شي جينپيڭ گەرمانيانىڭ زۇڭليى مەرزبەن تەلەفوندا سويلەستى

شينحۋا اگەنتتىگى، 5 - ايدىڭ 23 - كۇنى، بەيجيڭ. 5 - ايدىڭ 23 - كۇنى تۇستەن كەيىن مەملەكەت ءتوراعاسى شي جينپيڭ ۇسىنىس بويىنشا گەرمانيانىڭ زۇڭليى مەرزبەن تەلەفوندا سويلەستى.

شي جينپيڭ مەرزدىڭ گەرمانيانىڭ زۇڭليى بولىپ تاعايىندالعاندىعىن تاعى ءبىر رەت قۇتتىقتادى. شي جينپيڭ بىلاي دەپ اتاپ كورسەتتى: بۇگىنگى دۇنيە جۇزىندەگى 100 جىلدىق وزگەرىس جەدەل قۇبىلىپ، حالىقارالىق جاعداي قىم - قۋىت بولىپ، جۇڭگو - گەرمانيا، جۇڭگو - ەۆروپا قارىم - قاتىناسىنىڭ ستراتەگيالىق، جالپى جاعدايلىق ءمانى اناعۇرلىم كورنەكتىلەندى. جۇڭگو مەن گەرمانيانىڭ اقاۋسىز، ورنىقتى قارىم - قاتىناسى ەكى ەلدىڭ مۇددەسىنە ۇيلەسەدى ءارى جۇڭگو مەن ەۆروپانىڭ ءار سالاسىنىڭ تىلەگىنە دە ۇيلەسەدى. جۇڭگو جاق گەرمانيا جاقپەن جان - جاقتى ستراتەگيالىق سەرىكتەستىك قارىم - قاتىناستىڭ جاڭا پاراعىن اشىپ، جۇڭگو - ەۆروپا قارىم - قاتىناسىنىڭ جاڭا دامۋعا قول جەتكىزۋىنە جەتەكشىلىك ەتىپ، دۇنيە ءجۇزى ەكونوميكاسىنىڭ ورنىقتى ارتۋىنا تىڭ ۇلەس قوسۋدى قالايدى.

شي جينپيڭ بىلاي دەپ باسا دارىپتەدى: جۇڭگو مەن گەرمانيا ءوزارا قۇرمەت ەتۋ، پارىقتاردى ساقتاپ، ورتاقتىققا ۇمتىلۋ، سەلبەسىپ تەڭ يگىلىككە كەنەلۋ رۋحىمەن ەكى جاقتى قارىم - قاتىناستى دامىتىپ كەلەدى، بۇل تاماشا ءداستۇر ەكى جاقتىڭ دەن قويا قورعاۋىن، جالعاستىرۋىن، ساۋلەلەندىرۋىن قاجەت ەتەدى. ءبىرىنشى، ساياسي ءوزارا سەنىمدىلىكتى بەكەمدەۋ كەرەك. جۇڭگو گەرمانيانى سەرىك سانايدى، گەرمانيانىڭ دامۋىن، گۇلدەنۋىن قۋانا كورىپ وتىر، گەرمانيا جاقپەن جوعارى جىكتەگىلەردىڭ بارىس - كەلىسىن جيىلەتىپ، ءبىر - ءبىرىنىڭ وزەكتى مۇددەسىنە قۇرمەت ەتىپ، ەكى ەل قارىم - قاتىناسىنىڭ ساياسي نەگىزىن بەكەمدەۋدى قالايدى. ەكىنشى، قارىم - قاتىناستىڭ سەرپىمدىلىگىن كۇشەيتۋ كەرەك. ەكى جاق اۆتوموبيل، ماشينا جاساۋ، حيميا ونەركاسىبى سياقتى ءداستۇرلى سالالارداعى سەلبەستىكتىڭ ساقتالۋ مولشەرىن ۇزدىكسىز ۇلعايتۋمەن بىرگە، جاساندى زەردە، كۆانتتىق تەحنيكا سياقتى الدىڭعى لەك سالالارىنداعى سەلبەستىكتىڭ ارتۋ مولشەرىن جەتىلدىرىپ، كليمات وزگەرىسى، جاسىل دامۋ سياقتى سالالارداعى اۋىس - كۇيىستى، سەلبەستىكتى كۇشەيتىپ، دۇنيە ءجۇزىنىڭ باياندى دامۋىنا جۇڭگو مەن گەرمانيانىڭ اقىل - پاراساتى مەن جوباسىن ارناۋى كەرەك. ءۇشىنشى، سەلبەستىكتىڭ قوزعاۋشى كۇشىن ارتتىرۋ كەرەك. جۇڭگو جاق گەرمانيامەن جوعارى دەڭگەيدەگى سىرتقا ەسىك اشۋ الا كەلگەن دامۋ ورايىنان بىرگە يگىلىكتەنۋدى قالايدى، گەرمانيا جاقتىڭ ەكى ەلدىڭ قوس باعىتتا قارجى قوسۋ سەلبەستىگىنە اناعۇرلىم كوپ ساياساتتىق قولداۋ جانە قولايلىلىق جاراتىپ، جۇڭگو كاسىپورىندارىنا ءادىل، جاريالى، كەمسىتپەيتىن شارۋاشىلىق - ساۋدا ورتاسىن ازىرلەۋىن ءۇمىت ەتەدى.

