شي جينپيڭ بەلورۋسسيا زۇڭتۇڭى لۋكاشەنكومەن كەزدەستى

6 - ايدىڭ 4 - كۇنى تۇستەن بۇرىن مەملەكەت ءتوراعاسى شي جينپيڭ بەيجيڭ جۇڭنانحايدا بەلورۋسسيا زۇڭتۇڭى لۋكاشەنكومەن كەزدەستى.

□ سۋرەتتى شينحۋا اگەنتتىگىنىڭ ءتىلشىسى حۋاڭ جيڭۋىن تۇسىرگەن

شينحۋا اگەنتتىگىنىڭ 6 ـ ايدىڭ 4 ـ كۇنى بەيجيڭنەن بەرگەن حابارى. 6 ـ ايدىڭ 4 ـ كۇنى تۇستەن بۇرىن مەملەكەت ءتوراعاسى شي جينپيڭ جۇڭنانحايدا بەلورۋسسيا زۇڭتۇڭى لۋكاشەنكومەن كەزدەستى.

شي جينپيڭ لۋكاشەنكونىڭ زۇڭتۇڭ بولىپ تاعى دا سايلانعاندىعىن قايتالاي قۇتتىقتادى. شي جينپيڭ بىلاي دەپ اتاپ كورسەتتى: جۇڭگو مەن بەلورۋسسيا شىنايى دوستار، جاقسى سەرىكتەر. ەكى جاق باستان ـ اياق شىن نيەتتەرىمەن مامىلە جاساسىپ، سەنىمدىلىك نەگىزىندە بارىس ـ كەلىس جاساپ كەلەدى. ەكى ەلدىڭ ءداستۇرلى دوستىعى ۋاقىت وتكەن سايىن بەكەمدەلدى، ساياسي ءوزارا سەنىمدىلىگى بەرىك، ءار سالاداعى سەلبەستىگى جان ـ جاقتى ىلگەرىلەتىلدى. جۇڭگو جاق جۇڭگو - بەلورۋسسيا قارىم ـ قاتىناسىنا باستان ـ اياق ستراتەگيالىق دەڭگەيدەن جانە ۇزاق بولاشاقتىق تۇرعىدان مامىلە جاسايدى جانە ونى دامىتادى، بەلورۋسسيا جاقپەن بىرگە ەكى ەل قارىم ـ قاتىناسىنىڭ جانە ءوزارا پايدا جەتكىزۋ سەلبەستىگىنىڭ ورنىقتى قاداممەن الىسقا جەتۋىن ىلگەرىلەتۋدى قالايدى. ەكى جاق بىرلەسكەن مەملەكەتتەر ۇيىمى، شاڭحاي سەلبەستىك ۇيىمى سياقتى كوپ جاقتى جۇلگەلەردە سايكەسۋدى جانە سەلبەسۋدى ونان ارى كۇشەيتىپ، زورەكەرلىككە، وكتەمدىككە، وزبىرلىققا بىرگە قارسى تۇرىپ، حالىقارالىق ادىلدىكتى، تۋراشىلدىقتى قورعاۋى كەرەك.

لۋكاشەنكو مىنالاردى ءبىلدىردى: بۇل مەنىڭ جۇڭگودا 15 ـ رەت ساپاردا بولۋىم، ءار جولى جۇڭگو جاقتىڭ تەرەڭ دوستىق سۇيىسپەنشىلىگىن شىنايى سەزىنەمىن. بەلورۋسسيا جاق جۇڭگو جاقتىڭ ۇزاق ۋاقىتتان بەرى زور كۇشپەن قولداپ جانە كومەك كورسەتىپ كەلگەنىنە العىس ايتادى، جۇڭگوعا ايرىقشا سەنەدى، جۇڭگومەن قارىم ـ قاتىناسىن بۇلجىماي دامىتادى، جۇڭگومەن سەلبەستىكتى بەلسەنە ىلگەرىلەتەدى. حالىقارالىق ىستەردە جۇڭگو كوپ جاقتىلىقتى باتىل قولداپ، سىڭار جاقتىلىققا جانە جازالاۋعا، قىسىم تۇسىرۋگە قارسى تۇرىپ، دۇنيە جۇزىنە ۇلگى ورناتتى. بەلورۋسسيا جاق ايرىقشا سۇيىنەدى، جۇڭگو جاقپەن حالىقارالىق ادىلدىكتى، تۋراشىلدىقتى بىرگە قورعاۋدى قالايدى.

ۋاڭ ي كەزدەسۋگە قاتىناستى.