پارتيا 20 - كەزەكتى ورتالىق كوميتەتى ءتورتىنشى جالپى ءماجىلىسىنىڭ رۋحىن ىشكەرىلەي ۇيرەنىپ، دايەكتىلەندىرىپ، ”15 - بەسجىلدىقتا“ جاقسى باستاما اشۋعا قۇلشىنۋ كەرەك

1 - ايدىڭ 20 - كۇنى ولكە، مينيسترلىك دارەجەلى نەگىزگى باسشى كادرلاردىڭ پارتيا 20 - كەزەكتى ورتالىق كوميتەتى ءتورتىنشى جالپى ءماجىلىسىنىڭ رۋحىن ۇيرەنۋ، دايەكتىلەندىرۋ ارناۋلى تاقىرىپتىق زەرتتەۋ - تالقى كۋرسى ورتالىق پارتيا مەكتەبىندە (مەملەكەتتىك اكىمشىلىك شۋەيۋانى) اشىلدى. جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ وقۋ باستاۋ سالتىندا ماڭىزدى ءسوز سويلەدى.

سۋرەتتى شينحۋا اگەنتتىگىنىڭ ءتىلشىسى شيە حۋانچى تۇسىرگەن

«حالىق گازەتى»، 1 - ايدىڭ 20 - كۇنى، بەيجيڭ. ولكە، مينيسترلىك دارەجەلى نەگىزگى باسشى كادرلاردىڭ پارتيا 20 - كەزەكتى ورتالىق كوميتەتى ءتورتىنشى جالپى ءماجىلىسىنىڭ رۋحىن ۇيرەنۋ، دايەكتىلەندىرۋ ارناۋلى تاقىرىپتىق زەرتتەۋ - تالقى كۋرسى 1 - ايدىڭ 20 - كۇنى تۇستەن بۇرىن ورتالىق پارتيا مەكتەبىندە (مەملەكەتتىك اكىمشىلىك شۋەيۋانى) ساباق باستادى. جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ وقۋ باستاۋ سالتىندا ماڭىزدى ءسوز سويلەپ، بىلاي دەپ باسا دارىپتەدى: پارتيا 20 - كەزەكتى ورتالىق كوميتەتى ءتورتىنشى جالپى ءماجىلىسىنىڭ رۋحىن ۇيرەنۋدى، دايەكتىلەندىرۋدى ۇزدىكسىز تەرەڭدەتىپ، يدەيانى اناعۇرلىم ويداعىداي بىرلىككە كەلتىرىپ، زەيىن - زەردەنى، كۇش - قۋاتتى شوعىرلاندىرىپ، پارتيا ورتالىق كوميتەتىنىڭ پارمەندى باسشىلىعىندا ءتۇرلى قىزمەتتەردى تىڭعىلىقتى ىستەپ، ”15 - بەسجىلدىقتا“ جاقسى باستاما اشۋعا قۇلشىنۋ كەرەك.

جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ تۇراقتى مۇشەسى لي چياڭ ساباق باستاۋ سالتىن باسقاردى، جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ تۇراقتى مۇشەلەرى جاۋ لىجي، ۋاڭ حۋنيڭ، ساي چي، ديڭ شۋەشياڭ، لي شي، مەملەكەت ءتوراعاسىنىڭ ورىنباسارى حان جىڭ ساباق باستاۋ سالتىنا قاتىناستى.

شي جينپيڭ مىنالاردى اتاپ كورسەتتى: بەسجىلدىق جوبانى جاساۋ جانە اتقارۋ − پارتيامىزدىڭ ەل باسقارۋداعى ماڭىزدى تاجىريبەسى، جۇڭگوشا سوتسياليستىك ءتۇزىمنىڭ ماڭىزدى ساياسي ابزالدىعى، پارتيانىڭ باسشىلىعىن جۇزەگە اسىرۋعا، كۇشتى شوعىرلاندىرا وتىرىپ ءىرى ىستەردى ىستەۋگە، ستراتەگيالىق ماسەلەلەردى بولجامپازدىقپەن يگەرۋگە، ىستەرىمىزدىڭ ۇلاسپالىلىعىن ساقتاۋعا ءتيىمدى. بەسجىلدىق جوبانى جاساۋ، اتقارۋدىڭ ۇزاق ۋاقىتتىق امالياتى بارىسىندا پارتيامىز پارتيا ورتالىق كوميتەتىنىڭ ورتالىقتانعان ءبىر تۇتاس باسشىلىعىنا تاباندى بولۋ، ءىس جۇزىندىكتى شىعار ءتۇيىن ەتۋگە تاباندى بولۋ، بۇكىل ەلدى ءبىر تۇتاس جۇيە ەتۋگە تاباندى بولۋ، دەموكراتيانى ساۋلەلەندىرۋگە، كوپتىڭ اقىل - پاراساتىن شوعىرلاندىرۋعا تاباندى بولۋ، جوبانىڭ زاڭدا بەلگىلەنگەن پرينسيپتەرىنە تاباندى بولۋ سياقتىلاردى قامتىعان مول تاجىريبەلەر جاراتتى، توپتادى. ءبىز ءتۇزىم سەنىمىن بەكەمدەپ، جاڭا ءىس جۇزىندىك جاعدايمەن ۇزدىكسىز ۇشتاستىرىپ، وسى ابزالدىقتى ساۋلەلەندىرۋىمىز كەرەك.

