لي چياڭ مەملەكەتتىك كەڭەستىڭ بۇيرىعىنا قول قويىپ
«جۇڭحۋا حالىق رەسپۋبليكاسىنىڭ تۇتىنۋشىلاردىڭ ۇقىق - مۇددەسىن قورعاۋ زاڭىن اتقارۋ ەرەجەسىن» جاريالادى
2024.03.20 15:57 كەلۋ قاينارى : حالىق تورابى
شينحۋا اگەنتتىگى، 3 - ايدىڭ 19 - كۇنى، بەيجيڭ. مەملەكەتتىك كەڭەستىڭ زۇڭليى لي چياڭ بىرنەشە كۇننىڭ الدىندا مەملەكەتتىك كەڭەستىڭ بۇيرىعىنا قول قويىپ، «جۇڭحۋا حالىق رەسپۋبليكاسىنىڭ تۇتىنۋشىلاردىڭ ۇقىق – مۇددەسىن قورعاۋ زاڭىن اتقارۋ ەرەجەسىن» (تومەندە قىسقاشا «ەرەجە» دەلىنەدى) جاريالادى، بۇل ەرەجە 2024 – جىلى 7 - ايدىڭ 1 – كۇنىنەن باستاپ اتقارىلادى. «ەرەجە» جيىنى 7 تاراۋ، 53 تارماقتان قۇرالعان، وندا نەگىزىنەن مىناداي مازمۇندار بەلگىلەنگەن:
ءبىرىنشى، تيجاراتشىلاردىڭ بورىشىنا قاتىستى بەلگىلەمەلەر ناقتىلاندىرىلدى جانە تولىقتاندى. تۇتىنۋشىلاردىڭ ۇقىق - مۇددەسىن قورعاۋ زاڭىندا بەلگىلەنگەن تۇتىنۋشىلاردىڭ باس اماندىعى مەن مال - مۇلىك حاۋىپسىزدىگىن قامتاماسىزداندىرۋ، اقاۋى بار ونىمدەردى ءبىر جاقتى ەتۋ، جالعان ۇگىتكە تيىم سالۋ، باعاسىن اشىق جازۋ، ۇلگى تارماقتاردى پايدالانۋ، ساپاعا كەپىلدىك ەتۋ جاۋاپكەرلىگىن اتقارۋ، تۇتىنۋشىلاردىڭ جەكە ينفورماتسياسىن قورعاۋ سياقتى بورىشتار جونىندە ەگجەي - تەگجەيلى بەلگىلەمەلەر جاسالدى. تيجاراتشىلاردىڭ قارت، ازامات جاسىنا تولماعان تۇتىنۋشىلاردىڭ ۇقىق - مۇددەسىن قورعاۋعا قاتىستى بورىشتارى جونىندەگى بەلگىلەمەلەر تولىقتاندى.
ەكىنشى، توراپتىق تۇتىنۋعا قاتىستى بەلگىلەمەلەر كەمەلدەندىرىلدى. تيجاراتشىلاردىڭ تەحنيكالىق تاسىلدەردەن پايدالانىپ، تۇتىنۋشىلاردى تاۋار ساتىپ الۋعا نەمەسە قىزمەت وتەۋدى قابىلداۋعا زورلاۋىنا نەمەسە ءتۇسىن وزگەرتىپ زورلاۋىنا بولمايدى دەپ بەلگىلەندى. تيجاراتشىلاردىڭ تۇتىنۋشىلار جاعدايدان حابارسىز جاعدايدا، ۇقساس ءبىر تاۋارعا نەمەسە قىزمەت وتەۋگە ۇقساس ساۋدا شارت - جاعدايىندا تۇرلىشە باعا نەمەسە اقى الۋ ولشەمىن بەلگىلەۋىنە بولمايدى. تيجاراتشىلار مەرزىمىن وزدىگىنەن ۇزارتۋ، اقىسىن وزدىگىنەن ۇزارتۋ سياقتى تاسىلدەرمەن قىزمەت وتەسە، تۇتىنۋشىلارعا انىق ۇعىندىرۋى كەرەك. تىكە تاراتۋ تيجارات تۇعىرىنداعى تيجاراتشىلار تۇتىنۋشىلاردىڭ ۇقىق - مۇددەسىن قورعاۋ ءتۇزىمىن ورناتۋى جانە كەمەلدەندىرۋى كەرەك.
ءۇشىنشى، اقىسىن الدىن الا تولەۋ ۇلگىسىندەگى تۇتىنۋ تيجاراتشىلارىنىڭ بورىشى كۇشەيتىلدى. تيجاراتشىلار تۇتىنۋشىلارمەن جاساسقان كەلىسىم بويىنشا تاۋارمەن قامداۋى نەمەسە قىزمەت وتەۋى كەرەك، تاۋاردىڭ نەمەسە قىزمەت وتەۋدىڭ ساپاسىن تومەندەتۋىنە، بەتالدى باعا قوسۋىنا بولمايدى دەپ بەلگىلەنگەن. كەلىسىم بويىنشا تاۋارمەن قامداماسا نەمەسە قىزمەت وتەمەسە، تۇتىنۋشىلاردىڭ تالابى بويىنشا كەلىسىمدى اتقارۋ نەمەسە الدىن الا العان اقشانى قايتارۋ كەرەك. تيجاراتشىلاردا اۋىر تيجارات حاۋىپ-قاتەرى بولسا، الدىن الا اقشا الۋدى توقتاتۋى كەرەك؛ قىزمەت وتەۋدەن توقتاتۋدى نەمەسە قىزمەت وتەۋ ورنىن كوشىرۋدى ۇيعارسا، تۇتىنۋشىلارعا الدىن الا ۇقتىرۋ، بورىشىن جالعاستى وتەۋ نەمەسە تۇتىنىلماعان الدىن الا اقشا تولەۋ قالدىعىن قايتارۋ كەرەك.
