شي جينپيڭ امەريكا كاليفورنيا شتاتىنىڭ باستىعى نيۋسونمەن كەزدەستى
2023.10.26 16:06 كەلۋ قاينارى : حالىق تورابى
10 - ايدىڭ 25 - كۇنى تۇستەن كەيىن مەملەكەت ءتوراعاسى شي جينپيڭ حالىق سارايىندا امەريكا كاليفورنيا شتاتىنىڭ باستىعى نيۋسونمەن كەزدەستى. سۋرەتتى شينحۋا اگەنتتىگىنىڭ ءتىلشىسى حۋاڭ جيڭۋىن تۇسىرگەن
شينحۋا اگەنتتىگى، 10 - ايدىڭ 25 – كۇنى، بەيجيڭ (ءتىلشى ليۋ حۋا). 10 - ايدىڭ 25 - كۇنى تۇستەن كەيىن مەملەكەت ءتوراعاسى شي جينپيڭ حالىق سارايىندا امەريكا كاليفورنيا شتاتىنىڭ باستىعى نيۋسونمەن كەزدەستى.
شي جينپيڭ مىنالاردى اتاپ كورسەتتى: جۇڭگو مەن امەريكا − دۇنيە جۇزىندەگى الدىڭعى ەكى ءىرى ەكونوميكالىق تۇلعا، ەكونوميكانىڭ جالپى مولشەرى دۇنيە ءجۇزىنىڭ ۇشتەن بىرىنەن اسادى، حالىق سانىنىڭ جالپى سانى دۇنيە ءجۇزىنىڭ تورتتەن بىرىنە جۋىعىن ۇستايدى، ەكى جاقتى ساۋدا سوماسى دۇنيە ءجۇزىنىڭ بەستەن ءبىرىن ۇستايدى، ەكى جاقتىڭ مۇددەسىنىڭ توعىسۋى توتەنشە تىعىز. جۇڭگو - امەريكا قارىم - قاتىناسى دامىپ بۇگىنگى كۇنگە جەتتى، تابىس وڭاي - وسپاق قولعا كەلمەگەن، بارىنشا قاستەرلەۋگە تاتيدى. جۇڭگو امەريكاعا قاراتقان ساياساتىن دايەكتى اتقارادى، ياعني ءوزارا قۇرمەت ەتۋدە، بەيبىت قاتار تۇرۋدا، سەلبەسىپ تەڭ يگىلىككە كەنەلۋدە تاباندى بولادى. جۇڭگو جاق وسى باعىتقا قاراي ۇزدىكسىز قۇلشىنادى، سونداي - اق امەريكانىڭ دا جۇڭگومەن ءبىر باعىتتا ءجۇرۋىن ءۇمىت ەتەدى.
شي جينپيڭ كەزىندە كاليفورنيا شتاتىندا ساپاردا بولعان جاعدايدى قۋانا ەسكە الىپ، جۇڭگونىڭ جاسىل تيپكە بۇرىلىس جاساۋ جانە قاتىستى جەرگىلىكتى ورىنداردىڭ دامۋ جاعدايىن تانىستىردى. شي جينپيڭ مىنالاردى اتاپ كورسەتتى: جۇڭگو – امەريكا قارىم - قاتىناسىن ويداعىداي دامىتۋ ءار جاقتىڭ كۇشىن شوعىرلاندىرۋدى قاجەت ەتەدى. جۇڭگو - امەريكا قارىم - قاتىناسىنىڭ نەگىزى حالىقتا، ءۇمىتى حالىقتا، بولاشاعى جاستاردا، ومىرشەڭدىك كۇشى جەرگىلىكتى ورىندا. مەن جۇڭگو مەن امەريكانىڭ ءار سالاسىنىڭ بارىس - كەلىسى مەن جەرگىلىكتى ورىندارىنىڭ سەلبەستىگىنە ايرىقشا ءمان بەرەمىن جانە ونى قولدايمىن. وسى رەتكى ساپارىڭىزدىڭ ەكى جاقتىڭ ءوزارا ءتۇسىنىسۋىن كۇشەيتىپ، جۇڭگونىڭ كاليفورنيامەن سەلبەستىگىن كەڭەيتۋدە، جۇڭگو - امەريكا قاتىناسىنىڭ اقاۋسىز، ورنىقتى دامۋىن ىلگەرىلەتۋدە بەلسەندى رول اتقارۋىن ءۇمىت ەتەمىن. جۇڭگو مەن امەريكانىڭ جاسىل دامۋ، كليمات وزگەرىسىنە توتەپ بەرۋ سياقتى سالالارداعى سەلبەستىگىنىڭ كومەسكى كۇشى زور، ەكى جاقتىڭ وسى جاقتاعى سەلبەستىكتى كۇشەيتىپ، ونى جۇڭگو - امەريكا قارىم - قاتىناسى دامۋىنىڭ جاڭا كورىنەۋ تۇيىنىنە اينالدىرۋىنا ابدەن بولادى.
