ونەركاسىپ جانە ينفورماتسيالاندىرۋ مينيسترلىگى L3 دارەجەسىندەگى اۆتوماتتى جۇرگىزىلەتىن اۆتوموبيل تيپىندەگى ەكى ونىمگە رۇقسات بەردى 

ءتىلشىنىڭ 12 – ايدىڭ 15 – كۇنى ونەركاسىپ جانە ينفورماتسيالاندىرۋ مينيسترلىگىنەن ۇعىسۋىنشا، قاتىستى بەلگىلەمەلەرگە ساي، قابىلداۋ، تەكسەرۋ، جاريالاۋ سىندى تارتىپتەردەن سوڭ، ونەركاسىپ جانە ينفورماتسيالاندىرۋ مينيسترلىگى اۆتوموبيل وندىرەتىن ەكى سەرىكتەستىك تاپسىرعان L3 دارەجەسىندەگى ءمالىم شارتتار بويىنشا اۆتوماتتى جۇرگىزۋ يقۋاتىنا يە زەردەلى ينتەرنەتكە جالعانعان اۆتوموبيل ونىمىنە رۇقسات بەرۋ تۋرالى ءوتىنىشتى ماقۇلداعان.

ۇعىسۋعا قاراعاندا، ەكى ءونىم جەكە – جەكە مىنالار: چاڭ – ان ماركالى SC7000AAARBEV تيپتى بۇكىلدەي ەلەكترلى جەڭىل اۆتوموبيل، قاتىناس كەپتەلىسكە ۇشىراعان ورتادا جوعارى قارقىندى تاس جولدان شىعۋ جانە قالاداعى تەز قارقىندى تاق جولدا اۆتوماتتى جۇرگىزۋ يقۋاتىنا يە، قازىر بۇل يقۋاتتى تەك چۇڭچيڭ قالاسىنداعى ىشكى اينالماداعى تەز قارقىندى جول، جاڭا ىشكى اينالماداعى تەز قارقىندى جول (گاۋتانيان ايقاسپالى كوپىرى مەن لايجياچياۋ ايقاسپالى كوپىرى) جانە يۇيدۋ داڭعىلى (رىنحى ايقاسپالى كوپىرى – اۋەجاي ايقاسپالى كوپىرى) قاتارلى جول بولىكتەرىندە عانا اشۋعا رۇقسات بەرىلگەن؛ جيحۋ ماركالى BJ7001A61NBEV تيپتى بۇكىلدەي ەلەكترلى جەڭىل اۆتوموبيل، جوعارى قارقىندى تاس جول مەن قالاداعى تەز قارقىندى تاق جولدا اۆتوماتتى جۇرگىزۋ يقۋاتىنا يە، قازىر اتالعان يقۋاتتى تەك بەيجيڭ قالاسى بەيجيڭ – تايبەي جوعارى قارقىندى تاس جولى (داشيڭ رايونى جيۋگۇڭشين كوپىرى – اۋەجاي سولتۇستىك جەلىسى جوعارى قارقىندى تاس جولى)، اۋەجاي سولتۇستىك جەلىسى جوعارى قارقىندى تاس جولى (داچۇي وڭتۇستىك كوپىرى – داشيڭ اۋەجايى جوعارى قارقىندى تاس جولى)، سونداي – اق، داشيڭ اۋەجايى جوعارى قارقىندى تاس جولى (وڭتۇستىك التىنشى اينالمالى جول – اۋەجاي سولتۇستىك جەلىسى جوعارى قارقىندى تاس جولى) قاتارلى جول بولىكتەرىندە عانا اشۋعا رۇقسات بەرىلگەن.

كەلەسى قادامدا، اتالعان ەكى تيپتەگى اۆتوموبيلدى چۇڭچيڭ چاڭ – ان اۆتوموبيل بىرلەستىگى عىلىم - تەحنيكا شەكتى سەرىكتەستىگى مەن بەيجيڭ چۋشيڭ اۆتوموبيل قىزمەت وتەۋ شەكتى سەرىكتەستىگى سىندى ەكى قولدانۋشى نەگىزگى تۇلعا جوعارىدا اتالعان اۋماقتاردا جولعا شىعارىپ سىناق ەتەدى. ونەركاسىپ جانە ينفورماتسيالاندىرۋ مينيسترلىگى قاتىستى تاراۋلارمەن، سونداي – اق، جەرگىلىكتى ورىنداعى باسقارۋشى تاراۋلارمەن بىرگە اۆتوموبيلدەردىڭ قوزعالىسىن باقىلاۋدى جانە حاۋىپسىزدىككە كەپىلدىك ەتۋدى كۇشەيتىپ، تاجىريبەلەردى دەر كەزىندە قورىتىندىلاپ، زەردەلى ينتەرنەتكە جالعانعان اۆتوموبيلدەردى وندىرۋگە رۇقسات بەرۋدى باسقارۋدى جانە ولشەمدى زاڭ – تۇزىمدەر جۇيەسىن ۇزدىكسىز كەمەلدەندىرەدى.

كەلۋ قاينارى: حالىق تورابى