شي جينپيڭ امەريكا زۇڭتۇڭى ترامپپەن تەلەفوندا سويلەستى

شينحۋا اگەنتتىگىنىڭ 6 ـ ايدىڭ 5 ـ كۇنى بەيجيڭنەن بەرگەن حابارى. 6 ـ ايدىڭ 5 ـ كۇنى كەشتە مەملەكەت ءتوراعاسى شي جينپيڭ ۋاعدا بويىنشا امەريكا زۇڭتۇڭى ترامپپەن تەلەفوندا سويلەستى.

شي جينپيڭ بىلاي دەپ اتاپ كورسەتتى: جۇڭگو - امەريكا قارىم ـ قاتىناسى سىندى وسى الىپ كەمەنىڭ باعىتىن دۇرىستاۋ ءبىزدىڭ رولدى جاقسى يگەرىپ، بەتالىستى جاقسى بەلگىلەۋىمىزدى قاجەت ەتەدى، اسىرەسە، ءتۇرلى كەدەرگىلەردى، ءتىپتى، ءبۇلدىرۋدى الاستاۋىمىز كەرەك، بۇل توتەنشە ماڭىزدى. امەريكا جاقتىڭ ۇسىنىسىنا ساي، ەكى ەلدىڭ ەكونوميكا ـ ساۋدا جەتەكشىلەرى جەنەۆادا كەڭەس وتكىزىپ، ەكونوميكا ـ ساۋدا ماسەلەسىن تىلدەسۋ، كەڭەسۋ ارقىلى شەشۋدىڭ ماڭىزدى قادامىن باسىپ، ەكى ەلدىڭ ءار سالاسى مەن حالىقارالىق قوعامنىڭ جاپپاي قارسى الۋىنا يە بولدى، سونداي ـ اق تىلدەسۋ مەن سەلبەستىكتىڭ بىردەن ـ ءبىر دۇرىس تالعام ەكەندىگىن دالەلدەدى. ەكى جاق الدەقاشان ورناتىلعان ەكونوميكا ـ ساۋدا كەڭەسى مەحانيزمىنەن ويداعىداي پايدالانىپ، تەپە ـ تەڭ پوزيتسيا ۇستانىپ، وزدەرىنىڭ ءجىتى قاداعالاپ وتىرعان ىستەرىنە قۇرمەت ەتىپ، ەكى جاعى تەڭ پايداعا كەنەلۋ ناتيجەسىنە قول جەتكىزۋى كەرەك. بۇل جونىندە جۇڭگو جاقتىڭ ادال نيەتى بار، سونىمەن بىرگە پرينسيبى دە بار. جۇڭگولىقتار ەجەلدەن ايتقانىن ورىندايدى، ارەكەتىنەن ناتيجە شىعارادى، ورتاق تانىمعا كەلگەن ەكەن، ەكى جاق تا بويسۇنۋى كەرەك. جەنەۆا كەڭەسىنەن كەيىن، جۇڭگو جاق كەلىسىمدى قاتاڭ، مۇقيات اتقاردى. امەريكا جاق قول جەتكىزگەن ىلگەرىلەۋشىلىكتەرگە شىندىقتى ءىس جۇزىنەن ىزدەي وتىرىپ مامىلە جاساپ، جۇڭگوعا قولدانعان كەرەناۋ شارالاردى كۇشىنەن قالدىرۋى كەرەك. ەكى جاق ديپلوماتيا، ەكونوميكا ـ ساۋدا، ارميا، زاڭ اتقارۋ سياقتى سالالارداعى اۋىس ـ كۇيىستى كۇشەيتىپ، ورتاق تانىمدى نىعايتىپ، قاتە تۇسىنىكتى ازايتىپ، سەلبەستىكتى كۇشەيتۋى كەرەك.

شي جينپيڭ بىلاي دەپ باسا دارىپتەدى: امەريكا تايۋان ماسەلەسىن بايسالدىلىقپەن ءبىر جاقتى ەتىپ، ”تايۋاندى دەربەستەندىرۋدى“ كوزدەيتىن ات توبەلىندەي بولشەكتەۋشى ەلەمەنتتەردىڭ جۇڭگو مەن امەريكا ەكى ەلدى قاقتىعىساتىن، قارسىلاساتىن قاتەرلى جاعدايعا تۇسىرۋىنەن ساقتانۋى كەرەك.

ترامپ مىنالاردى ءبىلدىردى: ءتوراعا شي جينپيڭدى توتەنشە قۇرمەتتەيمىن، امەريكا - جۇڭگو قارىم ـ قاتىناسى توتەنشە ماڭىزدى. امەريكا جاق جۇڭگو ەكونوميكاسىنىڭ پارمەندى ارتۋدى ساقتاۋىن ءۇمىت ەتەدى. امەريكا مەن جۇڭگو سەلبەسسە كوپتەگەن جاقسى ىستەردى ىستەي الادى. امەريكا جاق ءبىر جۇڭگو ساياساتىن ۇزدىكسىز اتقارادى. ەكى ەلدىڭ جەنەۆا ەكونوميكا ـ ساۋدا كەڭەسى وتە ءساتتى بولىپ، تاماشا كەلىسىمگە كەلدى. امەريكا جاق جۇڭگو جاقپەن بىرگە قۇلشىنىپ كەلىسىمدى تياناقتاندىرۋدى قالايدى. امەريكا جاق جۇڭگولىق وقۋشىلاردىڭ امەريكاعا كەلىپ وقۋىن قارسى الادى.

شي جينپيڭ ترامپتىڭ جۇڭگوعا تاعى دا ساپارلاي كەلۋىن قارسى الاتىندىعىن ءبىلدىردى، ترامپ بۇعان شىن جۇرەكتەن العىس ايتتى. ەكى ەلدىڭ مەملەكەت باسشىلارى ەكى جاق ۇيىرمەلەرىنىڭ جەنەۆا ورتاق تانىمىن ۇزدىكسىز ويداعىداي تياناقتاندىرىپ، جاڭا كەزەكتى كەڭەستى تەز ارادا وتكىزۋگە قوسىلدى.