حالىقتىڭ جاعدايىن كەڭ كولەمدە ىشكەرىلەي تەكسەرىپ، حالىقتىڭ ۇنىنە قۇلاق اسىپ، حالىقتىڭ اقىل - پاراساتىن شوعىرلاندىرىپ، حالىقتىڭ تاماشا تۇرمىسقا دەگەن تالپىنىسىن ۇزدىكسىز جۇزەگە اسىرۋ كەرەك

شينحۋا اگەنتتىگى، 8 - ايدىڭ 4 - كۇنى، بەيجيڭ. جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ تاياۋدا توراپكەرلەردىڭ ”15 - بەسجىلدىق“ جوبانى جاساۋ قىزمەتى جونىندەگى ۇسىنىس - پىكىرلەرىن زەرتتەۋ، قابىلداۋ تۋرالى ماڭىزدى نۇسقاۋ بەرىپ بىلاي دەپ باسا دارىپتەدى: ”15 - بەسجىلدىق“ جوبانى جاساۋ قىزمەتىنە توراپتا پىكىر الۋ قيمىلىنا قاتىناسۋ شاماسى جوعارى، قامتۋ كولەمى كەڭ بولىپ، جالپى بارىستىق حالىق دەموكراتياسىنىڭ ءبىر رەتكى جاندى امالياتى سانالادى. قالىڭ حالىق بۇقاراسى بەلسەنە اقىل - كەڭەس بەرىپ، كوپتەگەن قۇندى ۇسىنىس - پىكىردى ورتاعا قويدى، قاتىستى تاراۋلار مۇقيات زەرتتەپ قابىلداۋى كەرەك. ءار دارەجەلى پارتكومدار مەن ۇكىمەتتەر حالىقتى وزەك ەتۋگە باستان - اياق تاباندى بولىپ، حالىقتىڭ جاعدايىن جان - جاقتى، ىشكەرىلەي تەكسەرىپ، حالىقتىڭ ۇنىنە قۇلاق اسىپ، حالىقتىڭ اقىل - پاراساتىن شوعىرلاندىرىپ، جۇڭگو ۇلگىسىندەگى وسىزامانداندىرۋدى ىلگەرىلەتۋدىڭ قۇدىرەتتى بىرىككەن كۇشىن ۇيىستىرىپ، حالىقتىڭ تاماشا تۇرمىسقا دەگەن تالپىنىسىن ۇزدىكسىز جۇزەگە اسىرۋى كەرەك.

باس شۋجي شي جينپيڭنىڭ عىلمي شەشىم جاساۋعا، دەموكراتيالىق شەشىم جاساۋعا، زاڭ بويىنشا شەشىم جاساۋعا تاباندى بولىپ، ”15 - بەسجىلدىق“ جوبانى جاساۋ قىزمەتىن جوعارى ساپامەن ورىنداۋ جونىندەگى ماڭىزدى نۇسقاۋىنىڭ رۋحىن دايەكتى تياناقتاندىرۋ ءۇشىن، بيىل 5 - ايدىڭ 20 - كۇنىنەن 6 - ايدىڭ 20 - كۇنىنە دەيىن ”15 - بەسجىلدىق“ جوبانى جاساۋ قىزمەتىندە توراپتا پىكىر الۋ قيمىلى ورىستەتىلدى. حالىق گازەتىندە، شينحۋا اگەنتتىگىنە، ورتالىق راديو - تەلەۆيزيا باس ستانسياسىنا قاراستى رەسمي توراپتاردا، اقپارات كليەنتىندە، سونداي - اق ”ۇيرەنۋدە قۋاتتى ەل“ ۇيرەنۋ تۇعىرىندا ارناۋلى ايدار اشىلىپ، تۇتاس قوعامنىڭ ۇسىنىس - پىكىرلەرى تىڭدالدى. قيمىلدا توراپكەرلەردەن جالپى 3 ميلليون 113 مىڭنان استام ۇسىنىس - پىكىر تاپسىرىپ الىنىپ، ”15 - بەسجىلدىق“ جوبانى جاساۋعا پايدالى پايدالانۋ ماتەريالى ازىرلەندى.

كەلۋ قاينارى: حالىق تورابى