جۇڭگو كوممۋنيستىك پارتياسى ورتالىق كوميتەتى دىڭ شياۋپيڭ جولداس دۇنيەگە كەلگەندىگىنىڭ 120 جىلدىعىن ەسكە ءتۇسىرۋ اڭگىمە ءماجىلىسىن وتكىزدى

8 - ايدىڭ 22 - كۇنى جۇڭگو كوممۋنيستىك پارتياسى ورتالىق كوميتەتى بەيجيڭدەگى حالىق سارايىندا اڭگىمە ءماجىلىسىن وتكىزىپ، دىڭ شياۋپيڭ جولداس دۇنيەگە كەلگەندىگىنىڭ 120 جىلدىعىن ەسكە ءتۇسىردى. شي جينپيڭ، جاۋ لىجي، ۋاڭ حۋنيڭ، ديڭ شۋەشياڭ، لي شي، حان جىڭ اڭگىمە ماجىلىسىنە قاتىناستى

سۋرەتتى شينحۋا اگەنتتىگىنىڭ ءتىلشىسى يان يان تۇسىرگەن

«حالىق گازەتى»، 8 – ايدىڭ 22 – كۇنى، بەيجيڭ (ءتىلشى جاۋ چىڭ). جۇڭگو كوممۋنيستىك پارتياسى ورتالىق كوميتەتى 8 - ايدىڭ 22 - كۇنى تۇستەن بۇرىن حالىق سارايىندا اڭگىمە ءماجىلىسىن وتكىزىپ، دىڭ شياۋپيڭ جولداس دۇنيەگە كەلگەندىگىنىڭ 120 جىلدىعىن ەسكە ءتۇسىردى. جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ ماڭىزدى ءسوز سويلەدى. ول مىنالاردى باسا دارىپتەدى: دىڭ شياۋپيڭ جولداس − بۇكىل پارتيا، بۇكىل ارميا، بۇكىل ەلدەگى ءار ۇلت حالقى تۇگەل مويىنداعان جوعارى بەدەلگە يە ۇزدىك باسشى، ۇلى ماركسيزمشى، ۇلى پرولەتاريات توڭكەرىسشىسى، ساياساتشى، اسكەري ىستەر مامانى، ديپلومات، ۇزاق سىننان وتكەن كوممۋنيزم جاۋىنگەرى، پارتيانىڭ ەكىنشى ۇرپاق ورتالىق باسشىلىق كوللەكتيۆىنىڭ ۇيىتقىسى، جۇڭگونىڭ سوتسياليستىك رەفورما جاساپ، ەسىك اشۋ جانە وسىزامانداندىرۋ قۇرىلىسىنىڭ باس جوبالاۋشىسى، جۇڭگوشا سوتسياليزم جولىن اشۋشى، دىڭ شياۋپيڭ نازارياسىنىڭ نەگىزىن قالاۋشى، دۇنيە ءجۇزىنىڭ بەيبىتشىلىگى مەن دامۋىنا كەلەلى ۇلەس قوسقان ۇلى ينتەرناتسيوناليست. ول پارتياعا، حالىققا، مەملەكەتكە، ۇلتقا، دۇنيە جۇزىنە كورنەكتى ۇلەس قوسىپ، وشپەس ەڭبەك ءسىڭىردى، كەيىنگىلەردى ماڭگى جىگەرلەندىرە بەرەدى.

جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ تۇراقتى مۇشەلەرى جاۋ لىجي، ۋاڭ حۋنيڭ، ديڭ شۋەشياڭ، لي شي، مەملەكەت ءتوراعاسىنىڭ ورىنباسارى حان جىڭ اڭگىمە ماجىلىسىنە قاتىناستى، جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ تۇراقتى مۇشەسى ساي چي اڭگىمە ءماجىلىسىن باسقاردى.

