لي چياڭ فرانسيانىڭ سىرتقى ىستەر مينيسترى باررومەن كەزدەستى

شينحۋا اگەنتتىگى، 3 ـ ايدىڭ 27 ـ كۇنى، بەيجيڭ. 3 ـ ايدىڭ 27 ـ كۇنى مەملەكەتتىك كەڭەستىڭ زۇڭليى لي چياڭ حالىق سارايىندا فرانسيانىڭ سىرتقى ىستەر مينيسترى باررومەن كەزدەستى.

لي چياڭ مىنالاردى ءبىلدىردى: تاياۋ جىلداردان بەرى جۇڭگو مەن فرانسيانىڭ قارىم - قاتىناسىندا ورنىقتى، بەلسەندى دامۋ تاماشا جاعدايى جارىققا شىقتى. بىلتىر ەكى ەلدىڭ ديپلوماتيالىق قارىم - قاتىناس ورناتقاندىعىنىڭ 60 جىلدىعىندا ءتوراعا شي جينپيڭ مەن ماكرون زۇڭتۇڭ ەكى جاقتى قارىم - قاتىناستى جانە سەلبەستىكتى تەرەڭدەتۋ جونىندە ءبىر قىدىرۋ ماڭىزدى ورتاق تانىمعا كەلدى. قازىرگى حالىقارالىق جاعدايدا جۇڭگو مەن فرانسيا دەربەس، پىسىپ - جەتىلگەن، جاۋاپكەرشىلىك ارقالايتىن ءىرى ەل رەتىندە قارىم - قاتىناستى، سەلبەستىكتى كۇشەيتىپ، ەكى ەل مەن دۇنيە ءجۇزىنىڭ بىرگە دامۋىنا اناعۇرلىم كوپ ورنىقتىلىق، تۇراقتىلىق قوسۋى كەرەك. جۇڭگو جاق فرانسيا جاقپەن بىرگە ەكى ەل مەملەكەت باسشىلارىنىڭ ستراتەگيالىق جەتەكشىلىگىن باسشىلىققا الىپ، جوعارى جىكتەگىلەردىڭ ءجيى بارىس ـ كەلىسىن ساقتاپ، ءار سالاداعى ءوزارا ءتيىمدى سەلبەستىكتى كەڭەيتىپ، كليمات وزگەرىسىنە توتەپ بەرۋ سياقتى كوپ جاقتى سەلبەستىكتى كۇشەيتىپ، ەكى ەل مەن دۇنيە ءجۇزى حالقىنا ءتىپتى دە زور باقىت جاراتۋدى قالايدى.

