مەملەكەت ءتوراعاسى شي جينپيڭ 2022 - جىلعى جاڭا جىلدى قۇتتىقتاۋ ءسوزىن سويلەدى

2021.12.31 23:03   كەلۋ قاينارى : حالىق تورابى

　　شينحۋا اگەنتتىگى، 12 - ايدىڭ 31 - كۇنى، بەيجيڭ. جاڭا جىل قارساڭىندا مەملەكەت ءتوراعاسى شي جينپيڭ ورتالىق راديو - تەلەۆيزيا باس ستانسياسى جانە ينتەرنەت ارقىلى 2022 - جىلعى جاڭا جىلدى قۇتتىقتاۋ ءسوزىن سويلەدى. ءسوزدىڭ تولىعى تومەندەگىدەي:

　　كوپشىلىك، سالەمەتسىزدەر مە! 2022 - جىل تاياپ قالدى، مەن بەيجيڭدە كوپشىلىككە جاڭا جىل بايلانىسىمەن ىزگى تىلەك تىلەيمىن!

　　وسى جىلعا قايىرىلا قاراساق، ءمانى وزگەشە بولدى. ءبىز پارتيا مەن مەملەكەت تاريحىنداعى بەلەستىك مانگە يە ءىرى ىستەردى باستان وتكەردىك. «ەكى 100 جىلدىق» كۇرەس نىساناسى تاريحي تۇرعىدان توعىستى، ءبىز جاپپاي سوتسياليستىك وسىزاماندانعان مەملەكەت قۇرۋدىڭ جاڭا ساپارىن باستاپ، جۇڭحۋا ۇلتىنىڭ ۇلى گۇلدەنۋىن جۇزەگە اسىرۋ جولىندا ارشىندى قاداممەن العا باسۋدامىز.

　　جىل باسىنان جىل سوڭىنا دەيىن ەگىس اتىزدارىندا، كاسىپورىنداردا، الەۋمەتتىك اۋماقتاردا، مەكتەپتەردە، شيپاحانالاردا، اسكەري كازارمالاردا، عىلمي زەرتتەۋ ورىندارىندا ... كوپشىلىك ءبىر جىل قاربالاستىققا ءتۇسىپ، ەڭبەك ەتىپ، ۇلەس قوسىپ، تابىسقا دا قول جەتكىزدى. زىمىراپ وتكەن ۋاقىت اياسىندا ءبىز كورگەن، سەزىنگەن جۇڭگو قايسار، گۇلدەنىپ - كوركەيگەن جۇڭگو بولدى. بۇل ارادا باۋىرمال، قادىرمەندى حالىق، كۇن سايىن تۇلەجىگەن دامۋشىلىق، ۇرپاقتان - ۇرپاققا جالعاسىپ كەلە جاتقان ىستەر بار.

　　7 - ايدىڭ 1 - كۇنى ءبىز جۇڭگو كوممۋنيستىك پارتياسى قۇرىلعانىنىڭ 100 جىلدىعىن سالتاناتپەن قۇتتىقتادىق. تيان - انمىن مىنبەسىندە تۇرىپ ايرىقشا تەبىرەندىك، تاريحي ساپار اۋمالى - توكپەلى بولدى، جۇڭگو كوممۋنيستەرى ميلليارد حالىقتى باستاپ، قيىن - قىستاۋ جاعدايدا توسقاۋىلداردى بۇزىپ، حاۋىپ - قاتەردى باستان كەشىرسە دە، العان بەتىنەن قايتپاي، 100 جىلدىق ۇلكەن پارتيانىڭ ايبىندى بەينەسىن سومدادى. اۋەلگى ماقساتتى ۇمىتپاعاندا عانا، ىستەرىمىز باستان - اياق باياندى بولادى. ءبىز ەرلىكپەن العا ۇمتىلىپ، العان بەتتەن قايتپاساق بولعانى، تاريحتىڭ، ءداۋىردىڭ، حالىقتىڭ ءۇمىتىن اقتاي الامىز.

