بيىل شينجياڭ تاس جول قاتىناس نەگىزدىك قۇرىلعىلارىن سالۋعا  80 ميلليارد يۋان قارجى قوسادى 

شينجياڭ گازەتىنىڭ 2 – ايدىڭ 8 – كۇنى ۇرىمجىدەن بەرگەن حابارى. انار بۇلت \ شينجياڭ گازەتىنىڭ ءتىلشىسى ما ينيڭنىڭ شينجياڭنىڭ 2025 ـ جىلعى قاتىناس ـ تاسىمال قىزمەتى جونىندەگى ماجىلىستەن ۇعىسۋىنشا، بيىل شينجياڭ تاس جول قاتىناسىنا 80 ميلليارد يۋان قارجى قوسۋدى، سايكەستى مەزگىلدەگىدەن %13.5 ارتتىرىپ، جوعارى قارقىندى (1 ـ دارەجەلى) تاس جولدى 13 مىڭ كيلومەتر اينالاسىنا جەتكىزۋدى، جوعارى قارقىندى تاس جولدى 8000 كيلومەتردەن اسىرۋدى، بۇكىل اۆتونوميالى رايون بويىنشا تاس جولدىڭ جالپى ۇزىندىعىن ”14 – بەسجىلدىق“ جوسپارداعى نىسانادان اسىرۋدى جوسپارلاعان.

تانىستىرۋعا قاراعاندا، قازىر اۆتونوميالى رايون بويىنشا تاس جولدىڭ جالپى ۇزىندىعى 230 مىڭ كيلومەترگە جەتكەن، بىلتىر جاڭادان سالىنعان مەملەكەتتىك، ولكەلىك 9 نەگىزگى جەلى تاس جولىنىڭ قۇرىلىسى تۇگەلدەي ۋاعىندا باستالعان، مەملەكەتتىك، ولكەلىك 16 نەگىزگى جەلى نىسانى سالىنىپ بولىپ، اۆتوموبيل قاتىناعان، تيانشان جەڭىس تۋنەلى ءبىر جىل بۇرىن تۇتاستىرىلعان، شينجياڭعا قاتىنايتىن ءبىر داڭعىل جاڭادان قوسىلعان جانە 4 اۋدان ـ قالاعا جوعارى قارقىندى (1 ـ دارەجەلى) تاس جول جاڭادان سالىنعان، اۆتونوميالى رايون بويىنشا اۋدان ـ قالالارعا جوعارى قارقىندى (1 ـ دارەجەلى) تاس جول تۇتاستىرۋ سالىستىرماسى %94 تەن اسقان. 3A دارەجەلى جانە ودان جوعارى دارەجەلى كورىنىس رايوندارىنا قاتىنايتىن جوعارى قارقىندى تاس جولدىڭ قامتۋ مولشەرى %95 كە جەتكەن.

كەلۋ قاينارى: حالىق تورابى