جۇڭگو كوممۋنيستىك پارتياسى ورتالىق كوميتەتى پارتيا سىرتىنداعى قايراتكەرلەر اڭگىمە ءماجىلىسىن اشتى

شينحۋا اگەنتتىگى، 12 - ايدىڭ 8 - كۇنى بەيجيڭ. 12 - ايدىڭ 3 - كۇنى جۇڭگو كوممۋنيستىك پارتياسى ورتالىق كوميتەتى جۇڭنانحايدا پارتيا سىرتىنداعى قايراتكەرلەر اڭگىمە ءماجىلىسىن اشىپ، بيىلعى ەكونوميكالىق جاعداي جانە كەلەر جىلعى ەكونوميكالىق قىزمەت جونىندە دەموكراتيالىق پارتيا - توپتاردىڭ ورتالىق كوميتەتتەرىنىڭ، مەملەكەتتىك ساۋدا - ونەركاسىپشىلەر بىرلەستىگىنىڭ جاۋاپتىلارىنىڭ جانە پارتيادا، توپتا جوق قايراتكەرلەردىڭ ۋاكىلدەرىنىڭ ۇسىنىس - پىكىرلەرىن تىڭدادى. جۇڭگو كوممۋنيستىك پارتياسى ورتالىق كوميتەتىنىڭ باس شۋجيى شي جينپيڭ اڭگىمە ءماجىلىسىن باسقاردى ءارى ماڭىزدى ءسوز سويلەپ بىلاي دەپ باسا دارىپتەدى: ەلىمىز ەكونوميكاسىنىڭ ۇزاق ۋاقىت جاقسارۋ تىرەكتىك شارت - جاعدايى مەن نەگىزگى بەتالىسى وزگەرگەن جوق، سەنىمدى بەكەمدەپ، ابزالدىقتان ويداعىداي پايدالانىپ، سىندارعا توتەپ بەرىپ، ەكونوميكانىڭ ورنىقتىلىق بارىسىندا جاقسارۋ اۋقىمىن ۇزدىكسىز بەكەمدەپ جانە كەڭەيتىپ، ”15 - بەسجىلدىق“ جوبانىڭ تاماشا باستاماسىن جۇزەگە اسىرۋ كەرەك.

جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ تۇراقتى مۇشەلەرى لي چياڭ، ساي چي، ديڭ شۋەشياڭ اڭگىمە ماجىلىسىنە قاتىناستى. لي چياڭ جۇڭگو كوممۋنيستىك پارتياسى ورتالىق كوميتەتىنىڭ تاپسىرۋىمەن بيىلعى ەكونوميكالىق قىزمەتكە قاتىستى جاعدايلاردى حابارلاندىرىپ، كەلەر جىلعى ەكونوميكالىق قىزمەت جونىندەگى قاتىستى ويلاردى تانىستىردى.