شي جينپيڭ سوزىندە بىلاي دەپ اتاپ كورسەتتى: دىڭ شياۋپيڭ جولداستىڭ ءومىرى − شۇعىلالى ءومىر، جاۋىنگەرلىك ءومىر، ۇلى ءومىر. ول پارتيا باسشىلىق ەتكەن ۇلت تاۋەلسىزدىگى جانە حالىقتىڭ ازاتتىق ىستەرى، جاڭا جۇڭگو قۇرۋ جولىندا ەرەن ۇلەس قوسىپ، سوتسياليستىك ءتۇزىمدى ورناتۋ جانە سوتسياليستىك قۇرىلىس ءۇشىن اسا ناتيجەلى قىزمەتتەر ىستەدى. ”مادەنيەت زور توڭكەرىسى“ اياقتاعاننان كەيىن ول پارتيانىڭ ەكىنشى ۇرپاق ورتالىق باسشىلىق كوللەكتيۆىنىڭ ۇيىتقىسى رەتىندە پارتيا مەن حالىققا باسشىلىق ەتىپ، ۇلى تاريحي بۇرىلىستى جۇزەگە اسىرىپ، ماركسيزمنىڭ جۇڭگوشالانۋىنىڭ جاڭا شارىقتاۋىن جۇزەگە اسىرۋدى ىلگەرىلەتىپ، سوتسياليستىك وسىزامانداندىرۋ قۇرىلىسىندا جاڭا جاعداي جاراتىپ، وتاننىڭ تولىق بىرلىككە كەلۋىن جۇزەگە اسىرۋدىڭ دۇرىس جولىن تۇراقتاندىرىپ، شۇعىلالى سوتسياليزم تۋىن باتىل قورعاپ، جۇڭگوشا سوتسياليزمدى ءساتتى جاراتتى.

شي جينپيڭ بىلاي دەپ باسا دارىپتەدى: دىڭ شياۋپيڭ جولداستىڭ تاريحي ەڭبەگى جالپى جۇزدىك، ءتول جاسامپازدىق سيپاتقا يە، جۇڭگو مەن دۇنيە جۇزىنە تەرەڭ، ۇزاق بولاشاقتىق ىقپال جاسادى. ول ءومىر بويى كۇرەس جاساۋ بارىسىندا كوممۋنيزم ۇلى مۇراتى مەن جۇڭگوشا سوتسياليزم سەنىمىن شەكسىز بەكەمدەيتىن وسكەلەڭ قاسيەتكە، حالىقتى شەكسىز قىزۋ سۇيەتىن ۇلى سۇيىسپەنشىلىككە، باستان - اياق شىندىقتى ءىس جۇزىنەن ىزدەيتىن نازاريالىق قاسيەتكە تاباندى بولىپ، ۇزدىكسىز ءورىس اشا جاڭالىق جاراتاتىن ساياسي باتىلدىقتى، بيىكتە تۇرىپ الىستى بولجاعان ستراتەگيالىق وي، رياسىز، دارقان پەيىلدى تولىق ايگىلەدى. ونىڭ ۇلى تاريحي ەڭبەگىن ءبىز ماڭگى ەستە ساقتايمىز؛ ونىڭ وسكەلەڭ توڭكەرىستىك قاسيەتىن ءبىز ماڭگى ارداقتايمىز.