　　پارتيا 19 - كەزەكتى ورتالىق كوميتەتىنىڭ التىنشى جالپى ءماجىلىسى پارتيانىڭ 3 - تاريحي قارارىن ماقۇلدادى. 100 جىلدىق تابىس ادامدى جەلپىندىرەدى، 100 جىلدىق تاجىريبە ادامعا وي سالادى. مەن كەزىندە ءتوراعا ماۋ زىدۇڭ مەن حۋاڭ يانپەي مىرزانىڭ «ياۋدۇڭداعى ديالوگى» جونىندە ايتقان ەدىم، ءبىز وزىندىك توڭكەرىس جاساۋعا باتىل بولعاندا عانا، تاريحي ىرىقتىلىققا قول جەتكىزە الامىز. جۇڭحۋا ۇلتىنىڭ ۇلى گۇلدەنۋىن جۇزەگە اسىرۋ استە قۇر ايعاي - سۇرەنمەن وڭاي - وسپاق بىتە سالاتىن شارۋا ەمەس، استە، بوگەتسىز، ءاپ - ساتتە جەتە سالاتىن شارۋا دا ەمەس. ءبىز ۇزاق بولاشاققا وي جۇگىرتىپ، امانشىلىقتا جامانشىلىقتىڭ بولارىن ويلاپ، ستراتەگيالىق تاباندىلىق پەن توزىمدىلىكتى ساقتاپ، كەڭ اۋقىممەن ساناسىپ، ءىستى ەگجەي - تەگجەيلى، تىڭعىلىقتى ورىنداۋىمىز كەرەك.

　　ءىرى ەلدىڭ ۇلكەندىگى دە، ءىرى ەلگە ءتان سالماعى دا بار. سان قيلى كۇردەلى ىستەر، سايىپ كەلگەندە، سان مىڭداعان وتباسىنىڭ ءىسى. مەن كەيبىر جەرلەرگە تەكسەرۋ - زەرتتەۋ جۇرگىزىپ، كوپتەگەن جاعدايلاردى كورىپ، ەستىپ، ەرەكشە شابىت الدىم جانە كوپ نارسەنى كوكەيگە ءتۇيدىم. بۇقارانىڭ ۇيىنە بارعان سايىن تاعى قانداي قيىنشىلىعى بار ەكەنىن سۇراپ وتىردىم، اۋىلداستاردىڭ ءسوزىن كوكەيدە بەرىك ساقتادىم.

　　حالىقتىڭ مۇڭ - مۇقتاجىنا، ءسوز جوق، باس قاتىرامىن؛ حالىقتىڭ تىلەگىن ورىنداۋعا، ءسوز جوق، قۇلشىنامىن. مەن دە اۋىل - قىستاقتان شىقتىم، كەدەيلىكتىڭ قانداي ەكەنىن جاقسى تۇسىنەمىن. ۇرپاقتان - ۇرپاققا جالعاسقان قۇلشىنىستار ارقىلى بۇرىن كەدەيشىلىك كورگەن جاندار قازىر قارنى توق، كيىمى كوك جاعدايعا جەتتى، بالا وقىتۋدان، تۇرعىن ۇيدەن، ەمدەۋ قامسىزداندىرۋىنان تارىقپايتىن بولدى. جاپپاي دوڭگەلەك داۋلەتتى قوعام قۇرۋ، كەدەيلىكتەن ارىلتۋ − پارتيامىزدىڭ حالىققا بەرگەن جاۋابى ءارى دۇنيە جۇزىنە قوسقان ۇلەسى. كوپشىلىكتىڭ ءتىپتى دە جاقسى تۇرمىس كەشىرۋىنە مۇمكىندىك جاساۋ ءۇشىن، ءبىزدىڭ كوز الداعى ناتيجەگە قاناعاتتانۋىمىزعا بولمايدى، ءالى دە ۇزاق جول باسۋىمىزعا تۋرا كەلەدى.

