4 توپتاعى ەڭ جاڭا ساندى مالىمەتتەن ەكونوميكانىڭ ومىرشەڭدىك كۇشىن، كومەسكى كۇشىن سەزىنۋ

7 - ايدىڭ 10 - كۇنى مەملەكەتتىك ساناق مەكەمەسى، مەملەكەتتىك پوچتا مەكەمەسى، جاراتىلىستىق بايلىق مينيسترلىگى، جۇڭگو اۆتوموبيل ونەركاسىبى قوعامى قاتارلىلار ەلىمىزدىڭ جازعى استىق، جەدەل جەتكىزۋ، كەن ونىمدەرى، اۆتوموبيل سياقتى كوپتەگەن جاقتاعى ەڭ جاڭا ساندى مالىمەتتەرىن جاريالادى. وسى ساندى مالىمەتتەر ەلىمىز ەكونوميكاسىنىڭ ۇزدىكسىز جاقسارعان ومىرشەڭدىك كۇشى مەن كومەسكى كۇشىن ايگىلەدى.

جازعى استىقتان ورنىقتى مول ءونىم الىندى

مەملەكەتتىك ساناق مەكەمەسى 7 - ايدىڭ 10 - كۇنى ساندى مالىمەت جاريالادى: بيىل بۇكىل ەل بويىنشا جازعى استىق ەگىلگەن جەر اۋدانى نەگىزىنەن ورنىقتى بولىپ، بىرلىك ءونىم مولشەرى قارايلاس بولدى، جازعى استىقتىڭ جالپى ءونىم مولشەرى 149 ميلليون 738 مىڭ توننا (299 ميلليارد 480 ميلليون جىڭ)، مۇنىڭ ىشىندە ءبيداي ءونىمى 138 ميلليون 160 مىڭ توننا (276 ميلليارد 320 ميلليون جىڭ) بولىپ، بۇكىل ەل بويىنشا جازعى استىقتان ورنىقتى مول ءونىم الىندى.

بۇكىل ەل بويىنشا جازعى استىق ەگىلگەن جەر كولەمى 399 ميلليون مۋ بولىپ، وتكەن جىلداعىمەن سالىستىرعاندا نەگىزىنەن ورنىقتى بولدى. جازعى استىقتىڭ بىرلىك ءونىمى مۋ باسىنا 375.6 كيلوگرام بولىپ، وتكەن جىلداعىمەن نەگىزىنەن قارايلاس بولدى. جازعى استىقتان ورنىقتى مول ءونىم الۋ جۇزەگە اسىپ، تۇتاس جىلداعى استىق ءوندىرىسىن ورنىقتىرۋعا بەرىك نەگىز قالانىپ، كۇردەلى دە اۋىر حالىقارالىق جاعدايعا توتەپ بەرۋگە، ەكونوميكانىڭ ءۇرتىس قالپىنا كەلۋىن، جاقسارۋىن ىلگەرىلەتۋگە پارمەندى تىرەك ازىرلەندى.

(قاتىستى حابارلاردى «حالىق گازەتىنىڭ» 4 -، 5 - بەتتەرىنەن وقي الاسىزدار)

جەدەل جەتكىزۋ كاسىبىنىڭ مولشەرى 100 ميلليارد دانادان استى

مەملەكەتتىك پوچتا مەكەمەسى 7 - ايدىڭ 10 - كۇنى جاريالاعان باقىلاپ – ولشەۋ ساندى مالىمەتىندە كورسەتىلۋىنشە، 7 - ايدىڭ 9 – كۇنىنە دەيىن ەلىمىزدىڭ جەدەل جەتكىزۋ كاسىبىنىڭ مولشەرى 100 ميلليارد دانادان اسىپ، 100 ميلليارد دانادان اسۋى 2024 – جىلداعىدان 35 كۇن بۇرىن ورىندالعان. سونىمەن ەلىمىزدىڭ جەدەل جەتكىزۋ كاسىبىنىڭ مولشەرى ءۇرتىس 5 جىل 100 ميلليارد دانادان استى.

بيىلعى 100 ميللياردىنشى جەدەل جولداما گۋاڭدۇڭنىڭ جۇڭشانىنان جياڭسۋدىڭ چاڭجوۋىنا جونەلتىلگەن ”كونەسىن جاڭاسىنا اۋىستىرۋ“ وتباسىلىق اۋا رەتتەگىشى بولدى. بيىل 100 ميللياردىنشى جەدەل جەتكىزۋدىڭ اناعۇرلىم تەز جارىققا شىعۋى ەلىمىزدىڭ تۇتىنۋ بازارىنىڭ كولەمىنىڭ ۇزدىكسىز كەڭەيۋىن، ەلەكتروندىق ساۋدانىڭ جالپىلاسۋ مولشەرىنىڭ ۇزدىكسىز جوعارىلاۋىن كورنەكتىلەندىرىپ، جەدەل جەتكىزۋ كاسىبىنىڭ كۇن سايىن تۇتىنۋدىڭ دارەجەسىن جوعارىلاتۋدى جانە ەكونوميكانىڭ ارتۋىن جەبەيتىن پارمەندى تىرەككە اينالعاندىعىن ايگىلەدى.