اڭگىمە ماجىلىسىندە جۇڭگو گومينداڭ توڭكەرىستىك كوميتەتى ورتالىق كوميتەتىنىڭ ءتوراعاسى جىڭ جيانباڭ، جۇڭگو دەموكراتيالىق وداعى ورتالىق كوميتەتىنىڭ ءتوراعاسى ديڭ جۇڭلي، جۇڭگو دەموكراتيالىق مەملەكەت قۇرۋ قوعامى ورتالىق كوميتەتى ءتوراعاسىنىڭ ورىنباسارى سۇن دۇڭشىڭ، جۇڭگو دەموكراتيانى ىلگەرىلەتۋ قوعامى ورتالىق كوميتەتىنىڭ ءتوراعاسى ساي دافىڭ، جۇڭگو شارۋا - جۇمىسشى دەموكراتيالىق پارتياسى ورتالىق كوميتەتىنىڭ ءتوراعاسى حى ۋەي، جۇڭگو ادىلەت پارتياسى ورتالىق كوميتەتىنىڭ ءتوراعاسى جياڭ زوجۇن، ”3 - قىركۇيەك“ ءىلمي قوعامى ورتالىق كوميتەتتىڭ ءتوراعاسى ۋ ۋەيحۋا، تايۋان دەموكراتيالىق اۆتونوميا وداعى ورتالىق كوميتەتىنى‍ڭ ءتوراعاسى سۋ حۇي، مەملەكەتتىك ساۋدا - ونەركاسىپشىلەر بىرلەستىگىنىڭ ءتوراعاسى گاۋ يۇنلۇڭ، پارتيادا، توپتا جوق قايراتكەرلەردىڭ ۋاكىلى گاۋ حۇڭجۇن ىلگەرىندى - كەيىندى ءسوز سويلەدى. ولار جۇڭگو كوممۋنيستىك پارتياسى ورتالىق كوميتەتىنىڭ قازىرگى ەكونوميكالىق اۋقىم جونىندەگى تالداۋ، تۇجىرىمى مەن كەلەر جىلعى ەكونوميكالىق قىزمەت جونىندەگى جوسپارلاۋىن، ويلاسۋىن بۇكىلدەي قۇپتادى ءارى كاسىپ سالاسىنىڭ ورنالاسۋىن ساپالىلاندىرۋ، ساپالى قامداۋدى ارتتىرۋ، وقۋ - اعارتۋ، عىلىم - تەحنيكا دارىندىلارى ءتۇزىمى رەفورماسىن تەرەڭدەتۋ، ساندى مالىمەت فاكتورىندىق مەملەكەت بويىنشا ءبىر تۇتاس ۇلكەن بازار قۇرۋ، ىشكى سۇرانىمدى كەڭەيتۋ، جوعارى دەڭگەيدە سىرتقا ەسىك اشۋدى كەڭەيتۋ، حالىقتىڭ سالاماتتىعىن، باقىتىن ارتتىرۋ، جوعارى ساپالى جۇمىستانۋدى ىلگەرىلەتۋ، مادەنيەت جۇمساق كۇشىن جوعارىلاتۋ سياقتىلار جونىندە ۇسىنىس - پىكىر بەردى.

كوپشىلىكتىڭ ءسوزىن مۇقيات تىڭداعاننان كەيىن شي جينپيڭ ماڭىزدى ءسوز سويلەدى.

ول مىنالاردى ءبىلدىردى: كوپشىلىك بيىلعى ەكونوميكالىق قىزمەتتە قول جەتكىزگەن ناتيجەلەردى تولىق تۇراقتاندىرىپ، كەلەر جىلعى ەكونوميكالىق قىزمەتتى ويداعىداي ىستەۋ جونىندە ۇسىنىس - پىكىر بەردى، ءبىز مۇقيات اقىلداسىپ قابىلدايمىز.

شي جينپيڭ بىلاي دەپ اتاپ كورسەتتى: بيىل وزگەشە ءبىر جىل بولدى، جۇڭگو كوممۋنيستىك پارتياسى ورتالىق كوميتەتى بۇكىل پارتيانى، بۇكىل ەلدەگى ءار ۇلت حالقىن ىنتىماقتاستىرىپ جانە باستاپ، قيىندىقتاردان تايسالماي العا ۇمتىلىپ، ەرلىكپەن شايقاس جاساپ، ەل ءىشى جانە حالىقارا سىندى ەكى ۇلكەن جاعدايدى ءبىر تۇتاس جوسپارلاپ، اناعۇرلىم بەلسەندى، ۇتىمدى ماكرولىق ساياساتتاردى اتقارىپ، ەكونوميكالىق، قوعامدىق دامۋدىڭ باستى نىسانالارىن ءساتتى ورىندادى. وتكەن 5 جىلدا ءبىز ءتۇرلى سوققىعا، سىن - سايىسقا ءونىمدى توتەپ بەرىپ، پارتيا مەن مەملەكەت ىستەرىندە جاڭا كەلەلى تابىستارعا قول جەتكىزۋدى ىلگەرىلەتتىك، ”14 - بەسجىلدىق“ ءساتتى اياقتالۋ الدىندا تۇر، ەلىمىزدىڭ ەكونوميكالىق قۋاتى، عىلىم - تەحنيكالىق قۋاتى، جالپىلىق مەملەكەت قۋاتى تىڭ ساتىعا كوتەرىلدى.

