شي جينپيڭ رەسەيدىڭ زۇڭتۇڭى پۋتينمەن كەزدەستى

2023.03.21 16:46 كەلۋ قاينارى : حالىق تورابى

　　سول جەر ۋاقىتى بويىنشا 3 - ايدىڭ 20 - كۇنى تۇستەن كەيىن جاڭا عانا ماسكەۋگە جەتكەن مەملەكەت ءتوراعاسى شي جينپيڭ ۋادە بويىنشا كرەمل سارايىندا رەسەيدىڭ زۇڭتۇڭى پۋتينمەن كەزدەستى.

　　سۋرەتتى شينحۋا اگەنتتىگىنىڭ ءتىلشىسى شىن حۇڭ تۇسىرگەن

　　«حالىق گازەتى»، 3 - ايدىڭ 20 – كۇنى، ماسكەۋ (تىلشىلەر يۇي حۇڭجيان، شياۋ شينشين). سول جەر ۋاقىتى بويىنشا 3 - ايدىڭ 20 - كۇنى تۇستەن كەيىن جاڭا عانا ماسكەۋگە جەتكەن مەملەكەت ءتوراعاسى شي جينپيڭ ۋادە بويىنشا كرەمل سارايىندا رەسەيدىڭ زۇڭتۇڭى پۋتينمەن كەزدەستى.

　　شي جينپيڭ بارعاندا كرەمل سارايىنىڭ قولباسشىسى كولىكتەن تۇسكەن جەردەن قارسى الدى. پۋتين زۇڭتۇڭ شي جينپيڭمەن ىستىق ىقىلاسپەن قول الىستى ءارى سۋرەتكە ءتۇستى. ەكى ەل باسشىلارى جۇڭگو - رەسەي قارىم - قاتىناسى جانە ورتاق كوڭىل ءبولىپ وتىرعان ماسەلەلەر جونىندە ىشكەرىلەي، بۇكپەسىز پىكىر اۋىستىردى.

　　شي جينپيڭ مىنالاردى اتاپ كورسەتتى: پۋتين زۇڭتۇڭنىڭ ۇسىنىسىمەن رەسەيدە تاعى دا مەملەكەتتىك ساپاردا بولعانىما توتەنشە قۋانىشتامىن. 10 جىلدىڭ الدىندا مەملەكەت ءتوراعاسى بولعاننان كەيىنگى تۇڭعىش رەتكى ساپارىمدا رەسەيدى تاڭداعانىم كۇنى كەشەگىدەي ەسىمدە. 10 جىلدان بەرى پۋتين زۇڭتۇڭمەن قويۋ بايلانىستا بولدىم. مەيلى مەنىڭ ج ك پ - نىڭ 20 - قۇرىلتايىندا ج ك پ ورتالىق كوميتەتىنىڭ باس شۋجيى بولىپ تاعى دا تاعايىندالعانىمدا بولسىن، الدە تاياۋدا جۇڭگونىڭ مەملەكەت ءتوراعاسى بولىپ قايتا سايلانۋىمدا بولسىن، ءسىز ماعان قۇتتىقتاۋ تەلەگرامماسىن دەرەۋ جولداپ تۇردىڭىز، مەن بۇعان شىنايى العىس ايتامىن. رەسەي كەلەر جىلى زۇڭتۇڭ سايلاۋىن وتكىزەدى. ءسىزدىڭ پارمەندى باسشىلىعىڭىزدا رەسەي قارىشتاپ دامىدى. مەن رەسەي حالقىنىڭ سىزگە ۇزدىكسىز باتىل قولداۋ كورسەتەتىنىنە كامىل سەنەمىن.

