”ءۇش رايون، ءبىر ورتالىق“ قۇرۋ ستراتەگيالىق ورنىن تىعىز ارقاۋ ەتىپ، جۇڭگو ۇلگىسىندەگى وسىزامانداندىرۋدىڭ حاينان تاراۋىن قۇلشىنا جازۋ كەرەك

12 - ايدىڭ 17 - كۇنى تۇستەن كەيىن جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ حايناننىڭ سانياسىندا حاينان ولكەلىك پارتكوم مەن ولكەلىك ۇكىمەتتىڭ قىزمەت مالىمەتىن تىڭداپ، ماڭىزدى ءسوز سويلەدى.

سۋرەتتى شينحۋا اگەنتتىگىنىڭ ءتىلشىسى ديڭ حايتاۋ تۇسىرگەن

«حالىق گازەتى»، 12 - ايدىڭ 17 – كۇنى، سانيا. جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ حاينان ولكەلىك پارتكوم مەن ولكەلىك ۇكىمەتتىڭ قىزمەت مالىمەتىن تىڭداعاندا بىلاي دەپ باسا دارىپتەدى: پارتيا 20 - قۇرىلتايىنىڭ جانە پارتيا 20 - كەزەكتى ورتالىق كوميتەتى ەكىنشى، ءۇشىنشى جالپى ماجىلىستەرىنىڭ رۋحىن جاپپاي دايەكتىلەندىرىپ، پارتيا ورتالىق كوميتەتىنىڭ حاينان ەركىن ساۋدا پورتى قۇرىلىسى جونىندەگى ءتۇرلى ورنالاستىرۋلارىن مۇقيات تياناقتاندىرىپ، رەفورمانى جاپپاي تەرەڭدەتۋ سىناق رايونىن، مەملەكەتتىك ەكولوگيالىق وركەنيەت سىناق رايونىن، حالىقارالىق ساياحات تۇتىنۋ ورتالىعىن، مەملەكەتتىك كەلەلى ستراتەگيالىق قىزمەت وتەۋدى قامتاماسىزداندىرۋ رايونىن قۇرۋ ستراتەگيالىق ورنىن تىعىز ارقاۋ ەتىپ، تۇتاس ارالدى كەدەندىك باقىلاۋ – باسقارۋعا الۋدىڭ الدى - ارتىنداعى رەفورما جاساپ، ەسىك اشۋ جانە جوعارى ساپالى دامۋ قىزمەتىن عىلمي جوسپارلاپ، يدەيانى ۇزدىكسىز ازات ەتىپ، ءورىس اشا جاڭالىق جاراتىپ، قيىنشىلىقتاردى جەڭىپ، ورنىقتى ىلگەرىلەتىپ، حاينان ەركىن ساۋدا پورتىن ەلىمىزدىڭ جاڭا داۋىردەگى سىرتقا ەسىك اشۋىنا جەتەكشىلىك ەتەتىن ماڭىزدى قاقپاعا اينالدىرۋعا كۇش سالىپ، جۇڭگو ۇلگىسىندەگى وسىزامانداندىرۋدىڭ حاينان تاراۋىن قۇلشىنا جازۋ كەرەك.

12 - ايدىڭ 17 - كۇنى تۇستەن كەيىن شي جينپيڭ حاينان ولكەسىنىڭ سانيا قالاسىندا حاينان ولكەلىك پارتكوم مەن ولكەلىك ۇكىمەتتىڭ قىزمەت مالىمەتىن تىڭدادى. ولكەلىك پارتكومنىڭ شۋجيى فىڭ فەي مالىمەت بەردى، ولكە باستىعى ليۋ شياۋميڭ قاتارلىلار مالىمەت بەرۋ جيىنىنا قاتىناستى.

