كوكتەم مەرەكەسى كەزىندەگى كينو بەلەتى كىرىسى 8 ميلليارد يۋاننان استى (جاڭا ساندى مالىمەت، جاڭا ءتۇيىن)
تاماشالاۋشىلاردىڭ مولشەرى 163 ميلليون ادام - رەتكە جەتتى
2024.02.19 15:51 كەلۋ قاينارى : حالىق تورابى
«حالىق گازەتى»، 2 - ايدىڭ 18 - كۇنى، بەيجيڭ (تىلشىلەر ليۋ ياڭ، رىن شانشان). مەملەكەتتىك كينو مەكەمەسىنىڭ 2 - ايدىڭ 18 - كۇنگى العاشقى ساناعىنا قاراعاندا، 2024 - جىلعى كوكتەم مەرەكەسى دەمالىسىندا (2 - ايدىڭ 10 - كۇنىنەن 2 - ايدىڭ 17 - كۇنىنە دەيىن) بۇكىل ەل بويىنشا كينو بەلەتى كىرىسى 8 ميلليارد 16 ميلليون يۋان، تاماشالاۋشىلاردىڭ مولشەرى 163 ميلليون ادام - رەت بولىپ، جەكە - جەكە 2023 - جىلعى كوكتەم مەرەكەسى دەمالىسىنداعىدان %18.47 جانە %26.36 ارتىپ، ۇقساس مەزگىلدەگى جاڭا رەكوردتى جاراتقان.
كوكتەم مەرەكەسى دەمالىسىندا «دۋماندى تىرلىك»، «زىمىراعان ءومىر - 2»، «ايۋدىڭ قىزىقتارى، ۋاقىت كەڭىستىگىنە كەرى بۇرىلۋ»، «20 - تارماق» سياقتى ەلىمىزدە وندىرىلگەن جاڭا فيلىدەر ءارقايسى كينوحانادا قويىلدى. بۇل فيلمدەردىڭ مازمۇنى ساپالى، وزىندىك ەرەكشەلىگى بار، مەرەكەلىك تۇسكە يە، كوكتەم مەرەكەسى دەمالىسىنىڭ تاماشالاۋ ورتاسىنا ۇيلەسەدى، رەال تۇرمىسقا دەگەن تەرەڭ سۇيىسپەنشىلىكتى بەينەلەپ، جۇرت جۇرەگىن جىلىتاتىن كۇش - قۋاتتى جەتكىزدى، كينو كورىپ، كوكتەم مەرەكەسىن وتكىزۋ ءتىپتى دە كوپ ادامنىڭ تالعامىنا اينالدى.
حالىققا ءتيىمدى الۋان ءتۇرلى كينو كورۋ قيمىلى كينو تۇتىنۋىن ونان ارى جەبەپ، كينو بازارىنىڭ دۋمانعا بولەنۋىنە دەم بەردى. «كوكتەم مەرەكەسىن كينومەن وتكىزۋ − 2024 - جىلعى كوكتەم مەرەكەسى كەزىندەگى سيفرلى حالىق اقشاسى كينو تۇتىنۋىنا تيىمدىلىك جاساۋ قيمىلى» وتكىزىلدى، 11 فينانس قۇرىلىمى كوكتەم مەرەكەسى دەمالىسىندا سيفرلى حالىق اقشاسى كينو كورۋ تۇتىنۋىنا 30 ميلليون يۋاننان استام قوسىمشا قاراجات بەرىپ، بەلگىلى سوماعا تولعاندا اقىنى ازايتۋ، تارتۋ بەلەتىن الۋ، سيفرلى سيلىق اقشا بەرۋ سياقتى تاسىلدەر ارقىلى كورەرمەندەردىڭ بەلەت الىپ كينو كورۋىنە ناقتى تيىمدىلىك جاسادى.
كوكتەم مەرەكەسى دەمالىسىنداعى اقاۋسىز، ءتارتىپتى تاماشالاۋ ورتاسىن جاراتۋ ءۇشىن، كينو، باسپا ۇقىعى، قوعام حاۋىپسىزدىگى، مادەنيەت جانە ساياحات سياقتى تاراۋلار كينوحانا جەلىسىندەگى كينو باسپا ۇقىعىن قورعاۋ ارناۋلى قىزمەتىن بىرلەسىپ ورنالاستىرىپ، ءتۇيىندى كينوحانا جەلىسىندەگى كينوعا، اسىرەسە، ءتۇيىندى تۋىندىلاردىڭ باسپا ۇقىعىن قورعاۋ ساقتىق تىزىمدىگىنە ەنگىزىلگەن كوكتەم مەرەكەسى كەزىندەگى كينوعا نازار اۋدارىپ، ءتۇرلى شارالار ارقىلى تاماشا كينو بازارىنىڭ باسپا ۇقىعى ءتارتىبىن قورعادى.
كوكتەم مەرەكەسى دەمالىسىندا كينو بازارىنىڭ دۋمانعا بولەنۋى دەمالىس كۇندەرىنە مادەنيەت ءدامىن قوسىپ، مەرەكە مەرەيىن اسىرىپ، كينو كاسىبىنىڭ قايتا ورلەۋ جاعدايىن ونان ارى بەكەمدەدى.
كەلۋ قاينارى: حالىق تورابى
جاۋاپتى رەداكتورى : نۇرعيسا قۇرمانجان ۇلى
تەلەفون: 65367915-010 حات ساندىعى: kazakh@peopledaily.com.cn
بۇل بەتتىڭ باسپا ۇقىعى حالىق تورابىنا ءتان، كەلىسىمنەن وتپەي كوشىرىپ پايدالانۋعا بولمايدى
Copyright © 1997-2023 by www.people.com.cn. all rights reserved
جۇڭگو كوممۋنيستىك پارتياسى اقپارات تورابى
