شي جينپيڭ ءۇندىستاننىڭ زۇڭتۇڭى مۋرمۋمەن جۇڭگو مەن ءۇندىستاننىڭ ديپلوماتيالىق قارىم - قاتىناس ورناتقاندىعىنىڭ 75 جىلدىعى بايلانىسىمەن ءوزارا قۇتتىقتاۋ تەلەگرامماسىن جولدادى

شينحۋا اگەنتتىگى، 4 ـ ايدىڭ 1 ـ كۇنى، بەيجيڭ. 4 ـ ايدىڭ 1 ـ كۇنى مەملەكەت ءتوراعاسى شي جينپيڭ ءۇندىستاننىڭ زۇڭتۇڭى مۋرمۋمەن ءوزارا قۇتتىقتاۋ تەلەگرامماسىن جولداپ، ەكى ەلدىڭ ديپلوماتيالىق قارىم ـ قاتىناس ورناتقاندىعىنىڭ 75 جىلدىعىن قۇتتىقتادى.

شي جينپيڭ بىلاي دەپ اتاپ كورسەتتى: جۇڭگو مەن ءۇندىستان ەكەۋى دە − وركەنيەتتى بايىرعى ەلدەر، وركەندەپ كەلە جاتقان ءىرى ەلدەر، ”الەمنىڭ وڭتۇستىگىندەگى“ ماڭىزدى مۇشەلەر، ەكەۋى دە وزدەرىنىڭ وسىزامانداندىرۋ قۇرىلىسىنىڭ شەشۋشى كەزەڭىندە تۇر. جۇڭگو - ءۇندىستان قارىم - قاتىناسىنىڭ دامۋ بارىسى ءوزارا تابىسقا جەتەتىن سەرىك بولۋ، ”ايداعار， ءپىل ءبيىن بىرگە بيلەۋدى“ جۇزەگە اسىرۋ ەكى جاقتىڭ دۇرىس تالعامى ەكەندىگىن، ەكى ەلدىڭ جانە ەكى ەل حالقىنىڭ ءتۇبىرلى مۇددەسىنە بۇكىلدەي ۇيلەسەتىندىگىن ايگىلەدى. ەكى جاق جۇڭگو - ءۇندىستان قارىم - قاتىناسىنا ستراتەگيالىق بيىكتىكتەن جانە ۇزاق بولاشاق تۇرعىسىنان مامىلە جاساپ جانە ونى ءبىر جاقتى ەتىپ، كورشى ۇلكەن ەلدەر بەيبىت قاتار تۇرۋ، ءوزارا سەنىم ارتۋ، ءوزارا پايدا جەتكىزۋ، ورتاق دامۋ سىندى بەرەكەلى ءوتۋ جولىن بىرگە جوسپارلاپ، دۇنيە ءجۇزىنىڭ كوپ ۇيەكتەنۋىن جانە حالىقارالىق قارىم - قاتىناستىڭ دەموكراتيالانۋىن بىرگە ىلگەرىلەتۋى كەرەك.

شي جينپيڭ بىلاي دەپ باسا دارىپتەدى: مەن زۇڭتۇڭ حانىممەن بىرگە قۇلشىنىپ، ەكى ەلدىڭ ديپلوماتيالىق قارىم - قاتىناس ورناتقاندىعىنىڭ 75 جىلدىعىن وراي ەتىپ، ەكى جاقتىڭ ستراتەگيالىق ءوزارا سەنىمدىلىگىن ارتتىرىپ، ءتۇرلى سالاداعى اۋىس - كۇيىستى، سەلبەستىكتى كۇشەيتىپ، كەلەلى حالىقارالىق ىستەردەگى كەڭەسۋ مەن سايكەسۋدى تەرەڭدەتىپ، جۇڭگو - ءۇندىستان شەكارا ءوڭىرىنىڭ بەيبىتشىلىگىن، تىنىشتىعىن بىرگە ويداعىداي قورعاپ، جۇڭگو - ءۇندىستان قارىم - قاتىناسىنىڭ اقاۋسىز، ورنىقتى ارنامەن العا دامۋىن ىلگەرىلەتىپ، دۇنيە ءجۇزىنىڭ بەيبىتشىلىگىن، گۇلدەنۋىن جەبەۋگە ۇلەس قوسۋدى قالايمىن.