شي جينپيڭ بىلاي دەپ اتاپ كورسەتتى: بيىل جىل باسىنان بەرى ءارقايسى دەموكراتيالىق پارتيا - توپتاردىڭ ورتالىق كوميتەتتەرى، مەملەكەتتىك ساۋدا - ونەركاسىپشىلەر بىرلەستىگى جانە پارتيادا، توپتا جوق قايراتكەرلەر جۇڭگو كوممۋنيستىك پارتياسى ورتالىق كوميتەتىنىڭ شەشىمدەرىمەن، ورنالاستىرۋلارىمەن تىعىز بايلانىستىرىپ، عىلىم - تەحنيكادا جاڭالىق اشۋ مەن كاسىپ سالاسىندا جاڭالىق اشۋدى توعىستىرا دامىتۋ، ىشكى سۇرانىستى جان - جاقتى كەڭەيتۋ سياقتى جاقتاردا تەكسەرۋ - زەرتتەۋ جۇرگىزۋدى بەلسەنە ورىستەتىپ، چاڭجياڭ وزەنىنىڭ ەكولوگيالىق ورتاسىن قورعاۋدى دەموكراتيالىق باقىلاۋدى ويداعىداي ىستەپ، ەكونوميكالىق، قوعامدىق دامۋداعى ءىشىنارا ءتۇيىندى، قيىن ماسەلەلەردى ارقاۋ ەتە وتىرىپ دەر كەزىندە اقىل - كەڭەس بەرىپ، ۇسىنىس قويىپ، جۇڭگو كوممۋنيستىك پارتياسى ورتالىق كوميتەتىنىڭ عىلمي شەشىم جاساۋىنا ماڭىزدى پايدالانۋ ماتەريالىن ازىرلەدى. شي جينپيڭ جۇڭگو كوممۋنيستىك پارتياسى ورتالىق كوميتەتى اتىنان كوپشىلىككە العىس ايتتى.

شي جينپيڭ بىلاي دەپ باسا دارىپتەدى: كەلەر جىلعى ەكونوميكالىق قىزمەتتى ويداعىداي ىستەۋدە جاڭا ءداۋىر جۇڭگوشا سوتسياليزم يدەياسىن جەتەكشى ەتىپ، پارتيا 20 - قۇرىلتايىنىڭ جانە پارتيا 20 - كەزەكتى ورتالىق كوميتەتىنىڭ ءار رەتكى جالپى ماجىلىستەرىنىڭ رۋحىن ىشكەرىلەي دايەكتىلەندىرىپ، جاڭا دامۋ ۇستانىمىن تولىق، دالمە - ءدال، جاپپاي دايەكتىلەندىرىپ، جاڭا دامۋ ارناسىن جەدەل قالىپتاستىرىپ، جوعارى ساپالى دامۋدى كۇش سالا ىلگەرىلەتىپ، ورنىقتىلىق بارىسىندا ىلگەرىلەۋ قىزمەت جالپى ارناسىنا تاباندى بولىپ، ىشكى ەكونوميكالىق قىزمەت پەن حالىقارالىق ەكونوميكا - ساۋدا كۇرەسىن اناعۇرلىم ويداعىداي ءبىر تۇتاس جوسپارلاپ، دامۋ مەن حاۋىپسىزدىكتى اناعۇرلىم ويداعىداي ءبىر تۇتاس جوسپارلاپ، اناعۇرلىم بەلسەندى، ۇتىمدى ماكرولىق ساياساتتاردى اتقارىپ، ساياساتتىڭ بولجامپازدىعىن، باعىتتامالىلىعىن، سايكەسىمدىلىگىن كۇشەيتىپ، ىشكى سۇرانىمدى ۇزدىكسىز كەڭەيتىپ، قامداۋدى ساپالىلاندىرىپ، مولشەرىن جانداندىرىپ، جەرگىلىكتى جاعدايعا قاراي جاڭاشا وندىرگىش كۇشتەردى دامىتىپ، بۇكىل ەل بويىنشا ءبىر تۇتاس ءىرى بازار قۇرىلىسىن ىشكەرىلەي ىلگەرىلەتىپ، ءتۇيىندى سالالارداعى حاۋىپ - قاتەردەن ۇزدىكسىز ساقتانىپ جانە ونى شەشىپ، جۇمىستاندىرۋدى، كاسىپورىندى، بازاردى، مەجەنى ورنىقتىرۋعا كۇش سالىپ، ەكونوميكانىڭ ساپاسى مەن مولشەرىن ۇتىمدى جوعارىلاتۋدى، ۇيلەسىمدى ارتتىرۋدى جەبەپ، قوعامنىڭ جاراسىمدىلىعى مەن ورنىقتىلىعىن ساقتاۋ كەرەك.

