شي جينپيڭ انگولانىڭ زۇڭتۇڭى لورەنسومەن كەڭەس وتكىزدى

2024.03.18 14:55 كەلۋ قاينارى : حالىق تورابى

　　3 - ايدىڭ 15 - كۇنى تۇستەن كەيىن مەملەكەت ءتوراعاسى شي جينپيڭ حالىق سارايىندا جۇڭگوعا مەملەكەتتىك ساپارمەن كەلگەن انگولانىڭ زۇڭتۇڭى لورەنسومەن كەڭەس وتكىزدى. سۋرەتتە: كەڭەستەن بۇرىن شي جينپيڭ حالىق سارايىنىڭ سولتۇستىك ۇلكەن زالىندا لورەنسونى قارسى الۋ سالتىن وتكىزۋدە.

　　سۋرەتتى شينحۋا اگەنتتىگىنىڭ ءتىلشىسى لي شۋەرىن تۇسىرگەن

　　شينحۋا اگەنتتىگى، 3 - ايدىڭ 15 – كۇنى، بەيجيڭ (ءتىلشى ليۋ حۋا). 3 - ايدىڭ 15 - كۇنى تۇستەن كەيىن مەملەكەت ءتوراعاسى شي جينپيڭ حالىق سارايىندا جۇڭگوعا مەملەكەتتىك ساپارمەن كەلگەن انگولانىڭ زۇڭتۇڭى لورەنسومەن كەڭەس وتكىزدى. ەكى ەلدىڭ مەملەكەت باسشىلارى جۇڭگو - انگولا قارىم - قاتىناسىن جاپپاي ستراتەگيالىق سەلبەستىك سەرىكتەستىك قارىم - قاتىناس دەڭگەيىنە كوتەرۋدى جاريالادى.

　　شي جينپيڭ بىلاي دەپ اتاپ كورسەتتى: بىلتىر جۇڭگو، انگولا ەكى ەل ديپلوماتيالىق قارىم - قاتىناس ورناتقانىنىڭ 40 جىلدىعىن بىرگە قۇتتىقتادى. جۇڭگو - انگولا قارىم - قاتىناسى حالىقارالىق تولقىمالى وزگەرىستىڭ سىنىنان ءوتىپ، ەكى ەل حالىقتارىن شىن مانىندە باقىتقا كەنەلتتى. جۇڭگو - انگولا سەلبەستىگى تۇستىك ەلدەر سەلبەستىگىنە، وركەندەپ كەلە جاتقان ەلدەر سەلبەستىگىنە جاتادى، جاقسى دوستار اراسىنداعى ءوزارا كومەكتەسۋ، ءوزارا پايدا جەتكىزىپ ءوزارا تيىمدىلىك جاساۋ، سەلبەسىپ تەڭ يگىلىككە كەنەلۋ بولىپ تابىلاردى. قازىرگى ۋاقىتتاعى وزگەرىس پەن بىلىقپالىق ارالاسقان دۇنيە ءجۇزى الدىندا، ەكى جاق ءداستۇرلى دوستىقتى ۇزبەي جالعاستىرىپ، ىنتىماقتاسا سەلبەسۋدى كۇشەيتىپ، تاباندى تۇردە ءبىرىن - ءبىرى قولداپ، بىرگە دامۋدى جۇزەگە اسىرۋعا ءتيىس. جۇڭگو جاق انگولانىڭ مەملەكەتتىڭ يەلىك ۇقىعىن، حاۋىپسىزدىگىن، دامۋ مۇددەسىن قورعاۋىن، ءوز ەلىنىڭ مەملەكەت جاعدايىنا ۇيلەسەتىن وسىزامانداندىرۋ جولىندا ىزدەنىس جاساپ، مەملەكەتتىڭ دامۋىن، گۇلدەنۋىن جۇزەگە اسىرۋىن قولدايدى، انگولا جاقپەن ەل باسقارۋ تاجىريبەلەرىن اۋىستىرۋدى كۇشەيتىپ، ەكى جاقتى ستراتەگيالىق قارىم - قاتىناس دەڭگەيىن جوعارىلاتىپ، ءوز ەلدەرىنىڭ وسىزاماندانۋ اياق الىسىن قول ۇستاسا ىلگەرىلەتۋدى قالايدى.

