شي جينپيڭ كولۋمبيانىڭ زۇڭتۇڭى پەترومەن كەڭەس وتكىزدى

2023.10.26 16:03 كەلۋ قاينارى : حالىق تورابى

10 - ايدىڭ 25 - كۇنى تۇستەن كەيىن مەملەكەت ءتوراعاسى شي جينپيڭ جۇڭگوعا مەملەكەتتىك ساپارمەن كەلگەن كولۋمبيانىڭ زۇڭتۇڭى پەترومەن كەڭەس وتكىزدى. سۋرەتتە: كەڭەستەن بۇرىن شي جينپيڭ حالىق سارايىنىڭ سولتۇستىك زالىندا پەتروعا ارناپ قارسى الۋ سالتىن وتكىزۋدە. سۋرەتتى شينحۋا اگەنتتىگىنىڭ ءتىلشىسى حۋاڭ جيڭۋىن تۇسىرگەن

　　شينحۋا اگەنتتىگىنى، 10 - ايدىڭ 25 – كۇنى، بەيجيڭ (ءتىلشى ليۋ حۋا). 10 - ايدىڭ 25 – كۇنى تۇستەن كەيىن مەملەكەت ءتوراعاسى شي جينپيڭ جۇڭگوعا مەملەكەتتىك ساپارمەن كەلگەن كولۋمبيانىڭ زۇڭتۇڭى پەترومەن كەڭەس وتكىزدى. ەكى ەل مەملەكەت باسشىلارى جۇڭگو مەن كولۋمبيا قارىم - قاتىناسىن ستراتەگيالىق سەرىكتەستىك قارىم - قاتىناس دەڭگەيىنە كوتەرەتىندەرىن جاريالادى.

　　شي جينپيڭ بىلاي دەپ اتاپ كورسەتتى: جۇڭگو مەن كولۋمبيا ديپلوماتيالىق قارىم - قاتىناس ورناتقان 43 جىلدان بەرى ەكى ەل قارىم - قاتىناسى حالىقارالىق اۋمالى - توكپەلى وزگەرىستەردىڭ سىنىنان ءوتىپ، باستان - اياق تاماشا دامۋ ارىنىن ساقتادى. ەكى جاق ءبىر - ءبىرىنىڭ وزەكتى مۇددەسىنە جانە ءجىتى قاداعالاپ وتىرعان كەلەلى ىستەرىنە ساياتىن ماسەلەلەردە ءوزارا ءتۇسىنىسىپ جانە قولداۋ كورسەتىپ، ءار سالاداعى سەلبەستىك تىڭعىلىقتى ىلگەرىلەپ، حالىقتار دوستىعى كۇن سايىن جۇرت جۇرەگىنە تەرەڭ ۇيالادى. جۇڭگو مەن كولۋمبيانىڭ ستراتەگيالىق سەرىكتەستىك قارىم - قاتىناس ورناتۋى − ەكى ەلدەگى ءار سالانىڭ ۇزاق ۋاقىت قۇلشىنۋىنىڭ ناتيجەسى، سونداي - اق ەكى جاقتىڭ ءوزارا سەنىمدىلىگى مەن سەلبەستىگىنىڭ شارت – جاعدايى پىسىپ – جەتىلگەنىنىڭ بەينەسى، ەكى جاقتىڭ بارىنشا قاستەرلەۋىن جانە ۇزدىكسىز بايىتىپ، دامىتۋىن قاجەت ەتەدى. جۇڭگو جاق كولۋمبيا جاقپەن بىرگە جۇڭگو مەن كولۋمبيانىڭ ستراتەگيالىق سەرىكتەستىك قارىم - قاتىناسىنىڭ ەكى ەل حالىقتارىن اناعۇرلىم ويداعىداي باقىتقا كەنەلتۋىن ىلگەرىلەتىپ، دۇنيە ءجۇزىنىڭ بەيبىتشىلىگى مەن دامۋىنا وڭ ەنەرگيا ۇستەۋدى قالايدى.