شي جينپيڭ بىلاي دەپ اتاپ كورسەتتى: اماليات جۇڭگو - گەرمانيا، جۇڭگو - ەۆروپا قارىم - قاتىناسىنىڭ دۇرىس ورنى سەرىكتەسۋ ەكەندىگىن، ورنىقتى، مەجەلەۋگە بولاتىن ساياساتتىق ورتا − ەكى جاقتى سەلبەستىكتىڭ ماڭىزدى كەپىلى ەكەندىگىن، ءىرى ەلدەردىڭ جاۋاپكەرشىلىك ارقالاۋى − ەكى جاقتىڭ ورتاق بورىشى ەكەندىگىن تولىق دالەلدەدى. بيىل − جۇڭگونىڭ ەۆروپا وداعىمەن ديپلوماتيالىق قارىم - قاتىناس ورناتقاندىعىنىڭ 50 جىلدىعى، ەكى جاق جۇڭگو - ەۆروپا قارىم - قاتىناسىنىڭ دامۋىنداعى تابىستى تاجىريبەلەردى بىرگە قورىتىندىلاپ، كوپ جاقتىلىقتى جانە ەركىن ساۋدانى قورعاۋدىڭ، ەسىك اشۋدى، ءوزارا ءتيىمدى سەلبەستىكتى تەرەڭدەتۋدىڭ بەلسەندى سيگنالىن تاراتۋى كەرەك.

مەرز مىنالاردى ءبىلدىردى: جۇڭگو − دۇنيە جۇزىندەگى ەڭ ماڭىزدى ەلدەردىڭ ءبىرى. گەرمانيا - جۇڭگو قارىم - قاتىناسىنىڭ دامۋى جاقسى، سەلبەستىگى تەرەڭ، تابىسى مول. قازىرگى حالىقارالىق جاعدايدا دۇنيە جۇزىندەگى ەكى ۇلكەن نەگىزگى ەكونوميكالىق تۇلعا رەتىندە، گەرمانيا مەن جۇڭگونىڭ سەلبەستىگى ءتىپتى دە ماڭىزدى مانگە يە. گەرمانيانىڭ جاڭا ۇكىمەتى ءبىر جۇڭگو ساياساتىنا تاباندى بولادى، سىندارلى بولۋ جانە ناقتى ءىس ىستەۋ رۋحى بويىنشا ەكى ەلدىڭ ستراتەگيالىق سەرىكتەستىك قارى - قاتىناسىنىڭ اناعۇرلىم زور دامۋعا قول جەتكىزۋىن ىلگەرىلەتۋدى قالايدى. گەرمانيا جاق جۇڭگو جاقپەن ءار سالاداعى اۋىس - كۇيىستى، سەلبەستىكتى جيىلەتىپ، اشىق، ءوزارا تيىمدىلىك جاساۋعا تاباندى بولىپ، ءادىل ساۋدانى جەبەپ، دۇنيە ءجۇزىنىڭ بەيبىتشىلىگىن قورعاپ، كليمات وزگەرىسى سياقتى دۇنيە جۇزىلىك سايىستارعا بىرگە توتەپ بەرۋدى ءۇمىت ەتەدى. ەۆروپا - جۇڭگو قارى - قاتىناسىنىڭ اقاۋسىز، ورنىقتى دامۋى ەكى جاقتىڭ مۇددەسىنە ۇيلەسەدى، گەرمانيا وسى ءۇشىن بەلسەندى رول اتقارۋدى قالايدى.

ەكى جاق ۋكراينا داعدارىسى جونىندە پىكىر اۋىستىردى.

كەلۋ قاينارى: حالىق تورابى