- ورتالىق
- ەل ءىشى
- شينجياڭ
- حالىقارا
مادەنيەت
ارناۋلى تاقىرىپ
داستۇرىمىزگە قۇرمەت داستارقانداعى اسقا قۇرمەتتەن باستاۋ السا ەكەن
2014.06.24 13:20 كەلۋ قاينارى : شينجياڭ حالىق راديو ستانسياسى تورابى
«توي دەسە قۋ باس دومالايدى». توي حابارى تيىسىمەن ىشتەي ەسەبىمىزدى جاساپ، ءساتتى ۋاقىتىندا توي ۇستەلىن تولتىرىپ بولامىز. ويدان-قىردان جينالعان بەيتانىس، ءتۇس تانىس، تانىس بولىپ ءبىر ۇستەلدى تولتىرىپ وتىرعان كوپشىلىكتىڭ يا، ءبىرىڭعاي ايەلدەر، يا، ءبىرىڭعاي ەرلەر بولاتىنى تابيعي. ۇلتتىق تاعامدارىمىزبەن تولعان داستارقانىمىز اۋەلگى قالپىن قۇراتپاي تولىسىپ، تۇرلەنىپ كەلە جاتقان مايەكتى مادەنيەتىمىزدىڭ ءبىر بولىگى. قازىر توي سايىن ءدامى تاڭدايدا قالار تاعامدارىمىز بەن اقسارباس قويدىڭ باسىنان باستاپ، جامباس، جال-جايا، قازى-قارتامەن تولعان تورە تاباق ەت تە ءوزنىڭ اۋەلگى سي-سياپاتىمەن ۇستەلىمىزدەن ويىپ ورىن الۋدا. وسىنداي ورتادا اس باتاسىنان كەيىن-اق اتىپ تۇرىپ الدىڭا كەلگەن ەتتى تۋراۋ قازاقتىڭ پەرزەنتى بولعان ۇل، قىزدىڭ باس تارتپايتىن بورىشى. باياعى ءداستۇر بويىنشا كەلگەندە بۇل بورىشتى سول داستارقان باسىندا وتىرعانداردىڭ ىشىندەگى جاسى كىشىسى اتقارۋعا مىندەتتى. داستارقان باسىنىڭ جوسىنىمەن ايتقىزباي الدىنا كەلگەن تاماقتى تۋراۋ سول جاستىڭ باسقاعا بولعان ادەپ-يباسىن، كورگەن ءتالىم-تاربيەسىن، تۇرمىسقا دەگەن ەبىن، ارىسىن ايتساق داستۇرگە دەگەن قۇرمەتىن تانىتادى. قازىر، ورتامىزدا ءوزىنىڭ كورگەن ءتالىم-تاربيەسىن ايتقىزباي ايگىلەيتىندەردىڭ ازايىپ كەتكەنىنە قايران قالماي تۇرا المايسىڭ. قاشان، قانداي داستارقاندا بولسىن الدىعا كەلگەن دايىن استى تۋرايتىن ءبىر ادامنىڭ شىقپاي، بۋى بۇرقىراعان تورە تاباق ەتتى قويا تۇرىپ، ساقپىنى الا سالىپ، تارەلكەدەگى قۋىرماشتارعا قول سالعاندارعا قاراپ، « مىنالار كادەنى بىلمەي مە» دەگەن وي كەلەدى. قايسىسى تۋرايدى دەپ ءوزىڭنىڭ ۇلكەندىگىڭدى بۇلداپ جاسى كىشىلەرگە جاپاقتاي قارايسىڭ، «تانيتىندارىڭا تۋراپ جىبەرىڭدەر»-دەپ ەمەۋرىن تانىتاسىڭ. ءبارى دە «مەن ەت تۋراعاندى بىلمەيمىن، سەن تۋراشى»-دەيدى تاعى بىرەۋىنە سىلتەپ. سەن ءسۇيت دەگەنگە سۇيتە سالاتىن جاس قايدا، «مەندە بىلمەيمىن» اناۋ تۋراسىنشى دەيدى يەك كوتەرىپ. «جەمەسەڭدەر قوي» دەپ ءبىر-بىرمەن ەگەسىپ، الدىنداعى تاماقتى ءوز تۇسىنان قالاعانىن جۇلىپ جەگەنگە دەيىن بارعان ەنجارلىقتى كورىپ، قايتەرىڭدى بىلمەي قىسىلاسىڭ.