　　شي جينپيڭ بىلاي دەپ دارىپتەدى: جۇڭگو - انگولا سەلبەستىگىنىڭ نەگىزى جاقسى، كولەمى زور، ءوزارا تولىقتاۋ سيپاتى كۇشتى، ءوزارا پايدا جەتكىزۋ سەلبەستىگىنىڭ وراسان زور كومەسكى كۇشى جانە نۇرلى بولاشاعى بار. ەكى جاق ”ءبىر بەلدەۋ، ءبىر جولدى“ ساپالى بىرگە قۇرۋ سەلبەستىگىن كۇشەيتىپ، دامۋ ستراتەگيالارىن ءتۇيىلىستىرۋدى ىلگەرىلەتىپ، ناقتى سەلبەستىكتىڭ ساپاسىن جوعارىلاتىپ، ونىمدىلىگىن ارتتىرۋدى ىلگەرىلەتۋى كەرەك. جۇڭگو جاق انگولا جاقپەن ءتۇيىندى نەگىزدىك قۇرىلعى نىساندارىن ويداعىداي جۇرگىزىپ، قۋاتتى جۇڭگو كاسىپورىندارىنىڭ انگولاعا بارىپ كوپ ءتۇرلى فورمادا سەلبەستىك ورىستەتۋىن قولداپ، انگولانىڭ اۋىل شارۋاشىلىعىن وسىزامانداندىرۋدى، ونەركاسىپتەندىرۋدى، ەكونوميكانى كوپ نەگىزدەندىرۋدى جۇزەگە اسىرۋىنا دەم بەرۋدى قالايدى. انگولا جاقتىڭ اناعۇرلىم پارمەندى شارا قولدانىپ، جۇڭگو ازاماتتارى مەن كاسىپورىندارىنىڭ زاڭدى ۇقىق - مۇددەسى مەن حاۋىپسىزدىگىن قامتاماسىز ەتۋىن ءۇمىت ەتەمىز. انگولا جاقتىڭ ۇزدىكسىز جۇڭگو حالىقارالىق يمپورت كورمەسى، جۇڭگو - افريكا ەكونوميكا - ساۋدا كورمەسى سياقتى تۇعىرلار ارقىلى جۇڭگوعا انگولانىڭ اناعۇرلىم كوپ ساپالى ونىمدەرىن تانىستىرۋىن قارسى الامىز. جۇڭگو جاق انگولاعا كومەكتەسەتىن ەمدەۋ اترەتى سياقتى نىسانداردى ۇزدىكسىز ويداعىداي جۇرگىزىپ، جۇڭگودا وقيتىن انگولالىق جوعارى مەكتەپ وقۋشىلارىنا وقۋ سيلىعى اقشاسى سانىن ازىرلەپ، گۋمانيتارلىق اۋىس - كۇيىستى جانە حالىقتار دوستىعىن نىعايتادى.