ءتورتىنشى، تۇتىنۋدان تولەم الۋ ارەكەتى ارناعا ءتۇسىرىلدى. ارىز - شاعىمدا، اشكەرەلەۋدە زاڭدارعا، زاڭ - ەرەجەلەرگە جانە قاتىستى بەلگىلەمەلەرگە بويسۇنۋ كەرەك، ارىز - شاعىمنان، اشكەرەلەۋدەن پايدالانىپ ورىنسىز پايدا تۇسىرۋگە، تيجاراتشىلاردىڭ زاڭدى ۇقىق - مۇددەسىنە قول سۇعۋعا، بازار شارۋاشىلىعى ءتارتىبىن بىلىقتىرۋعا بولمايدى دەپ بەلگىلەندى. تاۋاردىڭ نەمەسە قىزمەت وتەۋدىڭ بەلگى قاعازى، تۇسىندىرمەسى، ۇگىت ماتەريالى سياقتىلاردا تاۋاردىڭ نەمەسە قىزمەت وتەۋدىڭ ساپاسىنا ىقپال جەتكىزبەيتىن، ونىڭ ۇستىنە تۇتىنۋشىلاردى الجاستىرمايتىن اقاۋ بولسا، جازالاۋ سيپاتىندىق تولەم بەلگىلەمەسى قولدانىلمايدى. قىستىرۋ، قوراپتاۋ، جالعاننان جاساۋ، تاۋار وندىرگەن ۋاقىتىن وزگەرتۋ، فاكتتى ويدان جاساۋ سياقتى تاسىلدەر ارقىلى تولەمدى الداپ السا نەمەسە تيجاراتشىلاردى بوپسالاپ تارتىپ السا، زاڭ بويىنشا ءبىر جاقتى ەتىلەدى.
بەسىنشى، ۇكىمەتتىڭ تۇتىنۋشىلاردىڭ ۇقىق - مۇددەسىن قورعاۋ قىزمەت جاۋاپكەرلىگى ايقىندالدى. ءار دارەجەلى حالىق ۇكىمەتتەرى تۇتىنۋشىلاردىڭ ۇقىق - مۇددەسىن قورعاۋ قىزمەتىنە جەتەكشىلىك ەتۋدى كۇشەيتىپ، قاتىستى اكىمشىلىك تاراۋلاردىڭ تۇتىنۋشىلاردىڭ ۇقىق - مۇددەسىن قورعاۋ قىزمەت جاۋاپكەرلىگىن تياناقتاندىرۋىن ۇيىمداستىرۋى، سايكەستىرۋى، قۋزاۋى كەرەك دەپ بەلگىلەندى. قاتىستى اكىمشىلىك تاراۋلار تۇتىنۋ جونىندەگى ارىز - شاعىمداردى، اشكەرەلەۋلەردى دەر كەزىندە ءبىر جاقتى ەتىپ، تۇتىنۋدان ساقتاندىرۋ جانە حاۋىپ - قاتەر ەسكەرتۋىن ورىستەتىپ، باقىلاۋ - تەكسەرۋ جانە زاڭ اتقارۋ تەبىنىن ارتتىرىپ، تۇتىنۋشىلاردىڭ زاڭدى ۇقىق - مۇددەسىنە زيان جەتكىزەتىن ارەكەتتەردى دەركەزىندە تەكسەرىپ ءبىر جاقتى ەتۋى كەرەك.
بۇدان سىرت، «ەرەجەدە» تۇتىنۋشىلار قوعامىنىڭ مىندەت وتەۋ تالابى ايقىندالىپ، تۇتىنۋ داۋ - شارىن شەشۋگە قاتىستى بەلگىلەمەلەر اشالانىپ، زاڭعا قايشى ارەكەتتەر جونىندە سايكەستى زاڭدىق جاۋاپكەرلىك بەلگىلەندى.
كەلۋ قاينارى: حالىق تورابى
جاۋاپتى رەداكتورى : مانەپ ەربول ۇلى
تەلەفون: 65367915-010 حات ساندىعى: kazakh@peopledaily.com.cn
بۇل بەتتىڭ باسپا ۇقىعى حالىق تورابىنا ءتان، كەلىسىمنەن وتپەي كوشىرىپ پايدالانۋعا بولمايدى
Copyright © 1997-2023 by www.people.com.cn. all rights reserved
جۇڭگو كوممۋنيستىك پارتياسى اقپارات تورابى