　　شي جينپيڭ بىلاي دەپ دارىپتەدى: جۇڭگو - رەسەي قارىم - قاتىناسى دامىپ بۇگىنگى كۇنگە جەتتى، مۇنىڭ تەرەڭ تاريحي لوگيكاسى بار. ەڭ ۇلكەن كورشى ەلدەر جانە جان - جاقتى ستراتەگيالىق سەلبەستىك سەرىكتەرى رەتىندە، جۇڭگو - رەسەي قارىم - قاتىناسى وزدەرىنىڭ ديپلوماتيالىق جالپى جاعدايىندا جانە سىرتقى ساياساتىندا تۇگەلدەي الدىڭعى ورىندا تۇرادى. جۇڭگو ەجەلدەن دەربەس، ءوز - وزىنە قوجا بولۋ سىندى ديپلوماتيالىق ساياسات جۇرگىزىپ كەلەدى. جۇڭگو - رەسەي قارىم - قاتىناسىن ويداعىداي بەكەمدەۋ، ويداعىداي دامىتۋ − جۇڭگو جاقتىڭ ءوزىنىڭ ءتۇبىرلى مۇددەسى مەن دۇنيە ءجۇزىنىڭ دامۋ اۋقىمى نەگىزىندە جاساعان ستراتەگيالىق تالعامى. جۇڭگو جاق رەسەي جاقپەن ستراتەگيالىق ىستەستىكتى كۇشەيتۋدىڭ ۇلكەن بەتالىسىنان اۋىتقىمايدى. جۇڭگو دا، رەسەي دە مەملەكەتتىڭ دامۋىن، گۇلدەنۋىن جۇزەگە اسىرۋعا كۇش سالادى، دۇنيە ءجۇزىنىڭ كوپ ۇيەكتەنۋىن قولدايدى، حالىقارالىق قاتىناستىڭ دەموكراتيالانۋىن ىلگەرىلەتەدى. ەكى جاق ءار سالاداعى ناقتى سەلبەستىكتى اناعۇرلىم تەرەڭدەتىپ، بىرلەسكەن مەملەكەتتەر ۇيىمى سياقتى كوپ جاقتى تۇعىرلارداعى سايكەسۋدى، سەلبەسۋدى كۇشەيتىپ، ءوز ەلدەرىنىڭ دامۋىنا، گۇلدەنۋىنە دەم بەرىپ، دۇنيە ءجۇزىنىڭ بەيبىتشىلىگىنىڭ، ورنىقتىلىعىنىڭ تىرەگى بولۋى كەرەك.

　　پۋتين شي جينپيڭنىڭ رەسەيگە مەملەكەتتىك ساپارمەن كەلگەنىن قىزۋ قارسى الدى، شي جينپيڭنىڭ جۇڭگونىڭ مەملەكەت ءتوراعاسى بولىپ قايتا سايلانعانىن تاعى دا قىزۋ قۇتتىقتادى. پۋتين مىنالاردى ءبىلدىردى: وتكەن 10 جىلدان بەرى جۇڭگونىڭ ءار جاقتاعى دامۋى دۇنيە ءجۇزىن جالت قاراتقان ۇلى جەتىستىككە قول جەتكىزدى، بۇل − ءتوراعا شي جينپيڭنىڭ كورنەكتى باسشىلىعىنىڭ ارقاسى، سونداي - اق جۇڭگونىڭ مەملەكەت ءتۇزىمى مەن جونگە سالۋ جۇيەسىنىڭ ارتىقشىلىعىن دالەلدەدى. مەن ءتوراعا شي جينپيڭنىڭ پارمەندى باسشىلىعىندا، جۇڭگونىڭ، ءسوز جوق، ۇزدىكسىز دامىپ، گۇلدەنىپ، بەلگىلەنگەن ايبىندى نىسانالاردى ءساتتى جۇزەگە اسىراتىنىنا كامىل سەنەمىن. ەكى جاقتىڭ بىرگە قۇلشىنۋىندا، تاياۋ جىلداردان بەرى رەسەي - جۇڭگو قارىم - قاتىناسى ءار سالادا سۇبەلى تابىستارعا قول جەتكىزدى. رەسەي جۇڭگومەن ەكى جاقتى ناقتى سەلبەستىكتى ۇزدىكسىز تەرەڭدەتىپ، حالىقارالىق ىستەردەگى پىكىرلەسۋدى، سەلبەسۋدى كۇشەيتىپ، دۇنيە ءجۇزىنىڭ كوپ ۇيەكتەنۋى مەن حالىقارالىق قاتىناستىڭ دەموكراتيالانۋ اياق الىسىن ىلگەرىلەتۋدى قالايدى.

