14 - كەزەكتى مەملەكەتتىك حالىق قۇرىلتايى تۇراقتى كوميتەتىنىڭ 16 - ءماجىلىسى بەيجيڭدە جابىلدى

«حالىق گازەتى»، 6 - ايدىڭ 27 – كۇنى، بەيجيڭ (ءتىلشى پىڭ بو). 14 - كەزەكتى مەملەكەتتىك حالىق قۇرىلتايى تۇراقتى كوميتەتىنىڭ 16 - ءماجىلىسى 6 - ايدىڭ 27 - كۇنى تۇستەن بۇرىن بەيجيڭدەگى حالىق سارايىندا جابىلدى. ءماجىلىس داۋىسقا سالۋ ارقىلى جاڭادان وزگەرىس ەنگىزىلگەن اماندىق باسقارۋعا قايشىلىق جاساعانداردى جازالاۋ زاڭىن، جاڭادان وزگەرىس ەنگىزىلگەن جوسىقسىز باسەكەگە قارسى تۇرۋ زاڭىن ماقۇلدادى.

مەملەكەت ءتوراعاسى شي جينپيڭ جەكە - جەكە 49 -، 50 - ءنومىرلى ءتوراعا بۇيرىعىنا قول قويىپ جاريالادى.

كوميتەت باستىعى جاۋ لىجي ءماجىلىستى باسقاردى.

تۇراقتى كوميتەت قۇرامىنداعىلاردان 158 ادام ماجىلىسكە قاتىناستى، ماجىلىسكە قاتىناسقان ادام سانى زاڭدا بەلگىلەنگەن ادام سانىنا ۇيلەسەدى.

ءماجىلىس مەملەكەتتىك حالىق قۇرىلتايى تۇراقتى كوميتەتىنىڭ «حالىقارالىق جاراستىرۋ مەكەمەسىن قۇرۋ جونىندەگى شارتتى» بەكىتۋ جونىندەگى قارارىن داۋىسقا سالىپ ماقۇلدادى.

ءماجىلىس داۋىسقا سالۋ ارقىلى مەملەكەتتىك حالىق قۇرىلتايى تۇراقتى كوميتەتىنىڭ 2024 - جىلعى ورتالىقتىڭ سوڭعى ەسەبىن بەكىتۋ جونىندەگى قاۋلىسىن ماقۇلدادى، 2024 - جىلعى ورتالىقتىڭ سوڭعى ەسەبىن بەكىتتى.

ءماجىلىس مەملەكەتتىك حالىق قۇرىلتايى تۇراقتى كوميتەتى ۋاكىلدەردىڭ تولىمدىلىعىن تەكسەرۋ كوميسسياسىنىڭ ءىشىنارا ۋاكىلدەردىڭ ۋاكىلدىك تولىمدىلىعى جونىندەگى بايانداماسىن داۋىسقا سالىپ ماقۇلدادى.

ءماجىلىس داۋىسقا سالۋ ارقىلى مياۋ حۋانى ورتالىق اسكەري ىستەر كوميتەتىنىڭ مۇشەسى مىندەتىنەن قالدىردى.

ءماجىلىس داۋىسقا سالۋ ارقىلى جىڭ يانشيۇڭدى مەملەكەتتىك حالىق قۇرىلتايى وقۋ - اعارتۋ، عىلىم، مادەنيەت، دەنساۋلىق ساقتاۋ كوميتەتىنىڭ ورىنباسار مەڭگەرۋشى مۇشەلىگىنە تاعايىندادى؛ ۋ زىڭدى مەملەكەتتىك حالىق قۇرىلتايى تۇراقتى كوميتەتى زاڭ - ءتۇزىم قىزمەتى كوميتەتىنىڭ ورىنباسار مەڭگەرۋشىسى مىندەتىنەن قالدىردى.

ءماجىلىس مەملەكەتتىك حالىق قۇرىلتايى تۇراقتى كوميتەتىنىڭ ۋ زىڭنىڭ مەملەكەتتىك حالىق قۇرىلتايى تۇراقتى كوميتەتىنىڭ مۇشەلىك مىندەتىنەن شەگىنۋ ءوتىنىشىن قابىلداۋ جونىندەگى قاۋلىسىن داۋىسقا سالىپ ماقۇلدادى.

ءماجىلىس تاعى باسقا دا مىندەتكە تاعايىنداۋ، مىندەتىنەن قالدىرۋ جوباسىن داۋىسقا سالىپ ماقۇلدادى.

مەملەكەتتىك حالىق قۇرىلتايى تۇراقتى كوميتەتى باستىعىنىڭ ورىنباسارلارى لي حۇڭجۇڭ، ۋاڭ دۇڭميڭ، شياۋ جيە، جىڭ جيانباڭ، ديڭ جۇڭلي، حاۋ ميڭجين، ساي دافىڭ، حى ۋەي، ۋ ۋەيحۋا، تيە نيڭ، پىڭ چيڭحۋا، جاڭ چيڭۋەي، لوساڭ جياڭسۇن، شوكىرات زاكىر، باس حاتشى ليۋ چي ماجىلىسكە قاتىناستى.

مەملەكەتتىك كەڭەستىڭ مۇشەسى ۋاڭ شياۋحۇڭ، ەڭ جوعارى حالىق سوتى مەكەمەسىنىڭ باستىعى جاڭ جۇن، ەڭ جوعارى حالىق پروكۋراتۋراسىنىڭ باس پروكۋرورى يىڭ يۇڭ، مەملەكەتتىك باقىلاۋ - تەكسەرۋ كوميتەتىندەگى جاۋاپتى جولداس، مەملەكەتتىك حالىق قۇرىلتايى ارناۋلى كوميتەتتەرىنىڭ مۇشەلەرى، ولكەلىك، اۆتونوميالى رايوندىق، قالالىق حالىق قۇرىلتايى تۇراقتى كوميتەتتەرىندەگى جاۋاپتى جولداستار، تەتە ولكە دارەجەلى قالالىق حالىق قۇرىلتايى تۇراقتى كوميتەتتەرىندەگى ءبىر ءبولىم نەگىزگى جاۋاپتى جولداستار، مەملەكەتتىك حالىق قۇرىلتايىنىڭ ءبىر ءبولىم ۋاكىلدەرى، قاتىستى تاراۋلارداعى جاۋاپتى جولداستار ماجىلىسكە سىرتتاي قاتىناستى.

جابىلۋ جيىنىنان كەيىن مەملەكەتتىك 14 - كەزەكتى حالىق قۇرىلتايىنىڭ تۇراقتى كوميتەتى 17 - رەتكى ارناۋلى تاقىرىپتاعى لەكسياسىن وتكىزدى، كوميتەت باستىعى جاۋ لىجي باسقاردى. وقۋ - اعارتۋ مينيسترلىگى پارتيا باسشىلىق گرۋپپاسىنىڭ شۋجيى، مينيسترى حۋاي جينپىڭ «باس شۋجي شي جينپيڭنىڭ وقۋ - اعارتۋ جونىندەگى ماڭىزدى بايىمداۋلارىن ىشكەرىلەي ۇيرەنىپ، دايەكتىلەندىرىپ، وقۋ - اعارتۋدا قۋاتتى ەل قۇرۋدى تىڭعىلىقتى ىلگەرىلەتەيىك» دەگەن تاقىرىپتا لەكسيا جاسادى.