　　شي جينپيڭ جۇڭگو ۇلگىسىندەگى وسىزامانداندىرۋدىڭ ماندىك ءمانىن تەرەڭ پايىمدادى. شي جينپيڭ مىنالاردى دارىپتەدى: جۇڭگو جاق كولۋمبيانىڭ ءوز ەلىنىڭ مەملەكەت جاعدايىنا ۇيلەسەتىن دامۋ جولىن دەربەس، ءوز - وزىنە قوجا بولا وتىرىپ قاراستىرۋىن قولدايدى، كولۋمبيانىڭ بەيبىتشىلىك اياق الىسىنا قولداۋ كورسەتەدى، كولۋمبيانىڭ جاپپاي، ءۇرتىس، باياندى بەيبىتشىلىكتى ەرتەرەك جۇزەگە اسىرۋىن ءۇمىت ەتەدى، جۇڭگونىڭ ساپالى دامۋى مەن وسىزاماندانۋ اياق الىسىنىڭ كولۋمبيانى قامتىعان دۇنيە جۇزىندەگى ەلدەرگە دامۋدىڭ جاڭا ورايىن الا كەلەتىنىنە سەنەدى. جۇڭگو – كولۋمبيا قارىم - قاتىناسى تەڭدىك، ءوزارا تيىمدىلىك، تەڭ يگىلىككە كەنەلۋدى نەگىز ەتەدى. كولۋمبيانىڭ ”ءبىر بەلدەۋ، ءبىر جولدى“ بىرگە قۇرۋ ۇلى شاڭىراعىنا ەرتەرەك قاتىناسىپ، بىرگە دامۋدى، گۇلدەنۋدى جۇزەگە اسىرۋىن قارسى الامىز. ەكى جاق ەكونوميكا - ساۋدا ارالاس كوميتەتى مەحانيزمىنەن ويداعىداي پايدالانىپ، ەكى جاقتى ساۋدا قۇرىلىمىن ساپالىلاندىرىپ، ينفورماتسيا، حابارلاسۋ، سيفرلى ەكونوميكا سياقتى سالالارداعى سەلبەستىكتى كۇشەيتۋى كەرەك، جۇڭگو جاق كولۋمبيانىڭ اناعۇرلىم كوپ ەرەكشە ساپالى ونىمدەرىنىڭ جۇڭگو بازارىنا كىرۋىنە دەم بەرەدى. كولۋمبيا جاقتىڭ جۇڭگو العا قويعان دۇنيە جۇزىلىك تازا ەنەرگيا سەلبەستىك سەرىكتەستىك قاتىناسى باستاماسىنا قاتىناسىپ، جاسىل دامۋ ورايىنان بىرگە يگىلىكتەنۋىن قارسى الامىز. ەكى جاق حانزۋ ءتىلى وقىتۋى، كوركەمونەر ۇيىرمەلەرىنىڭ ءوزارا ساپاردا بولۋى، ساياحات سياقتى گۋمانيتارلىق اۋىس - كۇيىستى كۇشەيتىپ، ەسىرتكىگە تيىم سالۋ، ەل ارالىق قىلمىستارعا سوققى بەرۋ سياقتى سالالارداعى ەكى جاقتى زاڭ اتقارۋ سەلبەستىگىن كۇشەيتۋى كەرەك، كولۋمبيا جاقتىڭ كولۋمبياداعى جۇڭگو ازاماتتارىنىڭ، كاسىپورىندارىنىڭ، قۇرىلىمدارىنىڭ حاۋىپسىزدىگىن ويداعىداي قامتاماسىزداندىرۋىن ءۇمىت ەتەمىن. جۇڭگو مەن كولۋمبيا ەكەۋى دە وركەندەپ كەلە جاتقان ەلدەر، ەكى جاق حالىقارالىق ىستەردەگى پىكىرلەسۋدى، سەلبەسۋدى كۇشەيتىپ، وركەندەپ كەلە جاتقان ەلدەردىڭ ورتاق مۇددەسىن جانە حالىقارالىق ادىلدىك پەن تۋراشىلدىقتى قورعاۋى كەرەك.