مالىمەتتى تىڭداعاننان كەيىن شي جينپيڭ ماڭىزدى ءسوز سويلەپ، حايناننىڭ ءتۇرلى قىزمەتتەردە قول جەتكىزگەن ناتيجەلەرىن تۇراقتاندىرىپ، كەلەسى قادامداعى قىزمەتتەر جونىندە ايقىن تالاپ قويدى.

شي جينپيڭ بىلاي دەپ اتاپ كورسەتتى: حاينان ەرەكشەلىگىنە جانە ابزالدىعىنا يە وسىزاماندانعان كاسىپ سالاسى جۇيەسىن كۇش سالا ورناتۋ كەرەك. عىلىم - تەحنيكادا جاڭالىق اشۋ مەن كاسىپ سالاسىندا جاڭالىق اشۋدىڭ ىشكەرىلەي توعىسۋىن جەبەپ، ساياحات كاسىبى، وسى زامانعى قىزمەت وتەۋ كاسىبى، جوعارى، جاڭا تەحنيكا كاسىبى، ىستىق بەلدەۋ ەرەكشەلىگىندەگى جوعارى ءونىمدى اۋىل شارۋاشىلىعى سياقتى جەتەكشى كاسىپ سالالارىنىڭ تىزبەكتى تولىقتاۋىن، ۇزارتۋىن، ساپالىلانىپ دارەجەسىن جوعارىلاتۋىن ىلگەرىلەتۋ كەرەك. مەملەكەتتىڭ ستراتەگيالىق عىلىم - تەحنيكا كۇشتەرىمەن ىرىقتىلىقپەن ۇشتاسىپ، حالىقارالىق عىلىم - تەحنيكا سەلبەستىگىن كۇشەيتىپ، اناعۇرلىم اشىق دارىندى ەنگىزۋ مەحانيزمىن ورناتىپ، كوپ ساتىلى عىلىم - تەحنيكادا جاڭالىق اشۋ جۇيەسىن قالىپتاستىرىپ، قامال الۋ تەبىنىن ارتتىرىپ، عىلىم - تەحنيكا جەتىستىكتەرىن كادەگە جاراتۋدى كۇشەيتىپ، جەرگىلىكتى جاعدايعا قاراي جاڭاشا وندىرگىش كۇشتەردى دامىتۋ كەرەك. ەكولوگيانى الدىمەن ەسكەرۋگە، جاسىل دامۋعا تاباندى بولىپ، قورشاعان ورتاعا قاتىستى كورنەكتى ماسەلەلەردى رەتتەۋ - وڭاۋدى كۇشەيتىپ، جاسىل تاۋ، تۇنىق سۋ، كوگىلدىر تەڭىز، اشىق اسپاندى ويداعىداي قورعاۋ كەرەك. مادەنيەت، دەنە تاربيە، ساياحات، كۇتىنۋ سياقتى كاسىپ سالالارىنىڭ توعىسپالى دامۋىن ىلگەرىلەتىپ، ساياحات كاسىبىنىڭ اشىق سەلبەستىگىن جەبەۋ كەرەك. جاڭاشا تۇتىنۋدى جەتىلدىرىپ جانە ۇلعايتىپ، تۇتىنۋدىڭ تيپىن وزگەرتىپ، دارەجەسىن جوعارىلاتۋدى ىلگەرىلەتۋ كەرەك. قۇرلىق پەن تەڭىزدى ءبىر تۇتاس جوسپارلاۋعا، تاۋلى ءوڭىر مەن تەڭىز جاعالاۋى ءوڭىرىن بايلانىستىرۋعا، بايلىقتى توعىستىرۋعا تاباندى بولىپ، تەڭىز - مۇحيتتى اشۋدى مىقتى يگەرىپ، تەڭىز - مۇحيتتان وندىرگىش كۇشكە قول جەتكىزىپ، جاڭا ارتۋ تۇيىنىنە ۇمتىلىپ، تەڭىز - مۇحيتتا قۋاتتى ولكە قۇرۋ كەرەك.