«جاستار تۋرايدى» دەپ جوسىنعا باعىنىپ، داستارقاننىڭ بەرەكەسىن قاشىرىپ العانىڭا كىنالى بولىپ، ءبىر-بىرىنە كەكەتە قاراعان قاباقتارعا قاراپ قايمىعاسىڭ. سوندا ءبىزدىڭ «اس قادىرىن بىلمەسەڭ، اشارشىلىق تارتاسىڭ» دەپ تۇتاس دۇنيەگە قۇرمەتىن، الدىنا كەلگەن اسقا قۇرمەتتەن باستايتىن سالتىمىز، «ءبىر جەيدە بۇرىن توزدىرعان» دەپ جاسى ۇلكەننىڭ سوزىنە قۇلاق اساتىن قۇرمەتىمىز قايدا قالدى!؟ ءبىزدىڭ سي-سياپاتىمىزدىڭ تورەسى بولىپ الدىعا كەلەتىن ۇلتتىق تاعامىمىز «ەتكە» دەگەن قۇرمەتىمىز سول الدىڭا جايىلعان داستارقانعا دەگەن قۇرمەتىمىز، سول داستارقاندى جايعان داستارقان يەسىنە دەگەن قۇرمەتىمىز. كىمدى بولسىن جاتىرقاماي الدىنا اس قوياتىن ۇلتتىق مىنەزىمىزگە دەگەن قۇرمەتىمىز. ال ەندى ءبىر وتباسىنىڭ ۇيتقىسى، ءبىرءۇيدىڭ تىرەگى بولعان ايەلدەر باكى ۇستاپ الدىنا كەلگەن استى تۋراۋدى بىلمەسە، وندا بۇعان نە دەيمىز؟! جاستار بولسا مەيلى ەدى، وتاۋ كوتەرگەلى تالاي جىل بولىپ، وردانىڭ وشاعىن تۇتاتىپ وتىرعانداردىڭ «باكى ۇستاي المايمىن دەپ» كەسىرلەنسە بۇعان نە دەيمىزا؟! بۇلاردى اينالاسىنداعىلاردى الىمسىنبادى دەيمىز بە، ەت تۋراعاندى اۋىر كوردى دەيمىز بە؟!داستۇرىمىزگە، تۇرمسىمىزعا، تابيعاتىمىزعا جات وسىنداي جايلاردىڭ ايتپاۋدان ايبىمىزعا اينالىپ قالماسىنا كىم كەپىل؟! سوندىقتان، اعايىندارعا «داستۇرىمىزگە دەگەن قۇرمەتىمىز الدىمىزعا كەلگەن اسقا دەگەن قۇرمەتتەن باستاۋ السا ەكەن» دەگىم كەلەدى.
جاۋاپتى رەداكتورى : مۇحيت امانتاي ۇلى
وقىرمان نازارىنا
نازار سالا كەتەرسىز
- 1.
جۇڭحۋا حالىق رەسپۋبليكاسىنىڭ قاتىستى زاڭ-ەرەجەلەرىنە بويسىنىپ، توراپتا ءمورالدى بولىڭىز، ءسىزدىڭ ارەكەتىڭىز سەبەبىنەن تىكەلەي نەمەسە جانامالاي تۋىنداعان زاڭدىق جاۋاپكەرشىلىكتى ءوزىڭىز ارقالايسىز.
2.
قالام اتىڭىز بەن جازعان لەبىزىڭىزدى باسقارۋدىڭ بارلىق ۇقىعى حالىق تورابىنا ءتان.
3. حالىق تورابىنىڭ ءسىزدىڭ حالىق تورابىنىڭ لەبىز جازۋ بەتىنە جازعان لەبىزىڭىزدى توراپ ىشىندە كوشىرۋ نەمەسە لەبىزىڭىزدەن سيتات كەلتىرۋ ۇقىعى بار.
4.
ەگەر باسقارۋ جاعىنا پىكىرىڭىز بولسا، لەبىز جازۋ بەتىنىڭ باسقارۋشىسىنا نەمەسە حالىق گازەتى مەكەمەسىنىڭ توراپ ورتالىعىنا اڭىس ەتىڭىز.
تەلەفون: 67 /65368365-010 حات ساندىعى: kazakh@peopledaily.com.cn
بۇل بەتتىڭ مەنشىك ۇقىعى حالىق تورابىنا ءتان، كەلىسىمنەن وتپەگەندە كوشىرىپ پايدالانۋعا بولمايدى
Copyright © 1997-2012 by www.people.com.cn. all rights reserved
جۇڭگو كوممۋنيستىك پارتياسى اقپارات تورابى 
بۇل حابارعا باعاڭىز
لەبىز جازۋ
