ا ق ش عارىش مەكەمەسى جەر شارىنىڭ «تۋىسىن» تاپقانىن جاريالادى

بۇل عالامشاردا سۇيىق كۇيدەگى سۋ بار بولۋى مۇمكىن

2015.07.24 14:07   كەلۋ قاينارى : حالىق تورابى

　　كەپلەر 452b مەن جەر شارىنىڭ ۇلكەن – كىشىلىگىن سالىستىرعان سۋرەت (سولدا جەر شارى، وڭدا كەپلەر 452b، سۋرەت NASA تورابىنان الىنعان)

　　حالىق تورابى، 24 – شىلدە، بەيجيڭ. NASA بەيجيڭ ۋاقىتى بويىنشا بۇگىن تاڭ سارىدە اسا ماڭىزدى حابار جاريالادى: اتالعان مەكەمە كەپلەر تەلەسكوبىمەن جەر شارىنىڭ «ءارى ۇلكەن ءارى جاسامىس تۋىسىن» تاپقانىن جاريالادى. بۇل ادامزاتتىڭ باسقا «جەر شارىن» ىزدەۋ بارىسىندا باسقان ءبىر بەلەسى. بۇدان بۇرىن ادامزات جەر شارىنىڭ «جاقىن تۋىستارى» ەسەپتەلەتىن 11 جۇلدىزدى بايقاعان بولاتىن.

　　بۇل كەپلەر مىندەتى بارىسىندا تابىلعان ۇلكەن – كىشىلىگى جەر شارىمەن ەڭ قارايلاس قىدىرما جۇلدىز، وعان كەپلەر 452b دەپ ات قويىلعان، بۇل قىدىرما جۇلدىز G2 تۇرىنە جاتاتىن تۇراقتى جۇلدىزدى اينالادى، سوڭعىسى كۇنگە ۇقساس جۇلدىز. كەپلەر 452b بۇل جۇلدىزدىڭ «قونىستانۋعا ۇيلەسىمدى بەلدەۋىندە» ارەكەتتەنەدى، «قونىستانۋعا ۇيلەسىمدى بەلدەۋ» دەگەنىمىز تۇراقتى جۇلدىز توڭىرەگىندەگى بەلگىلى ارالىقتاعى اۋماقتى كورسەتەدى، وسى اۋماقتا سۋ سۇيىق كۇيدە بولادى.

　　كەپلەر 452bنىڭ كولەمى شامامەن جەر شارىنان %60تەي ۇلكەن. جەر شارىنان 1400 جارىق جىلى قاشىقتىقتا، اققۋ جۇلدىز شوعىرىنا ورنالاسقان. ونىڭ ماسساسى مەن قۇرامى ءالى تۇراقتاندىرىلمادى، كەيبىر زەرتتەۋ ناتيجەلەرىنە قاراعاندا، كەپلەر 452bنىڭ تاۋ جىنىسىنان قۇرالعان قىدىرما جۇلدىز بولۋ مۇمكىندىگى كۇشتى. كەپلەر 452b جۇلدىزىندا ءبىر جىل شامامەن 385 كۇن بولىپ، جەر شارىنداعى 365 كۇننەن ونشا پارىقتالمايدى.

　　«كەپلەر 452bنى جەر شارىنىڭ جاسامىس تارتقان، تۇلعاسى جەر شارىنان كورى ءىرى كەلەتىن ‹تۋىسى› دەپ ەسەپتەۋگە بولادى»، - دەيدى بۇل جۇلدىزدى بايقاعانداردىڭ ءبىرى جون جەنكنيس. ەگەر جەر شارىنىڭ تاريحى بويىنشا ەسەپتەسەك، بۇل جۇلدىزدىڭ «قونىستانۋعا ۇيلەسىمدى بەلدەۋدە» تۇرعانىنا 6 ميلليارد جىل بولعان، بۇل جەر شارىنىڭ «قونىستانۋعا ۇيلەسىمدى بەلدەۋدە» تۇرعان ۋاقىتىنان ۇزاق، بۇل وسى جۇلدىزدا تىرشىلىك بولۋىنىڭ ماڭىزدى شارتتارىنىڭ ءبىرى.

　　كەلۋ قاينارى: حالىق تورابى