شي جينپيڭ بىلاي دەپ باسا دارىپتەدى: ءتۇيىندى سالالارداعى رەفورمانى تىڭعىلىقتى ىلگەرىلەتۋ كەرەك. ەركىن ساۋدا پورتىنىڭ ساياساتتىق ءتۇزىم جۇيەسىن جان - جاقتى اتقارۋدى كوزدە ۇستاي وتىرىپ، ەسىك اشۋدىڭ اياق الىسى مەن ريتىمىن ويداعىداي ورنالاستىرۋ كەرەك. نازاردى ساۋدا، قارجى قوسۋ، شەكارا اتتاعان قارجى اينالىمى، ادامداردىڭ كىرىپ - شىعۋى، تاسىمال بارىس - كەلىسىنىڭ ەركىن، قولايلى بولۋىن جانە ساندى مالىمەتتەردىڭ حاۋىپسىز، ءتارتىپتى اينالىمعا ءتۇسۋىن جۇزەگە اسىرۋعا شوعىرلاندىرىپ، حالىقارالىق جوعارى دەڭگەيدەگى ەكونوميكا - ساۋدا ەرەجەسىمەن تۋرالانىپ، تۇزىمدىك ەسىك اشۋدى كۇش سالا ىلگەرىلەتىپ، بازارلانعان، زاڭمەن باسقارىلاتىن، حالىقارالانعان ماڭداي الدى شارۋاشىلىق - ساۋدا ورتاسىن قالىپتاستىرۋ كەرەك. ءتۇرلى اشىق تۇعىرلاردى ناقتىلاندىرىپ، ساپالىلاندىرىپ، ”ءبىر بەلدەۋ، ءبىر جولدى“ بىرگە قۇراتىن ەلدەر جانە رايونداردىڭ ەركىن ساۋدا باقشا رايوندارىمەن اۋىس - كۇيىستى، سەلبەستىكتى جانە فۋنكتسيانى ۇشتاستىرۋدى كۇشەيتۋ كەرەك. گۋاڭدۇڭ - شياڭگاڭ – اۋمىن ۇلكەن شىعاناق رايونىمەن ىقپالداسىپ دامۋدى كۇشەيتىپ، چاڭجياڭ ەكونوميكالىق بەلدەۋى، چاڭجياڭ اتىراۋى سياقتى وڭىرلەرمەن سەلبەستىكتى تەرەڭدەتۋ كەرەك. حاينان ەركىن ساۋدا پورتىنىڭ وزەكتى ساياساتىنىڭ تياناقتانۋىن جەدەل ىلگەرىلەتىپ، ءتۇرلى دايىندىق قىزمەتتەردى دەن قويا جاقسى ىستەپ، تۇتاس ارالدى كەدەندىك باقىلاۋ – باسقارۋعا الۋ اينالىمىنىڭ ورنىقتى، ءتارتىپتى بولۋىنا كەپىلدىك ەتۋ كەرەك.

شي جينپيڭ بىلاي دەپ اتاپ كورسەتتى: تۇرعىنداردىڭ وركەنيەت ساپاسى مەن قوعامدىق وركەنيەت دەڭگەيىن ۇزدىكسىز جوعارىلاتۋ كەرەك. پارتيانىڭ جاڭالىق اشۋ نازارياسى ارقىلى جۇرت تىلەگىن توعىستىرۋعا، سوتسياليستىك وزەكتى قۇن كوزقاراسىن جەتىلدىرۋگە جانە ساۋلەلەندىرۋگە تاباندى بولىپ، بۇقارالىق رۋحاني وركەنيەت قۇرۋدى كەڭىنەن ورىستەتىپ، زاتتىق وركەنيەت پەن رۋحاني وركەنيەتتىڭ بىردەي جوعارىلاۋىن قۇلشىنا جۇزەگە اسىرۋ كەرەك. تاريحي مادەنيەتتى، توڭكەرىستىك مادەنيەتتى، تەڭىز - مۇحيت مادەنيەتىن، ۇلتتىق سالت - سانا مادەنيەتىن ويداعىداي قورعاپ، ويداعىداي پايدالانىپ، مادەنيەتتە جاڭالىق اشۋ، جاسامپازدىق جاراتۋ ومىرشەڭدىگىن كۇشەيتىپ، مادەنيەت كاسىپ سالاسىن دامىتۋ جانە ۇلعايتۋ كەرەك. قالا مەن اۋىلدىڭ الەۋمەتتىك مادەنيەت قىزمەت وتەۋ جۇيەسىن اقاۋسىزداندىرىپ، قالا مەن اۋىلداعى بۇقارانىڭ رۋحاني مادەنيەت تۇرمىسىن بايىتىپ، ەسكى سالت - سانانى وزگەرتۋدى ۇزدىكسىز ىلگەرىلەتۋ كەرەك.

