بەتتى ساقتاۋ | باس بەت ەتۋ | حات ساندىعى | حابارلاسىڭىز | ءبىز تۋرالى
حالىق تورابى>>كوپ بەتتىك حابارلار

دۋماندى مەرەكە، ءدۇبىرلى جارمەڭكە

ـــ ءدوربىلجىن اۋداندىق 6 - كەزەكتى قار - مۇز مادەنيەت - ساياحات مەرەكەسى

2017.01.03 16:53   كەلۋ قاينارى : ءتاڭىرتاۋ تورابى



  ءتاڭىرتاۋ تورابىنىڭ تىلشىلەرى الىمبەك نۇرالين مەن جانبولات ماناربەك ۇلى حابارلايدى. قويناۋى قۇتقا، دالاسى دانگە تولعان ىرىستى مەكەن دوربىلجىندە جۇڭگو باتىس ءوڭىر قار - مۇز ساياحات مەرەكەسى ـــ اۋداندىق 6 - كەزەكتى قار - مۇز مادەنيەت - ساياحات مەرەكەسى تاۋىق جىلىنىڭ العاشقى اق تاڭىندا، اقشا قارمەن كومكەرىلگەن ەمىل قار شاڭعى الاڭىندا سالتاناتپەن باستالدى. تارباعاتاي ايماقتىق ءۋالي مەكەمەسى، ايماقتىق ۇگىت ءبولىمى، اۆتونوميالى رايوندىق ساياحات مەكەمەسىنەن جانە كورشىلەس اۋدان، قالالاردان كەلگەن قاتىستى باسشىلار، اۋداندىق پارتكومنىڭ ورىنباسار شۋجيى، اۋدان اكىمى ماقسۇتقان ءجامساپ ۇلى قيمىلدىڭ باستالۋ سالتىنا قاتىناستى.

  اۋدان اكىمى ماقسۇتقان ءجامساپ ۇلى بۇل جولعى قيمىلدىڭ ءمانى مەن ماڭىزى تۋرالى بىلاي دەدى: «قار - مۇز مادەنيەت - ساياحات مەرەكەسى بۇدان بۇرىن بەس كەزەك وتكىزىلگەن. بۇل جولعى قار - مۇز مادەنيەت - ساياحات مەرەكەسى جۇڭگونىڭ باتىس وڭىرىندەگى اۋدان، قالالاردىڭ قار - مۇز سالت - سانا، ساياحات مەرەكەسىنىڭ ءبىر بولەگى بولىپ، وسىعان ساباقتاسىپ جاتقان ءدوربىلجىن اۋداندىق 2 - كەزەكتى باعىتتامالى دالا جۇگىرىسى (الەۋمەتتىك يگىلىك سيپاتىندا)، ءدوربىلجىن اۋدانىنىڭ اۋىل شارۋاشىلىعى قوسىمشا ونىمدەرى كورمەسى، قار ءۇستى قىزىقتى ويىندارى سياقتى جەلىلەس قيمىلداردى قامتيدى. قار - مۇز مادەنيەت - ساياحات مەرەكەسىن وتكىزۋ ارقىلى قىسقى ساياحاتتىڭ دامۋىن جەبەپ، حالىق بۇقاراسىنىڭ قار - مۇز سپورتىنا قاتىناسۋ بەلسەندىلىگىن جوعارىلاتىپ، ءدوربىلجىن اۋدانى قار - مۇز ساياحاتىنىڭ سارا ماركاسىن جاراتۋعا كۇش سالامىز. سوڭىندا، كوپشىلىكتىڭ جاڭا جىلدارىنىڭ قۇتتى بولۋىن، جارىسقا قاتىناسقان سپورتشىلاردىڭ جۇلدەلى ورالۋىن تىلەيمىن».