شي جينپيڭ مىنالاردى باسا دارىپتەدى: پارتيا 20 - كەزەكتى ورتالىق كوميتەتىنىڭ ءتورتىنشى جالپى ءماجىلىسى ”15 - بەسجىلدىق“ مەزگىلىندەگى ەكونوميكالىق، قوعامدىق دامۋ جونىندە ستراتەگيالىق ورنالاستىرۋ جاسادى، ونى جان - جاقتى، تەرەڭ، دۇرىس ءتۇسىنۋ جانە يگەرۋ كەرەك. جان - جاقتى دەگەنىمىز جالپى جاعداي كوز اياسىمەن جالپى ءماجىلىستىڭ رۋحىن ءتۇسىنىپ، ءتۇرلى ورنالاستىرۋلاردى تۇتاس تۇلعا رەتىندە يگەرۋ، بىرەۋىنە عانا ءمان بەرىپ، ەكىنشىسىن قاعىس قالدىرماۋ بولىپ تابىلادى. تەرەڭ دەگەنىمىز ونىڭ نە ەكەنىن ءارى نەلىكتەن سولاي ەكەنىن ءبىلۋ، نە ءۇشىن ەكەنىن، قالاي ىستەۋ كەرەكتىگىن شىنايى ءتۇسىنۋ بولىپ تابىلادى. دۇرىس دەگەنىمىز ساياساتتىق شەك پەن ولشەمدى دالمە - ءدال يگەرىپ، ىستەۋگە تيىستىلەرىن، ءسوز جوق، ىستەۋ، ىستەمەۋگە تيىستىلەرىن استە ىستەمەۋ كەرەك دەگەندىك.

شي جينپيڭ مىنالاردى اتاپ كورسەتتى: ەلىمىزدىڭ دامۋى ستراتەگيالىق وراي مەن حاۋىپ - قاتەر، سىن - سايىس قاتار ءومىر سۇرگەن، تۇراقسىز، مەجەلەۋ قيىن فاكتورلار كوبەيگەن كەزەڭدە تۇر. ءبىز جاعدايعا تالداۋ جاساعاندا، ءتۇرلى فاكتورلاردى جان - جاقتى ويلاستىرۋمەن بىرگە، ونداعى كەيبىر شەشۋشى فاكتورلاردى، مىسالى، حالىقارالىق جاعداي، جاڭا كەزەكتى عىلىم - تەحنيكا توڭكەرىسى جانە كاسىپ سالاسى وزگەرىسى سياقتى جاڭا وزگەرىستەردى يگەرۋگە شەبەر بولۋىمىز كەرەك. جالپى جاعدايدى كوكەيدە ساقتاپ، بيىكتە تۇرىپ، الىسقا كوز جىبەرىپ، ستراتەگيالىق جاقتا تۇراقتىلىقتى ساقتاپ، تاكتيكالىق جاقتا دەن قويا جوسپارلاپ، ەلىمىز دامۋىنىڭ تۇراقتىلىعى مەن باياندىلىعىن ۇزدىكسىز كۇشەيتۋىمىز كەرەك.

