شي جينپيڭ رەسەيدىڭ زۇڭليى ميشۋستينمەن كەزدەستى
2023.12.21 15:59 كەلۋ قاينارى : حالىق تورابى
12 - ايدىڭ 20 - كۇنى تۇستەن بۇرىن مەملەكەت ءتوراعاسى شي جينپيڭ حالىق سارايىندا رەسەيدىڭ زۇڭليى ميشۋستينمەن كەزدەستى. سۋرەتتى شينحۋا اگەنتتىگىنىڭ ءتىلشىسى حۋاڭ جيڭۋىن تۇسىرگەن
شينحۋا اگەنتتىگى، 12 – ايدىڭ 20 – كۇنى، بەيجيڭ (ءتىلشى سۇن ي). 12 - ايدىڭ 20 - كۇنى تۇستەن بۇرىن مەملەكەت ءتوراعاسى شي جينپيڭ حالىق سارايىندا رەسەيدىڭ زۇڭليى ميشۋستينمەن كەزدەستى.
شي جينپيڭ بىلاي دەپ اتاپ كورسەتتى: بيىل جىل باسىنان بەرى پۋتين زۇڭتۇڭمەن 2 رەت ديدارلاستىم، ەكى ەلدىڭ ۇكىمەتتەرى، زاڭ شىعارۋ قۇرىلىمدارى، ساياسي پارتيالارى، جەرگىلىكتى ورىندارى تىعىز بارىس - كەلىس ورىستەتىپ، ءار سالاداعى ناقتى سەلبەستىكتەر اقاۋسىز، ورنىقتى دامىدى. بيىل الدىڭعى 11 ايدا جۇڭگو مەن رەسەيدىڭ ەكى جاقتى ساۋداسى قارقىندى دامىپ، پۋتين زۇڭتۇڭ ەكەۋىمىز بەلگىلەگەن جىلدىق ساۋدا سوماسىن 200 ميلليارد امەريكا دوللارىنا جەتكىزۋ نىساناسى كۇنى بۇرىن جۇزەگە اسىپ، ەكى ەلدىڭ ءوزارا ءتيىمدى سەلبەستىگىنىڭ وراسان زور سەرپىمدىلىگىن جانە كەڭ بولاشاعىن ايگىلەدى. جۇڭگو – رەسەي قارىم - قاتىناسىن ويداعىداي قورعاۋ، ويداعىداي دامىتۋ − ەكى جاقتىڭ ەكى ەل حالىقتارىنىڭ ءتۇبىرلى مۇددەسى نەگىزىندە جاساعان ستراتەگيالىق تالعامى. جۇڭگو جاق رەسەي حالقىنىڭ ءوزى تاڭداعان دامۋ جولىمەن ءجۇرۋىن قولدايدى. جۇڭگو جاق رەسەي جاقپەن بىرگە كەلەر جىلى ەكى ەلدىڭ ديپلوماتيالىق قارىم - قاتىناس ورناتقانىنىڭ 75 جىلدىعىن جاڭا باستاما ەتىپ، ەكى ەلدىڭ جوعارى دەڭگەيدەگى ساياسي قارىم - قاتىناسىنىڭ بەلسەندى اسەرىن ۇزدىكسىز ۇلعايتىپ، ءوز - ءوزىنىڭ ەكونوميكالىق، قوعامدىق دامۋىن جاپپاي ىلگەرىلەتۋ، ۇلتتىڭ گۇلدەنۋىن جۇزەگە اسىرۋ بارىسىندا ۇزدىكسىز قول ۇستاسا العا باسۋدى قالايدى.
شي جينپيڭ بىلاي دەپ دارىپتەدى: جۇڭگو ەكونوميكاسىنىڭ سەرپىمدىلىگى كۇشتى، كومەسكى كۇشى زور، اينالىم ءورىسى كەڭ، ۇزاق ۋاقىت جاقسارۋ نەگىزگى جاعدايى وزگەرگەن جوق. جۇڭگو ساپالى دامۋدى تاباندىلىقپەن ىلگەرىلەتىپ، جوعارى دەڭگەيدە سىرتقا ەسىك اشۋدى جەبەپ، رەسەيدى قامتىعان ءار ەلدىڭ دامۋىنا تىڭ وراي ازىرلەيدى. ەكى جاق ساياسيدا ءوزارا سەنىم ارتۋ، ەكونوميكادا ءبىرىن - ءبىرى تولىقتاۋ، قۇرىلعىلاردى بايلانىستىرۋ، حالىق تىلەگىن توعىستىرۋ ابزالدىعىن تولىق ساۋلەلەندىرىپ، سەلبەستىك مازمۇنىن ۇزدىكسىز بايىتىپ، ەكونوميكا - ساۋدا، ەنەرگيا، ۇلاستىرۋ - تۇتاستىرۋ سياقتى سالالارداعى سەلبەستىكتى تەرەڭدەتىپ، كاسىپ تىزبەگى مەن قامداۋ تىزبەگىنىڭ حاۋىپسىزدىگىن، ورنىقتىلىعىن بىرگە قورعاۋى كەرەك. ەكى جاق كەلەر جىلعى جانە ونان ارعى جىلعى جۇڭگو - رەسەي مادەنيەت جىلىن ويداعىداي وتكىزىپ، باي مازمۇندى گۋمانيتارلىق اۋىس - كۇيىس قيمىلدارىن كوبىرەك جوبالاپ، كوبىرەك ورىستەتىپ، ەكى ەلدىڭ ۇرپاقتان - ۇرپاققا جالعاسقان دوستىعىنىڭ قوعامدىق جانە حالىق رايى نەگىزىن بەكەمدەۋى كەرەك.