شي جينپيڭ بىلاي دەپ باسا دارىپتەدى: حالىق تۇرمىسىن قامتاماسىز ەتۋ مەن قوعامدىق باسقارۋ ورەسىن جاپپاي جوعارىلاتۋ كەرەك. نەگىزدىك، جالپىعا ءتيىمدى، ەڭ تومەنگى شەكتەن تۇسىرمەيتىن حالىق تۇرمىسى قۇرىلىسىن كۇشەيتىپ، قالا مەن اۋىلدىڭ الەۋمەتتىك قىزمەت وتەۋ جۇيەسى مەن قوعامدىق قامتاماسىزداندىرۋ جۇيەسىن كەمەلدەندىرىپ، بۇقارانىڭ شۇعىل، قيىن، الاڭداعان، ءزارۋ ماسەلەلەرىن ويداعىداي شەشۋ كەرەك. ءتۇيىندى قاۋىمنىڭ جۇمىستانۋىن، يگىلىك جاراتۋىن قولداۋدى كۇشەيتىپ، جۇمىستانۋدىڭ جالپى تۇلعالىق ورنىقتىلىعىن ساقتاۋ كەرەك. قالا مەن اۋىلدىڭ نەگىزدىك قۇرىلعىلارى مەن الەۋمەتتىك قىزمەت وتەۋ جۇلگەسىن ءبىر تۇتاس جوسپارلاپ، قالا - قالاشىقتاندىرۋدى ورنىقتى ىلگەرىلەتۋ كەرەك. كەدەيلىكتەن ارىلعانداردى سۇيەمەلدەۋدىڭ ناقتى ونىمدىلىگىن جوعارىلاتىپ، كولەمدى قايتا كەدەيلەسۋ، كەدەيلەسۋ تۋىلماۋدىڭ تومەنگى شەگىن ساقتاۋ كەرەك. دامۋ مەن حاۋىپسىزدىكتى ءبىر تۇتاس جوسپارلاپ، حاۋىپ - قاتەردەن ساقتانۋ جانە ونى تىزگىندەۋ جۇيەسىن كەمەلدەندىرىپ، اپاتتان ساقتانۋ، اپات زيانىن ازايتۋ، اپاتتان قۇتقارۋ قابىلەتى قۇرىلىسىن كۇشەيتىپ، اۋىر حاۋىپ - قاتەر مەن سىن - سايىسقا توتەپ بەرۋ قابىلەتىن جوعارىلاتۋ كەرەك. قالا، اۋىل، الەۋمەتتىك اۋماقتاردى باسقارۋ جۇيەسىن اقاۋسىزداندىرىپ، قارا كۇشتەردى الاستاۋدى، سۇرقيا كۇشتەردى جويۋدى ۇدايىلاندىرىپ، زاڭعا قايشى ءتۇرلى ارەكەتتەردى زاڭ بويىنشا جازالاۋ كەرەك.