　　شي جينپيڭ بىلاي دەپ اتاپ كورسەتتى: قازىرگى ۋاقىتتا وركەندەپ كەلە جاتقان ەلدەردىڭ شوعىرلى ەڭسە كوتەرۋ اۋقىمى بوگەۋ بەرمەيدى، مەيلى دۇنيە جۇزىلىك باسقارۋدا، الدە دامۋدا، گۇلدەنۋدە بولسىن، بۇكىل دۇنيە ءجۇزىنىڭ وڭتۇستىگى كەم بولسا بولمايدى. جۇڭگو افريكا ەلدەرىنىڭ تاۋەلسىزدىگىن، ءوز - وزىنە قوجايىن بولۋىن قورعاۋ جانە دامۋدى، گۇلدەنۋدى ىلگەرىلەتۋ جولىنداعى سەنىمدى دوسى جانە ادال سەرىگى. جۇڭگو جاق افريكا ەلدەرىنىڭ جانە افريكا وداعىنىڭ افريكا ماسەلەسىن افريكا ءادىسى ارقىلى شەشۋگە كۇش سالىپ، ءوڭىردىڭ بەيبىتشىلىگىن، ورنىقتىلىعىن قورعاۋىن قولدايدى، انگولا سياقتى افريكا ەلدەرىمەن كوپ جاقتى سايكەستىكتى كۇشەيتىپ، وركەندەپ كەلە جاتقان ەلدەردىڭ ورتاق مۇددەسىن قورعاپ، تەپە - تەڭ، ءتارتىپتى دۇنيە ءجۇزىنىڭ كوپ ۇيەكتەنۋى مەن جالپىعا ءتيىمدى، سيىسىمدى ەكونوميكانىڭ جاھاندانۋىن بىرگە باستاماشىلدىقپەن دارىپتەپ، ادامزاتتىڭ تاعدىرلاس ورتاق تۇلعاسىن قۇرۋدى ىلگەرىلەتۋدى قالايدى.

　　لورەنسو مىنالاردى ءبىلدىردى: جۇڭگوعا ساپارلاي كەلىپ، ءوز ۇيىمىزگە كەلگەندەي سەزىندىك. انگولا - جۇڭگو قارىم - قاتىناسى جوعارى دەڭگەيدە دامۋدى ساقتادى. مەيلى انگولا ىشكى سوعىستى اياقتاتىپ، سان كاسىپتى كوركەيتۋدى كۇتكەن كەزدە بولسىن، الدە جاڭا تيپتى ايدارشا ۆيرۋس ىندەتىنە توتەپ بەرۋدەگى قيىن ساتتە بولسىن، جۇڭگو بارلىعىندا ەڭ الدىمەن انگولا جاققا قاستەرلى قولداۋ كورسەتكەن مەملەكەت بولدى، انگولا جاق بۇعان شىن جۇرەكتەن العىس ايتادى. جۇڭگونىڭ قولداۋى مەن سەلبەستىگى انگولانىڭ نەگىزدىك قۇرىلعىلار قۇرىلىسى مەن ەكونوميكالىق، قوعامدىق دامۋىن ايرىقشا جەبەدى، مۇنى ءوزارا پايدا جەتكىزۋ سەلبەستىگىنىڭ ۇلگىسى دەپ ايتۋعا بولادى. انگولا جاق اناعۇرلىم كوپ جۇڭگو كاسىپورىندارىنىڭ انگولاعا كەلىپ قارجى قوسىپ، انگولانىڭ مەملەكەتتى دامىتۋىنا، گۇلدەندىرۋىنە دەم بەرۋىن قارسى الادى. انگولا جاق ءبىر جۇڭگو ساياساتىن باتىل اتقارىپ، تايۋان جۇڭگونىڭ ايرىلماس ءبىر بولىگى دەپ قارايدى، تايۋان ماسەلەسىنىڭ، ءسوزسىز، تولىق شەشىلەتىنىنە سەنەدى. انگولا جاق جۇڭگونىڭ دۇنيە ءجۇزىنىڭ بەيبىتشىلىگى مەن العا باسۋىن جەبەۋگە، حالىقارالىق ادىلدىكتى، ادىلەتتىلىكتى قورعاۋعا باستان - اياق كۇش سالىپ كەلە جاتقانىن بارىنشا القايدى، جۇڭگو جاقپەن كوپ جاقتى ىستەستىكتى كۇشەيتىپ، بىرلەسكەن مەملەكەتتەر ۇيىمى ۋستاۆىنىڭ باس ماقساتىن، پرينسيبىن، سونداي - اق ءار ەلدىڭ يەلىك ۇقىعىن، تاۋەلسىزدىگىن قورعاۋ، ىشكى ىسىنە كيلىكپەۋ سياقتى ماڭىزدى حالىقارالىق قارىم - قاتىناس ولشەمىن قورعاۋدى قالايدى. ءبىزدىڭ بۇگىن بىرلەسكەن مالىمدەمە جاريالاپ، انگولا - جۇڭگو جان - جاقتى ستراتەگيالىق سەلبەستىك سەرىكتەستىك قارىم - قاتىناسىنىڭ ورناتىلعانىن جاريالاۋىمىز ەكى جاقتىڭ قارىم - قاتىناستى تەرەڭدەتۋگە كۇش سالۋ بەكىمىن تولىق ايگىلەدى. انگولا جاق جۇڭگو جاقپەن بىرگە ەكى ەل قارىم - قاتىناسىنىڭ ۇزدىكسىز اناعۇرلىم كوپ جەتىستىككە قول جەتكىزۋىن ىلگەرىلەتۋدى كۇتەدى.