شي جينپيڭ مىنالاردى باسا دارىپتەدى: وسىزاماندانعان شارۋاشىلىق جۇيەسىن قۇرۋ، شارۋاشىلىق جۇيەسىنىڭ جالپى تۇلعالىق جاقتان جوعارىلاۋىن جۇزەگە اسىرۋ _ ”15 - بەسجىلدىق“ مەزگىلىندەگى ماڭىزدى ستراتەگيالىق مىندەت. جەر - جەر، سالالار ورنىن ءدال تاۋىپ، زەردەلىلەندىرۋ، جاسىلداندىرۋ، توعىستىرۋ بەتالىسىنا تاباندى بولىپ، سالىستىرمالى ابزالدىقتى ساۋلەلەندىرىپ، جوعارعى، تومەنگى اعارداعى كاسىپ سالالارى ءوزارا ۇشتاسقان، اركىم ءوز ارتىقشىلىعىن ايگىلەيتىن، بىرگە كۇش سالاتىن جاندى جاعداي قالىپتاستىرۋ كەرەك. جاساۋ كاسىبىنىڭ ۇيلەسىمدى سالىستىرماسىن ساقتاپ، وزىق جاساۋ كاسىبىن كۇش سالا دامىتۋ كەرەك. جەرگىلىكتى جاعدايعا قاراي جاڭاشا وندىرگىش كۇشتەردى دامىتىپ، عىلىم - تەحنيكادا جاڭالىق اشۋ مەن كاسىپ سالاسىندا جاڭالىق اشۋدىڭ ىشكەرىلەي توعىسۋىن ىلگەرىلەتۋ كەرەك. وسىزاماندانعان نەگىزدىك قۇرىلعىلار قۇرۋ كەرەك.

شي جينپيڭ مىنالاردى اتاپ كورسەتتى: ەلىمىزدىڭ جان سانى كوپ، بازارى كەڭ، شارۋاشىلىعى كەمەلدى، دامۋ قوزعاۋشى كۇشى مىعىم، جاڭا دامۋ جاعدايىن جەدەل قالىپتاستىرۋعا شارت - جاعداي بار. ەل ىشىندەگى جالپى اينالىمدى نەگىزگى تۇلعا ەتۋگە تاباندى بولىپ، تۇتىنۋ مەن قارجى قوسۋدىڭ، قاجەتسىنۋ مەن قامداۋدىڭ قاتىناسىن دۇرىس شەشىپ، حالىق تۇرمىسىنا تيىمدىلىك جاساۋ مەن تۇتىنۋدى جەبەۋدى، زاتقا قارجى قوسۋ مەن ادامعا قارجى قوسۋدى تىعىز ۇشتاستىرۋعا تاباندى بولىپ، حالىق شارۋاشىلىعىنىڭ اينالىم ساپاسى مەن ونىمدىلىگىن كۇش سالا جوعارىلاتىپ، ىشكى سۇرانىمدى ەكونوميكالىق دامۋدىڭ نەگىزگى قوزعاۋشى كۇشىنە اينالدىرۋ كەرەك. ەل ىشىندەگى ۇلكەن اينالىمدى كۇشەيتۋ ارقىلى جوعارى دەڭگەيدەگى سىرتقا ەسىك اشۋدى كەڭەيتۋدىڭ دەربەستىگىن جوعارىلاتىپ، حالىقارالىق اينالىمدى كەڭەيتۋ ارقىلى ەل ىشىندەگى رەفورما مەن دامۋدىڭ ومىرشەڭدىك كۇشىن ارتتىرىپ، ءىش پەن سىرتتىڭ تۇتاسۋىن، ءبىرىن - ءبىرى جەبەۋىن، بىرگە العا باسۋىن قۇلشىنا جۇزەگە اسىرۋ كەرەك.

شي جينپيڭ بىلاي دەپ باسا دارىپتەدى: ەكونوميكالىق دامۋ مەن قوعامدىق دامۋ ءبىرىن - ءبىرى تولىقتايدى، ءسوز جوق، سايكەسىپ قاتار ىلگەرىلەۋ كەرەك. حالىق تۇرمىسىن جاقسارتۋدى قوعامدىق دامۋدى جەبەۋدىڭ ءتۇيىنى ەتىپ، ەكونوميكانى دامىتۋمەن بىرگە، حالىقتىڭ تۇرمىس ساپاسىن دا ورنىقتى جوعارىلاتۋ كەرەك. پارتيا قۇرىلىسى ارقىلى جەتەكشىلىك ەتۋگە تاباندى بولىپ، زاڭمەن جونگە سالۋ ارقىلى قامتاماسىز ەتۋدى كۇشەيتىپ، نەگىزگى ساتىنىڭ نەگىزىن بەكەمدەپ، قوعامدىق جونگە سالۋ دەڭگەيىن شىنايى جوعارىلاتۋ كەرەك. دامۋ مەن حاۋىپسىزدىكتى ءبىر تۇتاس جوسپارلاپ، ءتۇرلى حاۋىپ - قاتەردەن ءونىمدى ساقتانىپ جانە ونى شەشىپ، مەملەكەتتىڭ حاۋىپسىزدىگى مەن قوعامنىڭ ورنىقتىلىعىن شىنايى قورعاۋ كەرەك.