　　شي جينپيڭ كولۋمبيانىڭ لاتىن امەريكاسى مەن كارايب ەلدەرى ورتاق تۇلعاسىنىڭ 2025 - جىلعى كەزەكتى ءتوراعا ەلى مىندەتىن وتكىزىپ العانىن قۇتتىقتاپ، بىلاي دەپ اتاپ كورسەتتى: جۇڭگو جۇڭگو - لاتىن امەريكاسى قارىم - قاتىناسىن دامىتۋعا ايرىقشا ءمان بەرەدى، لاتىن امەريكاسىنىڭ جانە كارايب ءوڭىرىنىڭ ءبىر تۇلعالانۋ اياق الىسىن بۇرىنعىداي قولدايدى، لاتىن امەريكاسىمەن بىرگە كەلەر جىلعى جۇڭگو - لاتىن امەريكا ەلدەرى تالقى مىنبەرى قۇرىلعانىنىڭ 10 جىلدىعىن وراي ەتىپ، جاڭا داۋىردەگى جۇڭگو – لاتىن امەريكاسى قارىم - قاتىناسىنىڭ ورنىقتى، باياندى دامۋىن ىلگەرىلەتۋدى قالايدى.

　　پەترو مىنالاردى ءبىلدىردى: ارادا تالاي جىل وتكەن سوڭ جۇڭگوعا تاعى دا ساپارلاي كەلگەنىمە وتە قۋانىشتىمىن، بۇگىنگى جۇڭگو مەن دۇنيە جۇزىندە وراسان زور وزگەرىستەر تۋىلدى، جۇڭگو توڭكەرىسى مەن قۇرىلىسىنىڭ نازارياسى مەن امالياتى ماڭىزدى وي سالۋ مانىنە يە. كولۋمبيا جاق ءتوراعا شي جينپيڭ العا قويعان ”ءبىر بەلدەۋ، ءبىر جول“ باستاماسىنا وسكەلەڭ ءمان بەرەدى. كولۋمبيا مەن جۇڭگو ستراتەگيالىق سەرىكتەستىك قارىم - قاتىناس ورناتقاننان كەيىن، كولۋمبيا ءوزىنىڭ وڭىرلىك باسىمدىعى مەن دامۋ ستراتەگياسىن ”ءبىر بەلدەۋ، ءبىر جول“ باستاماسىمەن ۇشتاستىرىپ، نەگىزدىك قۇرىلعى، تازا ەنەرگيا سياقتى سالالارداعى سەلبەستىكتى كۇشەيتۋدى قالايدى، جۇڭگو كاسىپورىندارىنىڭ كولۋمبياعا بارىپ قارجى قوسۋىن، ەكى جاقتى ساۋدا قارىم - قاتىناسىنىڭ اناعۇرلىم بىركەلكى دامۋىن ىلگەرىلەتۋىن قارسى الادى، بۇل كولۋمبيانىڭ ەل ءىشىنىڭ بەيبىتشىلىك اياق الىسىن ىلگەرىلەتۋىنە، حالىق اڭساعان بەيبىتشىلىكتى، ورنىقتىلىقتى جانە جۇمىستانۋدىڭ ارتۋىن جۇزەگە اسىرۋىنا سەپتىگىن تيگىزەدى، ءوڭىردىڭ جانە دۇنيە ءجۇزىنىڭ ۇلاستىرۋ – تۇتاستىرۋىن دا كۇشەيتەدى. كولۋمبيا جاق جۇڭگو جاقپەن پالەستينا - يزرايل جاعدايى سياقتى ماسەلەلەر جونىندە تىلدەسۋدى جالعاستىرىپ، سوعىستى توقتاتىپ، جاعدايدى ساباسىنا ءتۇسىرۋدىڭ شەشۋ جوباسىن تەز ارادا تابۋدى ىلگەرىلەتۋدى قالايدى. كولۋمبيا جاق ءتوراعا شي جينپيڭ العا قويعان دۇنيە جۇزىلىك دامۋ باستاماسىن، دۇنيە جۇزىلىك حاۋىپسىزدىك باستاماسىن، دۇنيە جۇزىلىك وركەنيەت باستاماسىن قارسى الادى، جۇڭگومەن كوپ جاقتى مەحانيزم ىشىندە قارىم - قاتىناستى، سەلبەستىكتى كۇشەيتۋدى قالايدى. كولۋمبيا جاق لاتىن امەريكاسى - جۇڭگو تالقى مىنبەرى قۇرىلىسىن قولدايدى، 2025 - جىلى لاتىن امەريكاسى ورتاق تۇلعاسىنىڭ كەزەكتى ءتوراعا ەلى بولۋ ورايىنان پايدالانىپ، لاتىن امەريكاسى - جۇڭگو قارىم - قاتىناسىنىڭ ۇزدىكسىز دامۋىن بەلسەنە ىلگەرىلەتۋدى قالايدى.