شي جينپيڭ دەموكراتيالىق پارتيا - توپتارعا، مەملەكەتتىك ساۋدا - ونەركاسىپشىلەر بىرلەستىگىنە جانە پارتيادا، توپتا جوق قايراتكەرلەرگە 3 جاقتان ءۇمىت ارتتى. ءبىرىنشى، جۇڭگو كوممۋنيستىك پارتياسى 20 - كەزەكتى ورتالىق كوميتەتى ءتورتىنشى جالپى ءماجىلىسىنىڭ رۋحىن ىشكەرىلەي ۇيرەنۋ جانە ءتۇسىنۋ كەرەك. جۇڭگو كوممۋنيستىك پارتياسى ورتالىق كوميتەتىنىڭ ستراتەگيالىق ورنالاستىرۋىن ءدال ءتۇسىنىپ، جەتە ءتۇسىنىپ، جۇڭگو كوممۋنيستىك پارتياسىمەن باستان - اياق بىرگە ويلاپ، بىرگە تۇرىپ، بىرگە ىستەۋ كەرەك. ەكىنشى، ”15-بەسجىلدىق“ جوبانى جاساۋ جانە اتقارۋ ءۇشىن بەلسەندىلىكپەن اقىل - كەڭەس بەرۋ كەرەك.

وسىزاماندانعان كاسىپ سالاسى جۇيەسىن قۇرۋ، جەرگىلىكتى جاعدايعا قاراي جاڭاشا وندىرگىش كۇشتەردى دامىتۋ، مىعىم ەل ءىشى بازارىن قۇرۋ سياقتىلاردى ارقاۋ ەتىپ، ىشكەرىلەي تەكسەرۋ - زەرتتەۋ جۇرگىزىپ، قۇندى، ماڭىزدى پىكىر - ۇسىنىستاردى العا قوي كەرەك. ءۇشىنشى، زەيىن - زەردەنى شوعىرلاندىرىپ، ەكونوميكانىڭ ورنىقتى جاقسارۋىن ىلگەرىلەتۋ كەرەك.

پارتيا مەن ۇكىمەتتىڭ ساياساتتى ۇگىتتەۋ، كۇدىك - كۇماننان ارىلتۋ، ورتاق تانىمدى ۇيىستىرۋ قىزمەتىن ويداعىداي ىستەۋىنە كومەكتەسىپ، قالىڭ مۇشەلەر مەن وزدەرى بايلانىس ورناتقان بۇقارانى سەنىمدى بەكەمدەپ، رۋحتى سەرپىلتىپ، تاماشا دامۋ ورتاسىن قالىپتاستىرۋعا باستاۋ كەرەك.

ليۋ گوجۇڭ، لي گانجيە، حى ليفىڭ، جاڭ گوچيڭ، ۋ جىڭلۇڭ، جۇڭگو كوممۋنيستىك پارتياسى ورتالىق كوميتەتىنىڭ، مەملەكەتتىك كەڭەستىڭ قاتىستى تاراۋلارىنىڭ جاۋاپتىلارى اڭگىمە ماجىلىسىنە قاتىناستى.

اڭگىمە ماجىلىسىنە تاعى شاۋ حۇڭ، حى باۋشياڭ، ۋاڭ گۋاڭچيان، جۋ يۇڭشين، ياڭ جىن جانە جاڭ ىندي، فاڭ گۋاڭحۋا، دۋ يىڭفىن قاتارلىلار قاتىناستى.