شي جينپيڭ بىلاي دەپ اتاپ كورسەتتى: پارتيانىڭ ساياسي قۇرىلىسى ارقىلى پارتيا قۇرىلىسىنىڭ قىزمەتتەرىنە ءبىر تۇتاس باسشىلىق ەتىپ، پارتيانى جاپپاي قاتاڭ باسقارۋدىڭ ىشكەرىلەي دامۋىن ىلگەرىلەتۋ كەرەك. نەگىزگى تاقىرىپتىق تاربيەنىڭ جەتىستىكتەرىن بەكەمدەپ جانە كەڭەيتىپ، پارتيا ءتارتىبىن ۇيرەنۋ تاربيەسىنىڭ ۇدايىلانۋىن، ۇزاق ۋاقىت ءونىمدى بولۋىن ىلگەرىلەتىپ، ورتالىقتىڭ 8 ءتۇرلى بەلگىلەمەسىنىڭ رۋحىن ۇزدىكسىز تياناقتاندىرىپ، ستيلگە بۇرىلىس جاساۋدى ىلگەرىلەتىپ، قالىڭ كادرلاردى باتىلدىقپەن قامال الىپ، باتىلدىقپەن سىناق جۇرگىزۋ، باتىلدىقپەن الدا ءجۇرۋ، قاجىرلىلىقپەن بەرىلە ىستەۋ سىندى ەرەكشە رايون رۋحىن ۇزدىكسىز ساۋلەلەندىرىپ، دۇرىس ناتيجە كوزقاراسىن ورناتۋعا جانە امالياتتا ايگىلەۋگە شابىتتاندىرۋ كەرەك. شىرىكتەسۋگە قارسى تۇرۋ كۇرەسىن ايالسىز مىقتى يگەرىپ، شىرىكتەسۋدىڭ پايدا بولۋ ورتاسى مەن شارت – جاعدايىن قۇلشىنا جوعالتۋ كەرەك. ۇقىق جۇرگىزۋدى تەجەۋ مەن باقىلاۋدى كۇشەيتىپ، كادرلاردى شىرىكتەسۋدەن، ازعىنداۋدان ساقتانۋ قابىلەتىن كۇشەيتۋگە تاربيەلەۋ جانە جەتەكتەۋ كەرەك.

شي جينپيڭ بىلاي دەپ باسا دارىپتەدى: جاڭا جىل مەن كوكتەم مەرەكەسى تاياپ قالدى، ءار دارەجەلى پارتكومدار مەن ۇكىمەتتەر استىق، كوجە قاتىق سياقتى حالىق تۇرمىسىن قامتاماسىز ەتۋدى ويداعىداي يگەرىپ، زاتتىق ماتەريال، ەنەرگيا سياقتىلارمەن قامداۋدى قامتاماسىز ەتۋ قىزمەتىن ويداعىداي يگەرىپ، ءوندىرىس حاۋىپسىزدىگىنە زور تەكسەرۋ جۇرگىزۋدى ىشكەرىلەي ورىستەتىپ، قوعامدىق كەلەلى جاعدايدىڭ ورنىقتىلىعىن قورعاۋى كەرەك. ورتالىقتىڭ ەكونوميكالىق قىزمەت ءماجىلىسىنىڭ رۋحىن مۇقيات دايەكتىلەندىرىپ، كەلەر جىلعى ەكونوميكالىق، قوعامدىق دامۋ قىزمەتىن عىلمي جوبالاپ، جاڭا جىلدا تاماشا باستاما جاراتۋعا قۇلشىنۋ كەرەك.

جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ تۇراقتى مۇشەسى، ورتالىق كوميتەت كەڭسە مەڭگەرمەسىنىڭ مەڭگەرۋشىسى ساي چي مالىمەت بەرۋ جيىنىنا قاتىناستى.

حى ليفىڭ جانە ورتالىق پەن مەملەكەت ورگاندارىنىڭ قاتىستى تاراۋلارىنداعى جاۋاپتى جولداستار مالىمەت بەرۋ جيىنىنا قاتىناستى.

كەلۋ قاينارى: حالىق تورابى