(قاتىستى حابارلاردى «حالىق گازەتىنىڭ» 4 - بەتىنەن وقي الاسىزدار)

كەن بايلىعىن ىزدەۋدە تىڭ تابىستارعا قول جەتتى

جاراتىلىستىق بايلىق مينيسترلىگى 7 - ايدىڭ 10 - كۇنى مىناداي حابار جاريالادى: بيىل الدىڭعى جارتى جىلدا بۇكىل ەل بويىنشا جاڭادان 38 كەن ورنى بايقالىپ، سايكەس مەزگىلدەگىدەن %31 ارتقان، مۇنىڭ ىشىندە ءىرى، ورتاشا كەن ورنى 25 كە جەتكەن. ۋران، رۋبيدي، كوبالت، مارگانەتس، التىن سياقتى ماڭىزدى كەن تۇرلەرىنەن كەن ىزدەۋدە كەلەلى تابىستارعا قول جەتكەن. قازىرگە دەيىن باسىم كوپ ساندى كەن تۇرلەرى ”14 ـ بەسجىلدىق“ كەن ىزدەۋ نىسانالىق مىندەتىن الدىن الا ورىندادى.

بيىل الدىڭعى جارتى جىلدا بۇكىل ەل بويىنشا مۇناي، تابيعي گازعا جاتپايتىن كەن ونىمدەرىن بارلاۋعا 6 ميلليارد 993 ميلليون يۋان قارجى قوسىلىپ، سايكەس مەزگىلدەگىدەن %23.9 ارتىپ، تەز قارقىنمەن ارتۋ جاعدايىن ساقتاپ، سايكەس مەزگىلدەگىدەن ۇزدىكسىز كەڭەيدى. مۇنىڭ ىشىندە قوعامدىق قارجى 3 ميلليارد 359 ميلليون يۋان بولىپ، سايكەس مەزگىلدەگىدەن %28.2 ارتىپ، كەن ونىمدەرىن بارلاۋ جالپى ۇسىنىلىمىنىڭ %48.0 ىن ۇستاپ، كاسىپورىنداردىڭ كەن ونىمدەرىن بارلاۋ بەلسەندىلىگى ۇزدىكسىز كۇشەيدى؛ ورتالىق پەن جەرگىلىكتى ورىنداردىڭ قازىنالىق قارجىسى 3 ميلليارد 634 ميلليون يۋان بولىپ، سايكەس مەزگىلدەگىدەن %20.1 ارتتى.

اۆتوموبيل ءوندىرۋ، ساتۋ تەز ارتتى

جۇڭگو اۆتوموبيل ونەركاسىبى قوعامى 7 - ايدىڭ 10 - كۇنى جاريالاعان ەڭ جاڭا ساندى مالىمەتتە كورسەتىلۋىنشە، بيىل الدىڭعى جارتى جىلدا اۆتوموبيل بازارى تاماشا جاعدايدى جالعاستىرىپ، اۆتوموبيل ءوندىرۋ، ساتۋ تۇڭعىش رەت بىردەي 15 ميلليون دانادان اسىپ، سايكەس مەزگىلدەگىدەن ەكى ورىندى سان بويىنشا ارتىپ، اۆتوموبيل كاسىپ سالاسىنىڭ ومىرشەڭدىك كۇشى ۇزدىكسىز جارىققا شىققان.

بيىل الدىڭعى جارتى جىلدا اۆتوموبيل ءوندىرۋ، ساتۋ جەكە ـ جەكە 15 ميلليون 621 مىڭ جانە 15 ميلليون 653 مىڭ دانا بولىپ، بىلتىرعى سول تۇستاعىدان جەكە ـ جەكە %12.5 جانە %11.4 ارتقان، مۇنىڭ ىشىندە جاڭا ەنەرگيالى اۆتوموبيل ءوندىرۋ، ساتۋ جەكە ـ جەكە 6 ميلليون 968 مىڭ جانە 6 ميلليون 937 مىڭ دانا بولىپ، بىلتىرعى سول تۇستاعىدان جەكە ـ جەكە %41.4 جانە %40.3 ارتقان. اۆتوموبيل ەكسپورتى 3 ميلليون 83 مىڭ دانا بولىپ، سايكەس مەزگىلدەگىدەن %10.4 ارتقان، مۇنىڭ ىشىندە جاڭا ەنەرگيالى اۆتوموبيل ەكسپورتى ءبىر ميلليون 60 مىڭ داناعا جەتىپ، سايكەس مەزگىلدەگىدەن %75.2 ارتقان.

(«حالىق گازەتىنىڭ» تىلشىلەرى ليۋ جىچياڭ، يۇي جيڭشيان، حان شين، چاڭ چين، ۋاڭ جىڭ)

كەلۋ قاينارى: حالىق تورابى