شي جينپيڭ بىلاي دەپ اتاپ كورسەتتى: دىڭ شياۋپيڭ جولداستىڭ بىزگە قالدىرعان ەڭ ماڭىزدى يدەيالىق بايلىعى − ول نەگىز بولىپ جاراتقان دىڭ شياۋپيڭ نازارياسى. دىڭ شياۋپيڭ نازارياسى − ماركسيزمنىڭ جۇڭگوشالانۋىنىڭ، وسىزاماندانۋىنىڭ ماڭىزدى بەلەسى. جاڭا ءداۋىر، جاڭا جورىقتا ءبىز، ءسوز جوق، دىڭ شياۋپيڭ نازارياسىن ۇزدىكسىز ىشكەرىلەي ۇيرەنىپ جانە قولدانىپ، ونىڭ عىلمي ءمانىن، وزەكتى ءمانىن تولىق، دۇرىس ءتۇسىنىپ، ءارى دىڭ شياۋپيڭ جولداستىڭ سوتسياليزمنىڭ زاڭدىلىعى جونىندەگى تانىمى نەگىزىندە العا قويعان كەلەلى قورىتىندىسىنا، نەگىزگى كوزقاراسىنا، دۇرىس قۋاتتاماسىنا تاباندى بولىپ، ءارى ۇزدىكسىز وزگەرىپ وتىرعان جاعدايعا نەگىزدەلىپ، نازاريانىڭ ءنارى مەن ءمانىن دۇرىس يگەرۋگە شەبەر بولىپ، سول ارقىلى رەال ماسەلەلەردى شەشىپ، اقيقاتقا تاباندى بولۋدان مىزعىماۋىمىز، امالياتقا جەتەكشىلىك ەتتىرۋدەن اۋىتقىماۋىمىز كەرەك. ماركسيزم - لەنينيزم، ماۋ زىدۇڭ يدەياسىنا، دىڭ شياۋپيڭ نازارياسىنا، ”ۇشكە ۋاكىلدىك ەتۋ“ ماڭىزدى يدەياسىنا، عىلمي دامۋ كوزقاراسىنا باستان - اياق تاباندى بولىپ، جاڭا داۋىردەگى جۇڭگوشا سوتسياليزم يدەياسىن جاپپاي دايەكتەندىرىپ، ماركسيزم سىندى جان تامىردان، جۇڭحۋانىڭ تاڭداۋلى ءداستۇرلى مادەنيەتى سىندى تامىردان باستان - اياق ايرىلماي، ادامزات قوعامىنىڭ بارلىق تاڭداۋلى وركەنيەت جەتىستىكتەرىنەن ۇلگى الۋعا، قابىلداۋعا شەبەر بولىپ، اقيقات جونىندە ۇزدىكسىز ىزدەنىس جاساپ، جۇڭگو ۇلگىسىندەگى وسىزامانداندىرۋدى ىلگەرىلەتۋدىڭ ءىس جۇزىندىك ماسەلەلەرىن ىشكەرىلەي زەرتتەپ، جۇڭگونىڭ سۇراۋىنا، دۇنيە ءجۇزىنىڭ سۇراۋىنا، حالىقتىڭ سۇراۋىنا، ءداۋىردىڭ سۇراۋىنا تەرەڭ جاۋاپ بەرىپ، ماركسيزمنىڭ جۇڭگوشالانۋىن، وسىزاماندانۋىن ۇزدىكسىز ىلگەرىلەتىپ، وسىزامانعى جۇڭگو ماركسيزمىنە، 21 - عاسىرداعى ماركسيزمگە ءتىپتى دە نۇرلى اقيقات شۇعىلاسىن شاشتىرۋىمىز كەرەك.

