شي جينپيڭ بوليۆيا زۇڭتۇڭى ارسەمەن جۇڭگو مەن بوليۆيانىڭ ديپلوماتيالىق قارىم ـ قاتىناس ورناتقاندىعىنىڭ 40 جىلدىعى بايلانىسىمەن ءوزارا قۇتتىقتاۋ تەلەگرامماسىن جولدادى

شينحۋا اگەنتتىگىنىڭ 7 ـ ايدىڭ 9 ـ كۇنى بەيجيڭنەن بەرگەن حابارى. 7 ـ ايدىڭ 9 ـ كۇنى مەملەكەت ءتوراعاسى شي جينپيڭ بوليۆيا زۇڭتۇڭى ارسەمەن ءوزارا قۇتتىقتاۋ تەلەگرامماسىن جولداپ، ەكى ەلدىڭ ديپلوماتيالىق قارىم ـ قاتىناس ورناتقاندىعىنىڭ 40 جىلدىعىن قۇتتىقتادى.

شي جينپيڭ بىلاي دەپ اتاپ كورسەتتى: جۇڭگو مەن بوليۆيا جاقسى دوستار، جاقسى باۋىرلاستار. ديپلوماتيالىق قارىم ـ قاتىناس ورناتقان 40 جىلدان بەرى، جۇڭگو - بوليۆيا قارىم ـ قاتىناسى حالىقارالىق اۋمالى ـ توكپەلى جاعداي وزگەرىسىنىڭ سىنىن باستان وتكەرىپ، تاماشا دامۋ ارىنىن باستان ـ اياق ساقتادى. ەكى جاق ءبىر ـ ءبىرىنىڭ وزەكتى مۇددەسىنە جانە ءجىتى قاداعالاپ وتىرعان كەلەلى ىستەرىنە ساياتىن ماسەلەلەردە ءبىرىن ـ ءبىرى تاباندىلىقپەن قولداپ، ”ءبىر بەلدەۋ، ءبىر جولدى“ جوعارى ساپالى بىرگە قۇرۋ سەلبەستىگىندە سۇبەلى جەتىستىكتەرگە قول جەتكىزىپ، حالىق دوستىعى جۇرت جۇرەگىنە اناعۇرلىم تەرەڭ ۇيالادى. بىلتىر 11 ـ ايدا 20 ەل توبى باسشىلارىنىڭ ريو ـ دە جانەيرو باسشىلار ماجىلىسىنە قاتىناسقان كەزدە مەن سىزبەن مول جەتىستىككە يە ديدارلاسۋ وتكىزىپ، جۇڭگو - بوليۆيا قارىم ـ قاتىناسىنىڭ بولاشاق دامۋىنا ايقىن بەتالىس كورسەتتىك. مەن جۇڭگو - بوليۆيا قارىم ـ قاتىناسىنىڭ دامۋىنا باسا ءمان بەرەمىن، زۇڭتۇڭ مىرزامەن بىرگە قۇلشىنىپ، ءداستۇرلى دوستىقتى ۇزدىكسىز جالعاستىرىپ، جۇڭگو - بوليۆيا ستراتەگيالىق سەرىكتەستىك قارىم ـ قاتىناسىنىڭ تاعى دا تىڭ ساتىعا كوتەرىلۋىنە جەتەكشىلىك ەتىپ، ەكى ەل حالقىنا اناعۇرلىم ويداعىداي باقىت جاراتۋدى قالايمىن.

ارسە مىنالاردى ءبىلدىردى: 40 جىلدان بەرى، بوليۆيا - جۇڭگو ەكى ەل ءوزارا قۇرمەت ەتۋ، دوستىق سەلبەستىك نەگىزىندە بەرىك ەكى جاقتى قارىم ـ قاتىناس ورناتتى. بوليۆيا جاق جۇڭگو جاقتىڭ نەگىزدىك قۇرىلعىلار، تەحنولوگيا، ەنەرگيا، دەنساۋلىق ساقتاۋ سياقتى سالالاردا كورسەتكەن قولداۋى مەن كومەگىنە جوعارى باعا بەرەدى، جۇڭگونىڭ جەر شارىنىڭ وڭتۇستىگىندەگى ەلدەردى ىنتىماقتاستىرۋ، لاتىن امەريكاسى جانە كارايب ەلدەرى - جۇڭگو سەلبەستىگىن جەبەۋ، اناعۇرلىم ءادىل، تەرەزەسى تەڭ، سيىسىمدى حالىقارالىق ءتارتىپ ورناتۋ جاعىندا ساۋلەلەندىرگەن باسشىلىق رولىن القايدى، ەكى ەل حالقىنىڭ باۋىرلاستىق سۇيىسپەنشىلىگىن ۇزدىكسىز تەرەڭدەتۋدى قالايدى.