　　كەڭەستەن كەيىن ەكى ەل مەملەكەت باسشىلارى شارۋاشىلىققا قارجى قوسۋ، ساۋدا، سيفرلى ەكونوميكا، جاسىل دامۋ، اۋىل شارۋاشىلىعى، عىلىم - تەحنيكا، وقۋ - اعارتۋ، مادەنيەت، تەكسەرۋ - كارەنتيندەۋ سياقتى سالالارداعى كوپ ءتۇرلى ەكى جاقتى سەلبەستىك قۇجاتتارىنا قول قويۋعا بىرگە كۋا بولدى.

　　ەكى جاق «جۇڭحۋا حالىق رەسپۋبليكاسى مەن كولۋمبيا رەسپۋبليكاسىنىڭ ستراتەگيالىق سەرىكتەستىك قارىم - قاتىناس ورناتۋ جونىندەگى بىرلەسكەن مالىمدەمەسىن» جاريالادى.

　　كەڭەستەن بۇرىن شي جينپيڭ حالىق سارايىنىڭ سولتۇستىك زالىندا پەتروعا ارناپ قارسى الۋ سالتىن وتكىزدى.

　　تيان - انمىن الاڭىندا 21 رەت ساليۋت اتىلىپ، قۇرمەت قاراۋىلى ساپ تۇزەپ قۇرمەت ءبىلدىردى. ەكى ەلدىڭ مەملەكەت باسشىلارى كوزدەن كەشىرۋ مىنبەسىنە شىقتى، اسكەري وركەستر جۇڭگو مەن كولۋمبيانىڭ مەملەكەت اندەرىن ورىندادى. پەترو شي جينپيڭنىڭ سەرىك بولۋىندا جۇڭگو حالىق ازاتتىق ارمياسىنىڭ قۇرمەت قاراۋىلىن كوزدەن كەشىردى ءارى سالتانات قاتارىن كوردى.

　　سول كۇنى كەشتە شي جينپيڭ حالىق سارايىنىڭ التىن ءتۇستى زالىندا پەتروعا ارناپ قارسى الۋ قوناعاسىن وتكىزدى.

　　ۋاڭ ي جوعارىداعى قيمىلدارعا قاتىناستى.

　　كەلۋ قاينارى: حالىق تورابى

جاۋاپتى رەداكتورى : نۇرعيسا قۇرمانجان ۇلى

تەلەفون: 65367915-010 ‍حات ساندىعى: kazakh@peopledaily.com.cn
بۇل بەتتىڭ باسپا ۇقىعى حالىق تورابىنا ءتان، كەلىسىمنەن وتپەي كوشىرىپ پايدالانۋعا بولمايدى
Copyright © 1997-2023 by www.people.com.cn. all rights reserved