتىپتى جۇرگىزىلۋدە، – دەدى.

　　2 - تامىز تۇستەن بۇرىن ساعات 7دەن 35 مينۋت مولشەرىندە، كۇنشان قالاسىنىڭ اشۋ رايونىنداعى جۇڭرۇڭ مەتال بۇيىمدار شەكتى سەرىكتىگىنىڭ اۆتوكولىك كۇپشەگىن وڭدەۋ سەحىندا ءوندىرىس بارىسىندا قوپارىلىس تۋىلدى، باستاپقى ساتىدا مۇنىڭ كاسىپورىننىڭ حاۋىپسىز ءوندىرىس جاۋاپكەرشىلىك شىرعالاڭى ەكەنى انىقتالىپ، شاڭ - توزاڭنان بولعان قوپارىلىس دەگەن كۇمان تاعىلدى. ۇعىسۋعا قاراعاندا، وقيعا تۋىلعاننان كەيىن جاراقاتتانعاندار جەكە - جەكە نانجيڭ، شاڭحاي، چاڭجوۋ، ۋشي، نانتۇڭ، سۋجوۋ، چاڭشۋ، كۇنشان قاتارلى 8 قالاداعى 15 ەمدەۋ قۇرىلىمىندا ەمدەلگەن. مەملەكەتتىڭ دەنساۋلىق ساقتاۋ تاراۋلارى ەلىمىزدىڭ جەر - جەرىنەن 50 نەشە ماماندى ءارقايسى ەمدەۋ تۇيىندەرىنە جىبەرىپ، قۇتقارۋ قىزمەتىنە جەتەكشىلىك ەتتى. جياڭسۋ ولكەسىندەگى ەمدەۋ تاراۋلارى ەڭ جاقسى اسپاپتار مەن دارىلەردى پايدالانىپ قۇتقارۋ قىزمەتىنىڭ ءونىمدى، ءساتتى جۇرگىزىلۋىنە كەپىلدىك ەتتى، ولكەلىك دەنساۋلىق - ساقتاۋ مەڭگەرمەسىنىڭ باسشىلارى مەن سۋجوۋ قالاسىنىڭ قاتىستى باسشىلارى ەمدەۋ تۇيىندەرىندە تۇرىپ، قۇتقارۋ قىزمەتىنە جاۋاپتى بولدى.

　　(جۇڭگو ۇلتتار اۋدارما مەكەمەسى اۋدارعان)

　　كەلۋ قاينارى: حالىق تورابى