　　ەكى جاق ۋكراينا ماسەلەسى جونىندە ىشكەرىلەي پىكىر الماستىردى. شي جينپيڭ بىلاي دەپ دارىپتەدى: ۋكراينا ماسەلەسىندە بەيبىتشىلىك، كوكەيگە قونىمدى بولۋ ءۇنى ۇزدىكسىز توعىسۋدا، باسىم كوپ ساندى ەل شۇعىل جاعدايدى باسەڭدەتۋدى قولداپ، بەيبىتشىلىكتى ءناسيحاتتاپ، كەلىسسوز وتكىزۋدى جەبەپ، وتقا ماي قۇيۋعا قارسى تۇردى. تاريحتان قاراعاندا، قاقتىعىستى ەڭ سوڭىندا تىلدەسۋ جانە كەلىسسوز ارقىلى شەشۋگە تۋرا كەلەدى. تاياۋدا جۇڭگو جاق تۇرعى قۇجاتىن ارناۋلى جاريالاپ، ۋكراينا داعدارىسىن ساياسي جولمەن شەشۋگە ۇندەدى، قىرعي قاباقتىق وي جەلىسىنە، سىڭار جاقتى شەكتەۋگە قارسى تۇردى. ءبىز قيىنشىلىق قانشالىق اۋىر بولعان سايىن، بەيبىتشىلىككە سونشالىق مۇمكىندىك قالدىرۋ كەرەك؛ قايشىلىق قانشالىق قيان - كەسكى بولعان سايىن، تىلدەسۋ قۇلشىنىسىنان باس تارتۋعا ءتىپتى دە بولمايدى دەپ قارايمىز. جۇڭگو جاق ۋكراينا ماسەلەسىن ساياسي جولمەن شەشۋدى ىلگەرىلەتۋدە ۇزدىكسىز سىندارلى رول اتقارۋدى قالايدى.

　　پۋتين مىنالاردى ءبىلدىردى: رەسەي جاق جۇڭگو جاقتىڭ كەلەلى حالىقارالىق ماسەلەلەردە ەجەلدەن ءادىل، وبيەكتيۆ، تەپە - تەڭ تۇرعىدا بولىپ، ادىلدىكتى، تۋراشىلدىقتى جاقتاعانىن القايدى. رەسەي جاق جۇڭگو جاقتىڭ ۋكراينا ماسەلەسىن ساياسي جولمەن شەشۋ جونىندەگى تۇرعى قۇجاتىن مۇقيات زەرتتەپ، بەيبىتشىلىك كەلىسسوزىنە اشىق پوزيتسيا ۇستاندى، جۇڭگو جاقتىڭ وسى ماسەلەنى شەشۋدە سىندارلى رول اتقارۋىن قارسى الامىز.

　　ەكى ەل باسشىلارى ەرتەڭ تاعى دا كەڭەس وتكىزىپ، الداعى ءبىر مەزگىلدەگى جۇڭگو مەن رەسەيدىڭ جالپى بەتتىك ستراتەگيالىق سەلبەستىك سەرىكتەستىك قاتىناسىنىڭ جاڭا جوباسىن جوبالاۋدى ءۇمىت ەتەتىندەرىن ءبىلدىردى.

　　كەلۋ قاينارى: حالىق تورابى

جاۋاپتى رەداكتورى : مانەپ ەربول ۇلى

تەلەفون: 65367915-010 ‍حات ساندىعى: kazakh@peopledaily.com.cn
بۇل بەتتىڭ باسپا ۇقىعى حالىق تورابىنا ءتان، كەلىسىمنەن وتپەي كوشىرىپ پايدالانۋعا بولمايدى
Copyright © 1997-2023 by www.people.com.cn. all rights reserved