مۋرمۋ مىنالاردى ءبىلدىردى: ءۇندىستان مەن جۇڭگو − ىرگەلەس ەكى ءىرى ەل، بۇكىل دۇنيە ءجۇزى حالىق سانىنىڭ ۇشتەن ءبىر ۇلەسىن ۇستاپ وتىر. ورنىقتى، مەجەلەۋگە بولاتىن جانە دوسجار ەكى جاقتى قارىم - قاتىناس ەكى ەل مەن دۇنيە جۇزىنە باقىت اكەلەدى. ءبىز ءۇندىستان مەن جۇڭگونىڭ ديپلوماتيالىق قارىم - قاتىناس ورناتقاندىعىنىڭ 75 جىلدىعىن وراي ەتىپ، ءۇندىستان ـ جۇڭگو قارىم - قاتىناسىنىڭ اقاۋسىز، ورنىقتى دامۋىن بىرگە ىلگەرىلەتەيىك.

سول كۇنى مەملەكەتتىك كەڭەستىڭ زۇڭليى لي چياڭ ءۇندىستاننىڭ زۇڭليى موديمەن ءوزارا قۇتتىقتاۋ تەلەگرامماسىن جولدادى. لي چياڭ مىنالاردى ءبىلدىردى: جۇڭگو جاق ءۇندىستان جاقپەن بىرگە قۇلشىنىپ، ەكى ەلدىڭ ديپلوماتيالىق قارىم ـ قاتىناس ورناتقاندىعىنىڭ 75 جىلدىعىن وراي ەتىپ، ستراتەگيالىق ءوزارا سەنىمدىلىكتى ۇزدىكسىز كۇشەيتىپ، ءار سالاداعى اۋىس ـ كۇيىستى، سەلبەستىكتى ىلگەرىلەتىپ، شەكارا ماسەلەسىن ۇيلەسىمدى ءبىر جاقتى ەتىپ، ەكى ەل قارىم ـ قاتىناسىنىڭ اقاۋسىز، ورنىقتى ارنامەن العا قاراي دامۋىن ىلگەرىلەتىپ، ەكى ەل حالقىنا اناعۇرلىم مول ىرىس ـ قۇت اكەلۋدى قالايدى.

مودي مىنالاردى ءبىلدىردى: ءۇندىستان مەن جۇڭگو − ەكى ءىرى وركەنيەتتى بايىرعى ەل، ادامزاتتىڭ تاريحي بارىسىن سومداۋدا ماڭىزدى رول اتقاردى، قازىر بەيبىتشىلىك پەن دامۋدى جەبەۋ اۋىر مىندەتىن ارقالاپ وتىر. ءۇندىستان - جۇڭگو قارىم - قاتىناسىنىڭ دامۋى دۇنيە ءجۇزىنىڭ گۇلدەنۋىنە، ورنىقتىلىعىنا ءتيىمدى بولىپ قانا قالماستان، دۇنيە ءجۇزىنىڭ كوپ ۇيەكتەنۋىن جۇزەگە اسىرۋعا دا ءتيىمدى. ءۇندىستان مەن جۇڭگونىڭ ديپلوماتيالىق قارىم - قاتىناس ورناتقاندىعىنىڭ 75 جىلدىعى ەكى ەلدىڭ قارىم - قاتىناسىن اقاۋسىز، ورنىقتى دامۋ كەزەڭىنە وتۋگە باستايدى.

كەلۋ قاينارى: حالىق تورابى