لي چياڭ بىلاي دەپ اتاپ كورسەتتى: جۇڭگو مەن فرانسيا _ ەركىن ساۋدانىڭ، كوپ جاقتىلىقتىڭ باتىل قورعاۋشىلارى، ەكى ەلدىڭ ەكونوميكالىق مۇددەسىنىڭ توعىسۋى تىعىز، ەكى جاق قورعانىمپازدىقتى، سىڭار جاقتىلىقتى بىرگە تەجەپ، ەسىك اشۋ پوزيتسياسى بويىنشا سەلبەستىكتى ۇزدىكسىز كۇشەيتىپ، ءبىرىن ـ ءبىرى تولىقتاۋ ابزالدىعىن تولىق ساۋلەلەندىرىپ، ەكى ەل ەكونوميكاسىنىڭ دامۋىنا ۇزدىكسىز قوزعاۋشى كۇش قوسۋى كەرەك. جۇڭگو جاق فرانسيا جاقتى باستان ـ اياق ماڭىزدى سەلبەستىك سەرىگى دەپ قارايدى، فرانسيا جاقپەن اۆياتسيا، عارىش، يادرو ەنەرگياسى سياقتى ءداستۇرلى سەلبەستىكتى كۇشەيتۋمەن بىرگە، سيفرلى ەكونوميكا، جاساندى زەردە، بيو عىلىم ـ تەحنيكا سياقتى جاڭادان گۇلدەنگەن جانە بولاشاقتاعى كاسىپ سالاسى سەلبەستىگىنىڭ كومەسكى كۇشىن ۇزدىكسىز اشىپ، ەكونوميكانىڭ جاڭا قوزعاۋشى كۇشىن بىرگە جەتىلدىرۋدى، زورايتۋدى قالايدى. فرانسيا جاقتىڭ فرانسياعا قارجى قوسقان جۇڭگو كاسىپورىندارىنا ءادىل، ادىلەتتى، مەجەلەۋگە بولاتىن دامۋ ورتاسىن جاراتۋىن ءۇمىت ەتەمىز. بيىل _ جۇڭگو مەن ەۆروپانىڭ ديپلوماتيالىق قارىم - قاتىناس ورناتقاندىعىنىڭ 50 جىلدىعى، جۇڭگو جاق ەۆروپا جاقپەن وسىنى وراي ەتىپ، ەكى جاق قارىم - قاتىناسىنىڭ ونان ارى ىشكەرىلەي دامۋىن ىلگەرىلەتىپ، ءوزارا قۇرمەت ەتۋ، تەڭدىك، ءوزارا تيىمدىلىك نەگىزىندە ەكى جاقتىڭ كوڭىل ءبولىپ وتىرعان ماسەلەلەرىن پىكىرلەسۋ، كەڭەسۋ ارقىلى شەشۋدى قالايدى. فرانسيا جاقتىڭ وسى ءۇشىن بەلسەندى رول اتقارۋىن ءۇمىت ەتەمىز.

باررو مىنالاردى ءبىلدىردى: بۇگىنگى دۇنيە ءجۇزىنىڭ كۇن سايىن كۇشەيگەن تۇراقسىزدىعى الدىندا، بىرلەسكەن مەملەكەتتەر ۇيىمى حاۋىپسىزدىك القالار كەڭەسىنىڭ تۇراقتى القا ەلى رەتىندە فرانسيا مەن جۇڭگو كوپ جاقتىلىقتى بىرگە قورعاۋدىڭ ماڭىزدى جاۋاپكەرشىلىگىن ارقالاپ وتىر. فرانسيا جاق جۇڭگومەن قارىم - قاتىناسقا ايرىقشا ءمان بەرەدى، جۇڭگومەن بىرگە قۇلشىنىپ، ەكى ەلدىڭ مەملەكەت باسشىلارى كەلىسكەن ماڭىزدى ورتاق تانىمدى بەلسەنە تياناقتاندىرىپ، جوعارى جىكتەگىلەردىڭ بارىس ـ كەلىسىن اناعۇرلىم جيىلەتىپ، ساۋدا، قارجى قوسۋ، عىلىم ـ تەحنيكا سياقتى سالالارداعى ءوزارا ءتيىمدى سەلبەستىكتى كەڭەيتىپ، كليمات وزگەرىسى سياقتى دۇنيە جۇزىلىك سايىستارعا قول ۇستاسا توتەپ بەرۋدى قالايدى. فرانسيا جاق ستراتەگيالىق دەربەستىككە باستان ـ اياق تاباندى بولىپ، ساۋدا قورعانىمپازدىعىنا جانە ساۋدا سوعىسىنا قارسى تۇرادى، ەۆروپا مەن جۇڭگونىڭ ەكونوميكا ـ ساۋدا سياقتى سالالاردا پىكىرلەسۋدى، سەلبەسۋدى كۇشەيتۋىن قولداپ، ەكى جاق كوڭىل ءبولىپ وتىرعان ماسەلەلەردى ۇيلەسىمدى ءبىر جاقتى ەتىپ، اناعۇرلىم كوپ بەلسەندى كەڭەستىك تارتىپتەردى كەڭەيتەدى.

كەلۋ قاينارى: حالىق تورابى