　　حۋاڭحى وزەنىنىڭ ساباسىنا ءتۇسۋى − جۇڭحۋا ۇلاندارىنىڭ مىڭ جىلدىق تىلەگى. تاياۋ جىلداردان بەرى مەن حۋاڭحى وزەنىنىڭ جوعارعى، ورتا، تومەنگى اعارلارىنداعى 9 ولكە، اۆتونوميالى رايوندى ارالاپ شىقتىم. مەيلى حۋاڭحى وزەنى، چاڭجياڭ وزەنى سياقتى «انا وزەندەر» بولسىن، الدە كوگىلدىر تولقىندى چيڭحاي كولى بولسىن، ايبىندى يارلۇڭزاڭبۋ وزەنى بولسىن؛ مەيلى وڭتۇستىكتىڭ سۋىن سولتۇستىككە جەتكىزۋ عاسىرلىق ينجەنەرياسى بولسىن، الدە سايحانبا ورمان الاڭىنىڭ «جاسىل كارتاسى» بولسىن؛ مەيلى يۇنناننىڭ ءپىلى سولتۇستىككە بەت السىن، الدە تيبەت بوكەنى ءوسىپ - ءوربىسىن ... وسىلاردىڭ بارلىعى ادام جاسىل تاۋدى ارداقتاسا، جاسىل تاۋ، ءسوز جوق، ادامنىڭ ءۇمىتىن اقتايتىنىن ەسكەرتىپ وتىر.

　　وسى ءبىر جىلدا ەستەن كەتپەس جۇڭگو ءۇنى، جۇڭگو ءساتى، جۇڭگو حيكايالارى دا تولىپ جاتىر. «پارتيانى الاڭسىز ەتىپ، مەملەكەتتى قۇدىرەتتەندىرۋدە مەن بارمىن» اتىنداعى جاستىق كوكتەم سەرتى، «پاك سۇيىسپەنشىلىك جۇڭگو ءۇشىن عانا» دەگەن تەرەڭ سۇيىسپەنشىلىككە تولى داتتەمە؛ «جۋرۇڭ ءنومىرلى مارس ماشيناسىنىڭ» مارستى بارلاۋى، «شيحى ءنومىرلى» كۇندى بارلاۋ جاساندى سەرىگىنىڭ ۇشىرىلۋى، «تيانحى ءنومىرلى» وزەكتى بولمەنىڭ عارىشقا ۇشىرىلۋى؛ سپورت ساڭلاقتارىنىڭ اسقاق جىگەرمەن العا ۇمتىلىپ، ەرلىكپەن الدىڭعى قاتاردان كورىنۋى؛ بۇكىل ەل بويىنشا جوعارىدان تومەنگە دەيىن ىندەتتەن ساقتانۋ - تىزگىندەۋگە جۇمىلۋدىڭ باتىل دا پارمەندى بولۋى؛ اپاتقا ۇشىراعان بۇقارانىڭ ءبىر - بىرىنە قول ۇشىن بەرىپ، اتا مەكەندەرىن قايتا قۇرۋى؛ حالىق ازاتتىق ارمياسىنىڭ كوماندير - جاۋىنگەرلەرىنىڭ، قارۋلى ساقشى وفيتسەر - اسكەرلەرىنىڭ ارميانى قۇدىرەتتەندىرۋدى مۇرات ەتىپ، وتاندى قورعاۋى ... سانسىز قاراپايىم قاھارماندار ەرلىكپەن كۇرەس جۇرگىزىپ، جاڭا داۋىردەگى جۇڭگونىڭ اسقاق جىگەرمەن قارىشتاپ العا باسۋىنىڭ بۋىرقانعان ارناسىن قالىپتاستىردى.