شي جينپيڭ مىنالاردى اتاپ كورسەتتى: عىلمي شەشىم جاساۋعا، دەموكراتيالىق شەشىم جاساۋعا، زاڭ بويىنشا شەشىم جاساۋعا تاباندى بولىپ، مەملەكەت پەن جەرگىلىكتى ورىنداردىڭ ”15 - بەسجىلدىق“ جوبا باعدارلاماسىن جانە ارناۋلى جوباسىن ويداعىداي جاساۋ كەرەك. جەرگىلىكتى پلان مەن ارناۋلى پلاندى مەملەكەتتىڭ جالپى تۇلعالىق پلانىمەن ويداعىداي ۇشتاستىرىپ، مەملەكەتتىڭ جالپى تۇلعالىق پلانىنىڭ رۋحى مەن تالابىن ايگىلەۋ، سونىمەن بىرگە، جەردىڭ، ءىستىڭ ىڭعايىنا قاراي ىستەپ، قاجەت پەن مۇمكىندىكتى بىرلىككە كەلتىرىپ، بەلگىلەنگەن ەكەن ىستەي الۋعا، تياناقتاندىرىپ، ونىمدىلىگىن كورۋگە كەپىلدىك ەتۋ كەرەك.

شي جينپيڭ بىلاي دەپ باسا دارىپتەدى: ”15 - بەسجىلدىق“ مەزگىلىندەگى نىسانا - مىندەتتەردى ءساتتى ورىنداۋدا، ءسوز جوق، پارتيانىڭ ەكونوميكالىق، قوعامدىق دامۋعا باسشىلىق ەتۋ قابىلەتى مەن ورەسىن كۇش سالا جوعارىلاتۋ كەرەك. ءار دارەجەلى كادرلار، اسىرەسە، باسشى كادرلار ۇيرەنۋدى ونان ارى كۇشەيتىپ، پارتيانىڭ جاڭالىق اشۋ نازارياسىن بەرىلە زەرتتەپ، كاسىپتىك ساپاسىن جوعارىلاتىپ، ناقتى ىستەۋ قابىلەتىن كۇشەيتۋى كەرەك. دۇرىس ساياسي ناتيجە كوزقاراسىن ورناتىپ جانە امالياتتا ايگىلەپ، ءىس جۇزىندىكتى شىعار ءتۇيىن ەتۋگە، زاڭدىلىق بويىنشا ءىس ىستەۋگە تاباندى بولىپ، حالىق ءۇشىن سانالى تۇردە ناتيجە شىعارۋ، ناقتى ءىس ىستەۋ ارقىلى ناتيجە شىعارۋ كەرەك. كۇرەس رۋحىن بارىنشا ساۋلەلەندىرىپ، باتىلدىقپەن كەۋدە كەرىپ العا شىعىپ، قيىندىقتان تايسالماي العا ۇمتىلىپ، حاۋىپ - قاتەرگە توتەپ بەرۋگە، سىن - سايىسقا توتەپ بەرۋگە، قيىندىقتاردى جەڭۋگە شەبەر بولۋ كەرەك. شىرىكتەسۋگە قارسى تۇرۋدىڭ تەگەۋرىندى كۇيىن ساقتاپ، ءبىر قادام دا ايالداماي، جارتى قادام دا جول بەرمەي، شىرىكتەسۋگە باتىلدىق ەتكىزبەۋدى، شىرىكتەسۋگە مۇمكىندىك بەرمەۋدى، شىرىكتەسۋدى ويىنا الدىرماۋدى ءبىر تۇلعالى ىلگەرىلەتۋ كەرەك.