　　كەڭەستەن كەيىن ەكى ەلدىڭ مەملەكەت باسشىلارى ”ءبىر بەلدەۋ، ءبىر جولدى“ بىرگە قۇرۋ سەلبەستىك جوباسىن جاساۋ، ەكونوميكا - ساۋدا، اۋىل شارۋاشىلىعى، جاسىل دامۋ سياقتى سالالار جونىندەگى كوپتەگەن ەكى جاقتى سەلبەستىك قۇجاتتارىنا قول قويۋعا بىرگە كۋا بولدى.

　　ەكى جاق «جۇڭحۋا حالىق رەسپۋبليكاسى مەن انگولا رەسپۋبليكاسىنىڭ جان - جاقتى ستراتەگيالىق سەلبەستىك سەرىكتەستىك قارىم - قاتىناس ورناتۋ جونىندەگى بىرلەسكەن مالىمدەمەسىن» جاريالادى.

　　كەڭەستەن بۇرىن شي جينپيڭ حالىق سارايىنىڭ سولتۇستىك ۇلكەن زالىندا لورەنسونى قارسى الۋ سالتىن وتكىزدى.

　　تيان - انمىن الاڭىندا 21 رەت قۇرمەت ساليۋتى اتىلىپ، قۇرمەت قاراۋىلى قاتارعا تۇرىپ قۇرمەت ءبىلدىردى. ەكى ەلدىڭ مەملەكەت باسشىلارى كوزدەن كەشىرۋ مىنبەسىنە شىعىپ، اسكەري وركەستر جۇڭگو، انگولا ەكى ەلدىڭ مەملەكەت ءانىن ورىندادى. لورەنسو شي جينپيڭنىڭ سەرىك بولۋىندا جۇڭگو حالىق ازاتتىق ارمياسىنىڭ قۇرمەت قاراۋىلىن كوزدەن كەشىردى ءارى قاتارعا ءبولىنىپ پاراتتان ءوتۋىن كوردى.

　　سول كۇنى كەشتە شي جينپيڭ حالىق سارايىنىڭ التىن ءتۇستى زالىندا لورەنسونى قارسى الۋ قوناعاسىن وتكىزدى.

　　ۋاڭ ي جوعارىداعى قيمىلدارعا قاتىناستى.

　　قاينارى: حالىق تورابى

جاۋاپتى رەداكتورى : مانەپ ەربول ۇلى

تەلەفون: 65367915-010 ‍حات ساندىعى: kazakh@peopledaily.com.cn
بۇل بەتتىڭ باسپا ۇقىعى حالىق تورابىنا ءتان، كەلىسىمنەن وتپەي كوشىرىپ پايدالانۋعا بولمايدى
Copyright © 1997-2023 by www.people.com.cn. all rights reserved