108 ميلليون يۋان پارا العان مەملەكەتتىك ەنەرگيا قارجى قوسۋ توبىنىڭ بۇرىنعى ورىنباسار باس ديرەكتورى لي دۇڭ ءبىرىنشى سوتتا مەرزىمسىز قاماق جازاسىنا ۇكىم ەتىلدى

  2024 – جىلى 7 – ايدىڭ 16 – كۇنى، جياڭشي ولكەسى يچۇن قالالىق ورتا دارەجەلى حالىق سوت مەكەمەسى ءبىرىنشى سوتتا مەملەكەتتىك ەنەرگيا قارجى قوسۋ توبى شەكتى جاۋاپكەرشىلىك سەرىكتىگىنىڭ بۇرىنعى پارتگرۋپپا مۇشەسى، ورىنباسار باس مەڭگەرۋشىسى لي دۇڭنىڭ پارا الۋ دەلوسىنا اشىق ۇكىم شىعارىپ، ايىپكەر لي دۇڭدى پارا الۋ قىلمىسى بويىنشا مەرزىمسىز قاماق جازاسىنا ۇكىم ەتىپ، ساياسي ۇقىعىنان ماڭگىلىك ماحرۇىم ەتتى، سونىمەن قوسا جەكەلىك بارلىق مال – مۇلكىن ءمۇسادىرالادى؛ مۇندا پارا الۋ جولىمەن تاپقان مال - مۇلكى مەن ءوسىمىن زاڭ بويىنشا قۋزاپ قايتارىپ الىپ، مەملەكەت قازىناسىنا تاپسىرادى.

 قاراۋ ارقىلى مىنالار انىقتالدى: 1999 - جىلدان 2023 - جىلعا دەيىن ايىپكەر لي دۇڭ شىنحۋا جۋڭعار كومىر سەرىكتەستىگى پارتكومىنىڭ ورىنباسار شۋجيى، مەڭگەرۋشىسى، جۋڭعار ەنەرگيا سەرىكتەستىگى پارتكومىنىڭ ورىنباسار شۋجيى، باس جوراسى، شىنحۋا توبىنىڭ ورىنباسار باس ينجەنەرى، پارتگرۋپپاسىنىڭ مۇشەسى، ورىنباسار باس مەڭگەرۋشىسى، مەملەكەتتىك ەنەرگيا توبى پارتگرۋپپاسىنىڭ مۇشەسى، ورىنباسار باس ديرەكتورى قاتارلى قىزمەتتەردى وتەگەن كەزىندە، قىزمەت قولايلىلىعىنان پايدالانىپ، قاتىستى ورىندار مەن جەكەلەردىڭ ءونىمدى ساتۋ، كومىر ساتىپ الۋ، كاسىپورىن تيجاراتى، قىزمەت مىندەتىن رەتتەۋ قاتارلى ىستەرىنە كومەك كورسەتىپ، قاتىستى ورىندار مەن جەكەلەردىڭ بەرگەن مال - مۇلكىن تىكەلەي نەمەسە باسقالار ارقىلى زاڭسىز قابىلداعان، حالىق اقشاسىنا سىندىرعاندا جيىنى 108 ميلليون يۋاننان استام بولعان، مۇنىڭ ىشىندەگى ءبىر ءبولىمىن ءىس جۇزىندە الماعان.

يچۇن قالالىق ورتا دارەجەلى حالىق سوت مەكەمەسى بىلاي دەپ قارادى: ايىپكەر لي دۇڭنىڭ ارەكەتى پارا الۋ قىلمىسىنا جاتادى، پاراعا العان سوماسى توتەنشە كوپ، ونى زاڭ بويىنشا جازالاۋ كەرەك. لي دۇڭنىڭ ءىشىنارا پارا الۋ قىلمىسىنىڭ جۇزەگە اسپاعاندىعى، دەلوعا الىنعاننان كەيىن بارلىق قىلمىسىن قاز - قالپىندا مويىنداۋى، قىلمىسىن تانىپ، رايىنان قايتۋى، ارام ولجانى بەلسەنە قايتارۋى، دەلوعا قاتىستى ارام اقشا، ارام ولجانى تۇگەلدەي قۋزاپ قايتارىپ الۋى زاڭدا بەلگىلەنگەن جاعدايعا قاراي جەڭىل جازالاۋعا بولاتىن جاعداي بولىپ، زاڭ بويىنشا جەڭىل جازالاۋعا بولادى. سونىمەن سوت جوعارىداعىداي ۇكىم شىعاردى.

         كەلۋ قاينارى: حالىق تورابى