  بۇل رەتكى قار - مۇز مادەنيەت - ساياحات مەرەكەسىنىڭ تاعى ءبىر جارقىن ءتۇيىنى وسى قيمىلعا بەسىنشى كەزەكتەن باستاپ قوسىلعان جارىس ءتۇرى ءۇش ادام (ەكى ەر، ءبىر ايەل) ءبىر گرۋپپا بولىپ باسەكەگە تۇسەتىن قارلى القاپتاعى دالا جۇگىرىسى ەدى. مۇندا كاسىپتىك سپورتشىلار گرۋپپاسى جانە بۇقارالىق توپ بولىپ ەكى گرۋپپا بويىنشا جارىس ۇيىمداستىرىلادى. توراپ اقپاراتىنىڭ قۋاتى ءدوربىلجىن اۋدانىنىڭ جاڭالىقتارىن الەمنىڭ ءار بۇرىشىنا جەتكىزدى. وسىنداي سالتاناتتى مەرەكەنىڭ بولارىن توراپتان كورىپ بىلگەن شەتەلدىك ازاماتتار بيىلعى جىلى شينجياڭنىڭ قارلى دالاسىنداعى ءدۇبىرلى دوداعا ات باسىن بۇرىپ، جاڭا جىلدى ەمىل حالقىمەن بىرگە قارسى الىپ، تاۋىق جىلىنىڭ تابىستى بولۋىنا تىلەكتەستىك ءبىلدىردى.

  ساياحات سىندى ءۇشىنشى كاسىپتىڭ دامۋى اۋدان ەكونوميكاسىنىڭ گۇلدەنۋىندە كەم بولسا بولمايتىن ماڭىزدى سالالاردىڭ ءبىرى. اسىرەسە، قىسقى ساياحاتتىڭ جىلدان - جىلعا جاندانىپ، ەل ءىشى - سىرتىنداعى ساياحاتشىلاردى باۋراي ءتۇسۋى كورىكتى ەمىلدىڭ كوركىن اسىرىپ، تۇرعىنداردى ءۇشىنشى كاسىپپەن شۇعىلدانۋعا جەبەپ قالماستان، دالا سەرۋەنىنە باستاپ، كوتەرىڭكى كوڭىل - كۇي، اسقاق رۋح سيلادى. ەمىل قار شاڭعى الاڭىنداعى شاڭعىشىلار بىردە جۇيتكىپ، بىردە باياۋ تەربەلىپ، اپپاق قاردىڭ ۇستىندە اق شاعالاداي ءتىزىلىپ قاتارىمەن ويىن كورسەتتى. قار بەتىندە قارعي جونەلەتىن ءتۇرلى موتوتسيكلدەر مەن جارىس كولىكتەرى دە رەتىمەن ويىن كورسەتىپ، تاماشالاۋشىلاردىڭ تاڭدايىن قاقتىردى. قار شاڭعى الاڭىنىڭ ءبىر بولەگىندە، جاڭا جىلدى جارقىن كوڭىلمەن قارسى العان تۇرعىندار وتباسىلارى، دوستارىمەن بىرگە تاۋعا شىعىپ، قار ويىنىنىڭ قىزىعىنا باتتى.

  جارىس الاڭىنىڭ ءبىر بۇرىشىنا جايعاسقان جارمەڭكەدە ۇلتتىق ونىمدەر، مال شارۋاشىلىق سەلبەستىك كووپەراتيۆتەرى وندىرگەن ەت ونىمدەرى مەن ىشپەك - جەمەكتەر دە ساياحاتشىلار مەن ەمىل حالقىنىڭ قىزۋ قارسى الۋىنا يە بولدى. بۇل رەتكى جارمەڭكە كاسىپكەرلەرگە تاماشا بازار باسەكەسىندىك وراي تۋدىرسا، الارماندار الىسقا شاپقىلاماي - اق، اۋىل ماڭىنان وزدەرى قالاعان ءتيىمدى باعاداعى تاۋارلارىنا قول جەتكىزە الدى.

【1】 【2】 【3】 【4】 【5】 【6】 【7】 【8】 【9】 【10】 【11】 【12】 【13】 【14】 【15】 
【16】 【17】 【18】 【19】 
جاۋاپتى رەداكتورى : نۇرعيسا قۇرمانجان ۇلى

 سۋرەت