شي جينپيڭ ءجۇز جىلدىق قورعالاتىن مۇرا − زىجينچىڭنان گۋگۇڭ مۇراجايىنا دەيىنگى كورمەنى ەكسكۋرسيالادى

«حالىق گازەتى»، 10 - ايدىڭ 27 - كۇنى، بەيجيڭ. گۋگۇڭ مۇراجايى قۇرىلعاندىعىنىڭ 100 جىلدىعى قارساڭىندا، جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ 10 - ايدىڭ 27 - كۇنى تۇستەن بۇرىن گۋگۇڭ مۇراجايىنا بارىپ، ”100 جىلدىق قورعاۋ − زىجينچىڭنان گۋگۇڭ مۇراجايىنا“ دەيىنگى كورمەنى ەكسكۋرسيالادى.

جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ تۇراقتى مۇشەسى، ورتالىق كوميتەت شۋجيچۋىنىڭ شۋجيى ساي چي كورمەنى ەكسكۋرسيالادى.

ساعات 10 مولشەرىندە شي جينپيڭ قاتارلىلار گۋگۇڭ مۇراجايىنا كەلىپ، ىلگەرىندى - كەيىندى تۇسكى قاقپا باتىس قاز قاناتتى عيماراتىنىڭ كورمە زالىنا، نەگىزگى عيماراتتىڭ كورمە زالىنا، شىعىس قاز قاناتتى عيماراتىنىڭ كورمە زالىنا بارىپ كورمەنى ەكسكۋرسيالادى. كورمە ”تامىرلاس مادەنيەت شىڭىراۋى“، ”100 جىلدىق مۇراگەرلىك ەتۋ“، ”مىڭ جىلدىق اۋارايى“ دەپ ءۇش بولىمگە بولىنگەن بولىپ، 200 پارشا قىمباتتى مادەنيەت مۇرا جانە جازبا مۇرالار قويىلعان بولىپ، گۋگۇڭ مۇراجايىنىڭ 100 جىلدىق دامۋ بارىسى مەن قۇرىلىس جەتىستىكتەرىن ايگىلەدى.

حاتكەرلىك، سۋرەت تۋىندىلارى، قولا قۇرالدار، قاس تاسى بۇيىمدارى، فارفور ىدىستار سياقتىلار جۇڭحۋا ۇلتىنىڭ شۇعىلالى تاريحى مەن ۇزدىكسىز جالعاسىپ كەلە جاتقان مادەنيەت جۇلگەسىنە كۋا بولدى. شي جينپيڭ تۇسىندىرمەنى مۇقيات تىڭداپ، ءالسىن - ءالى كىدىرىپ كورىپ، قاتىستى جاعدايلاردى سۇراستىردى. ول مىنالاردى اتاپ كورسەتتى: گۋگۇڭ مۇراجايى جۇڭحۋا ۇلتىنىڭ مادەنيەت گەنىن ارقالاپ وتىر، ول جۇڭحۋا وركەنيەتىنىڭ ماڭىزدى بەلگىسى. گۋگۇڭ سارايىن ويداعىداي قورعاۋ، گۋگۇڭ سارايىنىڭ رولىن ويداعىداي ساۋلەلەندىرۋ مەملەكەتتىڭ ءىرى ءىسى، گۋگۇڭ سارايىنىڭ داڭقتى بورىشى. جاڭا باستامادا گۋگۇڭ مۇراجايى تاڭداۋلى ءداستۇردى ساۋلەلەندىرىپ، مادەني مۇرالاردىڭ حالىققا ءتان بولۋىنا، حالىققا قىزمەت وتەۋىنە تاباندى بولىپ، مادەني مۇرالاردى قورعاۋدى، قالپىنا كەلتىرۋدى كۇشەيتىپ، مادەني مۇرالاردى اكتيۆتەندىرىپ پايدالانۋ دەڭگەيىن جوعارىلاتىپ، گۋگۇڭ سارايىن ماڭىزدى وتانشىلدىق تاربيە بازاسىنا، دۇنيە ءجۇزىنىڭ جۇڭحۋا وركەنيەتىن، جۇڭحۋا ۇلتىن تۇسىنۋىندەگى ماڭىزدى تەرەزەگە اينالدىرۋ كەرەك.

لي شۋلەي جانە ورتالىق پەن مەملەكەت ورگاندارىنىڭ قاتىستى تاراۋلارىنداعى جاۋاپتى جولداستار كورمەنى ەكسكۋرسيالادى.

كەلۋ قاينارى: حالىق تورابى