شي جينپيڭ بىلاي دەپ باسا دارىپتەدى: دىڭ شياۋپيڭ جولداستى ەڭ جاقسى ەسكە الۋ ول نەگىزىن قالاعان جۇڭگوشا سوتسياليزم ىستەرىن ۇزدىكسىز العا ىلگەرىلەتۋ بولىپ تابىلادى. ءبىز جۇڭگو ۇلگىسىندەگى وسىزامانداندىرۋ ارقىلى قۇدىرەتتى ەل قۇرۋ، ۇلتتى گۇلدەندىرۋ ۇلى ءىسىن جاپپاي ىلگەرىلەتۋ وزەكتى مىندەتىن تىعىز توڭىرەكتەپ، بۇرىنعىعا مۇراگەر بولىپ، كەيىنگىگە جول اشىپ، قايراتتانا العا ۇمتىلۋىمىز كەرەك. دۇرىس جولدان تايماي جاڭالىق جاراتۋعا تاباندى بولىپ، رەفورمانى ونان ارى جاپپاي تەرەڭدەتىپ، جۇڭگو ۇلگىسىندەگى وسىزامانداندىرۋدى ۇزدىكسىز پارمەندى قوزعاۋشى كۇشپەن جانە تۇزىمدىك كەپىلمەن قامداۋ كەرەك. جوعارى ساپالى دامۋ ماڭداي الدى مىندەتىن مىقتى يگەرىپ، جاڭا دامۋ تانىمىن تولىق، دالمە - ءدال، جاپپاي دايەكتەندىرىپ، ”بەستى ءبىر تۇلعالاندىرۋ“ جالپى تۇلعالىق ورنالاستىرۋىن ءبىر تۇتاس جوسپارلاپ ىلگەرىلەتىپ، ”ءتورتتى جاپپاي ورىنداۋ“ ستراتەگيالىق ورنالاستىرۋىن سايكەستى ىلگەرىلەتىپ، وسىزاماندانعان ەكونوميكالىق جۇيە ورناتۋدى جەدەلدەتىپ، جوعارى دەڭگەيدەگى عىلىم - تەحنيكادا ءوز كۇشىنە سۇيەنىپ، ءوزىن الۋەتتەندىرۋدى ىلگەرىلەتىپ، سوتسياليستىك وزىق مادەنيەتتى كۇش سالا دامىتىپ، زاتتىق وركەنيەت پەن رۋحاني وركەنيەت ءوزارا سايكەسكەن، ادام مەن تابيعات جاراسىمدى قاتار ءومىر سۇرەتىن تاماشا جاعداي قالىپتاستىرۋ كەرەك. حالىقتى بارىنەن جوعارى قويۋعا تاباندى بولىپ، جالپى بارىستىق حالىق دەموكراتياسىن دامىتىپ، اناعۇرلىم جوعارى دەڭگەيدەگى زاڭمەن باسقارىلاتىن جۇڭگو قۇرىپ، دامۋ بارىسىندا حالىق تۇرمىسىن قامتاماسىز ەتۋگە جانە جاقسارتۋعا تاباندى بولىپ، جالپى حالىقتىڭ ورتاق اۋقاتتانۋىن ىلگەرىلەتۋدە اناعۇرلىم كورنەكتى ماندىك ىلگەرىلەۋشىلىككە ۇزدىكسىز قول جەتكىزۋ كەرەك. جوعارى دەڭگەيدە سىرتقا ەسىك اشۋدى ىلگەرىلەتىپ، تۇزىمدىك ەسىك اشۋدى ورنىقتى قاداممەن كەڭەيتىپ، ”ءبىر بەلدەۋ، ءبىر جولدى“ بىرگە قۇرۋدىڭ جوعارى ساپالى دامۋىن ىلگەرىلەتىپ، ەسىك اشۋ مەن حاۋىپسىزدىكتى ءبىر تۇتاس جوسپارلاپ، مەملەكەتتىڭ يەلىك ۇقىعىن، حاۋىپسىزدىگىن، دامۋ مۇددەسىن قورعاۋ كەرەك. پارتيانى جاپپاي قاتاڭ باسقارۋدى تاباندىلىقپەن ىلگەرىلەتىپ، پارتيانى جاپپاي قاتاڭ باسقارۋ جۇيەسىن اقاۋسىزداندىرىپ، شىرىكتەسۋگە قارسى تۇرۋ كۇرەسىندە قامال الۋ شايقاسىنىڭ ۇزاققا سوزىلاتىن شايقاسىندا باتىل جەڭىسكە قول جەتكىزىپ، پارتيانىڭ ماڭگى ساپاسىن وزگەرتپەۋىنە، سيپاتىن وزگەرتپەۋىنە، قاسيەتىن وزگەرتپەۋىنە، باستان - اياق جۇڭگوشا سوتسياليزم ىستەرىنىڭ پارمەندى باسشىلىق ۇيىتقىسى بولۋىنا شىنايى كەپىلدىك ەتۋ كەرەك.

