ۇكىمەت جاق سانجىياڭ سەرىكتەستىگىن تەكسەرىپ ءبىر جاقتى ەتۋ جاعدايى جونىندە حابارلاندىرۋ جاريالادى 

حىفەي سانجىياڭ ينتەرنەتتىك عىلىم - تەحنيكا شەكتى سەرىكتەستىگىنىڭ (تومەندە قىسقاشا سانجىياڭ سەرىكتەستىگى دەپ الىنادى) تىكە تاراتىلىم ارقىلى زات ساتۋىنا قاتىستى ماسەلەلەر جونىندە، انحۇي ولكەسى حىفەي قالاسىنىڭ بىرلەسكەن تەكسەرۋ گرۋپپاسى 3 - ايدىڭ 23 – كۇنى مىناداي حابارلاندىرۋ جاريالادى: 2024 – جىلى 10 - ايدىڭ 11 – كۇنى سانجىياڭ سەرىكتەستىگى 68 ميلليون 949 مىڭ 500 اقشالاي ايىپ سوما مەن ءمۇسادىرالاۋ سوماسىن تولىق تاپسىرعان. ”شياڭگاڭ مەيچىڭ ايكۇلشەسى“، «اۆستراليانىڭ جەمىمەن باعىلعان سيىر ەتىنەن جاسالعان قاتتاما“ قاتارلى دەلوعا قاتىستى ونىمدەرگە بايلانىستى جيىنى 27 ميلليون 778 مىڭ 500 يۋان تولەم بەرگەن ءارى تولەم بەرۋگە تيىستىلەرىنە مۇمكىندىكتىڭ بارىنشا تولەم بەرۋ پرينسيبى جانە زاتتىڭ اقىسىمەن قوسا ءۇش ەسە تولەم بەرۋ ولشەمى بويىنشا، تولەم بەرۋ قىزمەتىن ويداعىداي ىستەگەن. سانجىياڭ سەرىكتەستىگىنىڭ ءونىم تاڭداۋ، ءونىمنىڭ ساپاسىن مەڭگەرۋ، ۇگىتتەۋ جانە تانىستىرۋ، زاتتى ساتقاننان كەيىنگى قىزمەت وتەۋ، ىشكى جاقتاعى باسقارۋ قاتارلى جاقتارىندا ورىن تەۋىپ وتىرعان ماسەلەلەرىنە باعىتتاي وتىرىپ، حىفەي قالالىق بىرلەسكەن تەكسەرۋ گرۋپپاسى سەرىكتەستىكتىڭ 89 ءتۇرلى ناقتى رەتتەۋ ـ تۇزەتۋ شاراسىن بەلگىلەۋىنە جەتەكشىلىك ەتكەن.

سانجىياڭ سەرىكتەستىگىنىڭ ءوتىنىش ەتۋى بويىنشا، حىفەي قالالىق بىرلەسكەن تەكسەرۋ گرۋپپاسى قاتىستى باسقارۋشى تاراۋلار مەن ادۆوكاتتاردى، تۇتىنۋشىلاردىڭ ۋاكىلدەرى قاتارلىلاردى ۇيىمداستىرىپ، جان - جاقتىلى باعالاۋ جۇرگىزۋ ارقىلى، سانجىياڭ سەرىكتەستىگىنىڭ رەتتەۋ - تۇزەتۋى تالاپقا ۇيلەسەدى، تيجاراتتى قالپىنا كەلتىرۋ شارت - جاعدايىن ازىرلەدى دەپ قاراعان.

ءتىلشىنىڭ ۇعىسۋىنا قاراعاندا، سانجىياڭ سەرىكتەستىگىنىڭ تىكە تاراتىلىم ارقىلى قاتىستى ونىمدەردى ساتۋ بارىسىندا جالعان ساۋدالىق ۇگىت جاساۋى سىندى ماسەلەلەرىنە باعىتتاي وتىرىپ، حىفەي قالاسى وسىنىڭ الدىندا بىرلەسكەن تەكسەرۋ گرۋپپاسىن قۇرعان، سونداي ـ اق 2024 ـ جىلى 9 - ايدىڭ 26 ـ كۇنى حابارلاندىرۋ شىعارىپ، سانجىياڭ سەرىكتەستىگىنىڭ زاڭعا قايشى تابىسىن ءمۇسادىرالاۋ، اتالعان سەرىكتەستىككە اقشالاي ايىپ سالۋ ۇيعارىمىن جاساپ، سەرىكتەستىكتى تيجاراتىن ۋاقىتشا توقتاتىپ، شەكتى مەرزىم ىشىندە تۇزەتۋگە بۇيىرعانىن جاريالاعان. (ءتىلشى: پان فىڭ)

كەلۋ قاينارى: حالىق تورابى