لي چياڭ ساباق باستاۋ سالتىن باسقارعاندا بىلاي دەپ اتاپ كورسەتتى: باس شۋجي شي جينپيڭنىڭ ماڭىزدى ءسوزى بيىكتە تۇرىپ الىستى بولجاعان، تەرەڭ ماعىنالى، ادامدى ەكپىندەي ىلگەرىلەۋگە جەبەيدى، اسا كۇشتى ساياسي سيپاتقا، نازاريالىق سيپاتقا، باعىتتامالىلىق سيپاتقا، جەتەكشىلىك سيپاتقا يە، بۇكىل پارتيانىڭ، اسىرەسە، جوعارى دارەجەلى كادرلاردىڭ ”14 - بەسجىلدىق“ مەزگىلىندەگى پارتيا مەن مەملەكەت ىستەرىندە قول جەتكەن كەلەلى تابىستاردى تەرەڭ تانۋىندا، ”15 - بەسجىلدىق“ مەزگىلىندەگى ەكونوميكالىق، قوعامدىق دامۋدىڭ جەتەكشى باعىتىن، باستى نىسانالارىن، ءتۇيىندى مىندەتتەرىن دۇرىس يگەرىپ، ستراتەگيالىق تۇراقتىلىقتى ساقتاپ، ءسوزسىز جەڭىسكە جەتۋ سەنىمىن كۇشەيتىپ، جۇڭگو ۇلگىسىندەگى وسىزامانداندىرۋ قۇرىلىسىنىڭ جاڭا جاعدايىن قۇلشىنا اشۋىندا توتەنشە ماڭىزدى مانگە يە. باس شۋجيدىڭ ماڭىزدى ءسوزىنىڭ باي مازمۇنىن، مايەكتى ءمانىن جانە امالياتتىق تالابىن تەرەڭ ءتۇسىنىپ، ”ەكىنى تۇراقتاندىرۋدىڭ“ شەشۋشى ءمانىن تەرەڭ ءتۇسىنىپ، ”ەكىنى قورعاۋدى“ باتىل ورىنداپ، يدەيا مەن ارەكەتتى باس شۋجيدىڭ ماڭىزدى ءسوزىنىڭ رۋحىمەن جانە پارتيا ورتالىق كوميتەتىنىڭ شەشىمدەرىمەن، ورنالاستىرۋلارىمەن سانالى تۇردە بىرلىككە كەلتىرۋ كەرەك. ۇيرەنگەندى قولدانىپ، ءبىلىم مەن ارەكەتتى ۇشتاستىرىپ، ۇيرەنۋ جەتىستىكتەرىن ناقتى ىسكەرلىككە، ناقتى ناتيجەگە اينالدىرىپ، جوعارى ساپالى دامۋدى ىلگەرىلەتۋدە ۇزدىكسىز تىڭ تابىستارعا قول جەتكىزۋ كەرەك.

جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ مۇشەلەرى، ورتالىق كوميتەت شۋجيچۋىنىڭ شۋجيلەرى، ورتالىق اسكەري ىستەر كوميتەتى ءتوراعاسىنىڭ ورىنباسارلارى، مەملەكەتتىك حالىق قۇرىلتايى تۇراقتى كوميتەتىنىڭ پارتيالى ورىنباسار باستىقتارى، مەملەكەتتىك كەڭەستىڭ مۇشەلەرى، ەڭ جوعارى حالىق سوتى مەكەمەسىنىڭ باستىعى، ەڭ جوعارى حالىق پروكۋراتۋراسىنىڭ باس پروكۋرورى، مەملەكەتتىك ساياسي كەڭەستىڭ پارتيالى ورىنباسار ءتوراعالارى وقۋ باستاۋ سالتىنا قاتىناستى.

ولكە، اۆتونوميالى رايون، قالالارداعى جانە شينجياڭ ءوندىرىس - قۇرىلىس بيڭتۋانىنداعى، ورتالىق پەن مەملەكەت ورگاندارىنىڭ قاتىستى تاراۋلارىنداعى، قاتىستى حالىقتىق ۇيىمدارداعى، ورتالىق باسقاراتىن فينانس قۇرىلىمدارىنداعى، كاسىپورىندارداعى، جوعارى مەكتەپتەردەگى، ازاتتىق ارميانىڭ ءارقايسى ورىندارى مەن قارۋلى ساقشى بولىمدەرىندەگى نەگىزگى جاۋاپتى جولداستار زەرتتەۋ - تالقى كۋرسىنا قاتىناستى. ءارقايسى دەموكراتيالىق پارتيا - توپتاردىڭ ورتالىق كوميتەتتەرىندەگى، مەملەكەتتىك ساۋدا - ونەركاسىپشىلەر بىرلەستىگىندەگى جانە قاتىستى جاقتارداعى جاۋاپتى جولداستار وقۋ باستاۋ سالتىنا سىرتتاي قاتىناستى.

كەلۋ قاينارى: حالىق تورابى