شي جينپيڭ بىلاي دەپ اتاپ كورسەتتى: وتاندى بۇكىلدەي بىرلىككە كەلتىرۋ − ماۋ زىدۇڭ، دىڭ شياۋپيڭ قاتارلى اعا بۋىن توڭكەرىسشىلەردىڭ ارمانى، ەل ءىشى - سىرتىنداعى جۇڭحۋا ۇلاندارىنىڭ ورتاق تىلەگى، سونداي - اق بوگەۋ بەرمەس تاريحي اعىم. ءبىز ”ءبىر ەل، ەكى ءتۇزىم“، ”شياڭگاڭدى شياڭگاڭدىقتار باسقارۋ“، ”اۋمىندى اۋمىندىقتار باسقارۋ“، وسكەلەڭ اۆتونوميا باعىتىن ۇزدىكسىز جاپپاي دۇرىس دايەكتىلەندىرىپ، شياڭگاڭ مەن اۋمىننىڭ مەملەكەتتىڭ دامۋ جالپى جاعدايىمەن اناعۇرلىم توعىسۋىن قولداپ جانە ىلگەرىلەتىپ، اناعۇرلىم جاقسى دامۋدى جۇزەگە اسىرۋىمىز كەرەك. ءبىز جاڭا داۋىردەگى پارتيانىڭ تايۋان ماسەلەسىن شەشۋ جالپى تۇلعالىق جوباسىن بۇلجىماي دايەكتىلەندىرىپ، ءبىر جۇڭگو پرينسيبىنە جانە ”92 - جىلعى ورتاق تانىمعا“ تاباندى بولىپ، ەكى جاعالاۋ قاتىناسىنىڭ بەيبىت دامۋىن ىلگەرىلەتىپ، ”تايۋاندى دەربەستەندىرۋگە“ بۇلجىماستان قارسى تۇرىپ، مەملەكەتتىڭ يەلىك ۇقىعى مەن تەرريتوريا تۇتاستىعىن قورعاۋىمىز كەرەك.

شي جينپيڭ بىلاي دەپ باسا دارىپتەدى: جۇڭگو − دۇنيە ءجۇزىنىڭ بەيبىتشىلىگىن قورعايتىن مىزعىماس كۇش. ءبىز بەيبىتشىلىك، دامۋ، سەلبەستىك، ورتاق يگىلىكتەنۋ تۋىن باستان - اياق بيىك ۇستاپ، ادامزاتتىڭ تاعدىرلاس ورتاق تۇلعاسىن قۇرۋدى ىلگەرىلەتىپ، بۇكىل ادامزاتتىڭ ورتاق قۇنىن ساۋلەلەندىرىپ، دۇنيە جۇزىلىك دامۋ باستاماسىن، دۇنيە جۇزىلىك حاۋىپسىزدىك باستاماسىن، دۇنيە جۇزىلىك وركەنيەت باستاماسىن تياناقتاندىرىپ، دۇنيە جۇزىلىك باسقارۋ جۇيەسى رەفورماسى مەن قۇرىلىسىنا بەلسەنە ات سالىسىپ، جۇڭگو ۇلگىسىندەگى وسىزامانداندىرۋدىڭ تىڭ ىلگەرىلەۋشىلىگى ارقىلى دۇنيە جۇزىنە تىڭ وراي جاراتۋىمىز كەرەك (ءسوزدىڭ تولىق مازمۇنىن «حالىق گازەتىنىڭ» 2 – بەتىنەن وقي الاسىزدار).