ميشۋستين مىنانى ءبىلدىردى: بيىل پۋتين زۇڭتۇڭ مەن ءتوراعا شي جينپيڭنىڭ ەكى رەتكى ءساتتى كەزدەسۋى رەسەي، جۇڭگو ەكى جاقتىڭ جاپپاي ستراتەگيالىق سەلبەستىك سەرىكتەستىك قارىم - قاتىناستى تەرەڭدەتۋگە كۇش سالاتىن بەرىك تىلەگىن ايگىلەدى، رەسەي جاق جۇڭگو جاقپەن ەكى ەل مەملەكەت باسشىلارى كەلىسكەن ءتۇرلى ماڭىزدى ورتاق تانىمداردى مۇقيات تياناقتاندىرۋدى قالايدى. كەشە ەكى جاق رەسەي - جۇڭگو زۇڭليلەرىنىڭ 28 - رەتكى مەرزىمدى ديدارلاسۋىن ءساتتى وتكىزدى. رەسەي جاق ەكى ەلدىڭ ەكى جاقتى ناقتى سەلبەستىگىنىڭ ورنىقتى ارتۋىنا رازى، جۇڭگو جاقپەن كومەسكى كۇشتى ونان ارى اشىپ، ەكونوميكا - ساۋدا، ەنەرگيا، ۇلاستىرۋ - تۇتاستىرۋ سياقتى سالالارداعى سەلبەستىكتى كەڭەيتىپ، مادەنيەت جىلىن ويداعىداي وتكىزىپ، ەكى ەل حالىقتارىنىڭ ۇرپاقتان - ۇرپاققا جالعاسقان دوستىعىن بەكەمدەۋدى قالايدى. رەسەي جاق جۇڭگونىڭ ءتوراعا شي جينپيڭنىڭ باسشىلىعىندا قول جەتكىزگەن ۇلى تابىستارىن شىن جۇرەكتەن قۇتتىقتايدى، جۇڭگو حالقىنىڭ ۇلۋ جىلىنىڭ كوڭىلدى بولۋىن تىلەيدى! جاڭا ءبىر جىلدا رەسەي – جۇڭگو قارىم - قاتىناسىندا تىڭ دامۋشىلىقتار بولۋىن ءۇمىت ەتەمىن.
ميشۋستين تاعى گانسۋداعى جەر سىلكىنىسىنە بايلانىستى شي جينپيڭگە رەسەي ۇكىمەتى مەن حالقىنىڭ حال سۇراۋ تىلەگىن جەتكىزىپ، رەسەي جاقتىڭ جۇڭگو جاقتىڭ قاجەتىنە قاراي كومەك كورسەتۋدى قالايتىنىن ءبىلدىردى. شي جينپيڭ بۇعان العىس ايتىپ، بىلاي دەپ اتاپ كورسەتتى: گانسۋ مەن چيڭحايدا جەر سىلكىنگەننەن كەيىن پۋتين زۇڭتۇڭ مەن كوپتەگەن شەتەل باسشىلارى حال سۇراۋ تەلەگرامماسىن جولدادى. ءبىز بار كۇشپەن قۇتقارۋعا ۇيىمداستىرىپ، حالىق بۇقاراسىنىڭ ءومىرى مەن مال - مۇلكىنىڭ حاۋىپسىزدىگىن مۇمكىندىكتىڭ بارىنشا قورعادىق. قازىر اپات تۋىلعان رايونداعى قۇتقارۋ كۇشتەرى مەن زاتتىق ماتەريالدار جەتكىلىكتى، جەرگىلىكتى حالىق بۇقاراسىنىڭ نەگىزگى تۇرمىسى قامتاماسىز ەتىلدى. جۇڭگو كوممۋنيستىك پارتياسىنىڭ پارمەندى باسشىلىعىندا، اپاتقا ۇشىراعان رايونداعى حالىق، ءسوز جوق، اپاتتى جەڭىپ، اتا مەكەندەرىن تىڭنان قۇرىپ شىعادى.
ۋاڭ ي كەزدەسۋدە بىرگە بولدى.
كەلۋ قاينارى: حالىق تورابى
جاۋاپتى رەداكتورى : نۇرعيسا قۇرمانجان ۇلى
تەلەفون: 65367915-010 حات ساندىعى: kazakh@peopledaily.com.cn
بۇل بەتتىڭ باسپا ۇقىعى حالىق تورابىنا ءتان، كەلىسىمنەن وتپەي كوشىرىپ پايدالانۋعا بولمايدى
Copyright © 1997-2023 by www.people.com.cn. all rights reserved
جۇڭگو كوممۋنيستىك پارتياسى اقپارات تورابى