نيۋسون مىنالاردى ءبىلدىردى: وتكەن نەشە ون جىلدان بەرى جۇڭگونىڭ دامۋى ەرەكشە تابىستارعا قول جەتكىزدى، اسىرەسە، تاياۋ جىلداردان بەرى جاڭا ەنەرگيا سالاسىندا قول جەتكىزگەن تابىستارى ادامدى سۇيىندىرەدى. دۇنيە جۇزىندە امەريكا - جۇڭگو قارىم - قاتىناسىنان ماڭىزدى مەملەكەتتىك قارىم - قاتىناس جوق، امەريكا - جۇڭگو قارىم - قاتىناسى امەريكانىڭ بولاشاعىنا سايادى، حالىقتىڭ باقىتىنا دا سايادى. جەرگىلىكتى ورىنداردىڭ بارىس – كەلىسى − امەريكا - جۇڭگو قارىم - قاتىناسىنىڭ ماڭىزدى قۇرامداس بولىگى. تاريحتا جۇڭگولىقتار كاليفورنيا شتاتى قۇرىلىسىنا ماڭىزدى ۇلەس قوسقان، كاليفورنيا شتاتى باستان - اياق امەريكانىڭ جۇڭگومەن سەلبەستىگىنىڭ ماڭىزدى قاقپاسى بولىپ كەلەدى. مەن ءتوراعا شي جينپيڭ ورتاعا قويعان امەريكا - جۇڭگو قارىم - قاتىناسىن دامىتۋدا ۇستانۋعا ءتيىستى پرينسيپتەردى قۇپتايمىن، وسىنداي رۋحپەن كاليفورنيا شتاتىنىڭ جۇڭگومەن بارىس - كەلىستى، اۋىس - كۇيىستى كۇشەيتۋىن ىلگەرىلەتىپ، كليمات وزگەرىسى، جاڭا ەنەرگيا سياقتى سالالارداعى سەلبەستىكتى جيىلەتۋدى قالايمىن. كاليفورنيا شتاتى جۇڭگونىڭ ۇزاق ۋاقىتتىق، ورنىقتى، پارمەندى سەلبەستىك سەرىگى بولۋدى قالايدى.
ۋاڭ ي كەزدەسۋدە بىرگە بولدى.
كەلۋ قاينارى: حالىق تورابى
جاۋاپتى رەداكتورى : نۇرعيسا قۇرمانجان ۇلى
تەلەفون: 65367915-010 حات ساندىعى: kazakh@peopledaily.com.cn
بۇل بەتتىڭ باسپا ۇقىعى حالىق تورابىنا ءتان، كەلىسىمنەن وتپەي كوشىرىپ پايدالانۋعا بولمايدى
Copyright © 1997-2023 by www.people.com.cn. all rights reserved
جۇڭگو كوممۋنيستىك پارتياسى اقپارات تورابى
