شينجياڭ ۇيعۇر اۆتونوميالى رايوندىق دامۋ جانە رەفورما كوميتەتى پارتگرۋپپاسىنىڭ بۇرىنعى ورىنباسار شۋجيى، بۇرىنعى ورىنباسار مەڭگەرۋشىسى تيان يۇيجۇن ءبىرىنشى سوتتا 9 جىل 6 اي مەرزىمدى قاماۋ جازاسىنا ۇكىم ەتىلدى

شينحۋا اگەنتتىگىنىڭ 6 – ايدىڭ 6 – كۇنى گۇيياڭنان بەرگەن حابارى. گۇيجوۋ ولكەسى انشۇن قالالىق ورتا دارەجەلى حالىق سوت مەكەمەسى 6 – ايدىڭ 6 – كۇنى ءبىرىنشى سوتتا شينجياڭ ۇيعۇر اۆتونوميالى رايوندىق دامۋ جانە رەفورما كوميتەتى پارتگرۋپپاسىنىڭ بۇرىنعى ورىنباسار شۋجيى، بۇرىنعى ورىنباسار مەڭگەرۋشىسى تيان يۇيجۇننىڭ پارا الۋ دەلوسىنا اشىق ۇكىم شىعارىپ، جاۋاپكەر تيان يۇيجۇندى پارا الۋ قىلمىسى بويىنشا 9 جىل 6 اي مەرزىمدى قاماۋ جازاسىنا ۇكىم ەتتى، وعان قوسا ءبىر ميلليون 200 مىڭ يۋان اقشالاي ايىپ سالدى؛ ايىپكەر تيان يۇيجۇننىڭ پارا الۋدان تاپقان تابىسى مەن ءوسىمىن زاڭ بويىنشا قۋزاپ قايتارىپ الىپ، مەملەكەت قازىناسىنا تاپسىرادى.

تەكسەرۋ ارقىلى 2011 - جىلدان 2022 - جىلعا دەيىن ايىپكەر تيان يۇيجۇن شاندۇڭ ولكەسى ۋيفاڭ قالاسى كۇيۋىن رايوندىق پارتكومنىڭ تۇراقتى مۇشەسى، ۇنەمىلىك ىستەرگە جاۋاپتى ورىنباسار باستىعى، گۇيجوۋ ولكەسى تۇڭرىن قالاسى ۋانشان رايوندىق پارتكومنىڭ شۋجيى قاتارلى قىزمەت قولايلىلىعىنان، سونداي - اق قىزمەت ۇقىعىنان نەمەسە ورنىنان قالىپتاسقان قولايلى شارت - جاعدايدان پايدالانىپ، قاتىستى ورىندار مەن جەكەلەردىڭ نىساندى كوتەرمەگە الۋ، قارجى بوساتۋ قاتارلى ىستەرىنە كومەك كورسەتكەن، زاڭسىز قابىلداعان مال - مۇلىكى حالىق اقشاسىنا سىندىرعاندا 34 ميلليون 70 مىڭ يۋاننان اسقان.

انشۇن قالالىق ورتا دارەجەلى حالىق سوت مەكەمەسى بىلاي دەپ قارادى: ايىپكەر تيان يۇيجۇننىڭ ارەكەتى پارا الۋ قىلمىسىنا جاتادى، العان پارا سوماسى ەرەكشە كوپ، ونى زاڭ بويىنشا جازالاۋ كەرەك. ايىپكەر تيان يۇيجۇن دەلوعا الىنعاننان كەيىن قىلمىس فاكتتەرىن قاز - قالپىندا مويىنداعاندىعىن، باسقا دەلولاردى بارلاۋعا قاتىستى دەرەكتەرمەن قامداعاندىقتان، ءارى تەكسەرۋ ارقىلى شىن ەكەندىگى انىقتالعاندىقتان ەڭبەك كورسەتۋ بەينەسى بار ەكەندىگىن، قىلمىسىن تانىپ وكىنگەندىگىن، زاڭسىز ولجانى بەلسەنە قايتارعاندىعىن، پاراعا العان زاڭسىز اقشا، زاڭسىز ولجانى تۇگەلدەي قايتارىپ العاندىعىن، زاڭدا بەلگىلەنگەن، جاعدايعا قاراي جەڭىل جازالاۋ، جەڭىلدەتىپ جازالاۋ جاعدايى بار ەكەندىگىن، زاڭ بويىنشا جەڭىلدەتىپ جازالاۋعا بولاتىندىعىن ەسكەرە وتىرىپ، سوت جوعارىداعى ۇكىمدى شىعاردى. ۇكىم جاريالانعاننان كەيىن، ايىپكەر تيان يۇيجۇن سوت ۇستىندە ۇكىمگە مويىنسال بولىپ، شاعىم ارىز بەرمەيتىندىگىن ءبىلدىردى.

كەلۋ قاينارى: حالىق تورابى