ساي چي ءماجىلىستى باسقارعاندا بىلاي دەدى: باس شۋجي شي جينپيڭ ماڭىزدى سوزىندە دىڭ شياۋپيڭ جولداستىڭ شۇعىلالى، جاۋىنگەرلىك، ۇلى ءومىرىن تەرەڭ تولعانىسپەن ەسكە الدى، دىڭ شياۋپيڭ جولداستىڭ پارتيا مەن حالىقتى باستاپ ەلىمىزدىڭ رەفورما جاساپ، ەسىك اشۋ جانە سوتسياليستىك وسىزامانداندىرۋ قۇرىلىسىنىڭ جاڭا كەزەڭىن ءساتتى اشقان، جۇڭگوشا سوتسياليزمدى، دىڭ شياۋپيڭ نازارياسىنىڭ ۇلى تاريحي ەڭبەگىن جاراتقان ۇلى ەڭبەگىنە وسكەلەڭ جوعارى باعا بەردى، دىڭ شياۋپيڭ نازارياسىن ۇزدىكسىز ىشكەرىلەي ۇيرەنىپ جانە قولدانىپ، دىڭ شياۋپيڭ جولداستىڭ وسكەلەڭ توڭكەرىستىك ونەگەسىنەن ۇيرەنىپ، ول اشقان جۇڭگوشا سوتسياليزم ىستەرىن ۇزدىكسىز العا ىلگەرىلەتۋ كەرەكتىگىن باسا دارىپتەدى. باس شۋجي شي جينپيڭنىڭ ماڭىزدى ءسوزى بيىكتە تۇرىپ، الىستى بولجاعان، ەگجەي - تەگجەيلى، تەرەڭ ساياسي، يدەيالىق، جەتەكشىلىك سيپاتقا يە بولدى، پارتيامىزدىڭ جاڭا ءداۋىر شارت - جاعدايىندا جۇڭگوشا سوتسياليزمگە تاباندى بولۋعا جانە ونى دامىتۋعا جەتەكشىلىك ەتۋىندە كەلەلى ماڭىزعا يە. ءبىز مۇقيات ۇيرەنىپ، ءتۇسىنىپ، ىشكەرىلەي دايەكتىلەندىرىپ، تياناقتاندىرىپ، زەيىن - زەردە، كۇش - قۋاتتى شوعىرلاندىرىپ، قايراتتانا العا ۇمتىلىپ، جۇڭگو ۇلگىسىندەگى وسىزامانداندىرۋ ارقىلى مەملەكەتتى قۇدىرەتتەندىرۋ قۇرىلىسىن، ۇلتتىڭ گۇلدەندىرۋ ۇلى ءىسىن جاپپاي ىلگەرىلەتۋ جولىندا قۇلشىنا كۇرەس جۇرگىزۋىمىز كەرەك.

اڭگىمە ماجىلىسىندە ورتالىق پارتيا تاريحى جانە قۇجات زەرتتەۋ ورنىنىڭ باستىعى چۇي چيڭشان، ورتالىق اسكەري ىستەر كوميتەتىنىڭ مۇشەسى، ورتالىق اسكەري ىستەر كوميتەتى ساياسي قىزمەت ءبولىمىنىڭ مەڭگەرۋشىسى مياۋ حۋا، سىچۋان ولكەلىك پارتكومنىڭ شۋجيى ۋاڭ شياۋحۇي ىلگەرىندى كەيىندى ءسوز سويلەدى.

بەيجيڭدەگى جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ مۇشەلەرى، ورتالىق كوميتەت شۋجيچۋىنىڭ شۋجيلەرى، مەملەكەتتىك حالىق قۇرىلتايى تۇراقتى كوميتەتىندەگى، مەملەكەتتىك كەڭەستەگى، مەملەكەتتىك ساياسي كەڭەستەگى، ورتالىق اسكەري ىستەر كوميتەتىندەگى قاتىستى باسشى جولداستار اڭگىمە ماجىلىسىنە قاتىناستى.

ورتالىقتاعى پارتيا - ۇكىمەت، ارميا ورىندارىنىڭ، بۇقارالىق ۇيىمداردىڭ قاتىستى تاراۋلارىنداعى، بەيجيڭ قالالىق، سىچۋان ولكەلىك پارتكومداعى جاۋاپتى جولداستار، ءارقايسى دەموكراتيالىق پارتيا - توپتار ورتالىق كوميتەتتەرىنىڭ، مەملەكەتتىك ساۋدا – ونەركاسىپشىلەر بىرلەستىگىنىڭ جاۋاپتىلارى جانە پارتيادا - توپتا جوق قايراتكەرلەردىڭ ۋاكىلدەرى، دىڭ شياۋپيڭ جولداستىڭ تۋىس - تۋعاندارى، دىڭ شياۋپيڭنىڭ جانىندا قىزمەت ىستەگەندەر جانە اتا مەكەنىنىڭ ۋاكىلدەرى، سونداي - اق ”مەملەكەتتىك دىڭ شياۋپيڭ جولداس دۇنيەگە كەلگەندىگىنىڭ 120 جىلدىعىن ەسكە ءتۇسىرۋ عىلمي تالقى ماجىلىسىنە“ قاتىناسقان ۋاكىلدەر قاتارلىلار اڭگىمە ماجىلىسىنە قاتىناستى.

كەلۋ قاينارى: حالىق تورابى