　　وتانىمىز شياڭگاڭ مەن اۋمىننىڭ گۇلدەنىپ - كوركەيۋىن، ورنىقتىلىعىن باستان - اياق كوكەيدە ساقتاپ كەلەدى. ءبىر جاعادان باس، ءبىر جەڭنەن قول شىعارىپ، بىرگە قۇلشىنعاندا عانا، «ءبىر ەل، ەكى ءتۇزىم» ورنىقتى قاداممەن الىسقا جەتە الادى. وتاننىڭ بۇكىلدەي بىرلىككە كەلۋىن جۇزەگە اسىرۋ − ەكى جاعالاۋداعى باۋىرلاستاردىڭ ورتاق تىلەگى. بارلىق جۇڭحۋا ۇلاندارىنىڭ قول ۇستاسا العا باسىپ، جۇڭحۋا ۇلتىنىڭ كوركەم بولاشاعىن بىرگە جاراتۋىن شىن جۇرەكتەن ءۇمىت ەتەمىن.

　　شەتەل باسشىلارىمەن جانە حالىقارالىق ۇيىمداردىڭ جاۋاپتىلارىمەن تەلەفوندا سويلەسىپ، بەينە ەكراندا ديدارلاسقان كەزىمدە، ولار جۇڭگونىڭ ىندەتكە قارسى اتتانۋدا جانە بۇكىل دۇنيە ءجۇزىنىڭ ىندەتتەن ساقتانۋ - تىزگىندەۋ جولىندا قوسقان ۇلەسىن تالاي رەت القادى. قازىرگە دەيىن جۇڭگو 120 دان استام مەملەكەت پەن حالىقارالىق ۇيىمدى 2 ميلليارد دانادان استام جاڭا تيپتى ايدارشا ۆيرۋس ۆاكسيناسىمەن قامدادى. دۇنيە جۇزىندەگى ءار ەل جاپا - ماشاقاتتا بىرگە بولىپ، ىنتىماقتاسا سەلبەسكەندە عانا ادامزاتتىڭ تاعدىرلاس ورتاق تۇلعاسىن قۇرۋدىڭ جاڭا تاراۋىن جازا الادى.

　　تاعى ءبىر ايدان استام ۋاقىت وتكەن سوڭ بەيجيڭ قىسقى وليمپيادا سپورت جارىسى مەن مۇگەدەكتەر قىسقى وليمپيادا سپورت جارىسى باستالادى. ءتىپتى دە كوپ ادامدى قار - مۇز سپورتىنا قاتىناستىرۋ دا وليمپيادا سپورتى تاقىرىبىنىڭ ءبىر مازمۇنى سانالادى. ءبىز شىن ىقىلاسپەن دۇنيە جۇزىنە ءبىر كەزەكتى سالتاناتتى وليمپيادا سپورت جارىسىن وتكىزىپ بەرەمىز. دۇنيە ءجۇزى جۇڭگونى كوكسەپ وتىر، جۇڭگو تاس ءتۇيىن دايىندالىپ بولدى.

　　جاڭا جىلدىڭ قوڭىراۋى قاعىلۋ الدىندا تۇر. ءبىزدىڭ 3 عارىشكەرىمىز ۇشى - قيىرسىز الەم كەڭىستىگىندە «ءىسساپاردا» ءجۇر، شەتەلدەگى باۋىرلاستار ءالى دە قاجىرلىلىقپەن ەڭبەكتەنىپ كەلەدى، ەلشىحانا، كونسۋلحانا، جۇڭگو قارجىلاندىرعان كاسىپورىندار سياقتى شەتەلدە تۇراتىن قىزمەتكەرلەر مەن شەتەلدە وقىپ جاتقان قالىڭ وقۋشىلار ءالى دە ءوز ىستەرىن باتىلدىقپەن، تاباندىلىقپەن جالعاستىرۋدا، سانسىز ارمانعا قۇلاش سەرمەۋشىلەر ءالى دە كۇرەس جاساپ، ۇلەس قوسىپ كەلەدى. كوپشىلىك، جاپا شەكتىڭىزدەر، مەن كوپشىلىككە شىن جۇرەكتەن جاڭا جىل بايلانىسىمەن سالەم جولدايمىن!

　　بولاشاققا بىرگە بەت الايىق! ەل امان، جۇرت تىنىش بولسىن!

　　كەلۋ قاينارى: حالىق تورابى